Çərşənbə, Mart 29, 2017
ƏSAS SƏHİFƏ

“Azəravtoyol” ASC tərəfindən 12-22 mayda Bakı şəhərində keçiriləcək IV İslam Həmrəyliyi Oyunlarında müəyyən edilmiş marşrut üzrə əsas yol şəbəkəsində “Oyunlar zolağı”nın işarələnməsi işlərinə start verilir.

ASC-nin mətbuat xidmətindən verilən məlumata görə, “Oyunlar zolağı”nın çəkilişinə ilk olaraq Neftçilər prospekti “Azneft meydanı”ndan başlanılır.

Bu məqsədlə axşam saat 22:00-dan etibarən səhər saatlarınadək Neftçilər prospektinin “Azneft meydanı”ndan Bakı İdman Sarayına qədər olan hissədə avtonəqliyyat vasitələrinin hərəkəti rənglənmə işlərinin aparıldığı zolaq üzrə hissə-hissə məhdudlaşdırılacaq.

“Oyunlar zolağı”nın kənarlarına sarı xətt çəkiləcək, asfalt üzərində isə təyin edilən yerlərdə “Bakı 2017” sözləri yazılacaq.

“Oyunlar zolağı”nın Neftçilər prospektinə (“Azneft meydanı” – Bayraq Meydanı), Bakı-Ələt yolunun 2-14 km-lik hissəsinə, Bakı Dairəvi-1 avtomobil yoluna, Moskva, Ziya Bünyadov və Atatürk prospektilərinə, Vaqif və Hənifə Ələsgərov küçələrinə, həmçinin Tbilisi prospektinə çəkilməsi nəzərdə tutulub.

Qeyd edək ki, “Azəravtoyol” ASC Bakı 2017 IV İslam Həmrəyliyi oyunlarında müəyyən edilmiş marşrut üzrə yol şəbəkəsinin yaxşılaşdırılması istiqamətində işlərini davam etdirir.

Trend

Martın 29-da İsmayıllı şəhərində nazir Əbülfəs Qarayevin iştirakı ilə Mədəniyyət və Turizm Nazirliyinin yeni yaradılan regional mədəniyyət və turizm idarələrinin fəaliyyətinə həsr olunmuş geniştərkibli müşavirə keçirilib.

Qurumdan verilən məlumata görə, müşavirəyə nazirliyin struktur bölmə rəhbərləri, Bakı Şəhər Mədəniyyət və Turizm Baş İdarəsi və regional mədəniyyət və turizm idarələrinin rəisləri, məsul əməkdaşları qatılıb. Həmçinin regional idarələrin Novruz bayramı ərəfəsində paytaxtda keçirilən bayram tədbirlərində iştirakı dəyərləndirilib.

Ə.Qarayev Novruz ərəfəsində Bakıda müxtəlif bayram tədbirlərinin keçirilməsini, nazirliyin yeni yaradılan Milli Turizm Təbliğat Bürosunun və regional mədəniyyət və turizm idarələrinin bu işdə yaxından iştirakının təqdirəlayiq olduğunu deyib: “Bu il keçirilən bayram tədbirləri Prezident İlham Əliyev tərəfindən də yüksək qiymətləndirib. Bayram tədbirlərində ölkəmizin bütün regionlarını təmsil edən kollektivlər bölgələrin mədəni həyatını yüksək səviyyədə nümayiş etdiriblər. 8 gün ərzində 60-dan artıq musiqi, rəqs və folklor kollektivi çıxış edib. Milli Turizm Təbliğat Bürosu tərəfindən keçirilən Novruz festivalına gün ərzində 30-35 min, bəzi günlərdə isə 50-60 min nəfər insan qatılıb”.

Həmçinin diqqətə çatdırılıb ki, aprel-may aylarında Azərbaycanda ilk dəfə olaraq “Shopping Festival”, mayda IV İslam Həmrəylik Oyunları, iyunda “Formula 1” Azərbaycan Qran-prisi kimi möhtəşəm yarışlar keçiriləcək. Yeni yaradılan regional mədəniyyət və turizm idarələri bu tədbirlərə öz töhfələrini verməli, ölkəmizin mədəni, tarixi dəyərlərinin, turizm imkanlarının xarici qonaqlara tanıdılması və təbliği işində yaxından iştirak etməlidir.

Nazir regionlarda mədəniyyət və turizm xidmətlərinin günün müasir tələbləri səviyyəsində qurulmasının vacibliyini xüsusi qeyd edib. Həmçinin yerlərdə fəaliyyət göstərən mərkəzi kitabxanaların nəzdində açıq kitabxanaların yaradılmasının gündəmdə olduğu vurğulanıb.

Müşavirədə regional mədəniyyət və turizm idarələrinin fəaliyyəti müzakirə olunub, təkliflər səslənib, qarşıda duran vəzifələrin icrası ilə əlaqədar işlər nəzərdən keçirilib, mövcud problemlərə dair fikir mübadiləsi aparılıb. Nazir idarə rəhbərlərindən işlərinə daha ciddi yanaşmağı tələb edib və onların səmərəli fəaliyyət göstərməsi üçün tapşırıqlar verib.

Trend

Azərbaycan Respublikasının Birinci vitse-prezidenti Mehriban xanım Əliyevanın sədrliyi ilə Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olunmuş müşavirədə verilən tapşırıqlara uyğun olaraq Nəsimi rayonunda da müvafiq tədbirlər görülür.

Rayon İcra Hakimiyyətindən daxil olan məlumata görə, hazırda rayonda 2373 ailədən ibarət 8713 məcburi köçkün məskunlaşıb və onların mənzil-məişət şəraitinin yaxşılaşdırılması və işlə təmin olunmaları üçün zəruri tədbirlər həyata keçirilir. Nəsimi Rayon İcra Hakimiyyətinin təşəbbüsü ilə rayonun ən böyük istehsalat müəssisələrindən olan “Bakı Tikiş Evi” Səhmdar Cəmiyyətində məcburi köçkünlərin təmin olunması üçün yeni iş yerləri açılıb.

Rayon İcra hakimiyyəti başçısının birinci müavini Gülarə Verdiyeva yeni işə götürülmüş məcburi köçkünlərlə görüşüb. Məcburi köçkünlər onlara göstərilən diqqət və qayğıya görə Azərbaycan Respublikasının Prezidenti İlham Əliyevə və Azərbaycan Respublikasının Birinci vitse-prezidenti Mehriban Əliyevaya öz minnətdarlıqlarını bildiriblər.

“Bakı Tikiş Evi”nin baş direktoru Fidail Rəhimov çıxış edərək yeni iş yerləri açılması üçün gələcəkdə də tədbirlər görüləcəyini söyləyib.

AZƏRTAC

Azərbaycanın din xadimləri 31 mart – Azərbaycanlıların Soyqırımı Günü ilə əlaqədar dünya ictimaiyyətinə müraciət ünvanlayıblar.

Azərbaycan Respublikasının vətəndaşları və milyonlarla dünya azərbaycanlılarının dilək və hisslərini ifadə edərək bütün dünya ictimaiyyətinə müraciət edirik.

Dünya tarixində milli, irqi, dini mənsubiyyətinə görə törədilmiş soyqırımı faktları bəşəriyyətin qan yaddaşında qara ləkələr kimi qalır və insanlığa qarşı ən böyük günahlardan hesab olunur. Belə faciəvi soyqırımı cinayətlərinə məruz qalan xalqlardan biri də azərbaycanlılardır və bu dəhşətli fəlakətlərin mütəmadi xarakter alması bütün Azərbaycan cəmiyyətini daim narahat edir.

İki yüz ildən artıqdır ki, erməni millətçiləri tərəfindən xalqımıza qarşı ardıcıl təcavüz və etnik təmizləmə siyasəti aparılır. Bu siyasətin əsas məqsədi azərbaycanlıları öz əzəli torpaqlarından qovmaq, bu ərazilərdə uydurma “Böyük Ermənistan” dövlətini yaratmaqdır.

İki əsr ərzində soyqırımı və deportasiya siyasəti xalqımıza ağır maddi və mənəvi zərbələr vurub, onun tarixi yaddaşında silinməz izlər buraxıb. Bütövlükdə, iki milyona yaxın azərbaycanlı qonşu xalqlara nifrət və təcavüz ideologiyası və psixologiyası üzərində qurulmuş erməni ekstremizminin fəlakət və dəhşətlərini öz taleyində yaşayıb. Bu qədər xəyanət və zərbələrə məruz qalmasına baxmayaraq, xalqımız soyqırımı və deportasiya faktlarını uzun zaman ictimai müzakirəyə çıxarmaq, beynəlxalq aləmdə ifşa etmək imkanına malik olmayıb. Yalnız ümummilli liderimiz Heydər Əliyevin Azərbaycanda ali hakimiyyətə qayıdışından sonra bu məsələyə prinsipial yanaşma nümayiş etdirilib, erməni millətçilərinin xalqımıza qarşı illərlə reallaşdırdığı soyqırımı və deportasiya siyasətinin mahiyyəti açıqlanıb və ifşa olunub. Azərbaycan Prezidenti Heydər Əliyevin 1998-ci il 26 mart tarixli Fərmanı ilə 31 mart azərbaycanlıların soyqırımı günü elan edilib, soyqırımı qurbanlarını anma tədbirlərinin keçirilməsinə, beynəlxalq miqyasda Azərbaycan həqiqətlərinin yayılmasına təkan verilib.

Bu gün Azərbaycanın rəsmi və ictimai dairələri Azərbaycan ərazisində erməni ekstremistlərinin törətdikləri etnik təmizləmə və soyqırımı əməllərinə dair təkzibolunmaz faktları geniş əhatəli şəkildə beynəlxalq təşkilatların və ictimaiyyətin diqqətinə çatdırmaqdadır. Bəşərə qarşı gerçək cinayətlər layiqli qiymətini almadıqca saxta ittihamlar ayaq tutur. Özlərini soyqırımı qurbanı kimi təqdim edən erməni ekstremistləri, Azərbaycan xalqına qarşı həyata keçirdikləri gerçək soyqırımı cinayətlərinin layiqincə cavabını verməyənlər və onlara havadarlıq edənlər bilməlidirlər ki, həqiqət gec-tez qalib gələcək, ədalət öz yerini tutacaqdır! Bu saxta ittihamlara havadarlıq edənlər bilməlidirlər ki, həqiqət gec-tez qalib gələcəkdir, ədalət öz yerini tutacaq, inşallah!

Layiqli qiymətini almayan qətliamlar yeni-yeni bəşəri cinayətlərə yol açır, dünyanın müxtəlif bölgələrində soyqırımların təkrarlanmasına, miqrant fəlakətlərinə zəmin yaradır. Beynəlxalq terrorizmin tüğyan etməsi, dünyanın müxtəlif nöqtələrində həyata keçirilən silsilə terror əməlləri, tarixi və dini abidələrə qarşı vandalizm aktları bu növ bəşəri fəlakətlərə zamanında layiqli hüquqi-siyasi qiymətin verilməməsinin acı fəsadlarıdır. Azərbaycanın əzəli torpaqları – hazırda erməni işğalında olan ərazilərimizdə dini–mənəvi abidələrimizə qarşı həyata keçirilməsi davam edən vandal hərəkətləri, o cümlədən Şuşadakı Gövhər Ağa məscidində aparılan qazıntı işlərini tarixi həqiqətlərin, mədəni irsin mənsubiyyətinin saxtalaşdırılması cəhdi, xalqımıza qarşı mənəvi soyqırımı kimi dəyərləndirir, dünya ictimaiyyətini belə halları qətiyyətlə pisləməyə çağırırıq.

Biz dövlətlər və xalqlararası münasibətlərdə beynəlxalq hüququn qəbul edilmiş prinsiplərinin, sivil birgə yaşayış normalarının tətbiq olunmasının tərəfdarıyıq. Lakin təəssüflər olsun ki, erməni terrorçuları törətdikləri cinayətlərə görə hələ də cəza almamış, işğal etdikləri Qarabağ və ətraf rayonların ərazilərinin qeyd-şərtsiz və dərhal boşaldılmasına dair Birləşmiş Millətlər Təşkilatınin Təhlükəsizlik Şurasının 4 məlum qətnaməsinin tələblərini bu günədək yerinə yetirməyib. Azərbaycanın illərdir beynəlxalq təşkilatlara etdiyi müraciətlərə rəğmən, Xocalı soyqırımı faktı hələ də lazımi səviyyədə siyasi, hüquqi qiymətini almayıb. Baxmayaraq ki Xocalı faciəsi Holokost, Xatın soyqırımları kimi insanlığa qarşı törədilmiş qətliamlarla bir sırada dayanır.

Bəşəriyyət insanlığa qarşı cinayətləri nifrətlə damğalamalı, insan sifətini itirmiş qatillərin əməllərini lənətləməlidir. Bütün səmavi dinlərin müqəddəs kitablarında əksini tapan həqiqət budur ki, Allahın yaratdığı bir insanı qətlə yetirmək – bütün bəşəriyyəti qətl etmək qədər ağır cinayətdir!

Biz, Azərbaycanın din xadimləri, hər il olduğu kimi, bir daha dünya ictimaiyyətinə müraciət edir, erməni işğalçılarının Azərbaycan xalqına qarşı törətdiyi soyqırımı cinayətlərinə siyasi-hüquqi qiymət verməyə çağırırıq. Qoy Uca Yaradan hamımıza doğrunu yanlışdan seçməkdə və ədalətli olmaqda yardımçı olsun! Amin!

AZƏRTAC

Rusiyanın tanınmış tarixçisi və siyasi təhlilçisi Oleq Kuznetsov Xocalı faciəsinin soyqırımı cinayəti kimi tanınması ilə bağlı Rusiya Dövlət Dumasının üzvlərinə ünvanlanmış petisiya tərtib edib.

Mətbuat Şurasından bildiriblər ki, sənədə hazırda 5 minədək şəxs imza atıb. Ona Dövlət Dumasının reaksiya verməsi üçün ən azı 15 min imzaya ehtiyac var.

Petisiyada 1992-ci il fevralın 25-dən 26-na keçən gecə Xocalıda dinc sakinlərə qarşı amansız cinayətin törədildiyi, bunun hazırda Ermənistan hakimiyyətində təmsil olunan şəxslər tərəfindən gerçəkləşdirildiyi vurğulanır. Nəticədə 63-ü uşaq, 106-sı qadın, 70-i qoca olmaqla ümumilikdə 613 nəfərin qətlə yetirildiyi, 56 nəfərin həyatına xüsusi amansızlıqla son qoyulduğu, 150 nəfərin itkin düşdüyü, 1275 nəfərin əsir götürüldüyü, 487 nəfərin yaralandığı diqqətə çatdırılır. Sənəddə məlumat verilir ki, insanlığa qarşı böyük terror aktını bır sıra dünya dövlətləri soyqırımı cinayəti kimi tanıyıb. Eyni addımın Rusiyanın Dövlət Duması tərəfindən atılmasının vacibliyi əsaslandırılır.

Azərbaycan Mətbuat Şurası media nümayəndələrini bu linkdə yer alan petisiyaya imza atmağa, bununla əlaqədar müvafiq təbliğat işləri aparmağa, Xocalı faciəsinə hüquqi qiymətin verilməsi istiqamətində həyata keçirilən tədbirlərə dəstək göstərməyə çağırır.

AZƏRTAC

Azərbaycan Milli Elmlər Akademiyasının (AMEA) İnformasiya Texnologiyaları İnstitutunda keçirilən növbəti elmi seminar “AzScienceNet” elm-kompüter şəbəkəsində IPv6-nın tətbiqi məsələlərinə həsr olunub.

İnstitutdan bildirilib ki, seminarda IPv6-nın arxitekturu, tipləri və s. barədə məlumat verilib.

Qeyd olunub ki, IPv6-nın əsas fərqli cəhəti daha uzun (128 bit) strukturlu ünvandan istifadə olunmasıdır. Təhlükəsizlik prosedurları IPv6 standartının tərkib hissəsi olan İnternet Protokol Təhlükəsizliyi (Internet Protocol Security – IPsec) ilə yerinə yetirilir. IPv6-nın digər üstünlüyü təhlükəsizlik üçün müəyyən edilmiş əlavə başlıqlarla avtorizasiya və şifrələnmənin aparılmasıdır.

Tədbirdə IPv6-nın dünya və Asiya regionu üzrə statistikası təqdim edilib, Azərbaycanda istifadəsi haqqında məlumat verilib.

AZƏRTAC

 “Narınc” Uşaq Psixologiya Mərkəzinin psixoloqu Elnurə Cahangirovanın hiperaktiv uşaqlarla bağlı məqaləs

 

Hiperaktiv uşaqlar daim düşünmədən hərəkət edir, bir fəaliyyət növündən digərinə asanlıqla keçir, bəzən etik qaydalara uyğun olmayan hərəkətlər də edirlər.

Ümumiyyətlə, hiperaktiv uşaqlar davranışlarının diqqəti çəkən və narahatlıq yaradan olduqlarını bilirlər. Lakin bunun qarşısını almaq üçün heç nə edə bilmirlər. Valideynlər onları başa düşməli, uşaqlarına sevgi ilə yanaşmalı, onlara dəstək olmalıdırlar. Hiperaktivliyin gətirdiyi çətinlikləri keçə bilmək üçün valideynlər uşaqlarının həkimi, psixoloqu və müəllimləri ilə mütəmadi əlaqə saxlamalıdırlar.

Qeyd edək ki, hiperaktivliyin əlamətləri uşaqlarda yeddi ayından əvvəl yaranmağa başlayır. Hiperaktiv uşaqlar diqqətini cəmləməkdə çətinlik çəkir və başqa uşaqlara nisbətən çox fəal olmalıdırlar. Bəzi hiperaktiv uşaqlarda isə diqqətini cəmləyə bilməmək, düşünmədən hərəkət etmək kimi əlamətlər özünü göstərsə də, onlarda həddindən artıq hərəkətlilik müşahidə olunmur. Bundan başqa qız uşaqlarında fəallıq, hərəkətlilik olmadan da diqqət əskikliyi özünü göstərə bilər. Bu vəziyyətdə isə diaqnoz qoymaq çətindir. Çünki bu vəziyyət səssiz, özünə qapanan qız uşaqlarında bir müddət gizli qala bilər. Diqqətini cəmləyərkən çəkdiyi çətinlik, diqqətinin tez yayınması ara-sıra gözə dəyər.

Uşaqlar böyüklərə nisbətən daha fəal və hərəkətlidirlər. Ancaq hiperaktiv uşaqlarda bu hərəkətlilik uşağın öz yaşıdları ilə müqayisədə diqqətə çarpacaq qədər çoxdur. Uşaqların hərəkətliliyi oyunlar zamanı, bağçada, məktəbdə və ya evdə olarkən ailə və müəllimlər üçün problem yaratdıqda həddindən artıq hərəkətlilik kimi xarakterizə edilir. Digər tərəfdən hiperaktiv uşağın qısa müddətli işlər ərzində televiziyaya baxmaq, kompüter oyunu oynamaq kimi əyləncələr zamanı çox diqqətli olduğunu da görə bilərsiniz.

 

Hiperaktiv uşaqların davranışı

 

Belə uşaqlar diqqətini cəmləməkdə çətinlik çəkir, mebellərin üstü ilə gəzir, evin içində qaçır, daim əllərində hansısa bir oyuncaq və ya əşya ilə oynayır, növbəsini gözləmək məsələsində də çox səbirsizdilər. Lakin bu uşaqlar diqqət əskikliyi göstərmədən saatlarla televizora baxır, kompüter oyunları oynayırlar. Belə bir halda uşaq necə hiperaktiv ola bilər?

Cavab çox asandır. Kompüter oyunları və televiziya uşaqların diqqətini cəmləyərək xəbərdarlıq göndərir. Yəni bu uşaqlar televizora baxarkən və ya kompüter oyunlarını oynayarkən passiv mövqedədirlər və diqqətlərini kənardan gələn xəbərdarlıqlar sayəsində cəmləyə bilirlər.

 

Hiperaktiv uşaqların valideynlərinin nəzərinə

 

Hiperaktiv uşaqlar həm valideynlərə, həm də ailənin digər üzvlərinə böyük problemlər yaradır. Müalicə olunmayan hiperaktiv uşaq ailəyə narahatlıq yaratmağa davam edəcək. Bu səbəbdən də uşağınıza davranışını idarə edə bilməsi üçün sizə kömək etmək məqsədilə bir neçə məsləhət veririk:

– Uşağınız üçün gündəlik bir proqram hazırlayın. Onun yemək yediyi, yuyunduğu, məktəbə getmək üçün evdən çıxdığı vaxtı hər gün eyni saatlarda müəyyən edin.

– Hiperaktiv uşaqlar ancaq yanlış bir şey etdikləri zaman böyüklərin diqqətini çəkirlər. Bu səbəbdən də uşağınızı gözəl sözlər deyərək qucaqlayıb mükafatlandırmağınız, müsbət davranışları üçün kiçik hədiyyələr verməyiniz çox önəmlidir. Valideyn və digər ailə üzvləri və yoldaşları tərəfindən olan bu cür müsbət dəstək və sevgi uşağınızın özünü yaxşı hiss etməsini təmin edəcək. Bu uşaqlar üçün ən uyğun davranış forması onları cəzalandırmaq əvəzinə mükafatlandırmaqdır. Onlarla danışarkən mümkün qədər düz gözlərinə baxmaq, bəzən kürəyini və ya əlini tutaraq toxunmaq da yaxşı nəticə verir.

– Məktəbdə uşaq lövhəyə yaxın olan parta arxasında, sakit bir uşağın yanında, müəllimin asanlıqla gördüyü, tez gedib toxunaraq təmas qura biləcəyi və xəbərdarlıq edə biləcəyi yerdə oturmalıdır.

– Öyrənmə çatışmazıqları varsa, pedaqoji üsullar tətbiq olunur. Hiperaktiv uşaqların təhsil almasında ailə üzvlərinin və uşağın ünsiyyətdə olduğu insanların rolu da çox böyükdür. Belə uşaqlar da məktəbdə ən azı digər yoldaşları qədər müvəffəqiyyətli ola bilirlər. Uşağın hiperaktiv olması əsla onun kifayət qədər ağıllı olmadığını göstərmir. Hiperaktiv uşaqlar nizamsız və diqqətsiz ola bilərlər. Lakin bu, onların öyrənmə qabiliyyətlərinin olmamasından xəbər vermir. Bu, onların hiperaktivliyindən irəli gəlir.

Sonda isə əziz valideynlərə məsləhətim odur ki, pozitiv düşünsünlər. Övladlarının daxili aləmi ilə daha yaxından maraqlansınlar.

Ailem.az

ABŞ Konqresinin Nümayəndələr Palatası internet provayderlərini istifadəçilərin şəxsi məlumatlarından istifadə etmək üçün icazə almasını nəzərdə tutan qanunun ləğvinə səs verib.

Provayderlər istifadəçilərin koordinatları, maliyyə vəziyyəti, sağlamlığı, uşaqları, daxil olduqları saytlar, məktublarının məzmunu haqda bilgi sahibi ola biləcəklər və bu məlumatları marketinq firmaları, eləcə də digər bazar iştirakçıları ilə bölüşmək üçün insanlardan icazə almayacaqlar.

Qərarın tərəfdarları mövqelərini belə izah edir ki, bu, bazarda rəqabəti artıracaq. Tənqidçilər isə qərarın istehlakçıların hüquqlarına zərbə vuracağını və şəxsi məlumatlara qeyri-məhdud çıxış imkanı verəcəyini bildirirlər. “Bu gün Konqres növbəti dəfə sübut etdi ki, onu maliyyələşdirən korporasiyaların maraqlarını seçicilərin təhlükəsizliyindən üstün tutur”, – deyə “Fight for the Future” (“Gələcək uğrunda mübarizə”) hüquq-müdafiə təşkilatının liderlərindən biri Evan Qrir söyləyib. Fəallar artıq məsələ ilə bağlı kampaniyaya başlayıblar.

Qeyd edək ki, Obama dövründə qəbul olunmuş qanunun ləğvi üçün kommunikasiya bazarının nəhəngləri – “Verizon”, AT&T və “Comcast” fəal iş aparırdı. Onların fikrincə, internet xidmətləri təklif edən şirkətlərin fəaliyyəti “Google” və “Facebook”dan daha sərt tənzimlənir.

Qanunun ləğvi barədə qərar prezident Donald Tramp tərəfindən imzalandıqdan sonra qüvvəyə minəcək.

İKT.lent.az

Bakı Nəqliyyat Agentliyi (BNA) 36 küçə və prospektdə avtobuslar üçün xüsusi hərəkət zolağının çəkilməsini təklif edib. Bunu BNA-nın baş direktoru Vüsal Kərimli bildirib.
Onun sözlərinə görə, ilkin olaraq 9 küçə və prospektdə bu zolağın çəkilməsinə razılıq verilib. V.Kərimli xatırladıb ki, avtobuslardan başqa, operativ nəqliyyat vasitələri, o cümlədən təcili tibbi yardım maşınları da bu zolaqlardan istifadə edə biləcək.

Həmin zolaqlardan taksilərin istifadəsinə gəlincə, qurum rəhbəri bunu deyib: “Bakıdakı taksi məsələsi ilə bağlı pərakəndə vəziyyət mövcuddur. Buna görə, biz vahid taksi sisteminin yaradılması ilə bağlı təklif irəli sürümüşük. Bəzi taksilər “A” nöqtəsindən “B” nöqtəsinə aparmaq üçün dolayı yollardan istifadə edir. Taksi bazası yaradıldıqdan sonra taksilər onlara verəcəyimiz xətlə istifadə edəcəklər. Əks halda istənilən şəxs avtomobil damına taksi işarəsi qoyub həmin yoldan istifadə edəcək. Bu məsələdə vətəndaşlarımızın da üzərinə məsuliyyət düşür. Gərək vətəndaşlarımız fərqlənmə nişanı olmayan taksilərdən istifadə etməsinlər”.

V.Kərmili xüsusi hərəkət zolaqlarından istifadə hüququ olmayan digər nəqliyyat vasitələrinə tətbiq ediləcək cəza tədbirlərinə də toxunub. Onun sözlərinə görə, BNA ilə Baş Dövlət Yol Polisi (BDYP) arasında memorandum imzalanıb. Memorandumun şərtlərinə əsasən, xüsusi hərəkət zolaqlarından istifadə edən nəqliyyat vasitələrinin fotoları BDYP-yə göndəriləcək və onlar barəsində müvafiq cəza tədbiri görüləcək.

“APA-Economics”

Dialoq.info xəbər verir ki, bu il Rəqaib gecəsi cümə axşamı günü 30 Mart, şam azanından (gün batdıqdan) sonra daxil olur.

Həzrət Məhəmməd (s) buyurur:

“Rəcəb ayının ilk cümə gecəsindən qafil olmayın, mələklər həmin gecəyə “arzular gecəsi” deyərlər”.

Allah-təala bu gecədə möminlərə rəğbət (lütfkarlıqlar) edər. Bu gecəyə hörmət edənləri əfv edər. Rəqaib gecəsi edilən dua qəbul olar, namaz, oruc, sədəqə kimi ibadətlərə saysız savablar verilir.

Həzrət Peyğəmbərdən (s) nəql olunur:

“Rəcəb ayının ilk cümə gecəsini unutmayın. Mələklər bu gecəni “Leylətül-Rəqaib” deyə yad edir. Bu günün gecə yarısında göy və yerdə bir mələk belə qalmır, bütün mələklər Kəbə ətrafına toplanır.”

Bu gecənin özünə məxsus əməlləri və namazı vardır.İlin ən mötəbər və müqəddəs günlərindən biri hesab olunur.

Əziz İslam Peyğəmbəri (s) buyurmuşdur:

“And olsun canım əlində olan ALLAHA hər kim bu namazı qilsa ALLAH həmin çəxsin günahlarını bağışlayar.Hətta günahları dəryalar qədər,səhradakı qum zərrəciklərinin sayı qədər,ağaclarının yarpaqlarının sayı qədər,dağların ağırlığı qədər çox olsa belə günahları bağışlanar.Qiyamət günü ALLAH həmin şəxsə 70 nəfərə şəfaət etməyə izn verər.Bu namaz birinci qəbr gecəsində mələk surətində insanın yanında olar və köməyinə gələr”

Bu namazın qılınma şərtlərindən biri orucdur

Rəcəb ayının ilk cümə axşamı günü (həftənin 4-cü günü – bu il Mart ayn 30-u) oruc tutulur.

Cümə gecəsi daxil olduqdan sonra Şam və İşa namazları arasında on iki rükət (altı  iki rükətli namaz) namaz qılınır.

Hər rükətdə 1 dəfə “Həmd”, 3 dəfə “Qədr” və 12 dəfə Ixlas (“Qul huvallahu əhəd”)surələri oxunur

  1. Namazdan sonra 70 dəfə:

“Allahummə salli əla Mühəmmədinin nəbiyyil-ummiyyi və əla Alih”

Tərcümə: “İlahi, Həzrət Muhəmmədə (s) və onun nəslinə öz rəhmətini göndər”

  1. Sonra səcdəyə gedib 70 dəfə:

“Subbuhun quddus Rabbul-məlaikəti vər-Ruh”

Tərcümə: “İlahi, Sən çox paksan, çox müqəddəssən, mələklər və Ruhun rəbbisən”

  1. Sonra başını səcdədən qaldırıb 70 dəfə :

“Rabbiğfir vərhəm və təcəvəz əmmə tə’ləmu innəkə əntəl-əliyyul-ə’zəm”.

Tərcümə: “Rəbbim, məni bağışla, mənə rəhm et. Bildiyin bütün günahlarımı əfv et. Həqiqətən Sən uca və əzəmətlisən”.

  1. Sonra yenidən səcdəyə gedib 70 dəfə:

“Subbuhun quddus Rabbul-məlaikəti vər-Ruh”

Tərcüməsi:İlahi, Sən çox paksan, çox müqəddəssən, mələklər və ruhun rəbbisən”.

Sonra hacət və istəyinizi Allahdan diləyirsiz

 

Allah tutacağınız orucu və qılacağınız namazları qəbul eləsin.

Bu gecə gün batdıqdan sonra (Şam azanı zamanı) Hicri-qəməri təqvimi ilə mübarək Rəcəb ayı daxil olur.

Sabahdan etibarən İslam aləmi ilahi ziyafətə – müqəddəs Ramazan ayına hazırlığa başlayır. Mübarək Rəcəb ayı – Allah qonaqlığı üçün səfərə hazırlıq aylarından birincisidir. Aləmlərin Rəbbi qarşısında hazırlıqlı olmaq üçün Rəcəb və Şəban ayları hazırlıq müddəti rolu oynayır.

Rəcəb ayı əzəmətli aylardan sayılır. Bu ay Allahın xüsusi rəhmət və bərəkət mövsümüdür, insanın mənəvi cəhətdən təmizlənməsi üçün əvəzsiz fürsətdir. Rəcəb ayında ən azı üç gün oruc tutmağın böyük savabı vardır.  Hədislərdə Rəcəb ayında oruc tutmaq çox sifariş edilib, insanın mənəvi dirçəliş əldə etməsinə və günahların bağışlanmasına səbəb olduğu buyurulub. Rəcəb ayında oruc tutmaq imkanları olmayanlara isə, imkanları çərçivəsində sədəqə vermək tövsiyə olunur.

Rəcəb ayında xüsusi əlamətdar günlər də vardır. Bu ayda üç ilahi şəxslərin viladəti baş verib. İmam Əli (ə.s), İmam Muhəmməd Baqir və İmam Cavadın (ə.s) mövludları bu aya təsadüf edir.  Bundan əlavə, İslam tarixinin ən mühüm hadisələrindən biri sayılan Həzrət Muhəmmədin (s)  Besəti, yəni onun Allah tərəfindən risalət məqamına ucaldılması məhz bu ayda baş verib.

İmam Əli (ə.s) buyurur: “Rəcəb ayı mənim, Şəban ayı Peyğəmbərin (s), mübarək Ramazan ayı isə Allah-Təalanın ayıdır”.

Allah bu ayda etdiyiniz ibadətləri və duaları qəbul etsin!

İnterAz

Azərbaycan alımləri Arif Paşayev və Əhəd Canəhmədovun həmmüəllifi olduqları “Mezomexanika və plastiklik fizikası” monoqrafiyası nəfis tərtibatda nəşr olunub. Əsər səkkiz bölmədən və ümumilikdə 511 səhifədən ibarətdir. Monoqrafiyanın rəyçisi SSRİ və Rusiya Dövlət mükafatları laureatı akademik Boris Qusevdir.

Monoqrafiyada fiziki mezomexanikanin struktur-analitik nəzəriyyəsi və konstruksiya materiallarının səth qatlarının dağılmadan əvvəlki mərhələdə yüklənən detalların gərginlik-deformasiya vəziyyətinin analizinə baxılır. Çoxsəviyyəli iyerarxiyalı təşkil olunmuş sistemdəki kimi deformasiya olunan cisimdə qeyri-xətti kanallaşan dağılma prosesləri təsvir edilib. Kompozit materiallarının elektrodinamik xüsusiyyətlərinin modelləşdirilməsinin nəticələri göstərilib. Burada fraktal materialların elastik xüsusiyyətlərinin eksperimental və ədədi tədqiqatları da əksini tapıb. Həmçinin, yüksək məsuliyyətli konstruksiya elementlərinin səth qatlarının dağılmasının və yeyilməsinin mexanizmləri təhlil edilir.

Monoqrafiya dağılma mexanikası və tribologiya sahəsində ixtisaslaşan elmi işçilər, aspirantlar və mühəndislər üçün və eləcə də ali texniki məktəblərin yuxarı kurs tələbələri üçün nəzərdə tutulub.

AZƏRTAC

Aprelin 16-də S.Vurğun adına Azərbaycan Dövlət Rus Dram Teatrında Viktor Denisovun “Bulvarda qürub çağı” (“Bilvar zaxodyaşeqo solntsa”) pyesi əsasında hazırlanmış tamaşanın premyerası keçiriləcək. Tamaşa müəllifin razılığı ilə “Bulvar Sanset” adı ilə repertuara daxil edilib. Bakılı tamaşaçılar səhnə əsərində Hollivud ulduzu Nora Desmondun heyrətamiz həyat hekayəsini görəcəklər. Bu obrazı Azərbaycanın Xalq Artisti Lyudmila Duxovnaya ifa edəcək.
Tamaşanın quruluşçu rejissoru İlqar Saffatdır. Səhnə əsərində, həmçinin Azərbaycanın Xalq Artisti Yuri Balıyev, aktyorlar Yaroslav Trifonov, Olqa Arsyentyeva çıxış edəcəklər.
sia.az

İtaliyanın paytaxtı Romada məşqçilər və hakimlər üçün beynəlxalq seminar keçirilib. Avropa Cüdo Federasiyasının təşkilatçılığı ilə baş tutan seminarda Azərbaycan Cüdo Federasiyası da təmsil olunub. Beynəlxalq dərəcəli hakim Valeh Məhərrəmov və hakim Nazim Umbayev seminarın işində iştirak ediblər.

 

Beynəlxalq seminarda bu ilin əvvəlində Bakıda qəbul olunan yeni qaydalar müzakirə olunub. Əsasən praktiki olaraq keçirilən məşqlərdə bütün hakimlərin səviyyəsi yoxlanılıb və yarış, hakimlik qaydaları haqqında geniş məlumatlar verilub. Sonra italiyalı idmançıların iştirakı ilə yarış keçirilib və hər bir hakim oyunları idarə edib.

Qeyd edək ki, seminara qatılan Avropanın tanınmış cüdo mütəxəssisləri Bakıda keçirilən beynəlxalq seminar və “Böyük Dəbilqə” yarışından bəhs ediblər, hər iki tədbirin yüksək səviyyədə keçirilməsindən, eləcə də təşkilatçılıqdan razı qaldıqlarını ifadə ediblər.

apasport.az

Bu gün AMEA Rəyasət Heyətində Biologiya və Tibb Elmləri Bölməsinin (BTEB) Ümumi yığıncağı keçirildi.

Tədbiri giriş sözü ilə açan bölmənin akademik-katibi, akademik Əhliman Əmiraslanov gündəlikdə duran məsələlər haqqında məlumat verərək yığıncağın BTEB üzrə AMEA-nın həqiqi və müxbir üzvlüyünə qeydə alınmış namizədlərin elmi fəaliyyətlərinin müzakirəsinə həsr olunduğunu bildirdi.

Bölmə üzrə AMEA-nın həqiqi və müxbir üzvlüyünə 18 namizədin qeydə alındığını diqqətə çatdıran alim onların hər birinə uğurlar arzuladı. Qeyd etdi ki, Azərbaycan elminin zirvəsi sayılan bu adlar elm istiqamətləri üzrə geniş tədqiqatlar aparan, elmi yeni biliklərlə zənginləşdirən, tanınmış elmi məktəblər yaradan və görkəmli xidmətləri olan alimlərə verilir.

Sonra hər bir namizəd öz fəaliyyəti, əldə etdiyi nailiyyətlər və Azərbaycan elminə verdiyi mühüm töhfələrə dair ətraflı məlumat verdi.

Sonda namizədlərin təqdimatlarına dair geniş fikir mübadiləsi aparıldı, çoxsaylı suallar cavablandırıldı.

XƏBƏR LENTİ