Çərşənbə, Mart 29, 2017
ƏSAS SƏHİFƏ

Mayın 25-də Sumqayıt Dövlət Universitetində (SDU) “Riyaziyyatın nəzəri və tətbiqi problemləri” mövzusunda beynəlxalq elmi konfrans keçiriləcək. Tədbir Təhsil Nazirliyi, SDU, Azərbaycan Milli Elmlər Akademiyasının (AMEA) Riyaziyyat və Mexanika İnstitutunun təşkilatçılığı ilə reallaşacaq.

AMEA-dan bildiriblər ki, iki gün davam edəcək konfransda funksional analiz və funksiyalar nəzəriyyəsi, diferensial tənliklər və riyazi fizika, optimallaşdırma və optimal idarəetmə, riyaziyyat və informatikanın tədrisi metodikasının aktual məsələləri üzrə məruzələr dinləniləcək, müzakirələr aparılacaq.

AZƏRTAC

Bakı Dövlət Universitetində 31 mart – Azərbaycanlıların Soyqırımı Günü ilə əlaqədar tədbir keçirilib.

BDU-nun Mətbuat və İnformasiya Şöbəsindən Trend-ə verilən məlumata görə, Universitetin professor-müəllim heyətinin iştirak etdiyi tədbiri açan rektor, akademik Abel Məhərrəmov Bakı Soveti və daşnak erməni silahlı dəstələrinin azərbaycanlılara qarşı törətdikləri qırğının xalqımızın tarixinə qanlı hərflərlə yazıldığını, tarixin bütün dönəmlərində erməni qəsbkarlarının vətənimizə və xalqımıza qarşı məkrli addımlar atdığını diqqətə çatdırıb. 1918-ci il 31 mart soyqırımından bəhs edən rektor ümummilli lider Heydər Əliyevin 1998-ci il martın 26-da imzaladığı “Azərbaycanlıların soyqırımı haqqında” fərmanla ilk dəfə olaraq dövlət səviyyəsində bu qətliama siyasi qiymət verildiyini qeyd edib.

Azərbaycanlıların Soyqırımı Günü ilə əlaqədar 5 dəqiqəlik çarxın nümayişindən sonra Mənbəşünaslıq, tarixşünaslıq və metodika kafedrasının müdiri, professor Anar İsgəndərov ermənilərin azərbaycanlılara qarşı törətdikləri vəhşilikləri dövlət cinayətləri adlandıraraq faktlarla ətraflı məlumat verib.

Sonda tələbələr adından tarix fakültəsinin tələbəsi Ayan Kərimova çıxış edib.

Səbail rayonunun idarə, təşkilat və müəssisələrində çalışan, rayondakı ali məktəblərdə təhsil alan, ictimai-siyasi həyatda fəal gənclərin, ictimaiyyət təmsilçiləri və tarixçi alimlərin iştirakı ilə Səbail Rayon İcra Hakimiyyətinin iclas zalında “31 mart azərbaycanlıların soyqırımı günüdür” mövzusunda dəyirmi masa keçirilib.

Konfransın işini açıq elan edən Səbail Rayon Gənclər və İdman İdarəsinin rəisi Vüqar Mürsəlov qeyd edib ki, Azərbaycan xalqı XX əsrdə bir neçə dəfə soyqırımlara məruz qalıb. Uzun illər azərbaycanlıların əzəli torpaqlarına sahib çıxmaq və burada “Böyük Ermənistan” yaratmaq xülyaları ilə yaşayan erməni qəsbkarları 1918-ci ildə Bakı, Şamaxı, Quba qəzalarında, Qarabağda, Zəngəzurda, Naxçıvanda, Lənkəranda və Azərbaycanın başqa bölgələrində minlərlə dinc azərbaycanlı əhalini yalnız milli mənsubiyyətinə görə məhv etmiş, milli memarlıq incilərini, məktəbləri, xəstəxanaları, məscid və digər abidələri dağıdıblar.

Ötən əsrin 80-ci illərində isə SSRİ-nin süqutunun sürətlənməsindən istifadə edən ermənilər öz havadarlarının köməyi ilə Dağlıq Qarabağın Ermənistana birləşdirilməsi üçün Azərbaycana qarşı birbaşa hərbi təcavüzə başladılar. 1992-ci ilin fevralında isə Xocalıda azərbaycanlılara qarşı növbəti soyqırımı törədildi, torpaqlarımızın 20 faizi işğal olundu.

Bu gün bu mövzunun gəncləri tərəfindən müzakirəsi, onun dərindən öyrənilməsi hər birimiz üçün mühüm əhəmiyyət kəsb edir.

ADPU-nin professoru Mais Əmrahov mövzu ilə bağlı çıxış edərək illər ərzində erməni millətçilərinin xalqımıza qarşı törətdikləri cinayətlərdən danışaraq bildirmişdir ki, Azərbaycan müstəqillik qazandıqdan sonra uzun illər gizli saxlanılan həqiqətlər açıldı, təhrif edilən hadisələr əsl qiymətini aldı. Ümummilli liderimiz Heydər Əliyevin 1998-ci il martın 26-da imzaladığı Fərmanla 31 mart Azərbaycanlıların Soyqırımı Günü elan edildi. Bu, həm də Azərbaycan xalqının əsrlər boyu üzləşdiyi mərhumiyyətlərə rəhbəri Heydər Əliyev olan dövlətin verdiyi əsl tarixi qiymət idi.

Azərbaycan Respublikasının Prezidenti cənab İlham Əliyev dövlətçilik maraqlarımızın qorunmasında, ölkəmizin ərazi bütövlüyünün bərpa olunması istiqamətində qəti və prinsipial mövqe nümayiş etdirir. Dövlət başçımızın yorulmaz fəaliyyəti sayəsində Azərbaycan inkişaf edib möhkəmlənərək dünyanın aparıcı ölkələri sırasında öz layiqli yerini tutub.

Dəyirmi masanın işində çıxış edən Dövlət İdarəçilik Akademiyasının professoru Musa Quluzadə, Səbail RİHBA-nın əməkdaşı Ziyad Əzizov, Azərbaycan Dövlət Pedaqoji Universitetinin müəllimi Tale Cəfərov, “Qərb” Universitetinin tələbəsi Turan Rzayev, Azərbaycan Dövlət Pedaqoji Universitetinin tələbəsi Aişən Vəliyeva və başqaları XX əsrin müxtəlif dövrlərində Azərbaycanlıların məruz qaldıqları soyqrım faktları, Ermənilər tərəfindən Azərbaycan torpaqlarının işğalı ilə bağlı uzun illər həyata keçirdikləri planları, Xocalı faciəsi və mövcud Ermənistan-Azərbaycan, Dağlıq Qarabağ münaqişəsinin nəticələri ilə bağlı məruzələrlə çıxış ediblər.

Sonda dəyirmi masa iştirakçıları adından yekdilliklə bəyanat qəbul olunub.

SİA

Tbilisidə fəaliyyət göstərən Mirzə Fətəli Axundov adına Azərbaycan Mədəniyyət Muzeyində filologiya üzrə fəlsəfə doktoru, yazıçı-publisist Sona Vəliyevanın Azərbaycan milli mətbuatının banisi, görkəmli maarifçi, “Əkinçi” qəzetinin yaradıcısı Həsən bəy Zərdabiyə həsr olunan “İşığa gedən yol” romanının təqdimatı keçirilib.

Tədbiri Azərbaycan Yazıçılar Birliyinin Gürcüstan şöbəsinin rəhbəri Rafiq Hümmət açıb. O, əsərin ədəbi-bədii və tarixi məziyyətlərinə toxunaraq “İşığa gedən yol” romanının peşəkar qələmin məhsulu olduğunu bildirib. Hər bir gənc və jurnalist tariximizi yaxşı bilməlidir. Düşünürəm ki, bu əsər jurnalistika sahəsində çalışan qələm sahibləri və araşdırmalar aparan mütəxəssis alimlər üçün qiymətli nəsr əsəridir.

Sonra Azərbaycanın Gürcüstandakı səfiri Dursun Həsənov Sona Vəliyevanin yaradıcılığı ilə tanış olduğunu və onun müəllifi olduğu “İşığa gedən yol” romanının tədbirinin Tbilisidə keçirilməsini alqışlayıb. O, Zərdabinin həyatının öyrənilməsinin gərəkliyindən danışıb və müəllifə bu mövzuya müraciət etdiyi üçün öz təşəkkürünü bildirib. Mərasimdə çıxış edən Azərbaycan Jurnalist Qadınlar Assosiasiyasının sədri Sevil Yusifova Sona Vəliyevanı Gürcüstanda yaşayan soydaşlarımızın yaxından tanıdıqlarını deyib. Artıq Gürcüstan elitası yazıçının həyat və yaradıcılığı ilə tanış olublar. Bu onun soydaşlarımızla ikinci görüşüdür.

Tbilisidə yazıçının “Arazbarı” kitabının da təqdimatı keçirilib. Xanım Yusifova Həsən bəy Zərdabinin həyatının bir hissəsinin Tbilisi mühiti ilə bağlı olduğunu bildirib: ““İşığa gedən yol” romanında H.B.Zərdabinin indiyə kimi hələ işıq özü görməmiş bir çox həyati məqamları üzə çıxarılıb. Əsərin dili rəvan və axıcıdır. Əsəri oxuyan oxucu sanki həmsöhbətilə söhbətləşir. Adətən, yazıçılar qələmə aldıqları tarixi əsərlərin dilini qəlizləşdirməyə çalışırlar. Sona Vəliyevanın qələmə aldığı əsərin isə dil məziyyətləri mənalı və gözəldir. Kitab poliqrafiya tərtibatı baxımından da çox nəfisdir. O, “İşığa gedən yol” romanının gürcü dilinə tərcümə olunmasının vacibliyini deyib.

Sonda Sevil Yusifova bildirib: “Fikrimcə, Sona Vəliyeva Tanrı tərəfindən seçilmiş ziyalılarımızdandır. Məhz Tanrının seçdiyi insan ona bəxş edilən müqəddəs missiyanı yerinə yetirərək həyatını işığa doğru istiqamətləndirən və ilahi missiyanı yerinə yetirən böyük mütəfəkkir, Azərbaycan milli mətbuatının banisi, görkəmli maarifçi Həsən bəy Zərdabinin həyatından məzmunlu tarixi bir roman ərsəyə gətirə bilər”.

Gürcüstan parlamentinin deputatları Mahir Dərziyev və Ruslan Hacıyev, Gürcüstan Azərbaycanlı Jurnalistlər Birliyinin sədri Nizami Məmmədzadə, şair Osman Əhmədoğlu, tərcüməçi Cambul Məmmədli, gənc yazıçı Kamran Kiryakov və başqaları roman haqqında və onun yazılma tarixi haqqında fikirlərini bildiriblər. Tədbirdə yazıçı Sona Vəliyevanın həyat və yaradıcılığı haqqında da ətraflı məlumat verilib.

Tədbirdə həmçinin, gürcü və Azərbaycan tarixi dostluğundan, Azərbaycan və gürcü ədəbiyyatının inkişafından, yazıçılarımızın əsərlərinin gürcü dilinə tərcüməsindən də söhbət açılıb. Mərasimdə söz alan qocaman jurnalist Emin Elsevər “İşığa gedən yol” romanının gürcü dilinə tərcümə olunmasını öz üzərinə götürməyə hazır olduğunu deyib.

Təqdimat mərasimində Azərbaycanın Gürcüstandakı səfirliyinin birinci katibi Elçin Məmmədov, Gürcüstanın ali məktəblərində təhsil alan azərbaycanlı tələbələr və Tbilisi azərbaycanlıları iştirak ediblər.

Standartlaşdırma, Metrologiya və Patent üzrə Dövlət Komitəsi akademik Mirqasımov adına Respublika Kliniki Xəstəxananın otolarinqoloqu, tibb üzrə fəlsəfə doktoru Məzahir Quliyevin təklifi əsasında hazırlanan dörd yeni ixtiraya – xüsusi konstruksiyalı adenotom, forseps (konxotom), bipolyar koaqulyasıyator ucluğu-pinset və sorucu ucluq alətlərinə müəlliflik hüququ verib.

Bu barədə məlumat verən ixtira müəllifi qeyd edib ki, həmin alətlərin tətbiqi burun-udlaq qanaxmaların qarşısının alınması, qan laxtalarının təmizlənməsi və görmə sahəsinin daha da yaxşılaşmasına, əməliyyatdan sonrakı fəsadların baş verməməsinə səbəb olacaq.

Yaxın vaxtlarda həmin alətlərin kütləvi şəkildə istehsalına başlanılacağı gözlənilir.

AZƏRTAC

2018-ci il dünya çempionatının final mərhələsinə ilk vəsiqənin sahibi müəyyənləşib. Mundiala ev sahibi kimi qatılacaq Rusiyadan sonra Braziliya da planetin ən nüfuzlu futbol turnirində oynamaq hüququ qazanıb.

“Sambaçılar” buna DÇ-2018-in Cənubi Amerika üzrə seçmə mərhələsinin XIV turunda nail olub. Titonun yetirmələri turnirin sonuna 4 tur qalmış Rusiyaya birbaşa vəsiqə verən 4 pillədən birini təmin edib.

Paraqvay üzərində 3:0 hesablı qələbə qazanan Neymar və komanda yoldaşları xal hesabını 33-ə çatdırıb. Onlar ən yaxın izləyicisini 9 xal qabaqlayır. Düzdü, 5-ci olan Argentina da Braziliyanı keçmək imkanına malikdi. Amma Uruqvayla Argentinanın öz arasında da oyunu qaldığından pentakampeonlar ən pis halda, 3 komandanı önə buraxacaq. Bu isə ilk 4 yerdən birinin təmin olunması anlamına gəlir.

Lionel Messisiz Argentina isə işini daha da çətinə salıb. Onlar autsayderlərdən olan Boliviyaya uduzmaqla 5-ci yerə enib. Bu yer isə mundiala deyil, pley-offa vəsiqə verir. Birbaşa vəsiqə üçün argentinalılar Kolumbiya, Uruqvay və Çili ilə mübarizə aparmalıdı. Lakin Ekvador, hətta Peru ilə Paraqvay da mundiala vəsiqə üçün sonadək savaşmağa çalışacaq. İki autsayder – Boliviya və Venesuela isə hətta pley-offda oynamaq şanslarını da itirib.

DÇ-2018-in seçmə mərhələsi

Cənubi Amerika zonası

XIV tur

Boliviya – Argentina – 2:0

Ekvador – Kolumbiya – 0:2

Çili – Venesuela – 3:1

Braziliya – Paraqvay – 3:0

Peru – Uruqvay – 2:1

 

1 Braziliya 14 10 3 1 35-10 33
2 Kolumbiya 14 7 3 4 18-15 24
3 Uruqvay 14 7 2 5 26-17 23
4 Çili 14 7 2 5 24-19 23
5 Argentina 14 6 4 4 15-14 22
6 Ekvador 14 6 2 6 23-20 20
7 Peru 14 5 3 6 22-23 18
8 Paraqvay 14 5 3 6 13-21 18
9 Boliviya 14 3 1 10 12-32 10
10 Venesuela 14 1 3 10 17-34 6

APA

FOTO:HALID KAYACAN

“Qalatasaray”ın heyətində ciddi itki baş verib. “Sarı-qırmızılar”ın aparıcı futbolçularından olan Armindo Bruma sıradan çıxıb. Gənc yarımmüdafiəçi Portuqaliyanın U-21 milli komandasının düşərgəsində zədələnib.

Klubun rəsmi saytından verilən açıqlamada bildirilir ki, ulduz futbolçu 3 həftə yaşıl meydanlardan kənar qalacaq. Onun Super Liqada “Adanaspor” və “Başakşekir”lə matçlarda oynamayacağı dəqiqdi. 21 yaşlı futbolçusunun 23-cü turda “Fənərbaxça” ilə derbiyə kimi hazır olacağı gözlənilir.

www.idmantv.az

Azərbaycan Respublikası Müdafiə Nazirliyi və Almaniya Federativ Respublikası Federal Müdafiə Nazirliyi arasında imzalanan plana uyğun olaraq Silahlı Qüvvələrin Hərbi Akademiyasında ikitərəfli əməkdaşlıq proqramı çərçivəsində görüş keçirilib. AFR Silahlı Qüvvələri Hərbi Akademiyasının hərbi strategiya məsələləri üzrə mütəxəssisi Klaus Hütker Hərbi Akademiyanın Strateji Araşdırmalar və Dövlət Müdafiəsini İdarəetmə Akademik Kursunun dinləyiciləri qarşısında mühazirələrlə çıxış edib. Mühazirələrdən sonra Silahlı Qüvvələrin Hərbi Akademiyasında hərbi strategiya sahəsində çalışan mütəxəssislər ilə K.Hütker arasında ekspert qrupunun görüşü keçirilib və müzakirələr aparılıb.

SİA

Martın 28-də Bakı Şəhər Mədəniyyət və Turizm Baş İdarəsinin təşkilatçılığı ilə Beynəlxalq Muğam Mərkəzində Mstislav Rostropoviçin 90 illik yubileyinə həsr olunmuş konsert keçirilib.

Konsertdə Bakı Şəhər Mədəniyyət və Turizm Baş İdarəsinin rəisi Vuqar Zeynalov, Mədəniyyət işçiləri Həmkarlar İttifaqının sədri Cəmilə Səttərova, Bakı şəhər uşaq musiqi və incəsənət məktəblərinin direktorları və digər qonaqlar iştirak ediblər.

“Bakı solistləri” kamera ansamblının müşayiətilə L.və M.Rostropoviçlər adına 21 nömrəli Onbirillik musiqi məktəbinin şagidlərinin ifasında Azərbaycan və dünya bəstəkarlarının Q.Qarayev “İldırımlı yollarla”, Q.Hüseynli “İlk məhəbbət”, F.Allahverdiyev “Tanqo”, S.Ələsgərov “Tarantella”, Y.Bozza “Ariya”, P.Çaykovskiy “Qu gölü” baletindən “Rus rəqsi”, Rossini “Komik duet” və digər əsərləri səsləndirilib.

Martın 29-da Azərbaycan Milli Elmlər Akademiyasının (AMEA) Mərkəzi Elmi Kitabxanasında AMEA-nın Fəlsəfə İnstitutu, Azərbaycan Respublikasının Prezidenti yanında Bilik Fondu və Fransanın Sofia-Antipolis Universitetinin hüquq və siyasi elmlər fakültəsinin birgə təşkilatçılığı ilə “İslam həmrəyliyi, mədəni müxtəliflik və milli identiklik” mövzusunda beynəlxalq elmi konfrans keçirilib.

Tədbirdə Azərbaycanda akkreditə olunmuş ABŞ, Fransa, Mərakeş, Misir, Pakistan, Qazaxıstan və digər ölkələrin mədəniyyət mərkəzlərinin nümayəndələri iştirak ediblər.

Fəlsəfə İnstitutun direktoru, professor İlham Məmmədzadə 2017-ci ilin Prezident İlham Əliyev tərəfindən “İslam Həmrəyliyi İli” elan edildiyini bildirib, onun regional və qlobal dünyəvi əhəmiyyətindən söz açıb, sülhün, əməkdaşlığın və həmrəyliyin bərqərar olmasında mühüm rolunu diqqətə çatdırıb.

“İslam həmrəyliyi, mədəni məxfilik və milli identika” mövzusunda çıxış edən fransalı alimlər Kristian Vallar “İslam və Respublika”, Ksavye Latur “Fransız olmaq”, Poline Türk “Dil identiklik: Fransada və Azərbaycanda azlıqların statusu”, Klodin Terrazzoni-Biblok “Respublika və İslamın bölünməzliyi” məsələlərinə toxunub, müasir dövrdə İslam həmrəyliyinin əhəmiyyətini və böyük maraq doğurduğunu qeyd ediblər.

Konfransda professor Zümrüd Quluzadə, Fəlsəfə İnstitutu direktorunun müavini Eynulla Mədətli, fəlsəfə elmləri doktoru Fizuli Qurbanov, Bilik Fondunun aparat rəhbəri, professor İsaxan Vəliyev çıxış edərək İslam həmrəyliyi təcrübəsində milli dəyərlərin yeri və əhəmiyyətindən, eləcə də İslam həmrəyliyinin mənəvi əsaslarından danışıblar.

AZƏRTAC

“1918- ci ilin mart ayında erməni nasistləri tərəfindən azərbaycanlılara qarşı törədilən soyqırıma dünya hələ də lazımi hüquqi qiymətini verməyib. Azərbaycan isə bu istiqamətdə ciddi addımlar atmaqda davam edir”. Bunu SİA-ya açıqlamasında Bakı şəhər Gənclər İdman Baş İdarəsinin (BŞGİBİ) rəisi Raqif Abbasov deyib.

O qeyd edib ki, Ümummilli Lider Heydər Əliyevin Sərəncamı ilə hər il martın 31-i Azərbaycanlıların Soyqırımı Günü kimi qeyd olunur: “ Bu sərəncamdan sonra ermənilərin azərbaycanlılara qarşı törətdikləri soyqırımında həlak olanlar hər il geniş şəkildə yad edilir. Qubada kütləvi insan məzarlığının tapılması bu soyqırımı faktını bir daha sübut edir. Hər il martın 31-də insanlar həmin məzarlığa kütləvi şəkildə axın edirlər”.

R.Abbasovun sözlərinə görə, dünyanın 1918-ci ildə azərbaycanlılara qarşı törədilən soyqırımı faktına hüquqi qiymət verməməsi xalqımızın Xocalı soyqırımına məruz qalmasına səbəb olub: “Dünya ölkələri, beynəlxalq institutlar azərbaycanlılara qarşı törədilən soyqırımına hüquqi qiymət verməlidirlər ki, bəşəriyyət bir daha ermənilər tərəfindən törədilən belə faciələrlə rastlaşmasın. Azərbaycanlılara qarşı soyqırımı faktının tanıdılması, cinayətkarların cəzalandırılması istiqamətində ölkəmizdə ciddi addımlar atılır. BŞGİBİ də hər il ənənəvi olaraq Qubadakı kütləvi məzarlığa gənclərin ziyarətini təşkil edir və silsilə tədbirlər həyata keçirir. Bu il həm də Qusarda dəfn olunmuş milli qəhramanımız Çingiz Qurbanovun məzarı da gənclər tərəfindən ziyarət ediləcək”.

Baş idarə rəisi əlavə edib ki, azərbaycanlılara qarşı törədilən soyqırımı ilə bağlı ölkəmizdə toplular çap olunur və diplomatik işlər aparılır: “Dünya siyəsətçiləri, nüfuzlu şəxslər, müxtəlif ölkələrin parlamentləri, beynəlxalq institutlara məlumatlar verilir, faktlar irəli sürülür. Tarixçilərimizin hazırladığı məshsullar müxtəlif dillərə tərcümə edilir”.

Azərbaycan Milli Elmlər Akademiyasının (AMEA) İnformasiya Texnologiyaları institutunda internet oyunlarının uşaq psixologiyasına mənfi təsirləri araşdırılır.
İnstitutdan bildirilib ki, informasiya-kommunikasiya texnologiyalarının sürətli inkişafı və bu sahəyə olan maraq uşaqların sağlamlığı və psixologiyasının pozulmasına gətirib çıxara bilər. İnternetdən intensiv istifadə uşaq və yeniyetmələrin maraqlarını ödəsə də, onların sağlamlığı üçün ciddi problemlər yaradır.
Qeyd olunub ki, sosial şəbəkələrdə geniş yayılmış və daha çox yeniyetmələri hədəfə alan “Siniy kit”, “Tixiy dom”, “More kitov”, “Razbudi menya v 4:20” kimi oyunlarla bağlı ilk təhlükə 2015-ci ildə Rusiyada meydana gəlib.“Siniy kit” oyunu Azərbaycanda da geniş yayılıb. Valideynlər övladlarının internet aktivliyinə nəzarət etməlidirlər. İlk gündən uşaqlar üçün kompüter və mobil telefonlardan istifadə qrafiki müəyyənləşdirilməli, onlara hansı saytların faydalı, hansılarının ziyanlı olduğu izah edilməlidir.
Uşaqların saatlarla kompüterə bağlı qalmaları onları asılı vəziyyətə salır, sosial mühitlə əlaqələrini zəiflədir. Kompüter oyunlarından asılı hala düşməmək üçün yeniyetmələrin müxtəlif hobbilərinin olması vacibdir.
AZƏRTAC

Azərbaycan Milli Elmlər Akademiyasının (AMEA) Hüquq və İnsan Haqları İnstitutunda bu müəssisənin baş elmi işçisi, siyasi elmlər üzrə fəlsəfə doktoru Rövşən Vəlizadənin rus dilində çapdan çıxmış “Metsamor AES: region üçün ekoloji bomba” kitabının təqdimat mərasimi keçirilib.

İnstitutun direktoru, Milli Məclisin deputatı Aytən Mustafayeva Ermənistanda 1967-ci ildən fəaliyyətə başlayan və böyük region üçün təhlükə mənbəyinə çevrilən Metsamor AES-in bütövlükdə bəşəriyyət üçün qlobal problem olduğunu vurğulayıb.

Müəllif R.Vəlizadə Ermənistanın bu vaxtadək bağlı qalan “nüvə proqramı”, Azərbaycana qarşı yürütdüyü düşmənçilik siyasəti, eləcə də Beynəlxalq Terror Təşkilatı ilə AES-in müştərək əlaqələri barədə məlumat verib.

AZƏRTACi

Asiya İnkişaf Bankı (AİB) “Şimal-Cənub” nəqliyyat dəhlizinin maliyyələşdirilməsinə kredit ayıra bilər.

Bu barədə AİB-in Azərbaycan nümayəndəliyinin rəhbəri Nariman Mannapbekov deyib.

O bildirib ki, Asiya İnkişaf Bankı “Azərbaycan Dəmir Yolları” QSC-yə 200 milyon dollar məbləğində kredit ayıra bilər. Kredit “Şimal-Cənub” nəqliyyat dəhlizinin maliyyələşdirilməsi üçün nəzərdə tutulub. Təkliflər “Azərbaycan Dəmir Yolları” QSC-nin rəhbərliyinə göndərilib və onlardan cavab gözlənilir.

AZƏRTAC

Salyan rayonunda torpaq və çınqıl örtüklü olan 16 km-lik Qaraçalar – Düzənlik- Peyk- Birinci Varlı avtomobil yolunda təmir işlərinə başlanılıb.

“Azəravtoyol” ASC-dən verilən məlumata görə, yenidənqurma işləri çərçivəsində hazırda yol yatağının inşası işləri aparılır. Zəruri olan yerlərdə yol yatağının yararsız qruntu qazılaraq çıxarılır, bunun əvəzinə isə xüsusi qum-çınqıl qarışığından ibarət material tökülərək yenidən kipləşdirmə işləri görülür. Daha sonra yol geyiminin əsasının tikintisi işləri aparılacaq. Yol əsası qum-çınqıl və optimal qırmadaş qarışığından ibarət olacaq.

Avtomobil yolu IV texniki dərəcəyə uyğun yenidən qurulur. Layihəyə uyğun olaraq yol bir gediş bir gəliş olmaqla 2 hərəkət zolağından ibarət olacaq. Hərəkət zolaqlarının eni 3 metr olmaqla ümumi hərəkət hissəsinin eni 6 metr təşkil edəcək. Hər bir istiqamət üzrə 2 metr çiyinlər də daxil yol yatağının eni isə 10 metrdir.

Torpaq işləri bitdikdən sonra yolun asfaltlanması planlaşdırılır. Salınacaq asfalt-beton örtüyünün qalınlığı 10 sm olmaqla 2 qat olacaq. Ümumilikdə təqribən 100 min kvadratmetr sahənin asfaltlanması işləri görüləcək. Yenidənqurma işləri çərçivəsində nəqliyyat vasitələrinin hərəkətinin normal təşkili üçün zəruri olan yerlərdə 54 ədəd yol nişanı və məlumatverici lövhə quraşdırılacaq, yol kənarına  təhlükəsizlik dirəkləri qoyulacaq və yola üfüqi nişanlama xətləri çəkiləcək. Bundan başqa yolun altından suların ötürülməsi üçün 6 yerdə uzunluqları 12 metr olan dəmir borular da quraşdırılacaq.

Qeyd edək ki, kənd yolunun tikintisi 4 yaşayış məntəqəsinin 8 mindən çox əhalisinin gediş-gəlişi xeyli yaxşılaşacaq, yük və sərnişin daşıması asanlaşacaq.

APA

XƏBƏR LENTİ