Cümə, Fevral 24, 2017
ƏSAS SƏHİFƏ

“Azexport.az” portalı fəaliyyətə başladığı iki ay ərzində sahibkarların ixrac imkanlarının artması ilə bağlı ciddi irəliləyiş əldə edib.

İqtisadi İslahatların Təhlili və Kommunikasiya Mərkəzindən “APA-Economics”ə verilən məlumata görə, portalın əldə etdiyi statistik rəqəmlər bu məlumatı verməyə əsas verir.

“Belə ki, Azexport.az fəaliyyətinə başlayandan sonra Azərbaycan məhsulların beynəlxalq platformalarda, o cümlədən Alibaba.com platformasında təmsil olunma səviyyəsi 50 dəfə artıb. Portalın statistik rəqəmlərə əsaslanaraq hazırladığı infoqrammadan göründüyü kimi, ötən ilin son aylarında qonşu ölkələrlə müqayisədə beynəlxalq portallarda Azərbaycan məhsullarının təmsil olunması ilə bağlı vəziyyət sürətlə yaxşılaşır. Çünki, Azexport.az portalı yüzlərlə “Made in Azerbaijan” brendini qlobal və regional səviyyəli elektron ticarət portallarında nümayiş etdirir”, – deyə məlumatda vurğulanıb.

Azexport.az-dan verilən məlumata görə, portalın hədəflərindən biri qısa müddətdə MDB məkanında “Made in Azerbaijan” brendinin qlobal “vitrində” ilk yerlərdə möhkəmlənməsini təmin etməkdən ibarətdir.

Fevralın 23-dən etibarən IDEA İctimai Birliyi tullantıların idarə olunması proqramı çərçivəsində Azərbaycan Təhsil Nazirliyi və “Azersun” şirkəti ilə birgə kağız və plastik tullantıların toplanması və təkrar emalına həsr olunmuş yeni layihəyə start verir.

IDEA-dan verilən məlumata görə, layihə çərçivəsində ali təhsil müəssisələrində kağız və plastik tullantılar üçün xüsusi çeşidləmə qutularının yerləşdirilməsi nəzərdə tutulub. Layihənin pilot fazası olaraq, Bakı Dövlət Universiteti, Azərbaycan Respublikasının Prezidenti yanında Dövlət İdarəçilik Akademiyası, Azərbaycan Dövlət Neft və Sənaye Universiteti, Azərbaycan Dillər Universteti, Azərbaycan Texniki Universiteti və Azərbaycan Dövlət İqtisad Universitetinə ümumilikdə 200 ədəd konteyner təhvil verilib.

Layihənin məqsədi tullantıların idarə olunması ilə bağlı ekoloji maarifləndirməni gücləndirmək, təkrar emalı təşviq etmək yolu ilə ağacların və təbii sərvətlərin qorunmasına, təbiətin mühafizəsinə və ekoloji balansın saxlanılmasına töhfə verməkdir. Sözügedən layihə çərçivəsində yerləşdirilən konteynerlərdə kağız və plastik tullantıların çeşidlənərək toplanması və təkrar emalı ali təhsil müəssisələrində təhsil alan tələbələrdə ekoloji məsuliyyət hissinin tərbiyə etdirilməsi, kağız israfının azaldılması, eləcə də ümumiyyətlə ətraf mühitin və təbii sərvətlərimizin mühafizəsi baxımından mühüm töhfə verəcək.

Məlum olduğu kimi, təbii resursların qənaətlə və səmərəli istifadəsi üçün tullantıların idarəolunması sahəsində əhalinin məlumatlandırılmasının əhəmiyyətini nəzərə alaraq, IDEA İctimai Birliyi hələ 2014-cü ilin fevral ayından etibarən kağız tullantıların qəbulu və təkraremalı ilə bağlı “Hər kağızı bir yarpağa dəyişək” layihəsini həyata keçirib. Layihə çərçivəsində bu günə qədər 600 tondan çox kağız tullantısı toplanaraq təkrar emala göndərilib.

Qeyd edək ki, layihə çərçivəsində kağız və plastik tullantılar üçün xüsusi qutuların mərhələli şəkildə bütün ali və orta təhsil müəssisələrində yerləşdirilməsi planlaşdırılıb. Layihə tərəfdaşları bütün tələbə və şagirdlərdən yaşıl qutuların kağız tullantılar, mavi qutuların isə plastik tullantılar üçün qoyulduğunu nəzərə alaraq, təhsil aldıqları müəssisədə tullantıları qutulara atarkən diqqətli olmağa və düzgün çeşidləməyə dəvət edir.

IDEA İctimai Birliyi hər kəsi, xüsusilə də gəncləri tullantıların idarə edilməsi işinə dəstək olmağa, onların çeşidlənməsi və azaldılmasına öz töhfələrini verməyə çağırır.

Trend

“Google” axtarış sistemi özünün “Waze” naviqasiya əlavəsini yol yoldaşı axtarışı funksiyası ilə tamamlayacaq.

“Uber” və “Lyft” taksi xidmətlərindən fərqli olaraq, “Google” adi sürücüləri naviqasiya əlavəsindən istifadə edərək eyni istiqamətə gedən insanları daşımağa sövq edəcək.

Yeni xidmət ABŞ-ın və Latın Amerikasının bir neçə şəhərində istifadəyə veriləcək.

“Biz adi bir sürücünü işə yollanarkən eyni istiqamətə gedəcək sərnişinləri də özü ilə götürməyə inandıra bilərikmi? Bu, ən mürəkkəb sualdır”, – deyə “Waze” şirkətinin rəhbəri Noam Bardin deyib.

“Waze” ilə hərəkət “Uber” və “Lyft”dən daha ucuz olacaq. Belə ki, Oklendin mərkəzindən San-Fransiskonun mərkəzinə gediş 4,5 dollar olacaq. “Uber Pool”da qiymət 10,57 dollar, “Lyft Line”da isə 12,40 dollar təşkil edir.

“Waze” xidmətindən yararlanan sərnişinlər bir mil məsafə üçün cəmi 0,54 dollar ödəyəcək. Əvvəlcə xidmət sürücülərdən pul tutmayacaq, lakin gələcəkdə xidmət tam gücü ilə çalışmağa başlayanda gəlirdən 15% tutulması planlaşdırılır.

İkt.Lent.az

Dövlət İmtahan Mərkəzində (DİM) struktur və kadr islahatları aparılıb.

Mərkəzdən bildirilib ki, struktur formalaşması nəticəsində qurumda 12 yeni şöbə yaradılıb və müdirlər təyin edilib.

Çingiz Xəlilov İnformasiyalaşdırma və texnoloji təminat şöbəsinin müdiri, Natiq Əliyev Yoxlama-ölçmə materiallarının yoxlanması şöbəsinin müdiri, Azər Bağırov Təşkilat şöbəsinin müdiri, Oleq Şelaqinov Statistik araşdırmalar, elmi layihələşdirmə və innovasiyalar şöbəsinin müdiri, Vüqar Əsgərov Hüquqi təminat və insan resursları şöbəsinin müdiri, Afiqə Batıyeva Metodika və dərsliklərin monitorinqi şöbəsinin müdiri, Fuad Mayılov Strateji inkişaf şöbəsinin müdiri, Vəli Məstəliyev Maliyyə və iqtisadiyyat şöbəsi, Vüsal Həmidov Elektron imtahanların təşkil və keçirilməsi şöbəsinin müdiri, Nigar Hüseynova-Didavari İctimaiyyətlə əlaqələr və kargüzarlıq şöbəsinin müdiri, Vüqar Əkbərov Dövlət elektron informasiya sistemləri şöbəsinin müdiri, Fərhad Zeynalov isə Təchizat və təsərrüfat şöbəsinin müdiri vəzifələrini icra edəcək.

Bildirilib ki, hazırda DİM-də strukturun formalaşması prosesi davam edir.

Qeyd edək ki, prezidentin sərəncamları ilə Dövlət İmtahan Mərkəzi publik hüquqi şəxsin Direktorlar Şurasının sədri Məleykə Abbaszadə, sədr müavinləri Namiq Babayev və Bəhram Xəlilov təyin edilib. Azərbaycan Milli Elmlər Akademiyası İdarəetmə Sistemləri İnstitutunun laboratoriya müdiri, AMEA-nın müxbir üzvü Kamil Aydazadə, təhsil nazirinin müavini Ceyhun Bayramov, Azərbaycan Respublikası Xüsusi Dövlət Mühafizə Xidməti rəisinin müavini, general-leytenant Niyazi Hacıyev, ADA Universitetinin prorektoru Fariz İsmayılzadə isə Direktorlar Şurasının üzvləri seçilib. DİM publik hüquqi şəxsdə icraçı direktor vəzifəsinə isə Vəfadar Misirov təyin olunub.
Prezidentin imzaladı fərmana əsəsən isə DİM dövlət qeydiyyatına alındığı andan DQMK və TQDK ləğv edilib, onların istifadəsində olan dövlət əmlakı DİM-in balansına verilib. DİM ötən il oktyabrın 19-da dövlət qeydiyyatına alınıb.

APA

Azərbaycan Turizm və Menecment Universiteti (ATMU) təhsil, tədris, təcrübə, təlim modelinə müvafiq olaraq beynəlxalq əlaqələrin genişlənməsində hər zaman maraqlıdır. Ötən ilin son günlərindən etibarən ATMU ilə Asiya-Sakit Okean Turizm Assosiasiyası (PATA) arasında əməkdaşlığın qurulması istiqamətində aparılan danışıqlar müsbət nəticələnib. Belə ki, bu ali təhsil ocağı PATA-ya üzv qəbul edilib.

1951-ci ildən fəaliyyət göstərən, qeyri-kommersiya təşkilatı olan PATA-nın mərkəzi ofisi Tailandın paytaxtı Banqkokda yerləşir. Təşkilatın 800-dən çox üzvü sırasında dünya turizm sənayesində layiqli yer tutan onlarla turizm təşkilatı, o cümlədən dövlət qurumları, universitetlər, aviaşirkətlər, hava limanları və turizm agentlikləri var. Assosiasiyanın başlıca məqsədi turizm sənayesində təmsilçilik hüququ qazanan təşkilatlarla mövcud əlaqələrin daha da möhkəmləndirilməsi, insan kapitalından düzgün istifadə strategiyasının işlənib hazırlanması və həyata keçirilməsi, dinamik inkişaf edən turizm sektorunda gənclərin, xüsusən tələbələrin fəal iştiraklarının təmin edilməsindən ibarətdir.

ATMU-nun daha bir nüfuzlu beynəlxalq təşkilata üzv qəbul edilməsi universitetin turizm təhsili arenasında daha da tanınmasına, tələbələrin yay tanışlıq və istehsalat təcrübəsi imkanlarının getdikcə genişlənməsinə, bir sözlə, təhsilin beynəlxalq əlaqələr müstəvisində təşkilinə zəmin yaradacaq.

AZƏRTAC

International Journal of Information Research and Review (IJIRR, Beynəlxalq İnformasiya Tədqiqatları və Təhlil jurnalı) Əməkdar incəsənət xadimi, tarix üzrə fəlsəfə doktoru, professor Vidadi Muradovun “XVIII-XX əsrin əvvəllərində Naxçıvanda xalçaçılığın vəziyyəti” mövzusunda nəzəri və təcrübi materiallar əsasında hazırlanmış məqaləsini nəşr edib.

Məqalədə qeyd olunur ki, Naxçıvan diyarında qədim dövrlərdə meydana gəlmiş xalçaçılıq erkən orta əsrlər dövründən başlayaraq müstəqil sənət sahəsinə çevrilib. İşçi qüvvəsinin və xammal ehtiyatlarının bolluğu orta əsrlər dövründə Naxçıvan diyarının xalçaçılıq sənətinin mühüm mərkəzlərindən birinə çevrilməsinə səbəb olmuşdu. Heç də təsadüfi deyil ki, Naxçıvan diyarı şəddə və vərni kimi xalça məmulatlarının istehsal edildiyi ilk ərazilərdən hesab edilir. XVIII-XX əsrin əvvəllərində xarici bazarlarda xalça məmulatlarına tələbatın kəskin şəkildə artması Naxçıvan diyarında da bu sənətin inkişafına güclü təkan vermişdi. Bölgədə istehsal edilən xalça məmulatlarının artıq xeyli hissəsi bazara çıxarılırdı.

Qeyd edək ki, V.Muradovun Naxçıvan xalçaçılıq tarixi mövzusunda tədqiqatları indiyədək respublikanın müxtəlif elmi jurnallarında, qəzetlərində dərc olunmuş məqalələrində, 2013-cü ildə Azərbaycan, ingilis, rus dillərində dərc olunmuş “Naxçıvan xalçaçıları” adlı kitablarında, “Azərbaycan xalçaları. Naxçıvan qrupu” filmində öz əksini tapıb.

Trend

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil məktəblərində “Ekoloji aylıqlar” layihəsi çərçivəsində tədbirlər davam edir.

BŞTİ-dən bildiriblər ki, fevralda ümumi təhsil məktəblərində keçirilən tədbirlər “Ekoloji mədəniyyət və incəsənət, Azərbaycanın ekoloji tarixi və etnoqrafiyası” mövzusuna həsr olunub. Əsas məqsəd şagirdləri Azərbaycanın ekoloji tarixi, mədəniyyəti, incəsənəti barədə maarifləndirmək və onların diqqətini maddi mədəniyyət abidələrinin qorunmasına və mühafizə edilməsinə yönəltməkdir.

Mövzu üzrə elmi konfrans, müsabiqə, yarış və sərgilər keçirilir, araşdırmalar aparılır. Həmçinin şagirdlərin müxtəlif muzey və qoruqlara ekskursiyaları təşkil edilir.

Fevralın sonunda mövzuya uyğun olaraq “Eko-etnoqrafiya şagirdlərin tədqiqatında”, “Ekoloji mədəniyyət və incəsənətin təbliği”, “Azərbaycanın ekoloji tarixi üzrə ən maraqlı araşdırma işi” nominasiyaları üzrə qalib məktəb seçiləcək.

AZƏRTAC

Instagram sosial şəbəkə yeniliyə imza atıb.

Trend-in TASS-a istinadən veridiy məlumata görə, sosial şəbəkədə eyni zamanda 10-dək foto və video yükləmək mümkün olacaq.

Yeni funksiya növbəti həftələrdə istifadəyə veriləcək.

Azərbaycan Respublikasının Birinci vitse-prezidenti

 Mehriban xanım Əliyevaya

Çox hörmətli Mehriban xanım!

Sizin, uzun illər ərzində çoxşaxəli fəaliyyəti ilə müstəqil Azərbaycanın tərəqqisinə əvəzedilməz töhfələr verən respublikamızın birinci xanımının Azərbaycan Respublikasının Birinci vitse-prezidenti təyin olunmağınız xalqımız tərəfindən böyük sevinc hissi ilə qarşılandı. Bu münasibətlə Sizi elmi ictimaiyyət  adından, şəxsən öz adımdan səmimi qəlbdən təbrik edir, Sizə müstəqil Azərbaycan dövlətçiliyinin möhkəmləndirilməsinə, milli maraqların qorunmasına, ölkəmizin beynəlxalq imicinin yüksəldilməsinə hədəflənmiş bu məsuliyyətli və şərəfli vəzifənizin həyata keçirilməsində uğurlar arzulayırıq!

Son illər Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən ardıcıl siyasət nəticəsində ölkənin demokratik idarəedilməsi mexanizmlərinin təkmilləşdirilməsi, daxili sabitliyin qorunub saxlanılması, respublikamızın beynəlxalq imicinin yüksəldilməsi istiqamətində böyük uğurlar əldə edilmişdir. Azərbaycan Respublikasının Konstitusiyasında dəyişiklik edilməsi ilə bağlı ölkəmizdə həyata keçirilən referendumun nəticələri bir daha sübut etdi ki, xalqımız bu siyasəti yekdilliklə dəstəkləyir. Biz əminik ki, Siz Azərbaycan Respublikasının Birinci vitse-prezidenti olaraq, cənab İlham Əliyevin rəhbərliyi altında həyata keçirilən dövlət siyasətinin daha da gücləndirilməsinə öz töhfələrinizi verəcəksiniz.

Dünyada və regionda olduqca mürəkkəb hadisələrin cərəyan etdiyi müasir şəraitdə müstəqil Azərbaycanın dövlət idarəetməsində  mühüm əhəmiyyətə malik belə bir yüksək vəzifəyə Sizin təyin edilməyiniz heç də təsadüfi deyildir. Siz  neçə illərdir ki, Milli Məclisin deputatı və Yeni Azərbaycan Partiyasının sədr müavini kimi  yüksək siyasi potensiala malik olduğunuzu əməli fəaliyyətinizlə  təsdiqləmisiniz. Fəaliyyətinizdə milli maraqların daim prioritet təşkil etməsinin nəticəsidir ki, Siz bütün xarici səfərlərinizdə, keçirdiyiniz görüşlərdə müstəqil dövlətimizin maraqlarını yüksək səviyyədə müdafiə edirsiniz.

Müasir dövrdə Siz həm də Azərbaycan mədəniyyətinin hamisi və yorulmaz təbliğatçısısınız. Məhz Sizin sayənizdə Azərbaycanın tarixi abidələri, muğam, saz, tar, Novruz bayramı dünyanın maddi-mədəni inciləri sırasına daxil edilmişdir. Son illərdə Sizin həyata keçirdiyiniz  möhtəşəm mədəniyyət layihələri  rəhbərlik etdiyiniz Heydər Əliyev Fondunu əsl mədəniyyət himayədarına çevirib. Siz “Avroviziya” mahnı müsabiqəsində gənc istedadlara verdiyiniz dəstəklə müa­sir musiqinin  sivil Şərq ölkəsi olaraq Azərbaycan üçün əlçatmaz olmadığını dünyaya nümayiş etdirdiniz.

Fəaliyyətinizin əsas istiqamətlərindən birini Azərbaycan təhsilinin inkişafı təşkil edir. Siz “Yeniləşən Azərbaycana yeni məktəb”, “Təhsilə dəstək” layihələri, “Uşaq evləri və İnternat məktəblərinin inkişafı”, “Məktəbəqədər təhsil müəssisələrinin inkişafı proqramı”  üzrə yüzlərlə orta məktəb və uşaq bağçası binalarının təməlini qoymuş və   bərpasına nail olmusunuz. Sizin rəhbərliyinizlə “Təhsilə dəstək” layihəsi ölkə sərhədlərini aşaraq dünyanın müxtəlif güşələrində yaşayan soydaşlarımızı da əhatə etmişdir.

Sizin dövlət və xalq qarşısında ən böyük xidmətinizdən biri 2004-cü ildə təsis edilmiş Heydər Əliyev Fondu ilə bağlıdır. Rəhbərlik etdiyiniz  Fond dünya şöhrətli dövlət xadimi, Ümummilli lider Heydər Əliyevin Azərbaycanın sosial-iqtisadi, mədəni inkişafını, xalqımızın maddi rifahının yaxşılaşması, onun min illər boyu yaratdığı, yaşatdığı dəyərlərin qorunması naminə müəyyən etdiyi siyasətin öyrənilməsi, təbliği və bu ideyaların həyata keçirilməsi istiqamətində misilsiz rol oynayır. Heydər Əliyev Fondunun   milli-mənəvi dəyərləri qoruyaraq himayə etməsi, əslində Azərbaycançılığa elmi əsaslarla töhfənin bariz nümunəsidir.

Çoxşaxəli fəaliyyətinizdə idmanın inkişaf etdirilməsi xüsusi istiqamətlərdən birini təşkil edir. “Bakı-2015” birinci Avropa Oyunlarının, “Formula 1” Bakı Qran Prisinin və bir sıra digər beynəlxalq miqyaslı möhtəşəm idman tədbirinin uğurla həyata keçirilməsi məhz Sizin təşkilatçılığınız sayəsində mümkün olmuşdur. Həyata keçirdiyiniz bu layihələr nəticəsində artıq Azərbaycan dünyanın idman mərkəzlərindən birinə çevrilmişdir.

Sizin  milli tarixi ənənələrə əsaslanan fəaliyyətiniz sayəsində müstəqillik illərində, xüsusən, son on ildə Azərbaycan qadınlarının ictimai fəallığı bütöv bir hərəkat səviyyəsinə yüksəlmişdir. Bu gün Siz dünyaya sülhün, həmrəyliyin və qardaşlığın gözü ilə baxaraq Azərbaycan qadınının haqq səsinə çevrilmisiniz. Qloballaşan dünyanı tolerantlığa, dünyəvi dəyərlərə, insan haqlarına çağırmaqla Azərbaycan qadınının mənəvi aləminin təmsilçisinə çevrilir, onu dünyaya tanıdırsınız.

Çox hörmətli Mehriban xanım!

Sizi, mənəvi və intellektual enerjisini ölkəmizin inkişafına yönəltməklə Azərbaycan qadınının ictimai fəaliyyətinin yeni səhifəsini açmış  respublikanın birinci xanımını bir daha Azərbaycan Respublikasının Birinci vitse-prezidenti təyin olunmağınız münasibətilə  elmi ictimaiyyət adından səmimi qəlbdən təbrik edirik. Biz əminik ki, bu hadisə müasir Azərbaycan dövlətçiliyi tarixində elmi-intellektual inkişaf modelinə əsaslanan və sosial-iqtisadi, mədəni-mənəvi tərəqqi ilə müşahidə olunan ölkəmizin yeni inkişaf mərhələsinin başlanğıcı olacaqdır.

Dərin hörmətlə,

Azərbaycan Milli Elmlər Akademiyasının prezidenti,

akademik Akif Əlizadə

Britaniya parlamentində “Xocalıya ədalət!” beynəlxalq kampaniyası çərçivəsində Avropa Azərbaycan Cəmiyyətinin (TEAS) təşkilatçılığı ilə keçirilmiş “Xocalı Sülh Mükafatı-2017” incəsənət müsabiqəsinin qaliblərinin mükafatlandırma mərasimi olub.

Tədbirdə çıxış edənlər Xocalı faciəsinin Azərbaycan xalqına qarşı böyük haqsızlıq və ədalətsizlik olduğunu bildiriblər. Xocalı faciəsinə, eləcə də Ermənistan-Azərbaycan, Dağlıq Qarabağ münaqişəsinə tezliklə hüquqi-siyasi qiymət verilməsinə və bu hadisəni törədənlərin layiqli cəzalarını alacaqlarına ümid bəslədikərini ifadə ediblər.

Bu il münsiflər heyətinə parlament üzvü, Böyük Britaniya parlamentinin Azərbaycanla dostluq qrupunun sədri Bob Bləkmən, Böyük Britaniyanın sabiq xarici işlər və birlik məsələləri naziri Baronessa Manzur, Britaniya parlamentinin üzvü Baronessa Varsi, Avropa Azərbaycan Cəmiyyətinin direktoru Lionel Zetter və azərbaycanlı skripkaçı Səbinə Rakçeyeva daxil idi.

Əsərlər dünyada baş verən münaqişələrin sülh yolu ilə həllinin təşviqini, qaçqın və məcburi köçkünlərin acınacaqlı vəziyyətini daha güclü təsvir etməsi baxımından qiymətləndirilib.

Münsiflər heyətinin rəyinə əsasən birinci yerə “Hərəkatın Sülhü” (Tranquillity of Movement) adlı əsəri ilə britaniyalı gənc rəssam Louisa Marriott layiq görülüb. Koreyalı gənc rəssam Tae Eun Ahn “Səhər” ( In the Morning) əsəri ilə ikinci, çinli Minq Yinq isə “Batırılmamalı” (Don`t be submerged) adlı əsəri ilə üçüncü yeri tutub.

Birinci yerin sahibinə 500 funt və “Xocalı Sülh Mükafatı-2017”, ikinci və üçüncü yerlərin sahiblərinə isə müvafiq olaraq 300 və 200 funt mükafat təqdim edilib.

Fevralın 18-də Gürcüstan Gənclərinə Yardım və Maarifləndirmə Təşkilatının təşkilatçılığı və təşəbüsü, Azərbaycanın Gürcüstan səfirliynin və Azerbaycan Respublikası Gəncliyə Yardım Fondunun da dəstəyi ilə “Xocalı soyqırımı” ilə bağlı tədbir təşkil olunub.

Tədbirin aparıcısı Hacı Bəkiroğlu tədbir haqqında məlumat verdikdən sonra Xocalıda qətlə yetirilənlər 1 dəqiqəlik sükutla yad edilib.

Sonra Gürcüstan Gənclərinə Yardım və Maarifləndirmə Təşkilatının sədri Musa Hacıyev qonaqları salamladıqdan sonra əsas iki mövzuya diqqət çəkib. O, öz çıxışında bəzi vətəndaşlarımızın “bu cür tədbirlər bizi niyə maraqlandırsın, bizlər ki, Gürcüstan vətəndaşıyıq” deyənlərə cavab verərək Gürcüstan vətəndaşı olsaq da bir azərbaycanlı milliyətinə sahibik və bu faciə Türk millətinə edilmiş bir cinayətdir” deyə vurğulayıb.

Çıxış üçün söz alan Qardabani rayon icra başçısının müavinini Dünyamalı Hacıyev isə əsrin faciəsi olan Xocalı qətliamının dünya səviyyəsində lazımi hüquq dəyərini almasının gərəkliliyinin və günahkarların cəzalandırılmasının lazım olduğunu vurğulayıb.

Faciə ilə bağlı geniş məlumat verən Azərbaycan Respublikasının Gürcüstandakı səfirliyinin nümayəndəsi Elçin Məmmədov Gürcüstanda belə tədbirlərin təşkil olunmasından böyük məmnuniyyət hissi duyduqlarını dilə gətirib.

Gürcüstan Azərbaycanlıları Konqresinin sədri Hüseyin Yusibov isə düşmənə qarşı birlik olmağın vacibliyini vurğulayıb.

Gürcüstan Müsəlmanları İdarəsinin Müftisi hacı Yasin Əliyev isə öz çıxışında şəhidlərə Allahdan rəhmət diləyib və onlar üçün dua edib.

Azərbaycanlıların Mədəniyyət Mərkəzinin Gənclər Şöbəsinin sədri Nərgiz Əliyeva isə bu cür tədbirlərin təşkilatlar arasında əməkdaşlı olaraq təşkil olunmasının vacibliyini vurğulayıb.

Daha sonra Azərbaycan Respublikasından dəvət olunmuş Türk İslam Araşdırmaları Mərkəzi İctimai Birliyinin sədri Dr. Telman Nüsrətoğlu mövzuya daha geniş bir çərçivədən yanaşaraq əslində ermənilərin tarix boyu sürmüş olan Türk düşmənliyini gözlər önünə sərgiləyib və mövzuya tarixi nöqteyi nəzərdən yanaşıb.

Onu da qeyd edək ki, tədbirdə dövlət nümayəndələri, Qeyri hökumət təşkilatlarının nümayəndələri, müəllimlər və tələbələr də iştirak ediblər.

Azərbaycanda yaşı 100-dən çox olan insanların sayı açıqlanıb.

Azərbaycan Milli Elmlər Akademiyası Fiziologiya İnstitutunun direktoru, biologiya üzrə elmlər doktoru Ulduz Həşimova bildirib ki, rəsmi statistik məlumatlara görə, ölkəmizdə 100 və daha çox yaşı olan 838 şəxs yaşayır.

U.Həşimova qeyd edib ki, Azərbaycanın bir sıra regionlarında yüksək uzunömürlülük indeksi qeydə alınır. İlkin rəqəmlərə görə, yüksək uzunömürlülük indeksi olan region əsasən Lənkərandır.

Onun sözlərinə görə, ənənəvi olaraq, ölkəmizin cənub-şərqindəki Talış dağları ərazisi uzunömürlülük zonası hesab edilir. Bu institutun laboratoriyasının dəlilləri ilə də təsdiqlənib.

İnstitut direktoru əlavə edib ki, uzunömürlülüyün yüksək indeksi Naxçıvan Muxtar Respublikası, Qazax və Şamaxı zonalarında da qeyd olunur:

“Lakin bunlar dəqiqləşdirilməmiş, başqa sözlə verifikasiya edilməmiş məlumatlardır və bəzi hallarda təsdiqlənməyə də bilər. Məsələn, Naxçıvan da uzunömürlülük baxımından perspektivli sayılır. Belə ki, rəsmi statistikaya əsasən, burada 50-dən çox şəxs 100 yaş həddini keçib. Lakin bu məlumatlar da dəqiqləşdirilməlidir, çünki yaşın verifikasiyası zamanı ilkin göstəricilər dəyişir. Bu, çox vaxt onunla əlaqədar olur ki, 85 yaşdan yuxarı adamlarda öz yaşını “artırmaq” tendensiyası müşahidə edilir”.

Trend

AFFA, Təhsil Nazirliyi, Gənclər və İdman Nazirliyinin dəstəyi, Tələbə Futbol Federasiyasının təşkilatçılığı ilə ali təhsil müəssisələrinin və kolleclərin tələbələri arasında Azərbaycan çempionatının fevralın 22-də açılış mərasimi keçirilib.

“Bayıl Arena”da keçirilən tədbirdə çıxış edən təhsil nazirinin müavini, Azərbaycan Tələbə Futbol Federasiyasının (ATFF) prezidenti, AFFA İcraiyyə Komitəsinin üzvü Firudin Qurbanov yarışı açıq elan edib, çempionatda mübarizə aparan komandalara uğurlar arzulayıb.

Sonra Azərbaycanın dövlət himni səslənib.

F.Qurbanov UEFA-nın hakim-inspektoru Asim Xudiyevin 60 illik yubileyi münasibətilə ATFF-in təsis etdiyi mükafatı ona təqdim edib. Mərasimdə xüsusi qonaq qismində çıxış edən Regional Futbol Federasiyası İctimai Birliyinin prezidenti, AFFA İcraiyyə Komitəsinin üzvü veteran futbolçu İsgəndər Cavadov topa ilk zərbəni vurub.

İlk oyunda Azərbaycan Dövlət Bədən Tərbiyəsi və İdman Akademiyasının və Azərbaycan Tibb Universitetinin komandaları qarşılaşıb. Görüşdə Akademiyanın tələbələri 6:0 hesabı ilə qalib gəliblər.

Azərtac

Daxili İşlər Nazirliyi (DİN) Polis Akademiyasında vakant olan orta və böyük rəis heyəti vəzifələrinə müsabiqə elan edir.

Dövlət və hüquq nəzəriyyəsi, cinayət hüququ, mülki hüquq, kriminalistika, cinayət prosesi, daxili işlər orqanlarının inzibati fəaliyyəti, daxili işlər orqanlarının əməliyyat-axtarış fəaliyyəti kafedralarının müəllimi və baş müəllimi vəzifələrinə namizədlər dövlət ali təhsil müəssisələrinin hüquq təhsili üzrə magistr pilləsini bitirmiş olmalıdır.

Dil hazırlığı kafedrasının müəllimi və baş müəllimi vəzifələrinə namizədlər dövlət ali təhsil müəssisələrinin magistr pilləsini ingilis dili ixtisası üzrə, hərbi kafedranın müəllimi vəzifəsinə namizədlər hərbi təhsil müəssisələrini və ya dövlət ali təhsil müəssisələrini hərbi istiqamət üzrə bitirməlidirlər.

Daxili işlər orqanlarında xüsusi texnika kafedrasının müəllimi vəzifələrinə namizədlər dövlət ali təhsil müəssisələrinin texniki istiqamətlər üzrə magistr pilləsini bitirməli, kompüterdə mükəmməl işləməyi bacarmalıdır. Fiziki hazırlıq kafedrasının baş müəllimi vəzifəsinə namizədlər dövlət ali təhsil müəssisələrinin magistr pilləsini idman ixtisasları üzrə bitirməli, əlbəyaxa döyüş növləri üzrə idman dərəcəsinə və məşqçilik təcrübəsinə malik olmalıdır. Daxili işlər orqanlarında idarəetmənin təşkili kafedrasının müəllimi vəzifələrinə namizədlər riyaziyyat, kompüter riyaziyyatı, informatika və hesablama texnikası istiqamətləri üzrə dövlət ali təhsil müəssisələrinin magistr pilləsindən məzun olmalıdırlar.

Daxili işlər orqanlarında idarəetmənin təşkili kafedrasında mühəndis-proqramçı və mühəndis-elektronçu vəzifələrinə namizədlərdən dövlət ali təhsil müəssisələrinin riyaziyyat, kompüter riyaziyyatı, informatika və hesablama texnikası istiqamətləri üzrə bakalavr və ya magistr pilləsində təhsil almaq, “Java”, “C++” və “Delphy” proqramlaşdırma dillərində işləmək təcrübəsi, həmçinin “MS SQL” və “Oracle” verilənlər bazasının idarə edilməsi sisteminin iş prinsipləri haqqında biliyə malik olmaq tələb edilir. Mühəndis-elektronçu vəzifələrinə namizədlərdən isə, həmçinin kompüterlərin cari təmiri və servis xidmətləri haqqında bilik və təcrübə tələb olunur.

Elmi-tədqiqat və redaksiya nəşriyyat şöbəsinin elmi katibi və elmi əməkdaşı vəzifələrinə namizədlər dövlət ali təhsil müəssisələrini bitirməli və hüquq sahəsi üzrə elmi dərəcəyə malik olmalıdırlar. Kitabxanaçı vəzifəsinə namizədlər dövlət ali təhsil müəssisələrinin kitabxanaşünaslıq və filologiya ixtisası üzrə bakalavr və ya magistr pilləsindən məzun olmalıdırlar.

Müsabiqədə “Azərbaycan Respublikasının daxili işlər orqanlarında xidmət keçmə haqqında Əsasnamə” ilə müəyyənləşdirilmiş şərtlərə cavab verən, 20 yaşdan 30 yaşadək, boyu 165 santimetrdən (qadınlar üçün 160 sm) yuxarı olan Azərbaycan Respublikasının vətəndaşları iştirak edə bilərlər.

Müsabiqənin şərtlərinə cavab verən namizədlərin sənədləri, bilik və bacarıqları Müsabiqə Komissiyası tərəfindən yoxlanıldıqdan sonra toplanılacaq. Müsabiqə zamanı elmi dərəcəyə malik olan şəxslərə üstünlük veriləcək. Müsabiqədən uğurla keçmiş namizədlərın sağlamlıq vəziyyəti və fiziki hazırlıq səviyyəsi daxili işlər orqanları əməkdaşları üçün müəyyən olunmuş normativlər üzrə yoxlanılacaq.

Müsabiqədə iştirak etmək istəyənlər fevralın 21-dən martın 18-dək hər gün (qeyri-iş günləri istisna olmaqla) saat 10.00-dan 18.00-dək Daxili İşlər Nazirliyinin Polis Akademiyasına (Bakı şəhəri, Şüvəlan qəsəbəsi, A.İldırım küçəsi 3) müraciət edərək şəxsiyyət vəsiqəsi, ali təhsil haqqında sənədin əsli, hərbi bilet, əmək kitabçası (olanlar üçün) təqdim etməlidirlər.

Qaliblər müvafiq xüsusi rütbə verilməklə Daxili İşlər Nazirliyinin kadrları tərkibinə daxil ediləcək və onların qanunvericilikdə müəyyənləşdirilmiş qaydada daxili işlər orqanları əməkdaşlarına şamil olunan imtiyazlardan istifadə hüququ olacaq.

Daxili işlər orqanları əməkdaşlarına məzuniyyətə çıxarkən və müalicə olunmaları ilə əlaqədar ildə bir dəfə bir aylıq əməkhaqqı məbləğində pul müavinəti, kirayəyə götürülmüş yaşayış sahəsindən istifadə üçün əməkdaşa və onun hər bir ailə üzvünə kompensasiya, DİN-in Tibb İdarəsinin Respublika Hospitalında, poliklinikalarında əməkdaşa və onun ailə üzvlərinə pulsuz tibbi xidmət, nazirliyin “Xəzri” İstirahət və Sağlamlıq Mərkəzinə yollayışın qiymətinin əməkdaşa 75 faizi, ailə üzvlərinə 50 faizi miqdarında imtiyaz, eləcə də xidmət zamanı şəhərdaxili ictimai nəqliyyat vasitələrindən pulsuz istifadə kimi əlavə güzəştlər verilir.

Müsabiqə əsasında vəzifəyə təyin olunmuş şəxslərin xidmət yerləri gələcəkdə polisin digər xidmət sahələrinə dəyişdirilməyəcək.

Əlavə məlumatı www.mia.gov.az  və www.pa.edu.az  saytlarından, eləcə də (012) 454-12-78 nömrəli əlaqə telefonu vasitəsi ilə almaq mümkündür.

Azərtac

1867-ci il 7 Noyabr dünya ilə bir adı olan fizik və kimyagər Mariya Sklodovskya-Küri doğulmuşdur. Polyak əsilli fransız kimyagəri və fiziki olan bu qadın iki dəfə Nobel mükafatı laureatı (fizika (1903) və kimya (1911)) olmuşdur.

Mariya Kyürinin elmi fəaliyyətində həyat yoldaşı Pyer Kürinin də böyük rolu olmuşdur. Onların 1895-ci ildə baş tutan evliliyi tezliklə dünya əhəmiyyətli nəticələr əldə edən əməkdaşlığın təməlini qoydu. 1896-cı ildə A. Anri Bekkerel təsadüf nəticəsində xarici işıq mənbəyi (Günəş və ya süni işıq) olmadan uran duzlarının şüalanmasını kəşf etdi. Bu, fiziklər üçün əsl sürpriz idi. Sonralar Mariya Bekkerelin bu kəşfini “radioaktivlik” adlandırdı. Fiziklər və kimyaçılar qarşısında əlavə sual meydana çıxdı: görəsən, bu xassə yalnız urana və onun duzlarınamı məxsusdur, yoxsa bu başqa elementlərdə də var? Mariya Küri məhz bu sual ətrafında əri Pyer Küri ilə birlikdə uranda aşkarlanan radioaktivliyin digər elementlərdə mövcud olmasını araşdırmağa qərar verdi və toriumda da radiovtivlik olmasını aşkarladı.

Pyer Kürinin özünü əsasən yeni radiyasiyanın fiziki cəhətdən öyrənilməsinə həsr etdiyi halda, Mariya Küri metal halında saf radium əldə etməyə çalışırdı. O, bu işə ərinin şagirdlərindən biri olan kimyaçı Andre-Lui Debirin köməyi ilə nail oldu. Mariya bu tədqiqatın nəticələrinə əsasən elmlər doktoru adını qazanmışdı və 1903-cü ildə Mariya və Pyer Bekkerel ilə bərabər radioaktivliyin kəşfinə, «radiasiya hadisəsinin tədqiqindəki əvəzedilməz müştərək fəaliyyətlərinə görə» görə fizika üzrə Nobel mükafatına layiq görülmüşlər.

1906-cı ildə Pyer Küri nəqliyyat qəzasında həlak oldu. Lakin Mariya Küri ona təyin olunan pensiyadan imtina edir. Həyat yoldaşının qəfil ölümü Mariya Küriyə ağır zərbə oldu, lakin həmçinin bu hadisə onun karyerasında dönüş nöqtəsi idi: bundan sonra o, bütün enerjisini Pyer Küri ilə başlatdıqları elmi işi təkbaşına tamamlamağa həsr etdi. O, 13 may 1906-cı ildə həyat yoldaşının ölümündən sonra vakant qalan professorluq vəzifəsinə təyin edildi və bununla da Sobon Universitetində dərs deyən ilk qadın professor oldu. Onun sonrakı təcrübələri radiumu metal şəklində almaqdan ibarət olmuşdur. Xanım fizik bu nəticəyə 1910-cu ildə Anri Debirinlə birgə nail olmuşdur.

Mariya və Pyer Küri

O, həmçinin Beynəlxalq Çəki və Ölçü vahidləri Bürosuna radioaktiv maddələrin ilk etalonunu hazırlayıb təqdim edən alim kimi də məşhurdur. Mariya Kürinin digər fundamental nailiyyəti kimya sahəsinə aiddir. O, 1911-ci ildə «kimyanın inkişafındakı əvəzedilməz fəaliyyətinə: radium və polonium elementlərinin kəşf edilməsi, saf halda radiumun ayrılması və bu möhtəşəm elementin təbiətinin öyrənilməsinə görə» kimya üzrə Nobel mükafatına layiq görülmüşdür. Bununla da o, Nobel mükafatını iki dəfə alan ilk şəxs kimi elm tarixinə düşmüşdür.

4 iyul 1934 -cü ildə Mariya Küri radioaktiv şüalanmanın yaratdığı qan xərçəngindən dünyasını dəyişdi.

XƏBƏR LENTİ