Cümə, Aprel 28, 2017
CƏMİYYƏT

Azərbaycan Respublikası Daxili İşlər Nazirliyi (DİN) mətbuat xidmətinin Gəncə, Şirvan, Quba, Lənkəran, Şəki və Bərdə regional qurumlarında vakant vəzifələrə xidmətə qəbulla əlaqədar müsabiqə elan edir.

DİN-in Baş Kadrlar İdarəsindən bildiriblər ki, müsabiqədə Azərbaycan Respublikasının ali təhsil müəssisələrini “jurnalist” ixtisası üzrə bitirmiş, müxbir kimi əmək stajına malik olan, yaşı 30-dan yuxarı olmayan, həqiqi hərbi xidmət müddətini tam başa vurmuş (kişilər üçün), özü və yaxın qohumları məhkum olunmamış, “Azərbaycan Respublikasının daxili işlər orqanlarında xidmət keçmə haqqında Əsasnamə”də müəyyən olunmuş şərtlərə cavab verən, aşağıda göstərilən şəhər və rayonlarda yaşayış yeri üzrə qeydiyyatda olan və hazırda yaşayan Azərbaycan Respublikasının vətəndaşları iştirak edə bilərlər:

Gəncə regionu üzrə: Gəncə, Goranboy, Göygöl, Samux, Şəmkir;

Şirvan regionu üzrə: Şirvan, Hacıqabul, Saatlı, Sabirabad, Salyan;

Quba regionu üzrə: Quba, Xaçmaz, Qusar;

Lənkəran regionu üzrə: Lənkəran, Astara, Masallı;

Şəki regionu üzrə: Şəki, Mingəçevir, Oğuz, Qəbələ;

Bərdə regionu üzrə: Bərdə, Ağdam, Tərtər, Yevlax.

Müsabiqədə iştirak etmək istəyən şəxslər 2017-ci il aprelin 17-dən mayın 17-dək http://www.mia.gov.az/index.php?/az/content/29942/ ünvanında yerləşdirilmiş elektron ərizə formasını şəxsən dolduraraq elektron poçt vasitəsilə DİN mətbuat xidmətinin internet ünvanına (metbuat@mia.gov.az) göndərməlidirlər.

Elektron ərizənin qeydiyyata alınması barədə müvafiq məlumat aldıqdan sonra müsabiqədə iştirak üçün dəvət olunan namizədlər şəxsiyyət vəsiqəsini, ali təhsil haqqında diplom, hərbi bilet (kişilər üçün), əmək kitabçasını təqdim etməlidirlər.

Müsabiqə qalibləri müvafiq xüsusi rütbə verilməklə Azərbaycan Respublikası Daxili İşlər Nazirliyinin kadrları tərkibinə daxil ediləcək. Onların qanunvericilikdə müəyyən olunmuş qaydada daxili işlər orqanları əməkdaşlarına şamil olunan imtiyazlardan istifadə hüququ olacaq.

Əlavə məlumatı (012) 590-99-07; (055) 861-73-11; (012) 590-93-64 əlaqə telefonlarından almaq olar.

Ombudsmanın Gəncə Regional Mərkəzi tərəfindən Göygöl rayonundakı Heydər Əliyev Mərkəzində həmin rayon ictimaiyyətinin, müxtəlif dövlət orqanlarının, o cümlədən rayon icra hakimiyyəti və polis şöbəsi əməkdaşlarının iştirakı ilə “Məişət zorakılığına qarşı mübarizə” mövzusunda tədbir keçirilib.

Tədbiri Göygöl Rayon İcra Hakimiyyətinin məsul əməkdaşı Babək Rəsulov giriş sözü ilə açaraq məişət zəminində törədilən zorakılıqla mübarizədə əhali arasında hüquqi maarifləndirmənin vacibliyini vurğulayıb.

İştirakçılara İnsan Hüquqları üzrə Müvəkkil Elmira Süleymanovanın salamlarını çatdıran Ombudsmanın Gəncə Regional Mərkəzinin rəhbəri Səbuhi Abbasov qeyd edib ki, keçirilən tədbir Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramına uyğun olaraq məişət zorakılığına qarşı mübarizə ilə bağlı qəbul edilmiş qanunun və digər normativ sənədlərin təbliği məqsədini daşıyır. Məişət zorakılığının qarşısının alınması nəzəriyyəsi və təcrübəsi göstərir ki, məişət zorakılığı hər zaman gender bərabərliyinin pozulması, adət və ənənə xarakterli münasibətlərin ifrat idrakı, iqtisadi asılılıq və digər amillərin təzyiqi altında yaranır. Ona görə gender bərabərliyinin təminatı, qadınlara qarşı zorakılığın, xüsusən cinayət xarakterli hərəkətlərin qarşısının alınması, məişət zorakılığı faktlarının hüquq pozuntusu kimi tanınması hər bir demokratik dövlətin vəzifəsidir. Məişət zorakılığı müasir cəmiyyət üçün böyük ictimai bəladır, bununla mübarizənin faydalılığı məişət zorakılığı qurbanlarının hüquqi və sosial sahələrdə mühafizə vasitələrinin mövcudluğundan asılıdır.

S.Abbasov 22 iyun 2010-cu il tarixli “Məişət zorakılığının qarşısının alınması haqqında” Azərbaycan Respublikası Qanununun müddəaları, həmçinin Ombudsman təsisatı tərəfindən bu sahədə həyata keçirilən tədbirlər, ərizə və şikayətlərə baxılması qaydaları, Müvəkkilin səlahiyyətləri, regional mərkəzlərinə müraciət etmək qaydaları barədə ətraflı məlumat verib.

Mövzu ilə bağlı Göygöl RPŞ-in əməkdaşları və digər iştirakçılar çıxışlar edərək cəmiyyətdəki məişət zorakılığı problemi ilə bağlı münasibətlərini bildirib. Tədbir iştirakçılarını maraqlandıran suallar cavablandırılıb.

İştirakçılar aktual mövzularda Göygöl rayonunda mütəmadi olaraq təşkil edilən hüquqi maarifləndirmə tədbirlərinə görə Müvəkkilə təşəkkür ediblər.

Oturaq həyat tərzi keçirmək əzələləri zəiflədir, fəqərə sütunundakı disklərə və oynaqlara daha çox yük düşür. Bu da onurğa sütunu xəstəliklərinin yaranmasına səbəb olur. Fəqərəarası diskin yırtığı ilə üzləşən pasientləri, bir qayda olaraq, əməliyyata cəlb edirlər.

Əslində isə  onurğa sütunu yırtıqlarının aradan qaldırılmaq üçün əməliyyata ehtiyac yoxdur.

Azərbaycan Bioloji Təbabət və Antihomotoksik Terapiya Cəmiyyətinin xətti ilə ölkəmizə dəvət olunmuş onurğa xəstəlikləri üzrə almaniyalı mütəxəssis, vertebroloq Gerhard Raysın fikrincə, yalnız aşağı və yuxarı ətrafların, yaxud sidik kisəsi və ya bağırsağın parezi belə əməliyyatı qaçılmaz edir. Qalan bütün hallarda fəqərəarası diskin yırtığı konservativ yolla müalicə oluna bilər:

“Müalicənin ən optimalı bioloji təbabət üsullarıdır. Fəqərəarası disk yırtığı diaqnozu ilə əməliyyat edilən pasientlərin bir müddət sonra həmin problemlə yenidən üzləşməsi halları tez-tez müşahidə olunur. Ümumiyyətlə, fəqərəarası diskin yırtığı olan insanlarda onun təkrar yaranma riski yüksəkdir. Buna görə də bioloji təbabətlə ilk növbədə birləşdirici toxumanı təmizləməyə çalışırıq. Çünki müasir dövrdə insanların çoxu sağlam həyat tərzi keçirmədiyi və düzgün qidalanmadıqları üçün birləşdirici toxuma turş toksinlərlə dolur və bu da onun zəifləməsinə gətirib çıxarır. Növbəti mərhələdə isə müalicə əzələlərin gücləndirilməsinə yönəldilməlidir. Əzələ gücləndikcə bağlara, oynaqlara və fəqərəarası disklərə düşən yük azalır”.

 

axar.az

Beynəlxalq Əmək Təşkilatı (BƏT) tərəfindən 2003-cü ildən etibarən 28 Aprel – Ümumdünya Əməyin Mühafizəsi Günü kimi elan edilib və bütün dünyada olduğu kimi, Azərbaycanda da hər il qeyd olunur.

BƏT-in statistikasına əsasən, hər il dünyada istehsalat qəzalarının təxminən 2,34 milyon nəfər insanın həlak olmasına, 160 milyondan çox insanın peşə xəstəliyinə məruz qalmasına, digər tərəfdən, bu qəzaların dünya üzrə ÜDM-in 4 faizinin, yaxud 2,8 trln. ABŞ dollarının itirilməsinə səbəb olduğunu nəzərə aldıqda, əməyin təhlükəsizliyi məsələsinin vacibliyi bir daha aydın olur.

Cari ilin ilk rübündə də Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən istehsalatla əlaqəli 31 bədbəxt hadisə qeydiyyata alınıb ki, həmin bədbəxt hadisələr nəticəsində 10 nəfər dünyasını dəyişib, 24 nəfər xəsarət alıb. Təhqiqat işləri aparılarkən bu qəzaların da məhz əməyin mühafizəsi tələblərinin yerinə yetirilməməsi səbəbindən baş verdiyi müəyyən olunub. Ona görə də hər bir işəgötürən əməyin mühafizəsinin idarə olunması məsələsinə xüsusi diqqət yetirməlidir.

Əməyin mühafizəsinin təmin olunması və istehsalatda bədbəxt hadisələrin qarşısının alınması üçün ilk növbədə işəgötürənlər tərəfindən işə cəlb olunmuş bütün işçilərlə bağlanmış əmək müqavilələrinin əmək müqaviləsi bildirişləri üzrə elektron informasiya sistemində qeydiyyatdan keçirilərək rəsmiləşdirilməsi təmin olunmalıdır. MDB məkanında ilk dəfə olaraq 2014-cü ilin iyul ayında Azərbaycanda tətbiqinə başlanılan əmək müqaviləsi bildirişləri üzrə elektron informasiya sistemi əmək hüquqlarının təminatına dövlət nəzarəti sahəsində müasir, çevik və şəffaf idarəetmə mexanizmi formalaşdırmaqla, işçilər üçün sağlam və təhlükəsiz əmək şəraitinin yaradılması məsələlərinə də nəzarət imkanı verir.

Qeyd edək ki, 2017-ci ildə Ümumdünya Əməyin Mühafizəsi Gününün mövzusu “Əməyin mühafizəsi üzrə məlumatların toplanması və istifadəsinin optimallaşdırılması”dır.

AZƏRTAC

Dünyada 212 milyon insan malyariya xəstəliyinə yoluxub.

Bu barədə Ümumdünya Səhiyyə Təşkilatının (ÜST) yaydığı hesabatda bildirilib.

Təşkilatın məlumatına görə, 2015-ci ildə 90 faizi Afrika qitəsi ölkələrində olmaqla, dünya üzrə 212 milyon nəfər malyariya xəstəliyinə tutulub və həmin insanlardan 429 mini ölüb.

Hesabatda vurğulanıb ki, malyariya daha çox Afrika qitəsində yerləşən ölkələrdə yayılıb.

Hesabatda qeyd olunub ki, 2000-ci ilin əvvəlindən etibarən bu xəstəliyə tutulanların sayında ciddi azalmalar müşahidə edilir.

axar.az

Heç bir kosmetik vasitə istifadə etmədən üzdəki yağı azaldmaq mümkündür.

Yağlı üzdən qurtulmanın əsas yolu üzü hər gün soyuq yox, iliq su ilə yumaqdır.

Üzünüzü qəti şəkildə tərkibində alkaqol olan losyonlarla silməyin. Onun yerinə təbii aloedən olan losyonalardan istifadə edin.

Soyuq süd və xiyar qabığı ilə gündə bir neçə dəfə üzü silmək də üz yağlarını azaldır.

Qeyd edək ki, əgər siz bu prosedurlardan mütəmadi olaraq istifadə etsəniz, üzünüzdə olan yağlanma bir aya 50 faiz azala bilər.

axar.az

Siqaret, enerji içkisi, duz, oturaq həyat tərzi, stress və fiziki aktivliyin aşağı olması ürək-damar problemlərini yaradan başlıca səbəblərdir.

Bu barədə Azərbaycan Tibb Universitetinin (ATU) Tədris Terapevtik Klinikasının kardioloqu Fuad Səmədov ATU-nun mətbuat xidmətinə bildirib.

Həkim deyib: “Azərbaycanda ürək-damar sistemi problemlərinin yaradan əsas səbəblər şəkərli diabet, piylənmə, təzyiq, böyrək çatışmazlığı kimi bir sıra xəstəliklərdir. Stress də ürək problemlərinin yaranmasında başlıca amillərdən biridir. Təəssüf ki, ölkəmizdə fərqli səbəblərdən yaranan stressdən əziyyət çəkənlərin sayı çoxdur. İnsanların özlərinə qarşı laqeyd münasibət göstərmələri yalnız ürəklə bağlı deyil, bir çox digər problemlərin də ortaya çıxmasına səbəb olur.

Diabet ürək xəstəliyinin bir ekvivalentidir və bu, bütün dünyada belə qəbul edilir. Vaxtında tənzimlənən şəkər isə ciddi risk amili olmaqdan çıxır. İndi diabet xəstələrinin bir problemi də insulin qəbulunun gecikdirilməsi və ya bu preparatın qəbulundan yayınmalarıdır.

Təzyiq bu gün cəmiyyətimizdə insanlar arasında kütləvi hal alıb, hətta gənclər belə bundan əziyyət çəkirlər. Hər kəsi düşündürən bir məsələ də tam sağlam bir insanda təzyiqin oynamasıdır. Bu, normal haldır. Cəmiyyətimizdə işçi təzyiqi anlayışı var. Bu qəbul edilən təzyiq normasıdır, bəzi insanlar yalnız sırf şikayəti olduğu halda təzyiqlərini mütəmadi olaraq ölçdürürlər. Bu gün insult keçirənlərin 90 faizi tənzimlənməmiş təzyiqi olan xəstələrdir. Belə insanlar sonradan yaranacaq fəsadların qarşısını almaqda çətinlik çəkəcəklərindən xəbərsiz, həkim məsləhəti olmadan müalicə olunmağa çalışırlar. Belə problemlərə zamanında müdaxilə etdikdə yarana biləcək ən ciddi xəstəliklərin qarşısını almış olarıq.

Ötən əsrin 80-ci illəri ilə müqayisədə bu gün ürək problemləri istər cavan, istərsə də yaşlı insanlar arasında geniş yayılıb. Ürək problemləri ən çox 50-60 yaşlı insanlar arasında üstünlük təşkil edir. Xüsusilə qadınlar arasında menopauzadan sonrakı dövrdə bu problem daha çox özünü büruzə verir. Gənclər arasında isə bu xəstəliklərin geniş yayılma səbəbləri bir çox problemlərdən qaynaqlana bilər. Misal üçün, oturaq həyat tərzi, qidalanma qaydalarının pozulması və ya gec saatlarda yemək ürək xəstəlikləri zamanı ölüm riskini artırır. Yemək yedikdən dərhal sonra yatmaq bir sıra problemlərin yaranmasına səbəb olur. Ürək xəstəlikləri irsi olaraq da ötürülür. Erkən yaşında dünyasını dəyişənlərin övladlarının öz həyat tərzlərinə daha diqqətlə yanaşmaları lazımdır.

Bu gün ölkəmizdə əhalinin fiziki aktivliyi çox aşağı səviyyədədir. İnsanlar xarici ölkələrlə müqayisədə çox nadir hallarda idmanla məşğul olurlar. Gənclər həddindən artıq istifadə etdikləri enerji içkilərinin mənfi təsirlərindən xəbərsizdirlər. Mən həkim olaraq gənclərin buna nə qədər meyilli olduğunun şahidi olmuşam. İstehsalçının belə içkilərinin gündə bir dəfə istifadəsinə icazə verdiyi halda, bəzən istifadə 8-10 dəfəyə qədər artır. 12-13 yaşlı yeniyetmələrin həyatları üçün isə enerji içkiləri böyük təhlükə mənbəyidir. Gənclər arasında bu növ içkilərə qarşı mübarizə məqsədilə klinikamızda yeni layihəyə də başlamışıq və maarifləndirmə işlərinin aparılmasını planlaşdırırıq. Valideynlər də bu məsələdə diqqətli olmalıdırlar. Çünki bu içkilərin enerji verməsi, əhvalı yaxşılaşdırması kimi söyləntilər qətiyyən məntiqli yanaşma deyil.

Əsas problemlərdən biri də cəmiyyətimizdə duz istifadəsinin həddindən artıq çox olmasıdır. Duz məhdudiyyəti tətbiq etdikdən sonra bir çox xəstələrin təzyiqinin normallaşdığını müşahidə etmişik. Orqanizmə heç bir xeyri olmayan duzdan istifadənin azaldılması insult, ürək çatışmazlığı riskini azaldacaq, təzyiqi normallaşdıracaq.

Ürək və ağciyəri tam sağlam olan insanın oturaq həyat tərzi sürməsi onun təngnəfəsliyinə səbəb ola bilər. Əsası isə cəmiyyətimizdə insanların bu kimi kiçik məsələlərə laqeyd yanaşmalarıdır. Şəkəri, təzyiqi olan, siqaret çəkən insanların həm ürək, həm də ağciyər müayinəsindən keçmələri vacibdir. Bəzən xəstədə nə ağrı, nə də təngnəfəslik olur. Bu zaman həmin insan özünü bir il bundan öncə ilə müqayisə etməlidir. O, bir il bundan əvvəl də bu işləri etdiyi zaman onda bu kimi halların olub-olmadığını xatırlamalıdır. Çünki bu bəzən ilk siqnal da ola bilər.

Ürək-damar problemləri fiziki hərəkət və ciddi emosionallıq nəticəsində də ortaya çıxa bilər. Sinədə yanğı, göynəmə, kürək nahiyəsində olan ağrılar ilkin əlamət sayıla bilər, əgər bu ağrılar bir dəqiqədən artıq davam edərsə, problemin başlanğıcı hesab etmək olar. Bəzən bu problem gizli də davam edə bilər. Məhz bu səbəbdən hər bir İnsan öz bədənini tanımalıdır”.

Azərtac

Adətən fəsil dəyişikliyi zamanı gözdə qaşınma olur, bəzən sulanmalar müşahidə olunur. Bu, allergiyadır, yoxsa gözlə bağlı digər problem? İnsanın ən vacib orqanlarından biri olan gözlərlə bağlı nələrə diqqət vermək lazımdır?

Bu və digər göz problemləri ilə bağlı Azərbaycan Tibb Universitetinin (ATU) Tədris Cərrahiyyə Klinikasının (TCK) oftalmologiya şöbəsinin müdiri Qurban İsmayılov ATU-nun mətbuat xidmətinə müsahibəsində danışıb.

-Fəsil dəyişən zaman əksər insanlarda gözlə bağlı müxtəlif problemlər yaranır. Bunun səbəbi nədir?

-Fəsil dəyişikliyi ilə əlaqədar olaraq gözdə olan sulanma və bu kimi digər şikayətlər adətən “allergik konyunktivit” adlandırdığımız göz xəstəliyi ilə əlaqədar olur. Adətən hər dəfə fəsillər dəyişərkən və ya bitkilərin tozlanma zamanı xəstələr bu şikayətlərlə həkimə müraciət edirlər. Yazılan dərmanlar sadəcə xəstənin şikayətlərini azaldıb, narahatlığını müəyyən müddətliyə aradan qaldırır. Lakin bəzən xəstələr həkim məsləhəti olmadan özləri müxtəlif dərmanlardan istifadə edirlər. Bu isə xəstəyə ziyan verə bilər. Ona görə də, belə hallarda həkim müayinəsindən keçdikdən sonra uyğun dərmanlardan istifadə etmək məsləhətdir.

-Bəzi insanlar qaş nahiyəsindəki ağrıların gözdən qaynaqlandığını düşünürlər. Bu, nə dərəcədə doğrudur?

-Qaş nahiyəsində olan ağrılar həm gözlə, həm də sinir sistemi ilə əlaqəli ola bilər. Dəqiq diaqnoz qoymaq üçün bu ağrıların vaxtı, müddəti, xarakterini nəzərə almaq, müayinədən sonra mənşəyini dəqiqləşdirmək olur.

-Son zamanlar ən çox hansı göz şikayətləri ilə bağlı müraciətlər olur?

-Şikayətlər çoxşaxəli olduğu kimi, səbəblər də müxtəlifdir. Allergik problemlərlə yanaşı, diabet xəstələri, gözdaxili təzyiqi, refraksiya problemi olan keratokonus və sairə bu kimi xəstəliklərlə müraciət edənlər də kifayət qədərdir.

-Bu xəstəliklərdən hansılarına cərrahi müdaxilə tələb olunur?

-Tibdə, xüsusilə də oftalmologiyada cərrahi müdaxilə yalnız ehtiyac olduğu halda icra edilir. Əgər xəstənin sağalması üçün cərrahi müdaxilədən başqa müalicələr mövcuddursa, ilk olaraq onlar icra edilir. Ancaq gözdə elə xəstəliklər var ki, müalicəsi ancaq cərrahi yolla aparıla bilər. Həmçinin bəzən xəstənin istəyini də nəzərə alaraq cərrahi müdaxilə məsləhət görülə bilir. Məsələn, eynək taxmaq istəməyən xəstələrə, müvafiq yoxlamadan sonra cərrahi müdaxilə məsləhət görülə bilər.

Katarakta, xalyazion, karatakonuson, vitrektomiya, çəpliyin korreksiyası, göz yaşı yolları əməliyyatı, qapaq plastikası, qapaqlarda olan xoş və bəd xassəli törəmələr, arqon lazer fotokoaqulyasiya, barier lazer fotokoaqulyasiya, YAG lazer, refraktiv əməliyyatlar son 1 il ərzində şöbəmizdə icra edilən əməliyyatlardan bəziləridir.

-Göz əməliyyatı icra edənlərin yaş həddi barədə nə demək olar?

-Göz əməliyyatlarının heç də hamısı yaşlı xəstələr üçün deyil. Katarakta-el arasında “mirvari suyu” kimi tanınan xəstəlik adətən yaşlılar arasında çox rast gəlinir. Ancaq yaşlılarda refraktiv korreksiya məqsədilə icra olunan eksimer lazer əməliyyatlarının sayı gənclərdə kifayət qədər azdır. Həmçinin 35 yaşdan sonra irəliləməsi dayanan keratokonus xəstələrində “korneal kross linking” kimi əməliyyatlar icra olunmur. Yəni, əməliyyatın yaşlıya və cavan insana icrası xəstəliyin xarakterindən asılıdır.

Azərtac

Akademik, görkəmli oftalmoloq Zərifə xanım Əliyevanın anadan olmasının 94-cü ildönümü münasibətilə Mərkəzi Neftçilər Xəstəxanasında pulsuz göz müayinələri keçirilib. Xətai Rayon İcra Hakimiyyətinin təşkilatçılığı ilə keçirilən xeyriyyə tədbirində şəhid ailələri, Qarabağ və Böyük Vətən müharibəsi, 20 Yanvar əlilləri, ahıl və kimsəsiz qocalar olmaqla 200-dən çox vətəndaş müayinədən keçirilib. Göz xəstəlikləri aşkar olunan 10 nəfər pulsuz əməliyyat olunmaq üçün qeydiyyata götürülüb.

Xəstəxanada Zərifə xanım Əliyevanın xatirəsinə həsr olunmuş yığıncaqda Xətai Rayon İcra Hakimiyyəti başçısının müavini Jalə Abdıyeva Zərifə xanımı istedadlı oftalmoloq, gözəl ziyalı, xeyirxah və nəcib insan olmaqla yanaşı müstəqil Azərbaycan dövlətinin memarı və qurucusu, xalqımızın ümummilli lideri Heydər Əliyevin vəfalı ömür–gün yoldaşı kimi xatırlandığını söyləyib. Mərkəzi Neftçilər Xəstəxanasının baş həkimi Leyla Seyidbəyova və başqaları Zərifə xanım Əliyevanın əziz xatirəsinin tibb elminə böyük töhfələr vermiş peşəkar həkim, nəcib peşə sahibi, eyni zamanda xalqını, millətini sevən gözəl ziyalı, sədaqətli həyat yoldaşı və qayğıkeş ana kimi yaddaşlara həkk olunduğunu bildirib.

Azərtac

Amerikalı tədqiqatçılar ABŞ və Avropa ölkələrində geniş yayılan xroniki yorğunluq sindromunun səbəbini tapıblar. Məlum olub ki, xəstəliyə bağırsaq mikroflorasının pozulması səbəb ola bilər.

“Lenta.ru” saytına istinadla xəbər verilir ki, alimlərin bu barədə məqaləsi “Microbiome” jurnalında dərc olunub.

Xroniki yorğunluq sindromu və ya mialgik ensefalomielit, hətta yaxşıca dincələndən sonra da davam edən yorğunluq şəklində təzahür edir. Tədqiqatçıların məlumatına görə, təkcə ABŞ-da bu sindromdan təxminən 2,5 milyon adam əziyyət çəkir. Lakin onun yaranmasının əsl səbəbləri indiyə qədər məlum deyildi.

Məlumdur ki, mədə-bağırsaq traktında yaşayan bakteriyalar mərkəzi sinir və həzm sistemləri arasında əlaqə yaradır. Buna görə də tədqiqatçılar mialgik ensefalomielitin disbakteriozla bağlı olub-olmadığını yoxlamağı qərara alıblar. Tədqiqatda 50 xroniki yorğunluqdan əziyyət çəkən və 50 sağlam könüllü iştirak edib.

Məlum olub ki, xroniki yorğun adamlarla sağlam adamlarda bakteriyaların tərkibi fərqlənir. Xroniki yorğun adamlarda disbakterioz aşkar edildiyi üçün alimlər xroniki yorğunluq sindromuna məhz disbakteriozun səbəb olduğunu hesab edirlər.

Azərtac

Pediatr Şəhla Rüstəmovanın məqaləsi.

Uşaq yalanı bir əyləncə də ola bilər, amma adətən daha ciddi problemlərə işarədir və buna diqqətlə yanaşmaq lazımdır. Əgər uşaq yalan danışırsa, bu zaman hansı fikirlər yarana bilər? Uşaq psixoloqu Lorens Katner uşağı yalana motivasiya edən 5 əsas səbəbləri sadalayır:

CƏZA QORXUSU. Uşaqlar cəzalanmaqdan qorxurlar. Əgər valideynlər uşaqlarını doğrudan da cəzalandıra və onlardan real olmayan nə isə gözləyirlərsə. Məsələn, valideyn istəyir ki, 8 yaşlı oğlu əla oxusun və hər gün əla qiymət alsın, ancaq bu, belə olmayan halda uşaq cəzalanır və futbol oynamaq üçün həyətə buraxılmır. Təbii ki, belə vəziyyətdə futbola böyük həvəsi olan uşaq yaxşı qiymət almadığı halda bunu valideyndən gizlədəcək, yaxud “yaxşı cavab verdim, amma müəllim qiymət yazmadı” kimi yalanlar danışacaq.

MƏNLİYİN ARTIRILMASI. Məktəbli uşaqlar dostları arasında statusunu artırmaq və yaxşı görünmək üçün yalan danışırlar. Məsələn: məşhur idmançı, aktyor, müğənni ilə rastlaşdığını və ya çox zəngin olduqlarını yoldaşlarına söyləyirlər. Əgər lovğalıq halları vaxtaşırı müşahidə olunursa, narahatçılığa səbəb yoxdur. Amma uşaq öz statusunu artırmaq üçün təkrarən yalan danışırsa, bu, uşağın ozündən tam narazı olmağına işarə edən ciddi bir siqnaldır. Bu hallarda aydınlaşdırmaq lazımdır ki, uşaq hansı səbəbdən özünü alçaldılmış və xeyirsiz hesab edir? Bəlkə məktəbdə yoldaşları uşağa lağ edir, fikir vermirlər?

ETİRAZ. Bir çox uşaqlar üçün yalan – məhdudiyyətlərə əks getmək, valideynlərinin avtoritetinə çağırış atmaq üsuludur. 10-12 yaşlarında uşaqlar düşünürlər ki, hər bir şeyi valideynə söyləməyə ehtiyac yoxdur və valideynin sualını hökm, təzyiq kimi qəbul etdikləri zaman yalan danışa bilərlər.

ŞƏXSİ SƏRHƏDLƏRİN TƏYİNİ. Uşaq böyüdükcə müstəqilliyinin, şəxsi həyatının və şəxsi məsafəsinin olmasının vacibliyini kəskin hiss edir. Valideynin nəzarəti və himayəsi artdıqca, uşaq daha da çox sirr saxlayır və yalan danışır. Hətta ondan əl çəkilməsi məqsədilə, kobudluğa da yol verə bilirlər: “Sən hara gedirsən?” – “Heç yerə!”, “Nə iş görürsən? – “Heç nə!”, “O kimdir?”- “Sən onu tanımırsan!”.

AİLƏDƏ OLAN PROBLEMLƏR. Uşaq daim yalan danışırsa, bu, ailədə hər hansı bir problemin olmasına işarədir. Əsasən də, yalana oğruluq və vandalizm (ətrafda olan əşyalara ziyan verilməsi) qoşulan zaman. Əgər uşaq tərəfindən yaranan pisliklərin qurbanı ailə üzvləridirsə, bu, ciddi diqqət mərkəzində olmalıdır, çünki sözlərdən daha ifadəli olan yardıma çağırış ümidsizlik hallarına işarə edə bilər. Adətən boşanan ailələrin uşaqlarında belə hallara tez-tez rast gəlinir. Bəzi hallarda isə uşaqlar öz hərəkətləri ilə valideynləri yenidən birləşməyə sövq edirlər.

aile.lent.az

“Elektron hökumət” portalında elektron arayışların sayı artırılıb.

Məlumat Hesablama Mərkəzindən verilən məlumata görə, Dövlət Dəniz Administrasiyası (DDA) tərəfindən təqdim edilən informasiya ehtiyatı əsasında “Dənizçinin şəxsiyyət sənədi” adlı elektron arayış hazırlanaraq portala inteqrasiya edilib.

Yeni istifadəyə verilən bu arayış növü dənizçinin şəxsiyyət sənədi üzərində hazırlanır. “Dənizçinin şəxsiyyət sənədi” üzrə məlumatlar isə Daxili İşlər Nazirliyinin “Giriş-çıxış və qeydiyyat” İdarələrarası Avtomatlaşdırılmış Məlumat Axtarış Sistemindən (İAMAS ) götürülür.

“Dənizçinin şəxsiyyət sənədi” adlı elektron arayışı əldə etmək üçün “Elektron hökumət” portalında“Elektron arayışlar” bölməsinə daxil olmaqla həmin arayışı seçmək lazımdır.

Qeyd edək ki, hazırda “Elektron hökumət” portalındakı arayışların sayı 17-dir. “Elektron arayışlar” günümüzdə ən çox təlabatın olduğu elektron xidmət növüdür. Portalın əməkdaşları tərəfindən aparılan araşdırmalar göstərir ki, ölkəmizdə müxtəlif növ əməliyyatlarda vətəndaşlardan 40-dan artıq kağız üzərində arayış növü tələb olunur. Nəzərə alsaq ki, kağız üzərində arayışlarda əks olunan məlumatlar elektron arayışlarla eyni məlumat sistemlərindən götürülür, bu sənəd növlərinin elektron təqdim olunması mümkündür.

Arayış növlərinin elektron təmin olunması vətəndaşlar üçün şəffaf, səmərəli xidmət olmaqla yanaşı, qurumların işini də sadələşdirir. Elektron arayışların tətbiqi bu günə qədər kağız daşıyıcıda olan sənədlər üçün ayrılan vəsaitə qənaət deməkdir, eyni zamanda daimi və daha etibarlıdır.

Bununlada sözügedən elektron arayışın portala inteqrasiyasından sonra, portaldakı ümumi e-arayışların sayı 17, ümumi e-xidmətlərin sayı isə 447 oldu.

Trend

Kanadada yerləşən Arton Kapital şirkəti dünya ölkələrinin beynəlxalq pasportlarının indeksi ilə bağlı araşdırma aparıb.
Beynəlxalq Pasport indeksinə liderlik edən Almaniya və Sinqapur vətəndaşlarının 159 ölkəyə vizasız səyahət etmək imkanı var.
193 ölkənin yer aldığı siyahıda Azərbaycan 63-cü yerdə qərarlaşıb. Belə ki, Azərbaycan vətəndaşları beynəlxalq pasportla 63 ölkəyə vizasız gedə bilirlər.
Siyahıda sonuncu yerdə Əfqanıstan qərarlaşıb. Əfqanıstan vətəndaşları 24 ölkəyə vizasız səyahət etmək imkanlarına malikdirlər.
Siyahıda Ermənistan Azəraycandan 4 pillə geridə – 67-ci yerdədir. Ermənistan vətəndaşları beynəlxalq pasportla 59 ölkəyə vizasız getmək imkanına malikdir.
azvision.az

Azərbaycanda tütünün qadağan olunduğu yerlərdə sulu qəlyandan istifadə də qadağan olunur. Bu, Milli Məclisdə ikinci oxunuşda müzakirəyə çıxarılan “Tütün məmulatlarının istifadəsinin məhdudlaşdırılması haqqında” qanun layihəsində əksini tapıb.
Bu gün MM-də “Tütünlə mübarizəyə dair Azərbaycan qanunvericiliyinin gücləndirilməsi” mövzusunda keçirilən dəyirmi masada bildirilib ki, layihənin birinci oxunuşunda tütünün qadağan olunduğu yerlərdə sulu qəlyanın da qadağan olunması barədə səslənən təkliflər nəzərə alınıb və bununla bağlı qanun layihəsinin 1-ci maddəsində dəyişiklik edilib.
Lent.az

Tomsk Dövlət Universitetinin alimləri insan sağlamlığının vəziyyəti və xəstəliklərə qarşı meyli haqqında məlumat verən saçın kimyəvi analizinin yeni üsulunu tapıblar.

Trend-in məlumatına görə, saçın spektral analizi üsulu insan orqanizmində həyati əhəmiyyətli mikroelementlərin konsentrasiyasını müəyyən etməyə imkan verir. Onların disbalansı uzun müddət gizli şəkildə davam edən müxtəlif xəstəliklərin inkişafına səbəb olur. Sözügedən metod bir dəfəyə 30 kimyəvi elementin konsentrasiyasını müəyyən etməyə imkan verir.

Yeni üsul artıq öz səmərəliliyini göstərib. Belə ki, alimlər işemik insult keçirmiş pasiyentlərin saçının analizini apararaq qanın element tərkibinin dəyişdiyini, toksik elementlər olan kadmium və qurğuşunun konsentrasiyasının artmasını və sinkin konsentrasiyasının azalmasını aşkar ediblər.

publika.az

XƏBƏR LENTİ