Cümə, Fevral 24, 2017
ELM VƏ TƏHSİL

Fevralın 23-də AMEA Nizami Gəncəvi adına Milli Azərbaycan Ədəbiyyatı Muzeyində Xocalı faciəsinin 25-ci ildönümünə həsr olunmuş “Qara yubiley – Xocalı faciəsinin 25 yaşı” mövzusunda elmi sessiya keçirilib.

Tədbirdə muzeyin direktoru, akademik Rafael Hüseynov XX əsrin ən dəhşətli faciəsi olan Xocalı soyqırımı və onun başvermə səbəbləri, şəhərin işğalı zamanı dinc əhaliyə qarşı törədilmiş genişmiqyaslı qanlı hərbi cinayət barədə ətraflı məlumat verib. Vurğulayıb ki, bu dəhşətli hadisə millətimiz üçün həm böyük insan tələfatı, həm də çoxlu sayda tarixi mədəniyyət abidələrinin məhv edilməsi ilə nəticələnib.

Muzeyin direktoru bu soyqırımının xalqımıza qarşı planlı şəkildə gerçəkləşdirilmiş terror, deportasiya və etnik təmizləmə siyasətinin tərkib hissəsi kimi, təkcə Azərbaycan xalqına deyil, bütün insanlığa qarşı yönəlmiş ən ağır cinayət olduğunu diqqətə çatdırıb. Qeyd edib ki, ulu öndər Heydər Əliyev tərəfindən Xocalı faciəsinə siyasi-hüquqi qiymət verilib, bu faciənin ermənilərin Azərbaycan xalqına qarşı həyata keçirdiyi soyqırımı aktı olduğu bütün dünyaya bəyan edilib.

“Azərbaycan xalqının uğradığı soyqırımları: mərhələlər, dərslər, vəzifələr” mövzusunda məruzə edən akademik R.Hüseynov bildirib ki, tarix boyu ermənilər xalqımıza qarşı düşmənçilik mövqeyi tutub, ayrı-ayrı dövrlərdə Azərbaycanın inamlı addımlarla irəliləməsindən narahat olaraq beynəlxalq hüquq normalarına zidd müxtəlif təxribat və qırğınlar törədiblər. Heydər Əliyev Fondunun vitse-prezidenti Leyla Əliyevanın təşəbbüsü ilə təsis edilmiş “Xocalıya ədalət!” beynəlxalq kampaniyasının uğurla həyata keçirilməsi nəticəsində artıq bir sıra dövlətlər Xocalıda törədilən qırğını soyqırımı kimi qəbul edib.

Tədbirdə muzeyin elmi işlər üzrə direktor müavini, filologiya üzrə elmlər doktoru, professor Xatirə Bəşirlinin “Xocalı soyqırımının tanıdılması Azərbaycan dövlətinin xarici siyasətinin əsas prioritetlərindən biri kimi”, filologiya üzrə elmlər doktoru Şəfəq Əlibəylinin “Türkdilli mənbələrdə Xocalının səsi”, muzeyinin elmi katibi, filologiya üzrə fəlsəfə doktoru Nuranə Əsədullayevanın “Xocalı faciəsinin ədəbiyyat və mədəniyyətdə əksi” mövzusunda məruzələri dinlənilib.

Fevralın 23-də Azərbaycan Dövlət Neft və Sənaye Universitetində (ADNSU) yazıçı, Əməkdar Jurnalist, Milli Məclisin deputatı Elmira Axundova ilə görüş olub.

ADNSU-dan bildiriblər ki, görüşdə bu ali məktəbin rektoru, professor Mustafa Babanlı təhsil müəssisəsində “Azərbaycanı tanıyaq və tanıdaq” layihəsi çərçivəsində alim və yazıçılarla, ictimai xadimlərlə tələbələrin görüşlərinin təşkil edilməsinin səmərəli olduğunu diqqətə çatdırıb.

Yazıçı, Əməkdar Jurnalist E. Axundovanın yaradıcılığı, ictimai fəaliyyəti barədə danışan rektor onun əsərlərinin əhəmiyyətini vurğulayıb.

Elmira Axundova müasir müstəqil Azərbaycan dövlətinin qurulmasında, inkişafında və dünyaya tanınmasında ümummilli lider Heydər Əliyevin misilsiz tarixi xidmətlərindən bəhs edib, Ulu Öndərlə bağlı xatirələrini bölüşüb.

Müasir dünyada təhsilin mühüm rolunu xatırladan deputat gənclərə tövsiyələrini verib, onları vətənpərvərliyə, təhsildə yüksək nailiyyətlər əldə etməyə çağırıb.

Sonra E. Axundova tələbələrin suallarını cavablandırıb, onlara öz kitablarını hədiyyə edib.

AZƏRTAC

“Həftəyə bir kitab oxuyaq” layihəsinə start verilib. Bakı şəhəri 165 nömrəli tam orta məktəbin təşkilatçılığı ilə reallaşdırılan layihənin məqsədi şagirdlərin mütaliəyə diqqətinin cəlb olunması, yeniyetmə və gənclərin oxu vərdişlərinin inkişaf etdirilməsi və kitaba olan marağın daha da artırılmasına nail olmaqdan ibarətdir. Layihənin təqdimat mərasimində bildirilib ki, şagirdlərin asudə vaxtının səmərəli təşkili, mütaliə vərdişlərinin formalaşdırılması və motivasiyanın artırılması üçün əlverişli şəraitin yaradılması mühüm amildir. Elə bu məqsədlə, təhsil nazirinin “Ümumtəhsil məktəb şagirdlərinin mütaliə vərdişlərinin təkmilləşdirilməsi və onlarda mütaliə mədəniyyətinin formalaşdırılması ilə bağlı tədbirlər barədə” əmrinə uyğun olaraq belə bir layihə gerçəkləşdirilir. Tədris ilinin sonuna kimi davam edəcək layihə çərçivəsində şagirdlərin oxuduqları kitablar “Dəyirmi masa” arxasında təhlil olunacaq və yaxud inşa yazı işləri vasitəsilə dəyərləndiriləcək. Təhlil və müzakirələr hər həftə bir sinifdə təşkil olunacaq.

AMEA Mərkəzi Elmi Kitabxanasında (MEK) fevral ayı ərzində daxil olan sənədlərin təqdimatı keçirildi.

Mərkəzi Elmi Kitabxananın direktoru Leyla İmanova  MEK-də görülən işlərdən söz açıb. Onun sözlərinə görə kitabxana milli dəyərlərin təbliği istiqamətində ciddi işlər görür. L.İmanova MEK-in Milli Rəqəmsal Yaddaş (MRY) bazası haqqında məlumat verib. Onun sözlərinə görə MRY-nin məqsədi Azərbaycanın qədim mədəniyyətinin, tarixinin bəşəriyyətin inkişafına verdiyi töhfələr barədə Azərbaycanda və ölkəmizin hüdudlarından kənarda mövcud olan bütün məlumatları toplamaq, sistemləşdirmək, rəqəmsallaşdırmaq, elektron kataloqa salmaq, arxivləşdirmək, yerli və dünya oxucusunun, tədqiqatçılarının istifadəsinə verməkdir.

MEK-in Beynəlxalq və İctimaiyyətlə Əlaqələr şöbəsinin müdiri Mübariz Göyüşlü  MEK fondlarında saxlanılan incilərin, şəxsi kitab  kolleksiyalarının, yeni sənədlərin təqdimatlarının ənənəvi olaraq hər həftə keçirildiyini qeyd etdi. M.Göyüşlü keçirilən tədbirlərin və görülən işlərin üç dildə yayımlanan mek.az saytında və kitabxananın sosial şəbəkələrdəki səhifələrində operativ şəkildə işıqlandırıldığını vurğuladı.

Kitabxananın Fondların formalaşdırılması şöbəsinin əməkdaşı Qönçə Cəlilova fevral ayı ərzində MEK-ə daxil olan sənədlər (kitab, jurnal, dissertasiya, avtoreferat və s.) haqqında slaydlı təqdimatla çıxış etdi. O, bildirdi ki, MEK-in fondları pulsuz məcburi nüsxələr, hədiyyələr, beynəlxalq kitab mübadiləsi və s. üsullarla formalaşdırılır. Q.Cəlilova MEK-in fevral ayı ərzində hədiyyə yolu ilə 121 kitab, 57 jurnal, pulsuz məcburi nüsxə olaraq 78 kitab, 62 jurnal,  3 avtoreferat, 2 elektron vəsait əldə etdiyini açıqladı. Daha sonra təqdimatçı bir sıra kitablar və jurnallar haqqında ətraflı məlumat verdi.

“Nadir Şah”, “Tamerlan”, “Şah arvadı və Cadugər” kimi  tarixi romanlarını MEK-ə hədiyyə edən  “Olaylar” qəzetinin baş redaktoru, yazıçı-publisist Yunus  Oğuz  bu səpkidə keçirilən tədbirlərin gənclərdə oxu mədəniyyətinin, mental dəyərlərin, fəlsəfi fikirlərin formalaşmasında müsbət rol oynayacağını bildirdi.

AMEA Fəlsəfə İnstitutunun Müasir fəlsəfə problemləri şöbəsinin müdiri, fəlsəfə üzrə elmlər doktoru  Əli Abasov tədbirdən məmnunluğunu ifadə edərək, müasir dünyamızda təşəkkül tapan yeni fəlsəfi baxışların AMEA-nın ayrı-ayrı institutlarına tətbiq edərək, onların üzvi şəkildə bağlılığını təmin etməyin vacibliyindən danışdı.

AMEA Fəlsəfə İnstitutunun əməkdaşı, fəlsəfə üzrə elmlər doktoru Əbülhəsən Abbasov Fəlsəfə İnstitunun prioritet fəaliyyət istiqamətinin cəmiyyətdəki mövcud problemlərə qeyri-ənənəvi yanaşaraq, yeni fəlsəfənin sisteminin işlənilməsi, postneoklassik dövrün epistemologiyasını ortaya qoyaraq praktik həll üsullarının ictimaiyyətə çatdırılması olduğunu qeyd etdi. O, bunun Azərbaycan fəlsəfə tarixinin uğuru olduğunu bildirdi.

ADU-nun Regionşünaslıq kafedrasının müdiri, dosent Sevdagül Əliyeva MEK-ə təqdim etdiyi “Norveç etnoqrafiyası” kitabı haqqında məlumat verdi. Tur Heyerdalın Azərbaycana səfəri, bunun tarixi və nəzəri cəhətdən dəyərini, iki ölkə arasında yaxşı münasibətlərin qurulmasında vacib rolunu qeyd etdi.

AMEA Arxeologiya və Etnoqrafiya İnstitutunun əməkdaşı İsmayıl Umudlu insanların nəsil bağlılığını əks etdirən – şəcərə haqqında olan məlumat, sənəd və faktların  bir yerdə toplanaraq, MEK daxilində fond yaradılmasını təkilif etdi. AMEA Fəlsəfə İnstitutunun əməkdaşı Rauf Məmmədov belə bir platformada elmin müxtəlif istiqamətlərində aparılan araşdırmaların, elmi nəticələrin sinergetik şəkildə bir müstəvidə müzakirəsinin yeni tarixi faktların aşkar olunmasına gətirib çıxaracağına əminliyini ifadə etdi.

MEK-in Kitabxana-Xidmət şöbəsinin müdiri Aygün Səfərova kitabxananın Azərbaycanın təbliğ edilməsi, beynəlxalq kitab mübadiləsi istiqamətində gördüyü işlərdən bəhs etdi.

Sonda qarşılıqlı maraq doğuran bir sıra məsələlər ətrafında fikir mübadiləsi aparıldı.

AMEA-nın Qafqazşünaslıq İnstitutunda Xocalı soyqırımının 25-ci ildönümünə həsr olunmuş “Bəşəriyyətə və sivilizasiyaya qarşı ağır cinayət: Ermənistanın Xocalıda törətdiyi soyqırımı” mövzusunda elmi seminar keçirilib.

Tədbirdə institutun direktoru, professor Musa Qasımlı Xocalı soyqırımı haqqında ətraflı məlumat verib. O, 1992-ci ilin fevral ayının 25-dən 26-na keçən gecə erməni silahlı qüvvələrinin blokada şəraitində olan köməksiz bir şəhərə – Xocalıya ağır texnika, tank və iriçaplı silahlarla hücuma keçdiyini, Xocalı soyqırımının XX əsrin sonlarında yalnız Azərbaycan xalqına qarşı deyil, bütün bəşəriyyətə qarşı törədilmiş ağır cinayət kimi tarixə düşdüyünü bildirib.

Diqqətə çatdırılıb ki, ulu öndər Heydər Əliyevin təşəbbüsü ilə Milli Məclis “Xocalı soyqırımı günü haqqında” xüsusi qərar qəbul edib, sənəddə hadisənin başvermə səbəbləri təfsilatı ilə açıqlanıb. Eyni zamanda, Xocalı faciəsi ilə bağlı həqiqətlərin dünya ictimaiyyətinə çatdırılması, erməni qəsbkarlarının beynəlxalq müstəvidə ifşası mühüm vəzifə kimi qarşıya qoyulub.

M.Qasımlı qeyd edib ki, 2008-ci ildən başlayaraq Heydər Əliyev Fondunun vitse-prezidenti Leyla Əliyevanın təşəbbüsü ilə Xocalı soyqırımının dünya ictimaiyyətinə çatdırılması məqsədilə “Xocalıya ədalət!” adı altında genişmiqyaslı beynəlxalq informasiya kampaniyası aparılır.

Tədbirdə institutun elmi işlər üzrə direktor müavini, f.ü.f.d. Rahil Nəcəfov, Qafqaz siyasəti şöbəsinin müdiri, t.ü.f.d., dos. Ramilə Dadaşova, Ermənişünaslıq şöbəsini müdiri, t.ü.f.d. Ziyad Əmrahov, Şimali Qafqaz şöbəsinin müdiri, t.ü.f.d. Vasif Qafarov, Gürcüstanşünaslıq şöbəsinin müdiri, f.ü.f.d. Vahid Ömərov, Tərcümə, nəşr və informasiya şöbəsinin müdiri Günel Musayeva və digərləri Xocalıda törədilən soyqırımın ağır nəticələri barədə danışıblar.

Bakının Yasamal rayonundakı 308 nömrəli tam orta məktəbin VIII-X sinif şagirdləri Azərbaycan Milli Elmlər Akademiyasının (AMEA) Fizika İnstitutunda olublar.

İnstitutdan bildiriblər ki, şagirdlərə bu elm müəssisəsinin innovasiya sektorunun elmi fəaliyyəti və burada quraşdırılan cihazlar barədə məlumat verilib. Məktəblilər, həmçinin AMEA-da təşkil olunan sərgiyə də baxıblar.

Tədbir şagirdlərin elmə marağını artırmaq, onları Fizika İnstitutunda görülən işlərlə tanış etmək məqsədi daşıyıb.

AZƏRTAC

“Xəzər” Universitetində tarix elmləri doktoru Nəsiman Yaqublunun  Xocalı soyqırımı haqqında Azərbaycanda ilk yazılmış “Xocalı soyqırımı” kitabının təqdimat mərasimi və tədbir keçirilib.
Tədbirdə ilk olaraq N.Yaqublu çıxış edib və kitabdakı yazılar haqqında məlumat verib, hadisədən bir neçə gün sonra Ağdamda olduğunu, Milli Qəhrəman Allahverdi Bağırovla birlikdə Əskəran yaxınlığında ermənilərlə danışıqlarda iştirak etdiyini, qətlə yetirilən meyitlərin necə alınıb gətirilməsini faktlarla və görüntülərlə tədbir iştirakçılarına çatdırıb.
Müəllif qeyd edib ki, girovda olan, müxtəlif işgəncələrə məruz qalan xocalılarla da görüşüb, onların faciələrini qələmə alıb.O, qeyd edib ki, bu kitabın təsir gücündən narahat olan erməni tədqiqatçıları və bəzi jurnalistləri soyqırım günlərində bu kitabın əleyhinə internetdə ingilis və erməni dillərində ciddi təbliğat aparırlar.
Sonra müəllif kitabdan tələbələrə və tədbir iştirakçılarına hədiyyə edib.
Tədbirdə Xocalı soyqırımını ilk olaraq lentə almış hərbi operator Seyidağa Mövsümlü də çıxış edib, xatirələrini danışıb və sonda onun çəkdiyi sənədli film nümayiş etdirilib.
qhtxeber.az

AMEA Nəsimi adına Dilçilik İnstitutunda “Türkologiya” jurnalının fəaliyyətinə həsr olunmuş hesabat iclası keçirilib.

İclası açan Dilçilik İnstitutunun direktoru, AMEA-nın müxbir üzvü Möhsün Nağısoylu çıxışında “Türkologiya” jurnalının fəaliyyətindən və inkişaf yolundan söz açıb.

Sonra jurnalın baş redaktoru, akademik Kamal Abdullayev çıxış edərək nəşrin hazırki fəaliyyət istiqamətlərini diqqətə çatdırıb. Bildirib ki, AMEA Rəyasət Heyətinin orqanı olan “Türkologiya” jurnalı təkcə dilçilik məsələlərini deyil, ədəbiyyat, tarix, fəlsəfə, folklor, mifologiya üzrə türkoloji araşdırmaları da işıqlandırır.

K.Abdullayev jurnalın redaksiya heyətinə tanınmış dilçi alimlərin cəlb edilməsi, beynəlxalq məsləhətçilər şurasında Türkiyə, Rusiya, Özbəkistan, Qazaxıstan, Polşa və digər ölkələrin alimlərinin təmsil olunması məsələlərindən də söhbət açıb. Akademik jurnalın nəzdində seminarların təşkili və yaxın zamanlarda əlavələrinin çap olunması ilə bağlı fikirlərini bölüşüb.

Daha sonra “Türkologiya” jurnalının baş redaktor müavini, Folklor İnstitutunun direktoru, AMEA-nın müxbir üzvü Muxtar İmanov jurnalın fəaliyyətini yüksək qiymətləndirib. Alim “Türkologiya” mərkəzinin yaradılmasının əhəmiyyətini diqqətə çatdırıb.

Nəşrin məsul katibi Elçin İbrahimov jurnalın beynəlxalq əlaqələrindən bəhs edərək Türkiyədə Türk Dil Qurumunun rəhbərliyi ilə görüşlərin keçirildiyini bildirib. O, Türkiyənin Qazi və Hacettəpə universitetlərində “Türkologiya” jurnalına dair seminarların təşkil olunduğunu diqqətə çatdırıb.

Sonda “Türkologiya” jurnalının hesabatı Dilçilik İnstitutunun Elmi Şurası tərəfindən qəbul olunub.

“Azexport.az” portalı fəaliyyətə başladığı iki ay ərzində sahibkarların ixrac imkanlarının artması ilə bağlı ciddi irəliləyiş əldə edib.

İqtisadi İslahatların Təhlili və Kommunikasiya Mərkəzindən “APA-Economics”ə verilən məlumata görə, portalın əldə etdiyi statistik rəqəmlər bu məlumatı verməyə əsas verir.

“Belə ki, Azexport.az fəaliyyətinə başlayandan sonra Azərbaycan məhsulların beynəlxalq platformalarda, o cümlədən Alibaba.com platformasında təmsil olunma səviyyəsi 50 dəfə artıb. Portalın statistik rəqəmlərə əsaslanaraq hazırladığı infoqrammadan göründüyü kimi, ötən ilin son aylarında qonşu ölkələrlə müqayisədə beynəlxalq portallarda Azərbaycan məhsullarının təmsil olunması ilə bağlı vəziyyət sürətlə yaxşılaşır. Çünki, Azexport.az portalı yüzlərlə “Made in Azerbaijan” brendini qlobal və regional səviyyəli elektron ticarət portallarında nümayiş etdirir”, – deyə məlumatda vurğulanıb.

Azexport.az-dan verilən məlumata görə, portalın hədəflərindən biri qısa müddətdə MDB məkanında “Made in Azerbaijan” brendinin qlobal “vitrində” ilk yerlərdə möhkəmlənməsini təmin etməkdən ibarətdir.

“Google” axtarış sistemi özünün “Waze” naviqasiya əlavəsini yol yoldaşı axtarışı funksiyası ilə tamamlayacaq.

“Uber” və “Lyft” taksi xidmətlərindən fərqli olaraq, “Google” adi sürücüləri naviqasiya əlavəsindən istifadə edərək eyni istiqamətə gedən insanları daşımağa sövq edəcək.

Yeni xidmət ABŞ-ın və Latın Amerikasının bir neçə şəhərində istifadəyə veriləcək.

“Biz adi bir sürücünü işə yollanarkən eyni istiqamətə gedəcək sərnişinləri də özü ilə götürməyə inandıra bilərikmi? Bu, ən mürəkkəb sualdır”, – deyə “Waze” şirkətinin rəhbəri Noam Bardin deyib.

“Waze” ilə hərəkət “Uber” və “Lyft”dən daha ucuz olacaq. Belə ki, Oklendin mərkəzindən San-Fransiskonun mərkəzinə gediş 4,5 dollar olacaq. “Uber Pool”da qiymət 10,57 dollar, “Lyft Line”da isə 12,40 dollar təşkil edir.

“Waze” xidmətindən yararlanan sərnişinlər bir mil məsafə üçün cəmi 0,54 dollar ödəyəcək. Əvvəlcə xidmət sürücülərdən pul tutmayacaq, lakin gələcəkdə xidmət tam gücü ilə çalışmağa başlayanda gəlirdən 15% tutulması planlaşdırılır.

İkt.Lent.az

Dövlət İmtahan Mərkəzində (DİM) struktur və kadr islahatları aparılıb.

Mərkəzdən bildirilib ki, struktur formalaşması nəticəsində qurumda 12 yeni şöbə yaradılıb və müdirlər təyin edilib.

Çingiz Xəlilov İnformasiyalaşdırma və texnoloji təminat şöbəsinin müdiri, Natiq Əliyev Yoxlama-ölçmə materiallarının yoxlanması şöbəsinin müdiri, Azər Bağırov Təşkilat şöbəsinin müdiri, Oleq Şelaqinov Statistik araşdırmalar, elmi layihələşdirmə və innovasiyalar şöbəsinin müdiri, Vüqar Əsgərov Hüquqi təminat və insan resursları şöbəsinin müdiri, Afiqə Batıyeva Metodika və dərsliklərin monitorinqi şöbəsinin müdiri, Fuad Mayılov Strateji inkişaf şöbəsinin müdiri, Vəli Məstəliyev Maliyyə və iqtisadiyyat şöbəsi, Vüsal Həmidov Elektron imtahanların təşkil və keçirilməsi şöbəsinin müdiri, Nigar Hüseynova-Didavari İctimaiyyətlə əlaqələr və kargüzarlıq şöbəsinin müdiri, Vüqar Əkbərov Dövlət elektron informasiya sistemləri şöbəsinin müdiri, Fərhad Zeynalov isə Təchizat və təsərrüfat şöbəsinin müdiri vəzifələrini icra edəcək.

Bildirilib ki, hazırda DİM-də strukturun formalaşması prosesi davam edir.

Qeyd edək ki, prezidentin sərəncamları ilə Dövlət İmtahan Mərkəzi publik hüquqi şəxsin Direktorlar Şurasının sədri Məleykə Abbaszadə, sədr müavinləri Namiq Babayev və Bəhram Xəlilov təyin edilib. Azərbaycan Milli Elmlər Akademiyası İdarəetmə Sistemləri İnstitutunun laboratoriya müdiri, AMEA-nın müxbir üzvü Kamil Aydazadə, təhsil nazirinin müavini Ceyhun Bayramov, Azərbaycan Respublikası Xüsusi Dövlət Mühafizə Xidməti rəisinin müavini, general-leytenant Niyazi Hacıyev, ADA Universitetinin prorektoru Fariz İsmayılzadə isə Direktorlar Şurasının üzvləri seçilib. DİM publik hüquqi şəxsdə icraçı direktor vəzifəsinə isə Vəfadar Misirov təyin olunub.
Prezidentin imzaladı fərmana əsəsən isə DİM dövlət qeydiyyatına alındığı andan DQMK və TQDK ləğv edilib, onların istifadəsində olan dövlət əmlakı DİM-in balansına verilib. DİM ötən il oktyabrın 19-da dövlət qeydiyyatına alınıb.

APA

Azərbaycan Turizm və Menecment Universiteti (ATMU) təhsil, tədris, təcrübə, təlim modelinə müvafiq olaraq beynəlxalq əlaqələrin genişlənməsində hər zaman maraqlıdır. Ötən ilin son günlərindən etibarən ATMU ilə Asiya-Sakit Okean Turizm Assosiasiyası (PATA) arasında əməkdaşlığın qurulması istiqamətində aparılan danışıqlar müsbət nəticələnib. Belə ki, bu ali təhsil ocağı PATA-ya üzv qəbul edilib.

1951-ci ildən fəaliyyət göstərən, qeyri-kommersiya təşkilatı olan PATA-nın mərkəzi ofisi Tailandın paytaxtı Banqkokda yerləşir. Təşkilatın 800-dən çox üzvü sırasında dünya turizm sənayesində layiqli yer tutan onlarla turizm təşkilatı, o cümlədən dövlət qurumları, universitetlər, aviaşirkətlər, hava limanları və turizm agentlikləri var. Assosiasiyanın başlıca məqsədi turizm sənayesində təmsilçilik hüququ qazanan təşkilatlarla mövcud əlaqələrin daha da möhkəmləndirilməsi, insan kapitalından düzgün istifadə strategiyasının işlənib hazırlanması və həyata keçirilməsi, dinamik inkişaf edən turizm sektorunda gənclərin, xüsusən tələbələrin fəal iştiraklarının təmin edilməsindən ibarətdir.

ATMU-nun daha bir nüfuzlu beynəlxalq təşkilata üzv qəbul edilməsi universitetin turizm təhsili arenasında daha da tanınmasına, tələbələrin yay tanışlıq və istehsalat təcrübəsi imkanlarının getdikcə genişlənməsinə, bir sözlə, təhsilin beynəlxalq əlaqələr müstəvisində təşkilinə zəmin yaradacaq.

AZƏRTAC

Bakı Şəhəri üzrə Təhsil İdarəsinin (BŞTİ) tabeliyindəki ümumi təhsil məktəblərində “Ekoloji aylıqlar” layihəsi çərçivəsində tədbirlər davam edir.

BŞTİ-dən bildiriblər ki, fevralda ümumi təhsil məktəblərində keçirilən tədbirlər “Ekoloji mədəniyyət və incəsənət, Azərbaycanın ekoloji tarixi və etnoqrafiyası” mövzusuna həsr olunub. Əsas məqsəd şagirdləri Azərbaycanın ekoloji tarixi, mədəniyyəti, incəsənəti barədə maarifləndirmək və onların diqqətini maddi mədəniyyət abidələrinin qorunmasına və mühafizə edilməsinə yönəltməkdir.

Mövzu üzrə elmi konfrans, müsabiqə, yarış və sərgilər keçirilir, araşdırmalar aparılır. Həmçinin şagirdlərin müxtəlif muzey və qoruqlara ekskursiyaları təşkil edilir.

Fevralın sonunda mövzuya uyğun olaraq “Eko-etnoqrafiya şagirdlərin tədqiqatında”, “Ekoloji mədəniyyət və incəsənətin təbliği”, “Azərbaycanın ekoloji tarixi üzrə ən maraqlı araşdırma işi” nominasiyaları üzrə qalib məktəb seçiləcək.

AZƏRTAC

Azərbaycanda yaşı 100-dən çox olan insanların sayı açıqlanıb.

Azərbaycan Milli Elmlər Akademiyası Fiziologiya İnstitutunun direktoru, biologiya üzrə elmlər doktoru Ulduz Həşimova bildirib ki, rəsmi statistik məlumatlara görə, ölkəmizdə 100 və daha çox yaşı olan 838 şəxs yaşayır.

U.Həşimova qeyd edib ki, Azərbaycanın bir sıra regionlarında yüksək uzunömürlülük indeksi qeydə alınır. İlkin rəqəmlərə görə, yüksək uzunömürlülük indeksi olan region əsasən Lənkərandır.

Onun sözlərinə görə, ənənəvi olaraq, ölkəmizin cənub-şərqindəki Talış dağları ərazisi uzunömürlülük zonası hesab edilir. Bu institutun laboratoriyasının dəlilləri ilə də təsdiqlənib.

İnstitut direktoru əlavə edib ki, uzunömürlülüyün yüksək indeksi Naxçıvan Muxtar Respublikası, Qazax və Şamaxı zonalarında da qeyd olunur:

“Lakin bunlar dəqiqləşdirilməmiş, başqa sözlə verifikasiya edilməmiş məlumatlardır və bəzi hallarda təsdiqlənməyə də bilər. Məsələn, Naxçıvan da uzunömürlülük baxımından perspektivli sayılır. Belə ki, rəsmi statistikaya əsasən, burada 50-dən çox şəxs 100 yaş həddini keçib. Lakin bu məlumatlar da dəqiqləşdirilməlidir, çünki yaşın verifikasiyası zamanı ilkin göstəricilər dəyişir. Bu, çox vaxt onunla əlaqədar olur ki, 85 yaşdan yuxarı adamlarda öz yaşını “artırmaq” tendensiyası müşahidə edilir”.

Trend

Daxili İşlər Nazirliyi (DİN) Polis Akademiyasında vakant olan orta və böyük rəis heyəti vəzifələrinə müsabiqə elan edir.

Dövlət və hüquq nəzəriyyəsi, cinayət hüququ, mülki hüquq, kriminalistika, cinayət prosesi, daxili işlər orqanlarının inzibati fəaliyyəti, daxili işlər orqanlarının əməliyyat-axtarış fəaliyyəti kafedralarının müəllimi və baş müəllimi vəzifələrinə namizədlər dövlət ali təhsil müəssisələrinin hüquq təhsili üzrə magistr pilləsini bitirmiş olmalıdır.

Dil hazırlığı kafedrasının müəllimi və baş müəllimi vəzifələrinə namizədlər dövlət ali təhsil müəssisələrinin magistr pilləsini ingilis dili ixtisası üzrə, hərbi kafedranın müəllimi vəzifəsinə namizədlər hərbi təhsil müəssisələrini və ya dövlət ali təhsil müəssisələrini hərbi istiqamət üzrə bitirməlidirlər.

Daxili işlər orqanlarında xüsusi texnika kafedrasının müəllimi vəzifələrinə namizədlər dövlət ali təhsil müəssisələrinin texniki istiqamətlər üzrə magistr pilləsini bitirməli, kompüterdə mükəmməl işləməyi bacarmalıdır. Fiziki hazırlıq kafedrasının baş müəllimi vəzifəsinə namizədlər dövlət ali təhsil müəssisələrinin magistr pilləsini idman ixtisasları üzrə bitirməli, əlbəyaxa döyüş növləri üzrə idman dərəcəsinə və məşqçilik təcrübəsinə malik olmalıdır. Daxili işlər orqanlarında idarəetmənin təşkili kafedrasının müəllimi vəzifələrinə namizədlər riyaziyyat, kompüter riyaziyyatı, informatika və hesablama texnikası istiqamətləri üzrə dövlət ali təhsil müəssisələrinin magistr pilləsindən məzun olmalıdırlar.

Daxili işlər orqanlarında idarəetmənin təşkili kafedrasında mühəndis-proqramçı və mühəndis-elektronçu vəzifələrinə namizədlərdən dövlət ali təhsil müəssisələrinin riyaziyyat, kompüter riyaziyyatı, informatika və hesablama texnikası istiqamətləri üzrə bakalavr və ya magistr pilləsində təhsil almaq, “Java”, “C++” və “Delphy” proqramlaşdırma dillərində işləmək təcrübəsi, həmçinin “MS SQL” və “Oracle” verilənlər bazasının idarə edilməsi sisteminin iş prinsipləri haqqında biliyə malik olmaq tələb edilir. Mühəndis-elektronçu vəzifələrinə namizədlərdən isə, həmçinin kompüterlərin cari təmiri və servis xidmətləri haqqında bilik və təcrübə tələb olunur.

Elmi-tədqiqat və redaksiya nəşriyyat şöbəsinin elmi katibi və elmi əməkdaşı vəzifələrinə namizədlər dövlət ali təhsil müəssisələrini bitirməli və hüquq sahəsi üzrə elmi dərəcəyə malik olmalıdırlar. Kitabxanaçı vəzifəsinə namizədlər dövlət ali təhsil müəssisələrinin kitabxanaşünaslıq və filologiya ixtisası üzrə bakalavr və ya magistr pilləsindən məzun olmalıdırlar.

Müsabiqədə “Azərbaycan Respublikasının daxili işlər orqanlarında xidmət keçmə haqqında Əsasnamə” ilə müəyyənləşdirilmiş şərtlərə cavab verən, 20 yaşdan 30 yaşadək, boyu 165 santimetrdən (qadınlar üçün 160 sm) yuxarı olan Azərbaycan Respublikasının vətəndaşları iştirak edə bilərlər.

Müsabiqənin şərtlərinə cavab verən namizədlərin sənədləri, bilik və bacarıqları Müsabiqə Komissiyası tərəfindən yoxlanıldıqdan sonra toplanılacaq. Müsabiqə zamanı elmi dərəcəyə malik olan şəxslərə üstünlük veriləcək. Müsabiqədən uğurla keçmiş namizədlərın sağlamlıq vəziyyəti və fiziki hazırlıq səviyyəsi daxili işlər orqanları əməkdaşları üçün müəyyən olunmuş normativlər üzrə yoxlanılacaq.

Müsabiqədə iştirak etmək istəyənlər fevralın 21-dən martın 18-dək hər gün (qeyri-iş günləri istisna olmaqla) saat 10.00-dan 18.00-dək Daxili İşlər Nazirliyinin Polis Akademiyasına (Bakı şəhəri, Şüvəlan qəsəbəsi, A.İldırım küçəsi 3) müraciət edərək şəxsiyyət vəsiqəsi, ali təhsil haqqında sənədin əsli, hərbi bilet, əmək kitabçası (olanlar üçün) təqdim etməlidirlər.

Qaliblər müvafiq xüsusi rütbə verilməklə Daxili İşlər Nazirliyinin kadrları tərkibinə daxil ediləcək və onların qanunvericilikdə müəyyənləşdirilmiş qaydada daxili işlər orqanları əməkdaşlarına şamil olunan imtiyazlardan istifadə hüququ olacaq.

Daxili işlər orqanları əməkdaşlarına məzuniyyətə çıxarkən və müalicə olunmaları ilə əlaqədar ildə bir dəfə bir aylıq əməkhaqqı məbləğində pul müavinəti, kirayəyə götürülmüş yaşayış sahəsindən istifadə üçün əməkdaşa və onun hər bir ailə üzvünə kompensasiya, DİN-in Tibb İdarəsinin Respublika Hospitalında, poliklinikalarında əməkdaşa və onun ailə üzvlərinə pulsuz tibbi xidmət, nazirliyin “Xəzri” İstirahət və Sağlamlıq Mərkəzinə yollayışın qiymətinin əməkdaşa 75 faizi, ailə üzvlərinə 50 faizi miqdarında imtiyaz, eləcə də xidmət zamanı şəhərdaxili ictimai nəqliyyat vasitələrindən pulsuz istifadə kimi əlavə güzəştlər verilir.

Müsabiqə əsasında vəzifəyə təyin olunmuş şəxslərin xidmət yerləri gələcəkdə polisin digər xidmət sahələrinə dəyişdirilməyəcək.

Əlavə məlumatı www.mia.gov.az  və www.pa.edu.az  saytlarından, eləcə də (012) 454-12-78 nömrəli əlaqə telefonu vasitəsi ilə almaq mümkündür.

Azərtac

XƏBƏR LENTİ