Cümə, Aprel 28, 2017
ELM VƏ TƏHSİL

Bakıda SOCAR-ın dəstəyi, Bakı Ali Neft Məktəbinin (BANM) və Böyük Britaniyanın “Confidence Capital Ltd” şirkətinin birgə təşkilatçılığı ilə ümummilli lider Heydər Əliyevin anadan olmasının 94-cü ildönümünə həsr olunan II SOCAR Beynəlxalq “Xəzər və Mərkəzi Asiya: ticarət, logistika, neft emalı, neft-kimya” forumu başa çatıb.

BANM-dən AZƏRTAC-a bildiriblər ki, forumun yeddinci sessiyası Xəzər regionunun neft emalı və neft-kimya sahələrinin icmalına həsr olunub.

SOCAR-ın Karbamid Zavodunun direktoru Xəyal Cəfərov “Karbamid zavodunun Azərbaycanda vəzifələri və perspektivləri” mövzusunda, “Azərkimya” İstehsalat Birliyinin Modernizasiya və yenidənqurma şöbəsinin rəisinin müavini Fəzail Yusifov “Azərbaycanın neft-kimya sənayesi-perspektivlər və vəzifələr”, SOCAR-ın emal layihələrinin idarə edilməsi şöbəsinin böyük mühəndisi Mətin Rəhimov “Azərbaycanın neft emalı və neft-kimya sahələrinin mövcud vəziyyəti və perspektivləri”, “Caspian Barrel” Neft Tədqiqatları Mərkəzinin direktoru İlham Şabanov “Xəzər regionunun neft emalı və neft-kimya sənaye sahələrinin təfsilatlı təhlili”, “SOCAR Methanol” MMC-nin baş direktoru Elnur Mustafayev “Metanolun istehsalı texnologiyası”, Emerson LLC şirkətinin Türkiyə və Cənubi Xəzər üzrə baş menecer Burak Gürkan “Göstəricilər üzrə ilk 25 faizin tərkibində necə olmalı. Plantweb rəqəmsal ekosistem” mövzularda məruzələrlə çıxış ediblər.

Forumun “Səmərəliliyin artırılması üçün ən yeni texnologiyalar” sessiyasında MDB ölkələrində biznesin inkişafının rəhbəri Mixail Babkin “Rekuperasiya qurğusunun müasir texnologiyaları” mövzusunda və “Pentair Valves&Controls” şirkətinin regional meneceri Farux Oznur Çelikkol “Neft emalı və neft-kimya zavodlarında təhlükəsizliyin və səmərəliliyin artırılması üçün müasir klapanlar və kompleks idarəetmə sistemləri” mövzularında məruzələr təqdim ediblər.

Foruma Azərbaycanın dövlət və hökumət nümayəndələri, SOCAR-ın rəhbər heyətinin və strukturların bölümlərin rəhbərləri, Azərbaycan, Qazaxıstan, Qırğızıstan, İran, Rusiya, Türkmənistan, Türkiyə, Ukrayna, Gürcüstan və digər ölkələrin sahə nazirliklərinin və transmilli neft-qaz şirkətlərinin nümayəndələri, ümumilikdə 150-dən çox iştirakçı qatılıb.

“PAŞA Həyat”ın təşkilatçılığı ilə İqtisad Universitetinin müəllim və professor heyəti üçün təlim keçirilib. “PAŞA Həyat” şirkəti maarifləndirmə layihəsi çərçivəsində “Sığorta və sığorta mədəniyyəti” mövzusunda növbəti 95-ci təlimini başa çatdırıb.

Şirkətin ictimaiyyətlə əlaqələr xidmətindən verilən məlumata görə, bu ilin aprel ayının 24-26-sı tarixlərində Azərbaycan Dövlət İqtisad Universitetində təşkil edilən təlimdə universitetin 20-yə yaxın müəllim və professor heyəti iştirak edib.

Təlimdə universitetin müəllimləri üçün həyat və qeyri-həyat sığortası, sığorta qanunvericiliyi, eləcə də Azərbaycan və xarici sığorta bazarlarının müqayisəsi haqqında geniş məlumat verilib.

Təlimin sonunda müəllimlərlə xatirə şəkili çəkilib, onlara “PAŞA Həyat”ın müvafiq sertifikatları təqdim olunub.

Qeyd edək ki, “PAŞA Həyat”ın “Sığorta və sığorta mədəniyyəti” adlı marifləndirici təlimləri artıq 4 ildir ki, keçirilir. Təlimin keçirilməsində əsas məqsəd iqtisadi sahədə təhsil alan tələbələrin, həmçinin müəllimlərin sığorta sahəsində bilik və bacarıq qabiliyyətlərini daha da artırmaq, eyni zamanda cəmiyyəti sığorta sahəsi haqqında maarifləndirməklə yanaşı, sığorta bazarının inkişafına dəstək olmaqdır.

2013-cü ildən indiyədək təşkil olunan təlimlərdə müxtəlif ali təhsil ocaqlarından 2300-dək tələbə iştirak edib.

Aprelin 28-də Azərbaycan Milli Elmlər Akademiyasının (AMEA) əsas binasında Rəyasət Heyətinin 2016-cı ildəki elmi və elmi-təşkilati fəaliyyətinə həsr olunan illik ümumi yığıncağı işə başlayıb.

Tədbirdə Azərbaycan Respublikası Prezidenti Administrasiyasının rəhbəri, akademik Ramiz Mehdiyev, Prezident Administrasiyasının humanitar siyasət məsələləri şöbəsinin müdiri Fatma Abdullazadə, Baş nazirin müavini Elçin Əfəndiyev, AMEA-nın həqiqi və müxbir üzvləri, ali məktəblərin rəhbərləri, dövlət və ictimai təşkilatların nümayəndələri iştirak edirlər.

Əvvəlcə tədbir iştirakçıları akademiyanın elmi müəssisə və təşkilatlarının 2016-cı ildəki fəaliyyətini əks etdirən sərgisi ilə tanış oldular.

AMEA-nın prezidenti, akademik Akif Əlizadə ümumi yığıncağı açaraq gündəlikdəki məsələlər barədə məlumat verdi.

Sonra AMEA-nın akademik-katibi, akademik Rasim Quliyevin akademiyanın Rəyasət Heyətinin 2016-cı ildəki elmi və elmi-təşkilati fəaliyyəti barədə yekun hesabat məruzəsi dinlənildi.

İclas işini davam etdirir.

2016-cı ildə Təhsil Nazirliyi tərəfindən diplomu tanınmayan tələbələrin sayı açıqlanıb.

Təhsil Nazirliyinin 2016-cı ilə dair illik hesabatında qeyd edilib ki, Akkreditasiya və Nostrifikasiya İdarəsi ali təhsil sənədlərinin tanınması və ekvivalentliliyinin müəyyən olunması məqsədilə 2016-cı ilin 11 ayı ərzində 2958 müraciəti (o cümlədən məzun olduqları ölkələr üzrə: Rusiya 1.090, Ukrayna 939, Türkiyə 302, Gürcüstan 123 və digər ölkələr üzrə 504) icraata qəbul edib.

Hesabat dövründə idarə tərəfindən əvvəlki illərdən icrası başa çatdırılmamış ali təhsil sənədləri də daxil olmaqla, ümumilikdə 2756 sənəd üzrə emal prosesi başa çatdırılıb və onlardan 1826 təhsil sənədi müsbət (o cümlədən, məzun olduqları ölkələr üzrə: Rusiya 629, Ukrayna 389, Türkiyə 346, Gürcüstan 34 və digər ölkələr üzrə 428), 930 təhsil sənədi isə (o cümlədən məzun olduqları ölkələr üzrə: Rusiya 463, Ukrayna 356, Türkiyə 20, Gürcüstan 64 və digər ölkələr üzrə 27) mənfi cavablandırılıb. Həmçinin 384 ali təhsil sənədinin I və II ekspert səviyyələri üzrə icrası tam başa çatdırılıb.

Aparılan təhlillər göstərir ki, icrası imtina ilə yekunlaşan ali təhsil sənədlərinin çoxunu MDB ölkələrinin məzunlarının təqdim etdiyi diplomlar təşkil edir. Həmçinin imtina səbəblərinin təhlili göstərir ki, məzunların əksəriyyəti ali təhsil müəssisəsinin tədris normativinə düzgün əməl etməmələri, tədris dili üzrə bilik səviyyələrinin aşağı olması və zəruri hallarda tədris dilində ixtisasa dair söhbətlər aparıldığı zaman ixtisas biliklərinin qənaətbəxş olmamasının aşkarlanması səbəbindən imtina alırlar.

Lent.az

AMEA-nın Məhəmməd Füzuli adına Əlyazmalar İnstitutu tərəfindən “İlahiyyata dair əlyazmalar kataloqu”nun II cildi çap olunub.

Kataloqu institutun aparıcı elmi işçisi, ilahiyyat üzrə fəlsəfə doktoru, dosent Nailə Süleymanova tərtib edib. Kitabın elmi redaktorları – institutun elmi işlər üzrə direktor müavini, filologiya üzrə elmlər doktoru Paşa KərimovƏrəbdilli əlyazmalar şöbəsinin müdiri, filologiya üzrə elmlər doktoru Kamandar Şəriflidir. Farsdilli əlyazma təsvirlərinin redaktoru Könül Bağırova, ərəbdilli əlyazma təsvirlərinin redaktoru isə Yeganə Rəhnulladır.

Kitaba ərəb, fars və türk dillərində qiraət, təcvid və təfsirə dair əlyazmalaraın elmi-paleoqrafik təsviri daxil olunub.

Kataloq  “Qiraət və təcvidə dair əlyazmalaraın  təsviri”, “Təfsirə dair ərəbdilli əlyazmaların təsviri”,  “Təfsirə dair  farsdilli əlyazmaların təsviri”, “Təfsirə türkdilli əlyazmaların təsviri”, “Quran elmlərinə dair ərəb, fars və türkdilli əlyazmaların təsviri” , “Təsvir olunmuş əlyazmaların göstəriciləri”, “Qiraət və təcvidə dair  göstəricilər”, “Təfsirə dair ərəbdilli əlyazmaların göstəriciləri”,  “Təfsirə dair farsdilli əlyazmaların göstəriciləri”, “Təfsirə dair türkdilli əlyazmaların göstəriciləri və s. bölmələrdən ibarətdir.

Qeyd edək ki, bu cilddə indiyədək heç yerdə yayımlanmayan bir çox əsərlər yer alıb. Həmin əsərlər paleoqrafik xüsusiyyətəri, tərtibatı və yazılış tarixinin qədimliyinə görə xüsusi maraq doğurur.

Bakı Dövlət Universitetində Müasir Azərbaycan Psixoloqları təşkilatı və Sosial elmlər və psixologiya fakültəsinin Tələbə Elmi Cəmiyyətinin birgə təşkilatçılığı ilə “Mədəni müxtəliflik şəraitində şəxsiyyətin sosial adaptasiyası problemləri” mövzusunda Respublika elmi-praktik konfransı keçirilib. Sosial elmlər və psixologiya fakültəsinin dekanı professor Hikmət Əlizadə konfransı açaraq BDU-nun rektorunun əmri əsasında “Müasir Azərbaycan Psixoloqları” İB-nin təşəbbüsü ilə keçirildiyini bildirib: “Tələbələrin I kursdan başlayaraq elmi-tədqiqat işlərinə cəlb edilməsi əsas vəzifələrdəndir və bu konfrans da bunun əyani göstəricisidir”.

Müasir Azərbaycan Psixoloqları təşkilatının sədri, BDU “Psixologiya” kafedrasının müdiri, AMEA–nın müxbir üzvü, professor Bəxtiyar Əliyev də çıxış edərək, konfransın mövzusunun əhəmiyyətindən, tələbələrin elmi araşdırmalara marağın artırılmasından və bu işin gələcəkdə də davam etdirilməsinin zəruriliyindən danışıb: “Azərbaycan Psixoloqları Cəmiyyətinin fəaliyyətinin 25 illik fasilədən sonra yenidən bərpa edilməsi zamanın tələbidir. Bu cəmiyyətin fəaliyyəti imkan verəcək ki, Azərbaycanda psixologiya sahəsində həm peşəkar psixoloqların hazırlanması, həm də psixoloji xidmətin müxtəlif sahələrdə təşkili elmi əsaslarla aparılsın. Psixoloji xidmət adı altında əhaliyə göstərilən qeyri-peşəkar fəaliyyətin qarşısı alınsın. Bugünkü tələbələr elə peşəkar hazırlanmalıdırlar ki, onlar həm elmi araşdırmalar aparsınlar, həm də keyfiyyətli psixoloji xidməti həyata keçirsinlər”. Konfransda Azərbaycan Dövlət Pedaqoji Universitetinin “Ümumi psixologiya” kafe-drasının müdiri, professor Ramiz Əliyev, Azər-baycan Dillər Universitetinin “Psixologiya” ka-fedrasının müdiri dosent Ceyhun Alıyev çıxış et-dilər. Onlar burada qaldırılan məsələlərin ak-tuallığını və əhəmiyyətini qeyd etdilər. Çıxış edənlər daha sonra bildirdilər ki, psixoloq-tələbələrin ilk respublika konfransının keçirilməsi psixologiya elminin gələcək inkişafına öz töhfəsini verəcəkdir. Sonra Qaim Cəfərli “Gənclərin sosial-psixoloji adap-tasiyasının xüsusiyyətləri”, Aytən Əfəndiyeva “Zorakılığa məruz qalan şəxslərin cəmiyyətə adapta-siyasının sosial-psixoloji təhlilinə dair”, Mahirə Hüseynova “Uşaqların cəmiyyətə adaptasiyası”, İlahə Məmmədova “Övladlığa götürülən uşaqların yeni

ailəyə adaptasiyası”, Tubuxanım Həmidova “Xüsusi qay-ğıya ehtiyacı olan şəxslərin cəmiyyətə adaptasiyasının sosial-psixoloji təhlili”, Nuranə Hüseynli “Mədəni müxtəlif-lik şəraitində milli azlıqların cəmiyyətə adaptasiyası”, Əsgərli Əsmər “Yeni ailə quran gənclərin adaptasiyası məsələ-si”, Cəmilə Mirzəyeva “Yaşlıların təqaüdə adaptasiyası” mövzusunda çıxış etdilər.

Konfransın plenar iclasından sonra bölmələr üzrə tələbələrin 40 elmi məruzələri dinlənilib.

Lent.az

Azərbaycan Respublikasının Prezidenti yanında Bilik Fondunun təşkilatçılığı ilə ümummilli lider Heydər Əliyevin anadan olmasının 94-cü ildönümünə həsr edilən “Heydər Əliyev və azərbaycançılıq məfkurəsi” mövzusunda videokonfrans keçirilib.

Bilik Fondundan bildiriblər ki, Nəqliyyat, Rabitə və Yüksək Texnologiyalar Nazirliyinin Elektron Hökumət Təlim-Tədris Mərkəzində təşkil olunan videokonfransda fondun icraçı direktoru Oqtay Səmədov ümummilli lider Heydər Əliyevin vətən və xalq qarşısındakı misilsiz xidmətlərindən danışıb. Qeyd edilib ki, Azərbaycanda müstəqil, demokratik, hüquqi dövlətin bərqərar olması, milli dövlətçiliyimizin, onun suverenliyinin qorunub saxlanılması Ulu Öndərin adı ilə bağlıdır. Ümummilli Lider maarifçilik ideyalarının inkişafına, milli təhsilin səviyyəsinin yüksəldilməsinə, yeni məktəblərin tikintisinə, təhsil ocaqlarının maddi-texniki bazasının möhkəmləndirilməsinə, yüzlərlə azərbaycanlı gəncin nüfuzlu ali məktəblərdə təhsil almasına xüsusi önəm verib.

Mövzu ilə bağlı geniş məruzə ilə çıxış edən, “Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu diqqətə çatdırıb ki, 1990-cı illərin əvvəllərində ölkəmizin gələcək taleyi ilə bağlı problemlərdən biri də köhnə siyasi sistemin dağılması ilə cəmiyyətdə yaranan ideoloji və mənəvi böhran olub. Vurğulanıb ki, köhnə ictimai-siyasi quruluş dağıldıqdan sonra, onun ideoloji və mənəvi dayaqları da iflasa uğrayıb. Həmin siyasi quruluşun illərlə formalaşdırdığı və tərbiyə etdiyi ictimai şüur yeni ideologiya axtarışına çıxmaq məcburiyyətində qalıb. Bu dövr istər yeni cəmiyyət modelinin qəbul edilməsi, istərsə də milli ideologiya formalarının axtarılması ilə xarakterik idi. H.Babaoğlu deyib: “Məhz belə bir mürəkkəb situasiyanın fonunda siyasi palitrada təmsil olunan qüvvələr özlərinin qrup mənafeləri naminə müxtəlif ideoloji cərəyanlara istinad etməyə çalışırdılar. Belə olduğu halda konstruktivlik və milli həmrəylik naminə mövqelərin yaxşılaşdırılması əvəzinə maksimalistlik meyilləri artır, bir-birini inkar formulu aksiomaya çevrilirdi”.

H.Babaoğlu qeyd edib ki, vətəndaş həmrəyliyi yarada biləcək ideologiya isə yalnız 1993-cü il siyasi dönəmindən sonra səslənməyə başlayıb. Bu, Yeni Azərbaycan Partiyası və onun yaradıcısı ulu öndər Heydər Əliyev tərəfindən irəli sürülən müddəalar olub. Xalqımızın Ümummilli Liderinin müəllifi olduğu azərbaycançılıq ideologiyası özündə ümumbəşəri səciyyə daşıyan və milli dəyərlərə cavab verən prinsipləri ehtiva etməklə milli həmrəyliyi təmin edən milli-mənəvi mexanizm olub. Azərbaycançılıq, eyni zamanda, bütün dünyada yaşayan azərbaycanlıların milli istinad mənbəyinə çevrilib. Bu ideologiya siyasi mənsubiyyətindən, dini əqidəsindən asılı olmayaraq, bütün etnik qrupların, milli azlıqların hüquqlarını paritet əsasda təsbit etdi və milli həmrəylik mənbəyi sayıldı. Bu gün dünyaya özünəməxsus tolerantlıq modeli təqdim edən, multikulturalizmin inkişafına töhfə verən Azərbaycan dövləti dini, etnik fərqliliyin birgəyaşayışının ən yüksək nümunəsi sayılır. Prezident İlham Əliyevin 2016-cı ili “Multikulturalizm ili” elan etməsi də məhz bu modelin dünyaya daha yaxından tanıdılmasında əhəmiyyətli rol oynayıb.

Sonda bölgə ziyalılarının fikirləri səslənib, tədbir iştirakçılarını maraqlandıran suallar cavablandırılıb.

Videokonfransda Sumqayıt, Gəncə, Bərdə, Mingəçevir, Lənkəran, Şəki, Qazaxdan olan ziyalılar, yerli ictimaiyyətin nümayəndələri, gənclər iştirak ediblər.

AZƏRTAC

Aprelin 27-də Azərbaycan Milli Elmlər Akademiyasının (AMEA) Mərkəzi Elmi Kitabxanasında AMEA-nın İqtisadiyyat İnstitutu tərəfindən nəşr etdirilmiş “İS(S)İ – 2015: İqtisadiyyatın liberallıq potensialı” adlı monoqrafiyanın təqdimat mərasimi olub.

İqtisadiyyat İnstitutundan bildiriblər ki, mərasimdə bu elm müəssisəsinin elmi katibi, iqtisad üzrə fəlsəfə doktoru Rəsmiyyə Abdullayeva təqdim olunan kitab barədə ətraflı məlumat verib.

İnstitut direktorunun elmi işlər üzrə müavini, iqtisad üzrə fəlsəfə doktoru Allahyar Muradov, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı, Azərbaycan Dövlət İqtisad Universitetinin professoru Məhiş Əhmədov monoqrafiyanı iqtisad elmi üçün əhəmiyyətli tədqiqat əsəri kimi dəyərləndiriblər.

Kitaba “İqtisadiyyatın solluğu (sağlığı) indeksi: 62 ölkədə dövlətin iqtisadiyyatı tənzimləməsi səviyyəsinin qiymətləndirilməsi” üzrə İqtisadiyyat İnstitutu əməkdaşlarının 2016-cı ildə yerinə yetirdiyi tədqiqatın hesabatı və həmin hesabatda əksini tapmış məsələlərlə bağlı son araşdırmalar daxil edilib.

AZƏRTAC

Aprelin 26-da İsmayıllı və Göyçay rayonlarına mediatur təşkil edilib. Təhsil Nazirliyindən verilən xəbərə görə, mediaturun məqsədi bu bölgələrdə quraşdırılan modul tipli məktəblər haqqında media nümayəndələrinə məlumat vermək və onları həmin məktəblərlə tanış etmək olub.

Əvvəlcə media nümayəndələri İsmayıllı rayonunun Yenikənd kənd ümumi orta məktəbinə baş çəkiblər. Media nümayəndələrinə məlumat verilib ki, 9 şagirdin təhsil aldığı Yenikənd kənd ümumi orta məktəbi 4 sinif otağı, 1 müəllimlər otağı və sanitar qovşaqdan ibarətdir.

Daha sonra media nümayəndələri Göyçay rayonu Yeniarx kənd orta məktəbin Hacağabəyli kənd sinif komplekti ilə tanış olublar. 4 sinif otağından, 1 müəllimlər otağı və sanitar qovşaqdan ibarət olan məktəbin 16 şagirdinin təlim-tərbiyəsi ilə 4 müəllim məşğul olur. Bildirilib ki, Nazirlər Kabinetinin ötən ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə Prezidenti cənab İlham Əliyevin 2017-2018-ci illərdə qəzalı vəziyyətdə olan məktəblərin modul tipli məktəblərlə əvəz edilməsi ilə bağlı tapşırığına uyğun olaraq ilk pilot layihə çərçivəsində Göyçay, İsmayıllı və Lənkəranda 3 məktəb quraşdırılaraq təhvil verilib. Həmçinin 2017-2018-ci illərdə 232 modul tipli məktəbin quraşdırılması planlaşdırılıb. Cari ilin sonuna qədər 100 məktəb təhvil veriləcək. Hazırda 17 rayonda 23 məktəbin quraşdırılmasına başlanılıb. Mayın sonunadək daha 19 məktəbin quraşdırılması nəzərdə tutulub.

Modul tipli məktəblərin üstünlüyü onların azməsrəfli olması ilə yanaşı, qısa müddət ərzində istənilən relyefdə quraşdırılması, asan daşınması, sinif otaqlarının sayının şagirdlərin sayına uyğun olaraq rahatlıqla azaldılıb-artırılmasıdır. Həmçinin qəzalı vəziyyətdə olan təhsil müəssisələrində təmir-tikinti işləri aparılarkən tədris prosesinin dayandırılmaması məqsədilə səyyar modul tipli məktəblərin quraşdırılması da nəzərdə tutulur.

SİA

Aprelin 27-də Azərbaycan Dillər Universitetində (ADU) “Öyrənmə nəticələri, sillabus tərtibatı və qiymətləndirmə” mövzusunda seminar təşkil olunub. Universitetin Beynəlxalq əlaqələr üzrə prorektoru, dosent Jalə Qəribova tərəfindən aparılan seminar ADU-nun akademik heyəti üçün nəzərdə tutulub.

J.Qəribova nümunələr əsasında təlimin nəticələri və onun qiymətləndirmə ilə bağlılığı, qiymətləndirmənin meyarları, dilin tədrisi, dil vərdişlərinin qiymətləndirilməsi, dil tədrisində təlim tapşırığının növləri haqqında məlumat verib. Təlimin nəticələrinin bu proqramın və ya modulun konkret məqsədlərini özündə ehtiva etdiyini bildirən dosent tələbələrin kursun sonunda sərbəst şəkildə fakt və məlumat əldə edəcəyini, özlərinin və digərlərinin araşdırmalarına tənqidi yanaşa biləcəyini diqqətə çatdırıb. O, öyrənmə situasiyasının təhlil olunması məsələsinə toxunub, sillabusda qoyulan tələblərin aydın şərh olunmasının vacibliyini vurğulayıb. J.Qəribova ABŞ universitetlərində qiymətləndirmə nümunələrindən söz açıb, Avropa Şurasının dillərin öyrənilməsinə yönəlmiş fəlsəfəsi barədə danışıb.

Aprelin 22-dən 27-dək Lənkəranda AMEA Rəyasət Heyəti, A.A.Bakıxanov adına Tarix İnstitutu, Türkiyənin Atatürk Araşdırma Mərkəzi (ATAM) və Lənkəran Şəhər İcra Hakimiyyətinin birgə təşkilatçılığı ilə “XX əsrdə türk-müsəlman xalqlarına qarşı soyqırımları” mövzusunda IV Beynəlxalq elmi konfrans keçirilib.

Konfrans iştirakçıları adından Azərbaycan Respublikasının Prezidenti İlham Əliyevə müraciət qəbul olunub.

Müraciətdə deyilir:

“Möhtərəm cənab Prezident!

22-27 aprel 2017-ci ildə Lənkəran şəhərində Azərbaycan Milli Elmlər Akademiyasının Tarix İnstitutu, Türkiyə Respublikasının Atatürk Araşdırmaları Mərkəzi və Azərbaycan Respublikasının Lənkəran rayonunun İcra hakimiyyəti tərəfindən birgə keçirilmiş “XX əsrdə türk-müsəlman xalqlarının soyqırımı” IV Beynəlxalq elmi konfransa göstərdiyiniz hərtərəfli diqqətə və təşkilatçı yardımınıza, eləcə də bu tədbirin iştirakçılarının elmi axtarışlarına və səylərinə verdiyiniz yüksək qiymətə görə Sizə öz dərin minnətdarlığımızı bildiririk.

Azərbaycanın ümummilli lideri Heydər Əliyevin hərtərəfli tədqiq olunmağa məsləhət bildiyi XIX-XX əsrlər tarixinin müxtəlif problemlərinə həsr olunan konfrans təkcə Azərbaycan Respublikasının deyil, dünyanın bir sıra başqa ölkələrin elmi həyatında mühüm hadisə oldu.

Azərbaycanda bir sıra nüfuzlu elmi simpoziumların və konfransların keçirilməsi, eləcə də ötən illərdə keçirilmiş beynəlxalq soyqırım konfranslarının iştirakçılarına Sizin Müraciətləriniz doğma xalqınızın tarixinə, ümumiyyətlə tarix elminə böyük əhəmiyyət verdiyinizi təsdiq edir.

Azərbaycan Respublikası Prezidentinin “XX əsrdə türk-müsəlman xalqlarının soyqırımı” IV Beynəlxalq elmi konfransın iştirakçılarına ünvanlanmış və tarixçi alimlərin fəaliyyətlərinin əsas istiqamətlərini, müzakirəsi aktual olan məsələləri əks etdirən Müraciəti tarixi keçmişimizin bundan sonra da dərindən öyrənilməsi üçün yeni imkanlar açır.

2017-ci ili İslam Həmrəyliyi İli elan etməyiniz baxımından da “XX əsrdə türk-müsəlman xalqlarının soyqırımı” IV Beynəlxalq elmi konfransın keçirilməsi xüsusi əhəmiyyətə malikdir.

Biz, “XX əsrdə türk-müsəlman xalqlarının soyqırımı” IV Beynəlxalq elmi konfransın iştirakçıları, təsdiq edirik ki, XIX əsrin ilk onilliklərində ermənilərin Şimali Azərbaycanın ərazilərinə kütləvi köçürülməsi, 1918-ci ilin yazında erməni millətçilərinin törətdiyi Azərbaycan xalqına qarşı soyqırımı, həmin ilin mayında əzəli Azərbaycan torpağı olan İrəvan bölgəsində Ermənistan (Ararat) Respublikasının yaradılması, bir əsr bundan əvvəl baş vermiş fəciəli hadisələr zamanı qanlı cinayətlərə səbəb olmuşQarabağ, Naxçıvan və Azərbaycanın digər torpaqlarına ermənilərin ərazi iddiaları, Azərbaycanın Zəngəzur vilayətinin Ermənistan SSR-ə verilməsi,İkinci dünya müharibəsindən sonra azərbaycanlıların Ermənistan SSR-dən deportasiyası – bütün bu proseslərbu gün bölgədə yaşanan faciələrin, ilk növbədə Ermənistan-Azərbaycan Dağlıq Qarabağ münaqişəsinin bünövrəsini qoymuşdur.

Tarixin dərslərinə məhəl qoyulmaması, soyqırımları törətmiş cinayətkarların cəzasızlığı artıq müasir dövrdəerməni millətçilərinin dağıdıcı fəaliyyətinə şərait yaratmışdır. Ərazisindən yüz minlərlə yerli əhali olan azərbaycanlıların, eləcə də digər xalqların nümayəndələrinin qovulmasından sonra monoetnik dövlətə çevrilən Ermənistan Respublikası qonşu xalqlara qarşı əsassız ərazi iddiaları ilə çıxış edir, Azərbaycan Respublikasının dünya birliyi tərəfindən tanınan ərazisinin beşdə bir hissəsinin işğalını davam etdirir. Bu siyasətin nəticəsindəDağlıq Qarabağın və digər Azərbaycan torpaqlarının əhalisinə qarşı amansız etnik təmizləmələri baş vermiş, bir milyondan artıq Azərbaycan Respublikasının vətəndaşı öz doğma torpağında məcburi köçkünə çevrilmiş, işğal edilmiş ərazilərdə Azərbaycan xalqının miniilliklər ərzində yaratdığı sivilizasiyanın izlərini silmək məqsədilə onun mənəvi və maddi mədəniyyətinin abidələri məhv edilmişdir.

“XX əsrdə türk-müsəlman xalqlarının soyqırımı” IV Beynəlxalq elmi konfransın məhz Lənkəranda keçirilməsi təsadüfi deyildir. Azərbaycanın ərazisində ən qədim yaşayış yerlərindən biri olan bu şəhər və onun ətrafı 99 il öncə Azərbaycan xalqına qarşı soyqırımları siyasətinin tərkib hissəsi olmuş erməni hərbi birləşmələri tərəfindən həyata keçirilən ağır cəza əməliyyatına məruz qalmışdır.

Konfransda eşidilmiş məruzələr müasir dünyanın yaşadığı geosiyasi sarsıntılar şəraitində tarixi təcrübənin nəzərə alınması zəruriliyini çox aydın şəkildə ortaya qoydu. Bu gün biz Yaxın Şərqin və Ön Asiyanın bir sıra ölkələrindəvəziyyətin xeyli kəskinləşməsini müşahidə edirik ki, bu da arasıkəsilməz müharibələrə, bölgələrdə və qlobal miqyasda qanlı qarşıdurmalara gətirib çıxarır. “İnsan hüquqları”, “demokratiya”, “beynəlxalq hüququn müdafiəsi”, “terrorizmə qarşı mübarizə”nin adı altında böyük dövlətlər əslində yalnız soyqırımlar və terror üçün əlverişli şərait yaradaraq dünyanı təsir dairələrinə yenidən bölmək uğrunda ölüm-dirim mübarizəsi aparırlar. Başqa sözlə desək, Xaç yürüşləri və Böyük coğrafi kəşflər dövründən başlayan özgə torpaqların zəbt edilməsi, yerli xalqların və onların yaratdığı qədim mədəniyyətlərin məhv edilməsi siyasəti bu gün yeni üsullarla və yeni formalarda davam olunmaqdadır. Bu siyasətin əsas hədəfi isə yenidən Şərq xalqları, o cümlədən türk və islam aləmidir.

Avropanı, ümumilikdə Qərbi bürüməkdə olan ksenofobiya və antiislaməhval-ruhiyyəsinin yüksəlişi tolerantlıq və multikulturalizm dəyərlərindən xatırladır ki, bunsuzda xalqlararası və konfessiyalararası sülhü təsəvvür etmək mümkün deyil. Məhz bu keyfiyyətlər Azərbaycanı – məclisimizdə təmsil olunan dövlətlərin elmi həyatında mühüm hadisə olan “XX əsrdə türk-müsəlman xalqlarının soyqırımı” IV Beynəlxalq elmi konfransınkeçirildiyi ölkəni fərqləndirir.

Azərbaycan sözün əsl mənasında tolerantlığın, multikulturalizmin, millətlərarası və dinlərarası sülhün bərqərar edilməsinə yönələn uğurlu dövlətsiyasətinin örnəyidir. Bu siyasətin həyata keçirilməsi Sizin, cənab Prezident, və Sizin başçılıq etdiyi dövlətin xidmətidir.

Biz, “XX əsrdə türk-müsəlman xalqlarının soyqırımı” IV Beynəlxalq elmi konfransıniştirakçıları, Sizə, cənab Prezident, qədim Lənkəranda bu mötəbər elmi məclisin keçirilməsinə yardım göstərdiyinizə görə bir daha öz dərin minnətdarlığımızı bildiririk. Sizə Azərbaycan Respublikasının ərazi bütövlüyünün təmin edilməsinaminə, Azərbaycanın və bütün bölgənin çiçəklənməsi, dünyada sülhün və təhlükəsizliyin bərqərar edilməsi istiqamətində apardığınız yorulmaz fəaliyyətinizdə uğurlar arzulayırıq”.

Naxçıvan Bölməsinin Tarix, Etnoqrafiya və Arxeologiya İnstitutunun direktоru, AMEA-nın müxbir üzvü Hacıfəxrəddin Səfərlinin “Naxçıvanın türk-islam mədəniyyəti abidələri” monoqrafiyası nəşr olunub.

Monoqrafiyada Naxçıvan ərazisində günümüzədək gəlib çatan bir sıra türk-islam mədəniyyət nümunələri, o cümlədən bu abidələri inşa edən bəzi memarlar barədə məlumat verilir.

Yeni nəşrə memarlıq nümunələrinin fotoşəkilləri və onların üzərində qalan kitabələrin qrafik təsvirləri də yer alıb.

science.az

Aprelin 27-də AMEA Rəyasət Heyəti Beynəlxalq Əlaqələr İdarəsinin təşkilatçılığı ilə Mərkəzi Elmi Kitabxanada “Thomson Reuters” agentliyi tərəfindən ““Web of Science” məlumat platforması elmmetrik məlumat mənbəyi kimi” mövzusunda maarifləndirici seminar keçirilib.

Seminarın keçirilməsində məqsəd AMEA-nın elmi müəssisələrinin alim və mütəxəssisləri üçün beynəlxalq “Web of Science” məlumat platformasının imkanları və əsas elementləri, onunla əlaqəli informasiya resursları, həmçinin müasir beynəlxalq elmi jurnallarda məqalələrin dərc olunması qaydaları ilə tanışlıq idi.

Tədbirdə AMEA-nın vitse-prezidenti, akademik İbrahim Quliyev çıxış edərək Akademiya ilə “Thomson Reuters” təşkilatı arasında 2016-cı ilin oktyabrında əməkdaşlıq müqaviləsinin imzalandığını xatırladıb. Akademik müqavilə çərçivəsində AMEA-nın elmi müəssisələri üçün “Web of Science” məlumat platformasından istifadə imkanının yaradıldığını bildirib. Bu günə qədər 14 seminarın keçirildiyini deyən İ.Quliyev təşkilatla əməkdaşlığın alim və mütəxəssislərin qlobal elmi bazaya çıxış təcrübəsi qazanmaq baxımından faydalı olduğunu vurğulayıb.

Sonra “Thomson Reuters” agentliyinin MDB ölkələri üzrə nümayəndəsi Valentin Boqorov ““Web of Science” məlumat platforması elmmetrik məlumat mənbəyi kimi” mövzusunda təqdimatla çıxış edib. V.Boqorov platformada 18 min elmi jurnalın yer aldığını və onlardan 13 mininin impakt faktorlu olduğunu söyləyib.

Seminarda “Web of Science” saytında axtarış vasitələrindən səmərəli istifadə yolları əyani nümayiş etdirilib.

Science.az

Azərbaycanda ümumi təhsilin X-XI sinifləri üçün təmayüllər üzrə fənn kurikulumları hazırlanacaq.

Təhsil Nazirliyindən verilən məlumata görə, Azərbaycanda təhsil islahatlarından irəli gələn vəzifələrə uyğun olaraq ümumi təhsilin X-XI sinifləri üçün təmayüllər üzrə fənn kurikulumlarının hazırlanması, onların tətbiqinə dair tövsiyələrin işlənməsi planlaşdırılıb. Kurikulumlar hazırlanarkən təmayül siniflərinin xüsusiyyətlərinə uyğun olaraq onların variativ xarakter daşıması nəzərdə tutulur.

Kurrkilumların hazırlanması üçün Azərbaycan dili (təlim Azərbaycan dilində olan məktəblər üçün), Azərbaycan dili (dövlət dili kimi ), ədəbiyyat, rus dili (təlim rus dilində olan məktəblər üçün), ədəbiyyat (təlim rus dilində olan məktəblər üçün), xarici dil, Azərbaycan tarixi, ümumi tarix, riyaziyyat, fizika, kimya, biologiya, çağrışaqədərki hazırlıq fənn kurikulumlarının hazırlanması üzrə mütəxəssislər tələb olunur. Xidmətin icra müddəti 30 avqust 2017- ci il tarixədəkdir.

Trend

Bakı Ali Neft Məktəbində (BANM) Ali Məktəbin rektoru Elmar Qasımov və Türkiyənin Botaş International Limited (“BIL”) şirkətinin prezidenti Erdoğan Tozan və Maliyyə və inzibati məsələlər üzrə direktoru Əhməd Akın arasında görüş keçirilib.

Görüşdə sözügedən şirkət haqqında məlumat verildi və fəaliyyət və əməkdaşlıq istiqamətləri müzakirə olunub.

Azərbaycanla Türkiyənin qardaş ölkələr olduğunu deyən BANM-ın rektoru Elmar Qasımov iki ölkə arasında bütün sahələrdə, o cümlədən təhsil sahəsində geniş əlaqələrin mövcud olduğunu bildirib. O, BANM tələbələrinin Türkiyənin bir sıra müəssisələrində hər il təcrübə keçdiyini bildirərək belə bir imkanın Botaş tərəfindən yaradılması potensialının araşdırılmasını təklif edib. Rektor qeyd edib ki, bu kimi təlimlər Ali Məktəbin tələbələrinin inkişafina xidmət edəcək. Şirkətin baş direktoru Erdoğan Tozan da öz növbəsində bu təklifə müsbət yanaşdıqlarını vurğulayıb və məsələnin həlli istiqamətində əlindən gələn dəstəyi göstərəcəklərini bildirib.

Qeyd edək ki, Botaş International Limited şirkəti neft-qaz sektorunda xarici tərəfdaşlarla səmərəli əməkdaşlığın genişləndirilməsi məqsədi ilə BOTAŞ tərəfindən yaradılıb. Şirkətin ən böyük və əhəmiyyətli layihələrindən biri də Bakı-Tbilisi-Ceyhan layihəsidir. Şirkət eyni zamanda TANAP layihəsində də iştirak edir.

XƏBƏR LENTİ