Cümə, Aprel 28, 2017
GÜNDƏM

“Nizami Gəncəvi adına Qızıl medal başqa bir alimə də nəsib ola bilərdi. Amma bu mükafata məni layiq gördülər. Mən də müəllimlərimdən öyrənmişəm, onlara minnətdaram”.

APA-nın xəbərinə görə, bunu Azərbaycan Milli Elmlər Akademiyasının (AMEA) müxbir üzvü, professor, M. V. Lomonosov adına Moskva Dövlət Universitetinin Bakı filialının rektoru Nərgiz Paşayeva deyib. Mükafat üçün AMEA rəhbərliyinə təşəkkürünü bildirən N. Paşayeva qeyd edib ki, Nizami Gəncəvi adına Qızıl medalın dəyər və məsuliyyətini anlayır: “Dünyada aqillər həmişə qüvvətli, cahillər isə zəif olur. İstərdim ki, kiçik bir əməyim elmimizi daha qüvvətli, daha möhtəşəm etsin. Azərbaycan elmi fikri, Azərbaycan düşüncəsi, Azərbaycan özünüdərki böyük, beynəlxalq müstəvidə, Oksford kimi universitetdə öz təzahürünü və layiqli yerini tapsın. Nizami Gəncəvinin adı Oksford Universitetində daimi qalsın. “Tanrı məni işıqlandırdı” – Oksford Universitetinin devizidir. Nizami Gəncəvi isə yazıb: “Mənim misralarımdan işıq saçır, gözlərə işıq gəlir”. Bu nailiyyəti tək özümə şamil etmirəm”.

Qeyd edək ki, mükafat alimə AMEA Rəyasət Heyətinin 2016-cı il üzrə elmi və elmi-təşkilati fəaliyyətinə həsr olunmuş Ümumi yığıncaqda təqdim olunacaq.

Xatırladaq ki, N. Paşayevaya bu mükafat müstəqillik illərində elm, təhsil sahəsində həyata keçirilən beynəlxalq layihə – Oksford Universitetinin Nizami Gəncəvi adına Azərbaycan və Qafqazşünaslıq Mərkəzinin, Nizami Gəncəvi Fondunun yaradılması və səmərəli fəaliyyətinin təmin edilməsi, Azərbaycan ədəbiyyatının dünya miqyasında tədqiq olunması sahəsindəki müstəsna xidmətlərinə görə verilib.

Azərbaycan Milli Elmlər Akademiyasının (AMEA) aprelin 28-də keçirilən ümumi yığıncağında “Azərbaycan Respublikasının Nizami Gəncəvi adına Qızıl medalı” öz sahiblərinə təqdim olunub. Aprelin 19-da Azərbaycan Milli Elmlər Akademiyası Rəyasət Heyətinin iclasında “Azərbaycan Respublikasının Nizami Gəncəvi adına Qızıl medalı” müsabiqəsinin nəticələrini ictimayyətə açıqlayan AMEA-nın prezidenti, akademik Akif Əlizadə müsabiqədə iştirak etmək üçün namizədliyi irəli sürülən alimlər haqqında təqdimatların müvafiq sənədlərlə birlikdə Ekspert Komissiyasına təqdim olunduğunu, Komissiyanın bu il keçirilən yekun iclasında Qızıl medala layiq görülən namizədlərin seçildiyini bildirib.

Müsabiqənin nəticələrinə görə, müstəqillik illərində Azərbaycanda elm və təhsil sahəsində həyata keçirilən mühüm beynəlxalq layihə olan Oksford Universitetində Nizami Gəncəvi adına Azərbaycan və Qafqazşünaslıq Elmi Mərkəzinin yaradılması və səmərəli fəaliyyətinin təmin edilməsindəki müstəsna xidmətlərinə görə M.V.Lomonosov adına Moskva Dövlət Universitetinin (MDU) Bakı filialının rektoru, AMEA-nın müxbir üzvü, professor Nərgiz Paşayeva, Azərbaycanın mədəni və tarixi irsinin dünya miqyasında elmi əsaslarla öyrənilməsinə verdiyi xüsusi dəstəyə görə Oksford Universitetində Nizami Gəncəvi adına Azərbaycan və Qafqazşünaslıq Elmi Mərkəzinin İngiltərə tərəfdən rəhbəri, Oksford və Nyu-York universitetlərinin professoru Robert Hoyland Qızıl medala layiq görülüblər.

Qeyd edək ki, 2013-cü ilin yayında M.V.Lomonosov adına MDU-nun Bakı filialının rektoru, professor Nərgiz Paşayevanın britaniyalı alimlərlə görüşü zamanı məlum oldu ki, Oksford Universitetində Azərbaycan ədəbiyyatı, tarixi və dili haqda demək olar heç bir məlumat, araşdırma, tədris vəsaiti yoxdur və fənlər tədris edilmir. Bununla belə, universitetdə gürcü və erməni dilləri öyrənilir. Həmin vaxt professor Nərgiz Paşayeva britaniyalı alimlərlə müzakirələr zamanı təklif edib ki, Oksford Universitetinin nəzdində Elmi Mərkəz açılsın və bu Mərkəz universitetin bir hissəsi kimi tanınsın, elmi fəaliyyət göstərsin və gələcək nəsillər bundan istifadə edə bilsinlər. Professor Nərgiz Paşayeva Mərkəzə Nizami Gəncəvinin adının verilməsini təklif edərək demişdi: “Bizim iki qürur mənbəyimiz varsa, onlardan biri Nizami Gəncəvidir”.

Beləliklə, 2013-cü il oktyabrın 28-də Böyük Britaniyada M.V.Lomonosov adına Moskva Dövlət Universitetinin Bakı filialının rektoru, AMEA-nın müxbir üzvü, professor Nərgiz Paşayeva və Oksford Universitetinin beynəlxalq inkişaf üzrə direktoru Lieyzl Elder arasında Oksford Universitetində Nizami Gəncəvi adına Azərbaycan və Qafqazşünaslıq Elmi Mərkəzinin yaradılmasına dair Anlaşma Memorandumu imzalandı və həmin vaxtdan dünyanın ən qədim və nüfuzlu universitetlərindən biri olan Oksford Universitetində Nizami Gəncəvi adına Elmi Mərkəz fəaliyyət göstərməyə başladı (http://www.orinst.ox.ac.uk/research/nizami-ganjavi/home).

Professor Nərgiz Paşayeva 2013-cü ildən fəaliyyət göstərən Oksford Universitetinin Nizami Gəncəvi Mərkəzinin yaradılmasında böyük əmək sərf edərək Böyük Britaniyada müxtəlif görüşlər keçirmiş və bu Mərkəzə məhz dahi şairimiz Nizaminin adının verilməsinə nail olmuşdur.

2013-cü ildən başlayaraq bu istiqamətdə professor Nərgiz Paşayevanın Oksford Universitetinin inkişaf departamentinin rəhbəri xanım Lieyzl Elder, universitetin keçmiş vitse-kansleri professor Endru Hamilton, Kraliçanın ədliyyə məsələləri üzrə müşaviri, “Brasenose” Kollecinin rəhbəri Con Bouers, Sent Kross Kollecinin rəhbəri, Viktoriya və Albert muzeyinin direktoru vəzifəsində işləmiş Ser Mark Couns, Şərqşünaslıq İnstitutunun rəhbəri professor Mark Smit, Triniti Kollecinin professoru Brayan Vord Perkins və onlarla başqa alim və rəhbər şəxslərlə keçirdiyi görüşlərdə Azərbaycan üçün vacib olan bu elmi Mərkəzin fəaliyyət istiqamətləri və elmi-strateji məqsədləri müzakirə olunmuşdur.

Nizami Gəncəvi Mərkəzi Oksford Universitetinin rəsmən qəbul edilmiş və tanınmış struktur bölməsidir və həmin universitetin təkcə Şərqşünaslıq fakültəsi ilə bağlı məsələləri deyil, ümumiyyətlə, Oksford Universitetində digər sahələrdə elm və təhsillə bağlı olan bütün məsələlərdə Azərbaycan üzrə koordinator səlahiyyətlərinə malikdir.

Hazırda Mərkəz Oksford Universiteti tərəfindən tərtib və təsdiq edilmiş 5 illik elmi-tədris proqram üzrə kitabların yüksək akademik səviyyədə tərcüməsi, Bərdə şəhərində arxeoloji tədqiqatların aparılması, beynəlxalq konfransların keçirilməsi, əlyazmaların öyrənilməsi, aspirant və magistrantların hazırlığı istiqamətində fəaliyyət göstərir. Həmçinin Mərkəz Oksford Universitetinin qaydaları çərçivəsində mədəni-akademik layihələri də həyata keçirərək dünya elmi-intellektual birliyi ilə əlaqələr yaratmağa çalışır.

Qeyd edək ki, Oksford Universitetinin Nizami Gəncəvi Elmi Mərkəzində professor Nərgiz Paşayevanın təşəbbüsü ilə başlanmış Nizami yaradıcılığının tədqiqatçısı, tanınmış şərqşünas alim, professor Yevgeni Bertelsin “Dahi Azərbaycan şairi Nizami” kitabının (1940) Oksford Universitetində rus dilindən ingilis dilinə edilən tərcüməsi başa çatıb. Y.Bertelsin bu elmi əsəri Nizami yaradıcılığının öyrənilməsi və tədqiqi baxımından dünya nizamişünaslığı və şərqşünaslığı üçün vacib əhəmiyyət daşıyır. 1940-cı ildən etibarən həmin kitab nəinki ingilis dilində, həmçinin orijinal variantda da təkrar nəşr edilməyib. Kitab Oksford Universitetində ingilis dilində çap olunub. Bu, ingilis dilində nəşr olunan ilk akademik tərcümədir və cari ilin mayında Böyük Britaniyada kitabın təqdimatı keçiriləcək.

Oksford Universitetinin Nizami Gəncəvi Elmi Mərkəzi öz fəaliyyətində fundamental və akademik elmi araşdırmalara xüsusi önəm verərək müxtəlif beynəlxalq elmi konfranslar təşkil edir. 2015-ci il iyunun 6-da Oksford Universitetinin Nizami Gəncəvi adına Azərbaycan və Qafqazşünaslıq Elmi Mərkəzi, Şərqşünaslıq İnstitutu və Qədim Antik Dövr Mərkəzi ilə birgə “Şərqi Qafqaz son antik dövrdən erkən İslam dövrünə qədər” adlı Beynəlxalq elmi-praktik konfrans təşkil edib.

Nizami Gəncəvi Mərkəzinin Böyük Britaniyada keçirdiyi ilk geniş akademik elmi tədbirində Oksford Universiteti ilə yanaşı, Böyük Britaniyanın digər nüfuzlu təhsil ocaqlarının, eləcə də Avropanın bir sıra qabaqcıl universitetlərinin Yaxın Şərq və Qafqaz bölgəsi üzrə mütəxəssis alimləri iştirak ediblər.

2016-cı il iyunun 11-də Oksford Universitetinin ən qədim təhsil müəssisələrindən olan “Brasenose” Kollecində universitetin Nizami Gəncəvi Mərkəzi növbəti “Trans-Xəzər əlaqələri (V-XIII əsrlər)” mövzusunda Beynəlxalq elmi konfrans təşkil edib. Keçirilən hər iki konfransın həmsədri Oksford Universitetinin Nizami Gəncəvi Mərkəzinin Azərbaycan tərəfdən rəhbəri, M.V. Lomonosov adına MDU-nun Bakı filialının rektoru, AMEA-nın müxbir üzvü, professor Nərgiz Paşayeva olub.

Konfransda Oksford Universitetinin alimləri ilə yanaşı, Şotlandiyanın Edinburq Universitetinin Roma arxeologiyası üzrə professoru, Oksford və Tübingen universitetlərinin mühazirəçisi, eyni zamanda, Böyük Britaniyanın Farsşünaslıq İnstitutu və Romaşünaslığın Təbliği Cəmiyyətinin şura üzvü Eberhard Zauer, Rusiya Elmlər Akademiyasının aparıcı arxeoloqu və tarixçisi, professor Zvezdana Dode, Rusiya Elmlər Akademiyasının Dağıstan elmi mərkəzində arxeologiya departamentinin rəhbəri, professor Murtazəli Hacıyev, Harvard Universitetinin aparıcı arxeoloqu, doktor Kərim Əlizadə, Nyu-York və Pensilvaniya universitetlərində arxeologiya üzrə aparıcı mütəxəssis, doktor Lara Fabian, Kanadanın Saskatçevan və İngiltərənin Durham universitetlərinin doktoru Kristen Hopperin elmi məruzələri böyük maraqla dinlənilib.

Professor Nərgiz Paşayevanın təşəbbüsü ilə Oksford Universitetinin tədqiqatçı alimi, doktor Pol Vodsvordun rəhbərliyi altında bir qrup Oksford tədqiqatçısı Bərdədə artıq iki ildir ki, arxeoloji qazıntılar aparır və Azərbaycan üçün çox əhəmiyyətli tarixi tapıntılara nail olublar.

Onu da qeyd edək ki, Britaniyanın “Sərhədsiz İrs” (Heritage Without Borders) təşkilatı Azərbaycanda ilk dəfə olaraq mədəni irsin qorunması məqsədilə Bərdə Arxeoloji Ekspedisiyasının işinə cəlb edilib. Bu təşkilat dünyanın müxtəlif bölgələrində bəşəriyyətin mədəni irsinin qorunması üçün aparıcı mütəxəssisləri bir araya gətirir və işlədiyi ölkələrdə aparılan arxeoloji qazıntılar zamanı aşkar edilən maddi mədəniyyət nümunələrinin qorunması və mühafizəsini təşkil edərək gələcək nəsillərə ötürülməsini təmin edir.

2016-cı ildə Britaniyada təsis edilmiş və rəsmi qeydiyyatdan keçmiş (qeydiyyat nömrəsi 1169381) “Azərbaycan və Qafqazı öyrənən Britaniya Fondu”nun (“The British Foundation for the Study of Azerbaijan and the Caucasus”) Qəyyumlar Şurasının sədri professor Nərgiz Paşayeva seçilib.

Lordlar Palatasının üzvü, Avropa Şurasının 2003-2006-cı illərdə Azərbaycan üzrə məruzəçisi olmuş Lord Malkolm Brus, İngiltərənin Azərbaycan və Qafqaz regionu üzrə aparıcı alimləri – Oksford Universitetinin İslam tarixi üzrə, habelə Nyu-York Universitetinin Qədim Dünya İnstitutunun aparıcı professoru, hazırda Qafqaz regionunu öyrənən və qədim Bərdənin arxeoloji ekspedisiyasına rəhbərlik edən professor Robert Hoyland, Şotlandiyanın məşhur Sent Endryus Universitetinin İslam, Orta Asiya və Qafqaz bölgəsi üzrə professoru Endryu Pikok və Ekseter Universitetinin İslam tarixi və şiəlik təriqətinin yayıldığı əraziləri öyrənən professoru Robert Qliv yaradılan Britaniya Fondunun Qəyyumlar Şurasının üzvləridir.

Bu Fond Azərbaycan və Birləşmiş Krallıq arasında mövcud olan ikitərəfli elm, mədəniyyət, maarif, təhsil münasibətlərinə real töhfə verən ciddi bir qurum kimi fəaliyyət göstərməyi qarşısına məqsəd qoyub. Fond Oksford Universitetinin Nizami Gəncəvi Mərkəzinin və İngiltərə-Azərbaycan Cəmiyyətinin fəaliyyətinə dəstək verməklə yalnız Oksford Universiteti və Londonda deyil, İngiltərənin başqa ali təhsil ocaqları, mötəbər elmi və siyasi qurumları ilə əməkdaşlıq etməyi planlaşdırır. Fondun məqsədlərindən biri də Azərbaycan və Qafqaz üzrə Britaniyanın alim və aparıcı mütəxəssislərini bir araya gətirib Azərbaycanı layiqli səviyyədə təmsil etməklə yanaşı, Britaniyada yaşayan Azərbaycan icmasına dəstək olmaqdır. Britaniya Fondu Birləşmiş Krallıqda elm və mədəniyyət sahələrində Azərbaycan və Qafqazla bağlı aparılan bütün işlərin davamlı, uğurlu, perspektivli olmasını və beynəlxalq akademik səviyyəsini təmin etmək məqsədilə şəffaf və ədalətli dəstək üçün yaradılıb.

2017-ci il yanvarın 25-də dünyanın ən böyük dekorativ-tətbiqi incəsənət və dizayn muzeyi olan, 1852-ci ildə əsası qoyulmuş Viktoriya və Albert Muzeyində Britaniya Fondunun təqdimat mərasimi keçirilib.

Tədbirdə Birləşmiş Krallığın elmi-akademik dairələrinin nüfuzlu üzvləri, Böyük Britaniya hökuməti və parlamentini təmsil edən şəxslər, Böyük Britaniya Baş nazirinin Azərbaycan, İraq və Türkmənistan ilə ticarət üzrə xüsusi nümayəndəsi Baronessa Nikolson, Böyük Britaniya parlamentinin Lordlar Palatasının üzvləri lord Malkolm Brus və lord Maykl German iştirak ediblər. Tədbirə qatılan alimlər arasında məşhur tarixçi, Londonun SOAS Universitetinin ərəb tarixi üzrə professoru Hyu Kennedi, Oksford Universitetinin ərəb ədəbiyyatı üzrə professoru Culiya Brey, Oksford Universitetinin Rusiya və Avrasiya Mərkəzinin direktoru, professor Roy Allison, Oksford Universitetinin şərqşünaslıq fakültəsinin professoru Edmund Herseq, Oksford Universitetinin Nizami Gəncəvi Mərkəzinin Britaniya tərəfdən rəhbəri, professor Robert Hoyland, SOAS Universitetinin Şərq musiqisi üzrə professoru, İranşünaslıq Mərkəzinin üzvü Oven Rayt, həmin universitetin İslam incəsənəti üzrə professoru, SOAS Universitetinin xəzinələri layihəsinin direktoru Anna Kontadini, ABŞ-ın Luiziana ştatının Tuleyn Universitetinin Səfəvilər dövrü üzrə tədqiqatçı alimi, professor Elio Brankaforte, Britaniyanın Ekseter Universitetinin İslamşünaslıq üzrə professoru Robert Qliv, Şotlandiyanın Sent Endryus Universitetinin orta əsrlər üzrə islamşünas professoru Endryu Pikok, Kembric Universitetinin Qazaxıstan Mərkəzinin direktoru, doktor Siddhart Saksena, Darem Universitetinin aparıcı arxeoloq alimi, doktor Dan Lorens, qədim və orta əsrlər dövrü üzrə tarixçi alim, BBC və digər beynəlxalq telekanallarda yayımlanan elmi-maarifləndirici verilişlərin məşhur aparıcısı və müəllifi doktor Bettani Hyus və başqalarının adlarını çəkmək olar.

Qeyd etmək lazımdır ki, Oksford Universitetinin Nizami Gəncəvi Elmi Mərkəzi yarandığı gündən M.V. Lomonosov adına Moskva Dövlət Universitetinin Bakı filialı ilə sıx əlaqələr qurub. Hazırda MDU-nun Bakı filialında Nizami Gəncəvi Elmi Mərkəzi ilə elmi əlaqələr qurmaq istəyən, Azərbaycanda fəaliyyət göstərən bütün elmi müəssisə və təşkilatlar üçün əlaqə mərkəzi rolunu həyata keçirən “Oxford Room” adlı xüsusi şöbə mövcuddur. Şöbə Mərkəzin fəaliyyəti ilə maraqlanan, onun ali missiyasına kömək göstərmək istəyən təhsil və elm müəssisələrini, fiziki və hüquqi şəxsləri Mərkəzin fəaliyyəti haqqında informasiya ilə təmin edir.

Azərbaycan Respublikasının xarici işlər naziri Elmar Məmmədyarov və Macarıstan Respublikasının xarici işlər və ticarət naziri Peter Siyarto arasında diplomatik münasibətlərin qurulmasının 25 illiyi münasibətilə təbrik məktubu mübadiləsi həyata keçirilib. XİN-in mətbuat xidmətindən verilən məlumata görə, Xarici işlər naziri Elmar Məmmədyarov həmkarına ünvanladığı məktubunda ölkələrimiz arasındakı hazırkı intensiv münasibətlərin tarixinin orta əsrlərə gedib çıxdığını və bu münasibətlərin XV-XVII əsrlərdə Azərbaycan dövlətləri və Macar Krallığı arasında yaranmış diplomatik əlaqələr və ticarət əməkdaşlığı üzərində qurulduğunu diqqətə çatdırıb.

Nazir Elmar Məmmədyarov Azərbaycanla Macarıstan arasındakı strateji tərəfdaşlıq münasibətləri və ən yüksək səviyyədə davam edən siyasi dialoqun bütün sahələrdə qarşılıqlı iş birliyinin daha da inkişaf etdirilməsinə əlverişli imkan yaratdığını bildirib.

2017-ci ilin aprel ayında Şərq tərəfdaşlığı və Vişeqrad qrupu ölkələrinin xarici işlər nazirlərinin Varşavada keçirilən toplantısı çərçivəsində macarıstanlı həmkarı ilə keçirdiyi görüşü məmnunluq hissi ilə xatırlayan Elmar Məmmədyarov belə görüşlərin münasibətlərimizin bütün istiqamətlər üzrə genişlənməsinə töhfə verdiyini qeyd edib. O həmçinin Ermənistan-Azərbaycan Dağlıq Qarabağ münaqişəsinin beynəlxalq hüququn norma və prinsipləri, Azərbaycanın suverenliyi, ərazı bütövlüyü və beynəlxalq səviyyədə tanınmış sərhədləri çərçivəsində sülh yolu ilə həll olunmasına dair Macarıstanın davamlı və prinsipial dəstəyinin yüksək qiymətləndirildiyini diqqətə çatdırıb.

Macarıstanın xarici işlər və ticarət naziri Peter Siyarto Elmar Məmmədyarova ünvanladığı məktubunda ötən 25 ildə Azərbaycan və Macarıstan arasında ikitərəfli münasibətlərin yüksələn xətlə inkişaf etdiyini və hazırda əməkdaşlığın bütün sahələrdə, o cümlədən siyasi, iqtisadi, mədəni və humanitar sahələrdə genişlənməkdə olduğunu vurğulayıb.

Peter Siyarto Azərbaycan və Macarıstanın strateji tərəfdaş və yaxın dost ölkə olduğunu bildirərək, bunun bariz nümunəsi kimi mütəmadi olaraq keçirilən yüksək səviyyəli görüşləri və bu yaxınlarda Bakıda uğurla həyata keçirilən Macarıstan günlərini qeyd edib.

Nazir Peter Siyarto Macarıstanın ölkələrimizin maraqlarına xidmət edən ikitərəfli əlaqələrin daha da inkişafı və şaxələndirilməsində maraqlı olduğunu vurğulayıb.

Bu gün akademik Zərifə Əliyeva adına Milli Oftalmologiya Mərkəzində akademik Zərifə Əliyevanın anadan olmasının 94 illiyinə həsr olunmuş “Oftalmologiyanın aktual məsələləri” adlı elmi konfrans keçirilib.

Konfransda çıxış edən Zərifə Əliyeva adına Milli Oftalmologiya Mərkəzinin direktoru Elmar Qasımov bildirib ki, Zərifə xanımın elmi fəaliyyəti çoxşaxəli və zəngindir.

E.Qasımov vurğulayıb ki, Azərbaycan oftalmologiyasının bugünki inkişafı həm klinik, həm elmi baxımdan Zərifə xanımın adı ilə bağlıdır və onun elmi istiqamətlərinin bir hissəsidir: “Bizim bugünki inkişafımız Zərifə xanımın birbaşa köməyidir, onun işinin davamıdır. Zərifə xanım Əliyeva eyni zamanda, yüksək keyfiyyətlərə malik bir insan idi”.

E.Qasımov bildirib ki, Zərifə xanım Əliyevanın fəaliyyət göstərdiyi dövrdə Azərbaycanda traxoma xəstəliyi çox yayılmışdı: “Zərifə xanım ölkəmizdə traxomanın ləğv olunmasına böyük səy göstərib”.

E.Qasımov əlavə edib ki, Zərifə xanımın 200-ə yaxın elmi məqaləsi çap olunub. O qeyd edib ki, Zərifə xanım həmişə xəstələrə qayğı göstərib, gənc həkimlərə lazımi şərait yaradıb: “Bu gün də Azrbaycanda oftalmologya Zərifə xanımın fəaliyyətindən faydalanır. Zərifə Əliyevanın fəaliyyəti müasir oftalmoloqlar üçün bir nümunədir və onun xatirəsi həmişə qəlbimizidə uca tutulacaq”.

Daha sonra çıxış edən Zərifə Əliyeva adına Milli Oftalmologiya Mərkəzinin elm üzrə direktor müavini Hicran Namazova Zərifə Əliyevanın elmi və pedaqoji fəaliyyəti haqqında danışıb.

O qeyd edib ki, Zərifə xanım Azərbaycanın görkəmli alimi olmaqla, bütün xalqımızın hörmət etdiyi bir şəxsiyyətdir: “Zərifə xanım Azərbaycan oftalmologiyasını ölkəmizin hüdudlarından çox uzaqlarda da tanıtmışdı. Bu gün də Azərbaycan oftalmologiyasının dünyada tanınması Zərifə xanımın fəaliyyətinin nəticəsidir. Zərifə xanım haqqında çox sözlər deyilib, kitablar yazılıb, amma onun fəaliyyəti o qədər geniş idi ki, biz onun fəaliyyəti barədə nəyisə unuda bilərik. Bu gün də oftalmoloqlar Zərifə xanımın fəaliyyətindən bəhrələnirlər. Zərifə xanım eyni zamanda, gözəl pedaqoq idi. Zərifə xanımın qoyduğu irs bu gün də davam edir və oftalmoloqlar üçün bir örnəkdir”.

Daha sonra tədbirdə bir sıra elmi məruzələr dinlənilib və tədbir iştirakçılarının müxtəlif sualları cavablandırılıb.

Prokurorluq orqanlarında yeni təyinat olub.
Baş prokuror Zakir Qaralovun imzaladığı əmrlə Baş prokuror yanında Korrupsiyaya Qarşı Mübarizə Baş İdarəsinin Təşkilati və informasiya təminatı idarəsinin rəisi Orxan İsayev tutduğu vəzifədən azad edilərək Baş prokuror yanında Korrupsiyaya Qarşı Mübarizə Baş İdarəsinin rəis müavini vəzifəsinə təyin edilib.
Qeyd edək ki, Baş prokuror yanında Korrupsiyaya Qarşı Mübarizə Baş İdarəsinin rəis müavini vəzifəsində çalışmış İlqar Abbasov ötən gün Baş prokuror Zakir Qaralovun imzaladığı müvafiq əmrlə Bakı şəhər prokuroru təyin olunub.
Səlahiyyət müddəti başa çatan Bakı şəhər prokuroru olmuş Əziz Seyidov aprelin 25-də Milli Məclisin qəbul etdiyi qərarla Ali Məhkəmənin hakimi seçilib.

APA

Aprelin 22-dən 27-dək Lənkəranda AMEA Rəyasət Heyəti, A.A.Bakıxanov adına Tarix İnstitutu, Türkiyənin Atatürk Araşdırma Mərkəzi (ATAM) və Lənkəran Şəhər İcra Hakimiyyətinin birgə təşkilatçılığı ilə “XX əsrdə türk-müsəlman xalqlarına qarşı soyqırımları” mövzusunda IV Beynəlxalq elmi konfrans keçirilib.

Konfrans iştirakçıları adından Azərbaycan Respublikasının Prezidenti İlham Əliyevə müraciət qəbul olunub.

Müraciətdə deyilir:

“Möhtərəm cənab Prezident!

22-27 aprel 2017-ci ildə Lənkəran şəhərində Azərbaycan Milli Elmlər Akademiyasının Tarix İnstitutu, Türkiyə Respublikasının Atatürk Araşdırmaları Mərkəzi və Azərbaycan Respublikasının Lənkəran rayonunun İcra hakimiyyəti tərəfindən birgə keçirilmiş “XX əsrdə türk-müsəlman xalqlarının soyqırımı” IV Beynəlxalq elmi konfransa göstərdiyiniz hərtərəfli diqqətə və təşkilatçı yardımınıza, eləcə də bu tədbirin iştirakçılarının elmi axtarışlarına və səylərinə verdiyiniz yüksək qiymətə görə Sizə öz dərin minnətdarlığımızı bildiririk.

Azərbaycanın ümummilli lideri Heydər Əliyevin hərtərəfli tədqiq olunmağa məsləhət bildiyi XIX-XX əsrlər tarixinin müxtəlif problemlərinə həsr olunan konfrans təkcə Azərbaycan Respublikasının deyil, dünyanın bir sıra başqa ölkələrin elmi həyatında mühüm hadisə oldu.

Azərbaycanda bir sıra nüfuzlu elmi simpoziumların və konfransların keçirilməsi, eləcə də ötən illərdə keçirilmiş beynəlxalq soyqırım konfranslarının iştirakçılarına Sizin Müraciətləriniz doğma xalqınızın tarixinə, ümumiyyətlə tarix elminə böyük əhəmiyyət verdiyinizi təsdiq edir.

Azərbaycan Respublikası Prezidentinin “XX əsrdə türk-müsəlman xalqlarının soyqırımı” IV Beynəlxalq elmi konfransın iştirakçılarına ünvanlanmış və tarixçi alimlərin fəaliyyətlərinin əsas istiqamətlərini, müzakirəsi aktual olan məsələləri əks etdirən Müraciəti tarixi keçmişimizin bundan sonra da dərindən öyrənilməsi üçün yeni imkanlar açır.

2017-ci ili İslam Həmrəyliyi İli elan etməyiniz baxımından da “XX əsrdə türk-müsəlman xalqlarının soyqırımı” IV Beynəlxalq elmi konfransın keçirilməsi xüsusi əhəmiyyətə malikdir.

Biz, “XX əsrdə türk-müsəlman xalqlarının soyqırımı” IV Beynəlxalq elmi konfransın iştirakçıları, təsdiq edirik ki, XIX əsrin ilk onilliklərində ermənilərin Şimali Azərbaycanın ərazilərinə kütləvi köçürülməsi, 1918-ci ilin yazında erməni millətçilərinin törətdiyi Azərbaycan xalqına qarşı soyqırımı, həmin ilin mayında əzəli Azərbaycan torpağı olan İrəvan bölgəsində Ermənistan (Ararat) Respublikasının yaradılması, bir əsr bundan əvvəl baş vermiş fəciəli hadisələr zamanı qanlı cinayətlərə səbəb olmuşQarabağ, Naxçıvan və Azərbaycanın digər torpaqlarına ermənilərin ərazi iddiaları, Azərbaycanın Zəngəzur vilayətinin Ermənistan SSR-ə verilməsi,İkinci dünya müharibəsindən sonra azərbaycanlıların Ermənistan SSR-dən deportasiyası – bütün bu proseslərbu gün bölgədə yaşanan faciələrin, ilk növbədə Ermənistan-Azərbaycan Dağlıq Qarabağ münaqişəsinin bünövrəsini qoymuşdur.

Tarixin dərslərinə məhəl qoyulmaması, soyqırımları törətmiş cinayətkarların cəzasızlığı artıq müasir dövrdəerməni millətçilərinin dağıdıcı fəaliyyətinə şərait yaratmışdır. Ərazisindən yüz minlərlə yerli əhali olan azərbaycanlıların, eləcə də digər xalqların nümayəndələrinin qovulmasından sonra monoetnik dövlətə çevrilən Ermənistan Respublikası qonşu xalqlara qarşı əsassız ərazi iddiaları ilə çıxış edir, Azərbaycan Respublikasının dünya birliyi tərəfindən tanınan ərazisinin beşdə bir hissəsinin işğalını davam etdirir. Bu siyasətin nəticəsindəDağlıq Qarabağın və digər Azərbaycan torpaqlarının əhalisinə qarşı amansız etnik təmizləmələri baş vermiş, bir milyondan artıq Azərbaycan Respublikasının vətəndaşı öz doğma torpağında məcburi köçkünə çevrilmiş, işğal edilmiş ərazilərdə Azərbaycan xalqının miniilliklər ərzində yaratdığı sivilizasiyanın izlərini silmək məqsədilə onun mənəvi və maddi mədəniyyətinin abidələri məhv edilmişdir.

“XX əsrdə türk-müsəlman xalqlarının soyqırımı” IV Beynəlxalq elmi konfransın məhz Lənkəranda keçirilməsi təsadüfi deyildir. Azərbaycanın ərazisində ən qədim yaşayış yerlərindən biri olan bu şəhər və onun ətrafı 99 il öncə Azərbaycan xalqına qarşı soyqırımları siyasətinin tərkib hissəsi olmuş erməni hərbi birləşmələri tərəfindən həyata keçirilən ağır cəza əməliyyatına məruz qalmışdır.

Konfransda eşidilmiş məruzələr müasir dünyanın yaşadığı geosiyasi sarsıntılar şəraitində tarixi təcrübənin nəzərə alınması zəruriliyini çox aydın şəkildə ortaya qoydu. Bu gün biz Yaxın Şərqin və Ön Asiyanın bir sıra ölkələrindəvəziyyətin xeyli kəskinləşməsini müşahidə edirik ki, bu da arasıkəsilməz müharibələrə, bölgələrdə və qlobal miqyasda qanlı qarşıdurmalara gətirib çıxarır. “İnsan hüquqları”, “demokratiya”, “beynəlxalq hüququn müdafiəsi”, “terrorizmə qarşı mübarizə”nin adı altında böyük dövlətlər əslində yalnız soyqırımlar və terror üçün əlverişli şərait yaradaraq dünyanı təsir dairələrinə yenidən bölmək uğrunda ölüm-dirim mübarizəsi aparırlar. Başqa sözlə desək, Xaç yürüşləri və Böyük coğrafi kəşflər dövründən başlayan özgə torpaqların zəbt edilməsi, yerli xalqların və onların yaratdığı qədim mədəniyyətlərin məhv edilməsi siyasəti bu gün yeni üsullarla və yeni formalarda davam olunmaqdadır. Bu siyasətin əsas hədəfi isə yenidən Şərq xalqları, o cümlədən türk və islam aləmidir.

Avropanı, ümumilikdə Qərbi bürüməkdə olan ksenofobiya və antiislaməhval-ruhiyyəsinin yüksəlişi tolerantlıq və multikulturalizm dəyərlərindən xatırladır ki, bunsuzda xalqlararası və konfessiyalararası sülhü təsəvvür etmək mümkün deyil. Məhz bu keyfiyyətlər Azərbaycanı – məclisimizdə təmsil olunan dövlətlərin elmi həyatında mühüm hadisə olan “XX əsrdə türk-müsəlman xalqlarının soyqırımı” IV Beynəlxalq elmi konfransınkeçirildiyi ölkəni fərqləndirir.

Azərbaycan sözün əsl mənasında tolerantlığın, multikulturalizmin, millətlərarası və dinlərarası sülhün bərqərar edilməsinə yönələn uğurlu dövlətsiyasətinin örnəyidir. Bu siyasətin həyata keçirilməsi Sizin, cənab Prezident, və Sizin başçılıq etdiyi dövlətin xidmətidir.

Biz, “XX əsrdə türk-müsəlman xalqlarının soyqırımı” IV Beynəlxalq elmi konfransıniştirakçıları, Sizə, cənab Prezident, qədim Lənkəranda bu mötəbər elmi məclisin keçirilməsinə yardım göstərdiyinizə görə bir daha öz dərin minnətdarlığımızı bildiririk. Sizə Azərbaycan Respublikasının ərazi bütövlüyünün təmin edilməsinaminə, Azərbaycanın və bütün bölgənin çiçəklənməsi, dünyada sülhün və təhlükəsizliyin bərqərar edilməsi istiqamətində apardığınız yorulmaz fəaliyyətinizdə uğurlar arzulayırıq”.

AŞPA və bu kimi digər Avropa strukturları əslində Qərb imperializminin milli dövlətlərə təzyiq etmək, onları şantaj etmək üçün yaratdığı xüsusi mexanizmlərdir. Zahirən insan hüquqları və azadlıqları kimi qlobal dəyərləri müdafiə edən mühüm bir Avropa strukturu kimi görünən bu təşkilatlar əslində imperializmin maraqlarına xidmət edir.

Bu fikirləri Avropa Şurası Parlament Assambleyasının Türkiyə ilə bağlı monitorinqi bərpa etmək qərarını şərh edən Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu bildirib.

Hikmət Babaoğlu deyib: “Mexanizm belə qurulub ki, əvvəlcə ayrı-ayrı dövlətlər bu cür qurumlara cəlb olunur və onlara ümumi öhdəliklər qəbul etdirilir. Sonra isə planın ikinci əsas hissəsi işə düşür. Bu mərhələdə öz məqsədlərinə çatmaq, yəni, dövlətləri öz istəklərinə uyğun şəkildə idarə etmək, onları istismar etmək üçün addımlar atılır. Buna etiraz edilən zaman isə dərhal həmin ölkə insan hüquq və azadlıqlarının pozulduğu ölkə kimi qələmə verilir və şantaja məruz qalır. Bu metod xüsusilə müsəlman ölkələrinə qarşı tətbiq edilir. Əgər konkret ifadə etməyə çalışsaq, Avropa İttifaqının bütün struktur vahidləri, o cümlədən AŞPA müsəlman ölkələrinə qarşı əməlli-başlı siyasi terror müharibəsi aparır. Onlar, belə demək mümkündürsə, insan hüquq və azadlıqları silahı ilə hücum edir, Yaxın Şərqdə başlatdıqları idarəolunan xaos müharibəsini bütün müsəlman ölkələrinə yaymağa çalışırlar. Bu hibrid müharibə növü Qərb imperializminin düşünüb tapdığı ən qəddar, ən amansız və ən əxlaqsız müharibədir. Bu müharibə idarəolunan xaos nəzəriyyəsinə və vətəndaşların insan hüquqları adı ilə aldadılaraq öz əlləri ilə qurduqları dövləti yıxmağa əsaslanır. Bundan sonra isə həmin ölkənin dövləti həmin xalqın başına uçurulur və bütün sərvəti talan edilir. Ötən ilin 15 iyul hadisələri də Türkiyəni imperializmin yeni müharibə poliqonuna çevirməyə hesablanmışdı. Ancaq türk xalqı Qoca qitənin bu hiyləsinə aldanmadı. Əksinə, referendum qərarı alaraq öz milli dövlətini bir qədər də gücləndirdi. İndi Avropa bunun əvəzini çıxmağa çalışır. Ona görə də AŞPA vasitəsilə belə bir siyasi şantaj həyata keçirir”.

Milli Məclisin deputatı qeyd edib ki, belə şantajlara Azərbaycan da zaman-zaman məruz qalıb. Siyasi məhbus manipulyasiyası, məşhur Ştrasser monitorinqi kimi siyasi şoular hamımızın xatirindədir. Məqsəd Azərbaycana Qarabağı unutdurmaq, işğalçı Ermənistan tərəfindən hər cür hüquqları pozulan bir milyondan çox azərbaycanlının hüquqlarının bərpasını gözardı etmək, Azərbaycanda siyasi xaos yaratmaqla milli dövlətimizi zəiflətmək idi. Hazırda eyni siyasət Türkiyəyə qarşı aparılır. Çünki Qərb imperializmi islamofob fəlsəfə ilə idarə olunur. Müsəlman Şərqində apardıqları müharibə də onların gözündə növbəti səlib yürüşüdür. Bu yürüşün zəfərlə bitməsinə isə başlıca maneə Türkiyədir. Məsələnin kökündə bu dayanır. Ona görə, bundan sonra da Qərb imperializminin hücumları davam edəcək.

“Çox mürəkkəb və həssas bir tarixi mərhələdən keçirik və çox ayıq olmalıyıq. Yeni birliklər yaratmalıyıq. TürkPA, Türk Şurası kimi təşkilatlarımızı gücləndirməli və birgə addımlar atmalıyıq. Bunu dəstəkləyən güclü iqtisadiyyat və hərbi sənaye qurmalıyıq. Əks təqdirdə, Qərb imperializminin müharibə maşını bundan sonra da bir çox xalqların milli dövlətlərini əllərindən almağa davam edəcək”, – deyə H.Babaoğlu bildirib.

AZƏRTAC

Görkəmli oftalmoloq-alim, akademik Zərifə Əliyevanın doğum günü münasibəti ilə Mərkəzi Neftçilər Xəstəxanasında “Açıq qapı” aksiyası keçiriləcək.

Bu barədə Səhiyyə Nazirliyindən məlumat verilib.

Nazirlikdən bildirilib ki, aksiya sabah keçiriləcək.

Sabah səhər 9:00-dan 15:00-a kimi Mərkəzin Oftalmologiya şöbəsinin mütəxəssisləri vətəndaşların təmənnasız müayinələrini icra edəcəklər.

Trend

Ötən il Azərbaycanda keçirilən buraxılış imtahanları nəticəsində 9 və 11-ci siniflər üzrə bəzi şagirdlərin yazıb-oxumağı bacarmaması məlum olub. Dövlət İmtahan Mərkəzinin nəşr etdiyi Abituriyent jurnalının 12-ci sayında qeyd olunub ki, 9 və 11-ci siniflərin şagirdləri arasında nəinki tədris proqramını minimum mənimsəməyənlər, hətta yazıb-oxumaqda çətinlik çəkənlər və ya ümumiyyətlə yazıb-oxumağı bacarmayanlar da aşkarlanıb. 11-ci sinif şagirdləri arasında 22 nəfər, 9-cu sinif şagirdləri arasında isə 69 nəfər belə şagird olub: “Bu statistika imtahan rəhbərlərinin protokolları əsasında ortaya çıxıb. Bu cür halların imtahan rəhbərlərinin əksəriyyətinin protokollarında qeyd olunmamasını nəzərə alsaq, yuxarıda göstərilən faktların, əslində, daha çox olduğunu və vəziyyətin daha acınacaqlı olduğunu ehtimal etmək mümkündür”.

Belə şagirdlərin 9-cu, 11-ci sinfə qədər gəlib çatması müəmmalıdır. 11-ci siniflər üzrə yazıb-oxumağı bacarmayan şagirdlərin rayonlar (şəhərlər) üzrə sayı belədir: Lənkəran rayonunda 4 nəfər, Bakı şəhərində və Bərdə, Füzuli, Gədəbəy, Salyan rayonlarının hərəsində 2 nəfər, Ağdam, Cəbrayıl, Göyçay, Göygöl, Kürdəmir, Lerik, Neftçala və Sabirabad rayonlarının hər birindən 1 nəfər olub.

9-cu siniflər yazıb-oxumağı bacarmayan şagirdlərin rayonlar (şəhərlər) üzrə sayı belədir: Cəlilabada rayonunda 8 nəfər, Salyan rayonunda 6 nəfər, Füzuli, Lənkəran və Qazax rayonlarının hər birindən 3 nəfər, Daşkəsən, Biləsuvar, Gədəbəy, Göygöl, Qusar, Tovuz və Ucar rayonlarının hər birindən 2 nəfər, Gəncə, Şirvan və Yevlax şəhərlərinin, Kəlbəcər, Kürdəmir, Neftçala, Qax, Qobustan, Şəki, Zaqatala və Zərdab rayonlarının hərəsindən 1 nəfər olub.

SİA

AMEA Mərkəzi Elmi Kitabxanasına (MEK) Azərbaycan Respublikası Müəllif Hüquqları Agentliyinin sədri, professor Kamran İmanov tərəfindən sənədlər təqdim edilib.
Milli müəllif-hüquq institutunun inkişafı və təkmilləşdirilməsi, sonrakı illərdə davam etdirilməsi məqsədi daşıyan sənədlər aşağıdakılardır.
1.“Azərbaycan Respublikasında Əqli Mülkiyyət Hüquqları (dair bələdçi)”
2.“IT-IP: Əqli Mülkiyyətin gələcəyinə baxış (2016)”
3.“Əqli mülkiyyət iqtisadi kateqoriya kimi və onun iqtisadi inkişdakı rolu”
4.“Kreativ İqtisadiyyat və Azərbaycan İqtisadiyyatının inkişafı”
5.“Azərbaycan Universitetlərində və Elmi-Tədqiqat müəssisələrində əqli mülkiyyət sahəsindəki siyasət haqqında”
6.“Açıq təhsil resursları (ART) Əqli Mülkiyyət mövqeyindən”
7.“Elmi, tədris və ədəbi əsərlərin mətnlərində plagiat və onun alınması yolları”
8.“Fonoqram istehlakçılarının mənafelərinin onların fonoqramlarının qeyri-qanuni surətlərinin çıxarılmasından qorunmasına dair Konvensiya (29 oktyabr 1971-ci ildə Cenevrədə icra edildi)”
9.“Авторское право в Азербайджане (возможности и перспективы)”
10.“Национальная стратегия развития сферы авторского права и других прав ИС”
11. “Пекинский договор по аудиовизуальным исполнениям (приняты Дипломатической конференцией по охране аудиовизуальных исполнений 24 июня 2012 г. в Пекине)
12.“Всемирная конвенция об авторском праве (подписано в Женеве 06.09 1952 г. , пересмотрено в Париже 24.07.1971 г.),
13.The laws regulating the activity in the field of copyright of the Republic of Azerbaijan”
14. “Azərbaycanın müəllif-hüquq sistemi 20 ildə”
15. “Elektoron nəşrlər və müəllif- hüquq problemləri”
16.“İnternet və müəllif hüququ: maraqların toqquşması və kompromisin axtarışı”
17.Законы Азербайджанской Республики, регулирующие деятельность в авторско – правой сфере.
Kamran İmanovun müəllif hüquqları Azərbaycan xalqına məxsus olan tarixi abidələrin, şifahi xalq ədəbiyyatı nümunələrinin və müəllifi məlum olan əsərlərin ermənilər tərəfindən mənimsənilməsi ilə bağlı təqdim etdiyi sənədlər:
1.“Erməni tarixi uydurmalarının tarixinə giriş”
2.“Gəldim, gördüm…, mənimsədim”
3.“Армянски геноцид или армянский террор?”
4.“Кавказская Албания и хатты Малой Азии”
5. “Aрмянские инородные сказки”
Sənədlər Azərbaycan, rus, ingilis dillərində oxuculara təqdim edilir.

Tarixi təcrübə sübut edib ki, xüsusi mülkiyyətə, özəl təşəbbüslərə, işgüzarlığa, azad biznes fəaliyyətinə və rəqabətə əsaslanmayan hər hansı iqtisadi model səmərəli ola bilməz.

Bu barədə Azərbaycan Prezidentinin ictimai-siyasi məsələlər üzrə köməkçisi Əli Həsənovun “Biznes həyatı” jurnalında dərc olunan məqaləsində deyilir.

Ə.Həsənov qeyd edib ki, sahibkarlığın dəstəklənməsi Azərbaycan dovlətinin sosial-iqtisadi inkişaf strategiyasının ən önəmli istiqamətlərindən birini təşkil edir: “Dövlət-sahibkar münasibətlərinin tənzimlənməsi, iqtisadi qanunvericiliyin, inzibati prosedurların və institutsional mexanizmlərin təkmilləşdirilməsi, biznes subyektləri arasında işgüzar əlaqələrin inkişafi, sosial-iqtisadi proqramların həyata keçirilməsi və digər ardıcıl tədbirlər nəticəsində ölkə iqtisadiyyatında özəl sektorun payı 80%-i ötüb, məşğul əhalinin 70%-dən çoxu bu sektorda cəmləşib”.

PA rəsmisi bildirib ki, Azərbaycanda sahibkarlığa göstərilən dövlət qayğısı müxtəlif sahələrdə özünü büruzə verir. Azərbaycan Prezidenti İlham Əliyevin Saatlıda pambıqçılığın inkişaf məsələlərinə həsr olunmuş respublika müşavirəsində qeyd etdiyi kimi bu sahədə xüsusi əhəmiyyət daşıyan amil dövlət başçısının ardıcıl siyasi dəstəyinin olmasıdır. Prezident İlham Əliyev tez-tez sahibkarlarla görüşür, onların problemlərinin həlli yönündə tapşırıqlar verir, iş adamlarını ölkə iqtisadiyyatına daha böyük sərmayə yatırmağa həvəsləndirir.

Ə.Həsənov yazır ki, qlobal iqtisadi böhranın təsirləri, dünya bazarında konyuktur və qiymət tərəddüdləri dövlətin iqtisadi siyasətində nəzərə alınaraq, vaxtında və adekvat addımlar atılır: “Hazırda bu siyasətin əsas qayəsini ölkə iqtisadiyyatının şaxələndirilməsi, neftdən asılılığın aradan qaldırılması təşkil edir. Son vaxtlar biznes və investisiya mühitinin yaxşılaşdırılması iqtiqamətində ardıcıl tədbirlər həyata keçirilir. Dövlət başçısı milli iqtisadiyyatın əsas sektorları üzrə strateji yol xəritələrini təsdiq edib. Şübhə yoxdur ki, bu sənədlərdə nəzərdə tutulan tədbirlərin reallaşdırılması sahibkarlığın inkişafına əhəmiyyətli töhfə verəcək”.

Trend

Azərbaycan prezidenti İlham Əliyev Səudiyyə Ərəbistanı Krallığının energetika, sənaye və təbii sərvətlər naziri Xalid Əbdüləziz Əl Falihin başçılıq etdiyi nümayəndə heyətini qəbul edib.

Dövlət başçısı Səudiyyə Ərəbistanı Krallığına rəsmi səfərini və bu səfər zamanı İki Müqəddəs Məscidin Xadimi, Səudiyyə Ərəbistanının kralı Salman bin Əbdüləziz Al Səud və digər rəhbər şəxslərlə səmərəli görüşlərini məmnunluqla xatırlayıb.

Nazir Xalid Əbdüləziz Əl Falih ilə bu il Davosda keçirdikləri görüşü də xatırlayan dövlət başçısı onun ölkəmizə səfərinin Azərbaycanla daha yaxından tanış olmaq üçün yaxşı fürsət yaratdığını bildirib. Ölkələrimiz arasında ikitərəfli münasibətlərin çox yüksək səviyyədə olduğunu deyən prezident İlham Əliyev əlaqələrimizin getdikcə daha da möhkəmləndiyini vurğulayıb, mövcud əməkdaşlığımızın davam etdirilməsinin vacibliyini qeyd edib.

Dövlət başçısı ölkəmizin ikitərəfli əlaqələrin müxtəlif sahələrdə genişləndirilməsində maraqlı olduğunu deyib. Siyasi əlaqələrimizin çox yüksək səviyyədə olduğunu bildirən prezident İlham Əliyev bu imkandan istifadə edərək ölkələrimiz arasında iqtisadi sahədə mövcud olan əməkdaşlığın inkişaf etdirilməsinin, qarşılıqlı ticarət və qarşılıqlı ixracın artırılmasının zəruriliyini vurğulayıb. Enerji ehtiyatlarının işlənilməsi, neft və qazın emalı, neft-kimya sahəsində əməkdaşlığımızın əhəmiyyətini qeyd edən dövlət başçısı bu sahələrdə Azərbaycanın əldə etdiyi uğurlardan danışıb, dünyada sənaye üsulu ilə ilk neft quyusunun məhz Azərbaycanda qazıldığını, ölkələrimizin bu sahədə zəngin təcrübəsinin olduğunu bildirib. Prezident İlham Əliyev nümayəndə heyətinin sabah Səngəçal terminalı və buradakı layihələrin bir qismi ilə tanışlığının önəmini qeyd edib, Xalid Əbdüləziz Əl Falihin Azərbaycana səfərinin enerji sahəsində əməkdaşlığımızın inkişafında yeni dinamika yaradacağına ümidvar olduğunu bildirib.

Qonaq bildirib ki, o, Azərbaycan kimi gözəl bir ölkəyə səfər etməsindən məmnunluq duyur. Xalid Əbdüləziz Əl Falih ölkələrimiz və xalqlarımız arasında əlaqələrin dərin və qədim köklərə malik olduğunu, mədəni əməkdaşlığımızın uzun əsrlərdən bəri davam etdiyini vurğulayıb, bu əməkdaşlığımızın prezident İlham Əliyevin rəhbərliyi altında daha da genişləndirildiyini qeyd edib. Səudiyyə Ərəbistanı Krallığının Azərbaycanın müstəqilliyini tanıyan ilk dövlətlərdən biri olduğunu vurğulayan Xalid Əbdüləziz Əl Falih ölkələrimiz arasında diplomatik əlaqələrin qurulmasının 25 illiyinin qeyd edilməsindən məmnunluğunu ifadə edib. O, Səudiyyə Ərəbistanının Azərbaycanın ərazi bütövlüyünü daim dəstəklədiyini, ötən illər ərzində ölkələrimizin möhkəm əməkdaşlıq əlaqələri qurduğunu və bir-birini hər zaman dəstəklədiklərini qeyd edib.

Səudiyyə Ərəbistanı Krallığının energetika, sənaye və təbii sərvətlər naziri Xalid Əbdüləziz Əl Falih Kəbənin üz örtüyünün tərtibatının bir fraqmentini prezident İlham Əliyevə hədiyyə edib.

 

apa.az

Yüzlərlə QHT rəhbəri bankların göstərdiyi xidmətlərin məhdudlaşdırılması ilə əlaqədar bu gün prezidentə müraciət ünvanlayıb.

Beynəlxalq Münasibətlərin Araşdırılması Mərkəzi Mətbuat Xidmətindən verilən məlumatda bildirilir ki, Son günlər banklar Maliyyə Bazarlarına Nəzarət Palatasının məktubuna istinad etməklə, qanunvericiliyə əsasən qeyri-hökumət təşkilatlarına göstərməli olduqları bank xidmətlərinin əhatə dairəsini məhdudlaşdırıblar. Nəticədə ölkədə dövlət tərəfindən maliyyələşdirilən yüzlərlə qeyri-hökumət təşkilatlarının ictimai əhəmiyyətli layihələrinin icrasında qeyri-müəyyənliklər meydana gəlib. Buna səbəb isə “Nağdsız hesablaşmalar haqqında” qanunun 3.4.7-ci maddəsinə istinad edilərək dövlət donor qurumları tərəfindən ayrılmış vəsaitin rəsmiləşdirilməsini nəzərdə tutan qrant müqaviləsinin dövlət satınalma müqaviləsi kimi qiymətləndirilməsi olub.

Maliyyə Bazarlarına Nəzarət Palatasının 16 dekabr 2016-cı il tarixli “Nağdsız hesablaşmalar haqqında” qanuna istinad edərək banklara ünvanladığı məktubun icrası nəticəsində yaranmış problemlərdir.

Qeyd olunur ki, qeyri-hökumət təşkilatları 15 min manatadək məbləğ çərçivəsində nağd qaydada hesablaşmaların aparılmasını həyata keçirə bilmirlər. Hazırda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən keçirilən müsabiqə nəticələrinə əsasən müxtəlif layihələrinin icrası ilə bağlı ayrılmış maliyyə vəsaitləri qeyri-hökumət təşkilatlarının bank hesablarına köçürülsə də, bu vəsaitlərdən istifadə praktiki olaraq mümkünsüz hal alıb.

Bu səbəbdən QHT-lər ictimai əhəmiyyətli layihələrinin həyata keçirilməsi ilə bağlı yaranmış çətinliyin aradan qaldırılması və qanunvericiliklə müəyyən edilmiş 15 min manatadək məbləğdə hesablaşmaların nağd qaydada aparılmasının təmin olunmasına dair dövlət başçısından müvafiq göstəriş verməsini xahiş ediblər.

Azərbaycan Respublikasının Milli Məclisində “Dövlət qulluğu haqqında” Qanunda dəyişikliklər edilməsi barədə qanun layihəsi müzakirəyə çıxarılıb. Nəzərdə tutulan dəyişikliklər ətrafında mediada aparılan müzakirələrdə yanlış şərhlərə də rast gəlinir. Nəzərdə tutulan dəyişikliklər barədə Azərbaycan Respublikası Prezidenti Administrasiyasının qanunvericilik və hüquq ekspertizası məsələləri şöbəsinin müdiri Şahin Əliyev AZƏRTAC-a açıqlama verib. O deyib:

-Təəssüf ki, Azərbaycan Respublikasının Konstitusiyasını oxuyan jurnalistlərin sayı kifayət qədər azdır. Bilmək lazımdır ki, qanun Azərbaycan Respublikası Prezidentinin Administrasiyasını ləğv edə bilməz. Çünki Azərbaycan Respublikası Prezidenti Administrasiyasının yaradılması Azərbaycan Respublikası Konstitusiyasının 109-cu maddəsində nəzərdə tutulub.

“Dövlət qulluğu haqqında” Azərbaycan Respublikasının Qanununa nəzərdə tutulan dəyişikliklərin mahiyyəti isə ondan ibarətdir ki, Azərbaycan Respublikası Prezidentinin fəaliyyətini təmin edən bir sıra qurumlar dövlət qulluqçuları təsnifatına salınsın. Misal üçün, Azərbaycan Respublikası Prezidentinin fəaliyyətinin təmin edilməsində yalnız Azərbaycan Respublikası Prezidentinin Administrasiyası deyil, Azərbaycan Respublikası Prezidentinin İşlər İdarəsi, Azərbaycan Respublikası Prezidentinin Xüsusi Tibb Xidməti də iştirak edir.

Ona görə də “Dövlət qulluğu haqqında” Azərbaycan Respublikasının Qanununa təklif olunan dəyişikliklərdə Azərbaycan Respublikası Prezidentinin fəaliyyətini təmin edən qurumlar cəm halda göstərilir. Azərbaycan Respublikası Prezidentinin Administrasiyasının adı qanunda öz əksini tapa bilər, çünki bu ad Konstitusiyada təsbit olunub. Lakin adını çəkdiyim digər iki qurumun – Azərbaycan Respublikası Prezidentinin İşlər İdarəsi, Azərbaycan Respublikası Prezidentinin Xüsusi Tibb Xidmətinin adları qanuna salına bilməz. Ona görə ki, bu hal olsaydı, Azərbaycan Respublikası Prezidentinin səlahiyyətləri məhdudlaşmış olardı.

Konstitusiyaya görə, Azərbaycan Respublikasının Prezidenti qanunları poza bilməz və adını çəkdiyim qurumların mövcudluğu qanunda öz əksini tapsaydı, gələcəkdə zərurət olduqda Prezident onları yenidən təşkil edə və ya adlarını dəyişdirə bilməzdi.

XƏBƏR LENTİ