Çərşənbə, Mart 29, 2017
GÜNDƏM

ATƏT Parlament Assembleyasının vitse-prezidenti Azay Quliyev 28 mart 2017-ci ildə Sankt-Peterburqda ATƏT PA və Müstəqil Dövlətlər Birliyi üzv ölkələrin Parlamentlərarası Assambleyasının birgə təşkil etdiyi “Beynəlxalq Terrorizmlə Mübarizə üzrə Parlament Konfransı”nda çıxış edib.
“Beynəlxalq (Humanitar) Hüquq və Terrorizm: Çağırışlar və onlara cavablar” mövzusunda məruzə edən ATƏT PA-nın vitse-prezidenti Azay Quliyev indiyədək terrorizmi pisləyən çoxsaylı bəyanat və qətnamələrin qəbul edilməsinə baxmayaraq, həmin sənədlərdə terror fəaliyyətinin effektiv şəkildə aradan qaldırılmasına (hərbi, siyasi, hüquqi və s.) yönələn mexanizmlərin olmadığını bildirib: “Bu gün hər bir dövlət öz vətəndaşlarını terror təhlükəsindən qorumağı bacarmalıdır. Bu dövlətlərin təkcə hüququ deyil, eyni zamanda vəzifəsidir. Dünya birliyi, ayrı-ayrı ölkələr beynəlxalq terrorla mübarizədə öz səy və potensialını birləşdirməli və “ümumidüşmənlə” effektiv şəkildə mübarizə aparmalıdır. Lakin dövlətlər elə etməlidir ki, terrorizmlə mübarizə tədbirləri zamanı insan hüquqları və humanitar standartlar pozulmasın, başqa sözlə, demokratik dəyərlər və insan hüquqları terrorla mübarizəyə qurban edilməsin. Əksinə, terrora qarşı mübarizədə yeganə uzunmüddətli və səmərəli vasitə BMT Nizamnaməsi, insan hüquqları haqqında beynəlxalq razılaşmalar və Cenevrə Konvensiyaları kimi ən mühüm beynəlxalq sənədlərdə göstərilən insan hüquqları, demokratiya və sosial ədalətə real həyatda əməl etməklə ciddi nailiyyətlər əldə etmək olar”.
Azay Quliyev son illərdə bəzi ATƏT ölkələrində qaçqın və sığınacaq axtaranlara qarşı kriminal hərəkətlərin artmasının narahatlıq doğurduğunu deyib: “Qaçqın və sığınacaq axtaran kütlənin içərisində ağır cinayət əməlləri törətmiş şəxslərin də olması qeyd olunan kateqoriyaya mənsub bütün insanlara pis münasibət göstərilməsinə və onların lənətlənməsinə əsas vermir. Sığınacaq axtaranların həmin ölkələrə qeyri-qanuni gəlmələri onların tələblərinin rədd edilməsinə səbəb ola bilməz. Eyni zamanda onların ağır cinayətlər törətmiş etnik və ya dini qruplara aid olması həmin insanların təcrid olunmasına əsas yaratmır. Əgər biz terror aktlarına qarşı mübarizə apararkən insan hüquqlarını qoruya bilməsək, nəticədə terroristlər və bütövlükdə terror bütün bəşəriyyətə qalib gələcək. Məhz terrorçuların əsas məqsədi dünya düzənini pozmaq, ölkələrdə çaxnaşma və xaos yaratmaq, ən əsası isə hamılıqla qəbul edilən demokratik dəyər və prinsipləri məhv etməkdən ibarətdir”.
ATƏT PA-nın vitse-prezidenti Azay Quliyev çıxışında diqqəti qaçqın və sığınacaq axtaranlara birbaşa təsir göstərə biləcək 5 əsas problemə yönəldib: “Birinci, terrorla əlaqəsi olan və ya bu cür əlaqədə əsaslı şəkildə şübhəli bilinən şəxslərlə həqiqi qaçqın vəziyyətinə düşən şəxslər arasında fərq dəqiq müəyyənləşməli və  qaçqın statusunu almaq üçün tələb olunan prosedurlara əməl edilməsi minimum satandartlara cavab verməlidir. Əmin olmaq lazımdır ki, qaçqınların müəyyən edilməsi ilə bağlı qərarlar bu sahədə bilikli və yüksək ixtisaslı şəxslər tərəfindən qəbul olunur.Qaçqın statusu almaq istəyən vicdanlı insanların hüquqları pozulmamaldır. Hamı qəbul etməlidir ki, bu insanlar məhz terrorun qurbanına çevrilərək qaçqın vəziyyətinə düşüb və yaranmış münaqişə vəziyyətindən canını qurtarmaq üçün başqa ölkələrə pənah gətirmək məcburiyyətində qalıblar”.
İkinci məsələ sığınacaq axtaranlarla rəftarla bağlıdır. Bir çox hallarda sığınacaq axtaranlara münasibət müsbət olmur. Onlar dini və milli zəmində diskriminasiyaya məruz qalır və ciddi təzyiqlərlə üzləşirlər. Hesab edirəm ki, sığınacaq axtaranların həbsi istisna hal olmalı, adi bir qaydaya çevrilməməlidir. Bu həbslər yalnız o zaman qəbul edilə bilər ki, onların terrorla əlaqəsinin olmasına əsaslı şübhələr olsun və ya həbslə bağlı şərtlər ədalətli olsun. Bununla belə, daxili qanunvericiliyə əsasən bu həbslər məhkəmə təftişinə tabe olmaqla yanaşı, həm də qeyd edilən prosesə uyğun olmalıdır.
Digər bir mühüm məsələyə – qaçqınların və sığınacaq axtaranların təcrid edilmə məsələsinə toxunan Azay  Quliyev qeyd edib: “Unutmaq olmaz ki, həqiqi qaçqınlar və sığınacaq axtaranlar terrorun qurbanı olaraq ölkələr tərəfindən tam şəkildə müdafiə olunmalıdır. Ağır cinayətlərə görə məsuliyyət daşıyan şəxslərdən başqa heç kim üz tutduğu ölkədə təcridə məruz qalmamalıdır. Onlar beynəlxalq humanitar qanunların tələblərinə uyğun olaraq müdafiə olunmalı və əsasssız olaraq qaçqın statusundan məhrum edilməməlidirlər. Mən  dövlətləri beynəlxalq hüququn tələbinə əməl etməyə çağırıram” .
1951-ci il Konvensiyası göstərilən proseslə bağlı qanuna əsaslanaraq verilmiş qərara uyğun olaraq qaçqınların ölkədən çıxarılmasına – deportasiyasına milli təhlükəsizlik və ya ictimai asayişə təhlükə ola biləcəyi hallarda icazə verir. Bu halda qaçqına ona qarşı irəli sürülən ittihamlara cavab vermək üçün sübutların təqdim edilməsinə şərait yaradılmalıdır”.
Azay Quliyev çıxışında BMT Təhlükəsizlik Şurasının terrorçu və sığınacaq axtaranlar/qaçqınlar arasında əlaqələrin olduğunu irəli sürən 1373 nömrəli qətnaməsini tənqiq edərək bildirib ki, bu qətnamənin olduğu kimi tətbiqi bir sıra anlaşılmazlıqlara, sui-istifadələrə qanun pozuntularına səbəb olur. “Qətnamədəki müddəaların bəziləri möbcud vəziyyətə tam olaraq adekvat deyil və onların yerinə yetirilməsi qeyri müəyyənliyə, ədalətsiz qərarların qəbuluna, bir sıra hallarda isə  pozuntularla səbəb olur. Ona görə də sözügedən qətnamə beynəlxalq qaçqın hüququnun tələblərini nəzərə alaraq tətbiq edilməlidir. Terrorçuların sığınacaq axtaranlarla bağlı sistemdən sui-istifadə etməsinin qarşının alınması üçün dövlətlərin qəbul etdiyi qanuni tədbirlər günahsız qaçqın və sığınacaq axtaranların təqibi ilə nəticələnməməlidir”.
Sonda ATƏT PA-nın vitse-prezidenti Azay Quliyev aparılan müzakirələrin, səsləndirilən tövsiyələrin qlobal terrorizmlə mübarizə konteksində insan hüquqlarının müdafiə edilməsi işinə töhfə verəcəyinə ümid etdiyini bildirib.

Aprel ayından Yeni Azərbaycan Partiyasının rayon və şəhər təşkilatlarının konfranslarının keçirilməsinə başlanılacaq.

Bunu Yeni Azərbaycan Partiyasının İcra katibinin müavini, Milli Məclisin deputatı Siyavuş Novruzov deyib.

S.Novruzov bildirib ki, konfransların keçirilməsi ilə bağlı hazırlıq işləri yekunlaşıb, ilk təşkilatların hamısında hesabat-seçki yığıncaqları keçirilib, konfranslara nümayəndələr seçilib.

Yerli təşkilatlara yeni sədrlərin seçilməsi məsələsinə gəlincə isə S.Novruzov bildirib ki, bu, partiyanın nizamnaməsinə uyğun olaraq konfrans nümayəndələrinin səlahiyyətinə aid olan bir məsələdir: “Ötən konfranslardan indiyə qədər partiyanın sıralarına yeni insanlar daxil olub, hər bir rayon və şəhər təşkilatının sıraları genişlənib, xüsusilə gənclərin və qadınların sayı artıb. Ona görə də əgər təşkilat sədri bugünki ictimai-siyasi vəziyyətə cavab vermirsə, təşkilat üzvlərini qane etmirsə, təbii ki, burada qərar konfrans nümayəndələrinindir və onlar da öz qərarlarını verəcəklər”.

S.Novruzov bildirib ki, bu il ərzində konfransların yekunlaşdırılması nəzərdə tutulur: “Növbəti il seçki ilidir. Artq növbəti ildən biz bütün fəaliyyətimizi seçkilər istiqamətində təşkil edəcəyik. Əslində elə konfransların keçirilməsi, partiya sıralarına nəzər yetirilməsi, ilk təşkilatlarla rayon və şəhər təşkilatları arasında əlaqələrin gücləndirilməsi və digər işlər də partiya məsələlərinin tam həll olunması və partiyamızın seçki prosesinə tam hazır olması üçün həyata keçirilir”.

Trend

Bu il Azərbaycanda ali məktəblərə I-IV ixtisas qrupları üzrə qəbul zamanı müsabiqə şərtləri açıqlanıb. Dövlət İmtahan Mərkəzinin (DİM) Mətbuatla iş və elektron kommunikasiya sektorunun müdiri Xanlar Xanlarzadə bildirib ki, I ixtisas qrupu üzrə müsabiqəyə ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 250-dən və hər bir imtahan fənni üzrə ayrılıqda topladığı nisbi balı 10-dan az olmayan), II ixtisas qrupunda ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 300-dən və hər bir imtahan fənni üzrə ayrılıqda topladığı nisbi balı 10-dan az olmayan), III ixtisas qrupunda ümumi balı 200-dən, hər hansı bir ixtisas fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 300-dən və hər bir imtahan fənni üzrə ayrılıqda topladığı nisbi balı 10-dan az olmayan), IV ixtisas qrupunda isə ümumi balı 250-dən, hər hansı bir imtahan fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 250-dən və hər bir imtahan fənni üzrə ayrılıqda topladığı nisbi balı 10-dan az olmayan) abituriyentlər buraxılırlar.

DİM rəsmisi əlavə edib ki, bəzi ixtisaslar üzrə müsabiqə şərtlərində müəyyən dəyişiklər var: “Belə ki, I qrupun “Riyaziyyat”, “Fizika”, “Nəqliyyat tikintisi mühəndisliyi, “İnşaat mühəndisliyi”, “İnformasiya texnologiyaları mühəndisliyi”, “Geologiya, elektronika, telekommunikasiya və radiotexnika mühəndisliyi” üzrə ixtisaslarına ümumi balı 250-dən, hər hansı bir imtahan fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-da az olmayan (dövlət sifarişi əsasında ayrılan yerlərə ümumi balı 300-dən və hər bir imtahan fənni üzrə topladığı nisbi balı 10-dan az olmayan), “Kompyuter elmləri” ixtisası üzrə ümumi balı 300-dən, hər hansı bir imtahan fənni istisna olmaqla qalan 4 imtahan fənninin hər biri üzrə ayrılıqda topladığı nisbi balı 10-dan az olmayan (dövlət sifarişi əsasında ayrılan yerlər üzrə ümumi balı 350-dən və hər bir imtahan fənni üzrə topladığı nisbi balı 10-dan az olmayan) abituriyentlər müsabiqədə iştirak edə biləcəklər”.

AMEA İqtisadiyyat İnstitutunda Azərbaycan Respublikası Prezidentinin 6 dekabr 2016-cı il tarixli “Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında” Fərmanından irəli gələn vəzifələr haqqında AMEA Rəyasət Heyətinin 22 fevral 2017-ci il tarixli qərarı əsasında müzakirələr aparılıb, bu istiqamətdə elmi müəssisənin üzərinə düşən vəzifələrlə bağlı bir sıra mühüm qərarlar qəbul olunub.

Qərara əsasən, cari və sonrakı illərdə institutun elmi-təşkilati fəaliyyəti “Strateji yol xəritələri”nin qarşıya qoyduğu vəzifələrə hədəflənəcək və bununla bağlı məsələlər nəzarətdə saxlanılacaq.

Elmi müəssisə iqtisadiyyat yönümlü normativ-hüquqi sənədlərin, proqramların hazırlanmasında və ekspertizasında, “Strateji yol xəritələri”nin icrası ilə əlaqəli fəaliyyətlərin monitorinqində iştirak edəcək.

Bundan əlavə, 2017-ci ilin noyabrında “Strateji Yol Xəritələri: prioritetlər və inkişaf perspektivləri ” mövzusunda respublika konfransının keçirilməsi, KİV-də qarşıya qoyulan vəzifələrlə bağlı məqalələrin nəşri, həmçinin dünyanın nüfuzlu beyin mərkəzləri, Azərbaycanın dövlət qurumları, ali təhsil müəssisələri ilə əməkdaşlığın gücləndirilməsi, birgə tədqiqatların aparılması, yüksək ixtisaslı kadrların hazırlanması nəzərdə tutulur.

İnstitutun elmi işlər üzrə direktor müavini, i.f.d. Allahyar Muradov bildirib ki, artıq bu istiqamətdə ilk addım atılıb və 2017-ci il üzrə elmi tədqiqat, həmçinin doktorant və dissertantların dissertasiya mövzuları müəyyənləşdirilərkən “Strateji yol xəritələri”ndəki prioritetlər nəzərə alınıb. O, “Strateji yol xəritələri”ndəki prioritetlər üzrə mütərəqqi təcrübələrin öyrəniləcəyini və Azərbaycanda tətbiqi imkanlarının qiymətləndirilməsinin həyata keçiriləcəyini deyib.

Elmin İnkişafı Fondu 2016-cı il mayın 17-də Moskva şəhərində Azərbaycan Respublikasının Prezidenti yanında Elmin İnkişafı Fondu (EİF), Federal dövlət büdcə təşkilatı “Rusiya Fundamental Tədqiqatlar Fondu” (RFTF) və Azərbaycan Milli Elmlər Akademiyası (AMEA) arasında imzalanmış əməkdaşlıq haqqında üçtərəfli sazişin müddəalarını nəzərə almaqla 1-ci Azərbaycan-Rusiya üçtərəfli birgə beynəlxalq qrant müsabiqəsini elan edib.

Müsabiqə Azərbaycan və Rusiya alimlərindən ibarət müvəqqəti yaradılmış yaradıcı kollektivlərin birgə yerinə yetirilməsi planlaşdırılan və hər iki tərəf üçün aktual olan elmi istiqamətlər üzrə fundamental-tətbiq xarakterli elmi-tədqiqat layihələrini dəstəkləmək, beynəlxalq elmi əməkdaşlıq fəaliyyətini stimullaşdırmaq və müasir elmi problemlərin həlli üçün əlavə yaradıcılıq imkanı yaratmaq məqsədilə elan olunub. Müsabiqə çərçivəsində fundamental-tətbiqi xarakterli və 200 000 manatadək maliyyə həcmli layihələr Elmin İnkişafı Fondu tərəfindən maliyyələşdiriləcək.

Müsabiqədə iştirak etmək üçün layihələr martın 28-dən iyunun 29-u saat 17,00-dək qəbul olunacaq. Müsabiqənin nəticələrinin 2017-ci ilin 4-cü rübündə açıqlanması planlaşdırılır.

Elmin İnkişafı Fondu müsabiqəyə təqdim olunmuş layihələrin elmi ekspertizası işini və qalib layihələrin vaxtaşırı monitorinqini təşkil edəcək. Müsabiqəyə layihələr yalnız Elmin İnkişafı Fondunun yaratdığı innovativ texnologiya olan “e-QRANT”-“Qrant layihələrinin Elektron İdarəolunması Sistemi” vasitəsilə təqdim edilə bilər. Qrant iddiaçılarına kömək və sualların cavablandırılması məqsədilə Fondun məsləhət seminarlarının keçirilməsi də nəzərdə tutulub.

Rusiya Fundamental Tədqiqatlar Fondunun müvafiq elanı ilə aşağıdakı link vasitəsilə tanış olmaq olar: http://www.rfbr.ru/rffi/ru/contest/o_1969520

SİA

Vaxtilə qəbul olunmuş regionların sosial-iqtisadi inkişafı Dövlət proqramları uğurla icra edilir və ölkəmizdə yeni reallıqlar yaradıb.

Bunu Prezident İlham Əliyev Saatlıda pambıqçılığın inkişafı məsələlərinə dair respublika müşavirəsində çıxışı zamanı deyib.

Dövlətimizin başçısı qeyd edib: “Bizim əsas vəzifəmiz ondan ibarət idi ki, – bu gün də əlbəttə, bu vəzifə qarşımızda durur, – bütün infrastruktur layihələri icra edilsin, müasir infrastruktur yaradılsın, elektrik enerjisi, qazlaşdırma, içməli su, meliorasiya problemləri həll olunsun, kənd yolları, magistral yollar tikilsin və bu, özlüyündə sürətli iqtisadi və sosial inkişafa təkan verəcək. Belə də oldu. Nəzərə alsaq ki, regionların sosial-iqtisadi inkişafına dair artıq bir neçə Dövlət proqramı icra edilib, görərik ki, bu proqramların çox böyük əhəmiyyəti var. İnfrastruktur layihələri icra olunandan sonra biznes üçün daha da yaxşı şərait yaradıldı”.

Prezident əlavə edib ki, Azərbaycan dövləti bu istiqamətdə ardıcıl siyasət aparır, sahibkarlığın inkişafı, biznes mühitinin yaxşılaşdırılması, yeni ixrac bazarlarının araşdırılması və o bazarlara çıxmağımız ölkəmizin hərtərəfli inkişafına gətirib çıxarıb:

“Biz fəaliyyətimizi gələcəkdə də uğurla davam etdirəcəyik. Qeyri-neft sektorunun inkişafı prioritet sahədir, xüsusilə indiki şəraitdə ki, neftin qiyməti dünya bazarlarında kəskin şəkildə aşağı düşüb. Biz indi qeyri-neft sektorunun inkişafına həm daha çox fikir verəcəyik, həm də ki, daha da fəal iş aparılacaqdır”.

Trend

Martın 27-də IDEA İctimai Birliyinin təşəbbüsü ilə start verilən “Eko-skaut” layihəsinin Zirə Mədəniyyət Mərkəzində təqdimatı keçirilib. IDEA-dan verilən məlumata görə, layihənin məqsədi gəncləri təbiətin mühafizəsinə cəlb etmək, onları təbiətin bəxş etdiyi sərvətlərdən qənaətlə və düzgün istifadəyə təşviq etmək, canlı aləmi dərindən öyrənməyə və qorumağa, eləcə də cəmiyyətdə faydalı ekoloji işlərlə məşğul olmağa sövq etməkdən ibarətdir. IDEA eko-skaut layihəsi gənclərə planetimiz üçün təhlükə yaradan ekoloji problemləri dərk etmək və bu problemlərin həllinə digərlərini də cəlb etməklə, bu ictimai hərəkatda iştirak etmək və onun lideri olmaq imkanı yaradır.

Layihənin ilk mərhələsi olaraq Bakı şəhəri üzrə pilot orta məktəblərdə fəaliyyət göstərən fəal “Ekoklub” üzvlərinə Zirə Mədəniyyət Mərkəzində yerləşən IDEA Resurs Mərkəzində layihənin mahiyyəti, eko-skautların öhdəlikləri, onların fəaliyyət prinsipləri, gündəlik eko-skaut qaydaları, eko-skaut klubuna üzv olmağın yolları, üzvlük kartı və yüksək statuslu kartlar almağın yolları, balların toplanma mexanizmi haqqında ətraflı məlumat verilib.

Qeyd edək ki, kluba qoşulmaq üçün müraciət edən gənclərə üzvlük kartı və IDEA tərəfindən xüsusi olaraq hazırlanmış papaq, bel çantası, döş nişanı veriləcək. Yeni qoşulan üzvlər “Gənc ekoloq” adlandırılacaq və daha sonra bu statuslarını ətraf mühitə faydalı işlərlə məşğul olaraq və ballar yığaraq artırmaq imkanı əldə edəcəklər. Kifayət qədər bal toplayan eko-skautlar ən yüksək mərhələyə keçmiş sayılacaq və onlara IDEA tərəfindən qiymətli hədiyyələr təqdim olunacaq.

Təqdimat mərasiminin yekununda gənclər könüllü olaraq IDEA eko-skaut layihəsinə qoşulmaq üçün müraciət etmiş, ilk üzvlər olaraq birgə “eko-skaut andı” içiblər. Daha sonra eko-skautlar IDEA İctimai Birliyinin “Azərbaycanın 9 möcüzəsi” layihəsi çərçivəsində çəkilmiş “Şirvan Milli Parkı” sənədli filmini izləmiş və Zirə Mədəniyyət Mərkəzi Eko parkın ərazisində güllər əkiblər.

Sözügedən layihə gənclərin ekoloji problemlərin həllində aktiv iştirakı üçün əlverişli platforma yaradacaqdır.

IDEA eko-skaut layihəsi haqqında, o cümlədən qeydiyyat, üzvlük qaydaları, balların toplanması və s. ilə bağlı ətraflı məlumat üçün: http://www.ideacampaign.org/ecoscout/, tel.: 012 497 6316

Özbəkistanlı tarixçi alim Şuxrat Salamov Ermənistan-Azərbaycan Sülh Platformasına qoşulması ilə əlaqədar bəyanat verib.
Sülh Platformasının mətbuat xidmətindən verilən məlumata görə, bəyanatda deyilir:
“Sülh insanların bu həyatda istədiyi, ən ali fəzilətdir. Ona görə də mən Dağlıq Qarabağ münaqişəsinin yalnız sülh yolu ilə həllinə inanıram.  Azərbaycan və Ermənistan Respublikalarının ərazi bütövlüyü və suverenliyinə və hər iki dövlətin beynəlxalq səviyyədə tanınmış sərhədlərinə hörmət və dəstəyimi bildirmək istəyirəm. Həmçinin BMT Təhlükəsizlik Şurasının qəbul etdiyi qətnamələrin, digər beynəlxalq təşkilatların qətnamə və qərarlarının icrası vacib olduğunu vurğulamaq istəyirəm. ATƏT-in Minsk qrupunun münaqişənin həlli istiqamətində gördüyü işlərinin əhəmiyyətini qeyd etmək istəyirəm. Bir tarixçi kimi qeyd etmək istəyirəm ki, mövcud münaqişədən əvvəl Erməni və Azərbaycan xalqları sülh və əmin-amanlıq şəraitində yaşayıblar. Bu münasibətlər əsrlər boyu formalaşan qonşuluq və  dostluq münasibətlərinin nəticəsi olub. Münaqişənin uzun müddət həll olunmaması nəticəsində iki ölkə arasında əlaqələrin yalnız müharibə kontekstində formalaşmasını  təəssüf hissi ilə, qeyd etmək istəyirəm. Mən bu sülh təşəbbüsünü dəstəkləyirəm və bu təşəbbüsün münaqişəyə böyük töhfə verə biləcəyinə inanıram. Bu səbəbdən, məqsədi Ermənistan-Azərbaycan, Dağlıq Qarabağ münaqişəsinin sülh yolu ilə həlli və  Cənubi Qafqaz regionunda sülhün  bərpası və qorunması olan Ermənistan-Azərbaycan Sülh Platformasına qoşulduğumu bəyan edirəm”.
APA

M.V.Lomonosov adına Moskva Dövlət Universitetinin (MDU) Bakı filialı abituriyentləri 2017-2018-ci tədris ilində filiala qəbulun şərtləri və qaydaları ilə tanış olmaq məqsədilə “Açıq qapı günü”nə dəvət edir. “Açıq qapı günü”ndə MDU-nun Bakı filialının filologiya, tətbiqi riyaziyyat, kimya, psixologiya, iqtisadiyyat və fizika fakültələrində bakalavr və magistr hazırlığı ilə bağlı hərtərəfli məlumat əldə etmək mümkündür.

“Açıq qapı günü” 8 aprel 2017-ci il tarixində saat 14:00-da Bakı şəh., H.Cavid prospekti, 133 (çetronun “Elmlər Akademiyası” stansiyasının yanında) ünvanında keçiriləcək.

Əlaqə telefonu: (012) 598 93 32

SİA

Bu gün Azərbaycanın Mətbuat Şurasının sədri, Milli Məclisin üzvü, Azərbaycan-Gürcüstan Parlamentlərarası Dostluq Qrupunun sədri Əflatun Amaşov azərbaycanlıların kompakt yaşadığı Marneulidə yeni açılan Mərkəzi Kitabxanaya 1 048 kitab hədiyyə edib.
Tədbirdə Əflatun Amaşov, Gürcüstan parlamentinin deputatları Tamaz Naveriani, Ruslan Hacıyev, Marneuli rayon bələdiyyəsinin sədri Nəbi Abdullayev, rayon icra hakimiyyətinin başçısı Akif Əliyev və başqaları çıxış ediblər.
Ə. Amaşov çıxışında Azərbaycan dövlətinin məqsədinin Gürcüstanda yaşayan soydaşlarımızın hərtərəfli inkişaf etməsi olduğunu bildirib, azərbaycanlı oxucunun kitabxanalara cəlb etməyin vacibliyini vurğulayıb. Deputat Azərbaycan Mədəniyyət və Turizm Nazirliyi və Mətbuat Şurası ilə birgə nəşr olunan kitabların kitabxanaya hədiyyə olunmasının davamlı olacağını bildirib.
Tədbir çərçivəsində hər iki ölkənin deputatları müasir tələblərə cavab verən yeni kitabxanaya baxış keçiriblər.

APA

Qlazqo Universitetinin tədqiqatçıları insan dərisi ilə müqayisədə daha həssas yeni süni dəri tipi yaradıblar. Bir qrafen atom qatından ibarət süni dəri toxunuş ötürücüsü kimi işləyərək tam avtonomdur və əlavə enerji mənbəyinə ehtiyac duymur. Qrafen qatı altında dəri üzərinə düşən işığın 98 faizini hopduran günəş batareyaları yerləşdirilib ki, bu da enerjinin alınması üçün kifayət edir.

Yeni süni dəri növü tam praktik robotların yaradılması imkanları ilə yanaşı, protezlər sahəsinə müsbət təsir göstərə bilər. Doktor Ravinder Dahiya artıq “3D” printerdə çap edilən protez əllər hazırlamağa başlayıb.
Əlavə enerji mənbələrinə ehtiyacın olmaması, eləcə də silisium və qrafenin qiymətinin nisbətən ucuz olması sayəsində belə protezlərin qiyməti 350 dollar təşkil edir ki, bu da qiyməti on min dollardan çox olan akkumulyatorla işləyən standart protezlərdən xeyli ucuzdur.
Doktor hesab edir ki, yeni süni dəri tipi protez və robot texnikasından başqa tətbiq edilmək üçün daha geniş spektrə malikdir. Ən kiçik hərəkətləri aşkarlaya bilən yüksək həssaslığa malik material sayəsində texnologiya idman geyimi üçün yüksək dəqiqlikli ötürücülər, eləcə də avtonom qlükoza cihazları yaratmağa imkan verir. “ICTnews” Elektron Xəbər Xidməti “4PDA” resursuna istinadən yazır.

Ali təhsil müəssisələrinin I-V ixtisas qruplarına və tam orta təhsil bazasında orta ixtisas təhsili müəssisələrinə sənəd qəbulu davam edir. Səhər saatlarına olan satistikaya əsasən ümumilikdə 28 946 abituriyent qeydiyyatdan keçib.

Onlardan 27 108-i I-IV ixtisas qrupuna imtahan verənlərdir. 9 551 abituriyent V ixtisas qrupuna, 8 074-ü isə tam orta ixtisas təhsili müəssisələrinə qəbul olmaq üçün sənəd verib.

Qeydiyyatdan keçən 28 946 abituriyentdən 26 335-i qəbul imtahanının I mərhələsində (yaz imtahanlarında) iştirak edəcək.

Rus bölməsini seçən 4 555 abituriyent isə aprelin 9-da keçiriləcək “Azərbaycan dili” fənni üzrə test imtahanına qatılacaq. 2016-cı ildə “Azərbaycan dili” fənni üzrə test imtahanında “məqbul” alan 184 abituriyent isə cari ildə bu imtahanda iştirak etmədən müsabiqəyə buraxılacaqlar.

Qeyd edək ki, ali təhsil müəssisələrinə sənəd qəbulu aprelin 10-dək internet vasitəsilə aparılacaq. I-IV qruplar üzrə qəbul imtahanı (ilk imtahan) aprel-may aylarında, ikinci imtahan isə iyul ayında keçiriləcək. Orta ixtisas təhsili müəssisələrinə tam orta təhsil bazasında qəbul imtahanı əvvəlki illərin məzunları üçün isə iyul ayında baş tutacaq.

SİA

Bu gün Azərbaycanın təhlükəsizlik orqanlarının yaranmasının 98-ci ildönümüdür.
Ümummilli Lider Heydər Əliyevin 1997-ci il mart ayının 23-də imzaladığı sərəncamla hər il martın 28-də Azərbaycan Respublikasının təhlükəsizlik orqanlarının əməkdaşları öz peşə bayramlarını qeyd edirlər.
Azərbaycanda ilk milli təhlükəsizlik orqanı 1919-cu il martın 28-də yaradılıb. Xalq Cümhuriyyətinin hərbi naziri Səməd bəy Mehmandarovun əmri ilə nazirlik tərkibində kəşfiyyat və əks-kəşfiyyat bölməsi (kvartirmeyster) təşkil edilib.
Qurumun ilk rəhbəri Məmmədbağır Şeyxzamanlı, sonra onun qardaşı Nağı Şeyxzamanlı təyin edilib. Sovet dövründə qurum əvvəlcə Fövqəladə Komissiya (“ÇK”) adlanıb, bir müddət Daxili İşlər Xalq Komissarlığının (“NKVD”) tərkibində fəaliyyət göstərib, sonra Dövlət Təhlükəsizlik Komitəsi təşkil olunub. 1967-ci ilədək respublikanın təhlükəsizlik orqanlarına qeyri-azərbaycanlılar rəhbərlik ediblər.
Həmin il general Heydər Əliyev Azərbaycan DTK-nın sədri təyin olunub. Azərbaycan müstəqilliyini bərpa etdikdən sonra, 1991-ci il noyabrın 1-də Milli Təhlükəsizlik Nazirliyi yaranıb.
Azərbaycan Respublikasının Prezidenti cənab İlham Əliyevin 14 dekabr 2015-ci il tarixli 706 nömrəli Fərmanı ilə Azərbaycan Respublikasının Milli Təhlükəsizlik Nazirliyinin əsasında Azərbaycan Respublikasının Dövlət Təhlükəsizliyi Xidməti yaradılıb.(azvision.az)
Dövlət Təhlükəsizliyi Xidmətinin fəaliyyətinin hüquqi əsasını Azərbaycan Respublikasının Konstitusiyası, “Milli təhlükəsizlik haqqında”, “Kəşfiyyat və əks-kəşfiyyat fəaliyyəti haqqında”, “Əməliyyat-axtarış fəaliyyəti haqqında”, “Dövlət sirri haqqında”, “Terrorçuluğa qarşı mübarizə haqqında” Azərbaycan Respublikasının qanunları və digər qanunvericilik aktları, Azərbaycan Respublikasının Dövlət Təhlükəsizliyi Xidmətinin Əsasnaməsi, Azərbaycan Respublikası Prezidentinin fərman və sərəncamları, Azərbaycan Respublikası Nazirlər Kabinetinin qərar və sərəncamları, fəaliyyətə aid qanunvericiliyə əsasən qəbul olunmuş mərkəzi icra hakimiyyəti orqanlarının normativ hüquqi aktları, habelə Azərbaycan Respublikasının qanunları çərçivəsində Azərbaycan Respublikası tərəfindən bağlanmış beynəlxalq müqavilələr təşkil edir.
Bu fəaliyyət insan və vətəndaş hüquq və azadlıqlarına riayət olunması, humanizm, dövlət və cəmiyyət qarşısında cavabdehlik prinsiplərinə əməl olunması ilə həyata keçirilir.

Novruz bayramı münasibətilə Beynəlxalq Türk Mədəniyyəti Təşkilatı (TÜRKSOY) xalq çalğı alətləri ansamblının Rumıniyada ikinci konserti Buxarestdə yerləşən Milli Opera binasında keçirilib. Konsert TÜRKSOY və Yunus Əmrə Fondunun birgə təşkilatçılığı ilə reallaşıb.

Tədbirdə Azərbaycan, Türkiyə, Türkmənistan və Qazaxıstan səfirliklərin əməkdaşları, incəsənət xadimləri, musiqiçilər, Rumıniyada yaşayan türkdilli ölkələrin diasporları, rumın ictimaiyyətinin nümayəndələri iştirak ediblər.

Konsertdən əvvəl Türkiyənin Rumıniyadakı səfiri Osman Koray Ertaş, TÜRKSOY-un Azərbaycan üzrə nümayəndəsi Elçin Qafarlı və Yunus Əmrə Fondunun Rumıniya nümayəndəliyinin sədri Tuna Balkan Novruz bayramının tarixi, məqsədi, rəmzləri barədə tamaşaçılara məlumat verdilər. Çıxışlarda Novruzun birlik rəmzi olduğu diqqətə çatdırılıb.

Azərbaycanı konsertdə muğam kvarteti – gənc xanəndə Babək Quliyev, tarda Ruslan Zərbəliyev, kamançada Şəhriyar Musayev və nağarada Elnur Əliyev təmsil ediblər. Onların ifaları tamaşaçılar tərəfindən alqışlarla qarşılanıb.

AZƏRTAC

Azərbaycan Uşaqlarının IV Ümumrespublika Forumunun keçiriləcəyi tarix açıqlanıb.

Ailə Qadın və Uşaq Problemləri üzrə Dövlət Komitəsindən verilən məlumata görə, forumun bu il oktyabr-noyabr ayları ərzində keçirilməsi nəzərdə tutulur.

Forumun keçirilməsində məqsəd Ailə, Qadın və Uşaq Problemləri üzrə Dövlət Komitəsi, Heydər Əliyev Fondu və UNICEF-lə birgə uşaqların öz hüquqları ilə bağlı qərarların qəbul edilməsində iştirakını təmin etmək, uşaqlara öz problemləri ilə bağlı təşəbbüslərlə çıxış etmək və təkliflər vermək imkanı yaratmaq, həmçinin ictimaiyyətin diqqətinin uşaq hüquqlarının qorunmasına yönəldilməsidir. Forumların uşaqların ictimai fəallığının artırılmasında, iştirak hüququnun təmin edilməsində və liderlik keyfiyyətlərinin formalaşmasında mühüm əhəmiyyətə malik olduğu hesab edilir.

Qeyd edək ki, Azərbaycan Uşaqlarının I Forumu 2009-cu ildə, II Forumu 2011-ci ildə, III Forumu 2014-cü ildə keçirilib.

Trend

XƏBƏR LENTİ