Çərşənbə, Mart 29, 2017
GÜNDƏM

“Park Bulvar” və “Gənclik Mall”da fəaliyyət göstərən “OVS” mağazalarında müştərilərə üzərindəki etiketdə “MADE İN ARMENİA” yazılan paltarlar satılması ilə bağlı bakipost.az saytının tirajladığı xəbər cəmiyyətdə böyük rezonans doğurub.

Mağazanın səlahiyyətliləri hər nə qədər xəbəri təkzib etməyə, sözügedən malların əslində Banqladeşdə istehsal olunduğunu sübut etməyə çalışsa da, çəkilmiş fotolar fakt olaraq ortadadır.
Münaqişə halında olan ölkənin istehsalı olan malın Azərbaycanda satışına görə hüquqi məsuliyyət varmı?

Məsələ ilə bağlı sualı hüquqşünas Əliməmməd Nuriyev cavablandırıb.
O deyib ki, Azərbaycan və Ermənistan arasında münaqişə yaranan gündən bu günədək iqtisadi əlaqələr yoxdur:

“Nəinki dövlətlərarası, heç müəssisələr arasında da iqtisadi əlaqələrin olması barədə müqavilələr yoxdur. Ölkəmizdə fəaliyyət göstərən hüquqi və fiziki şəxslər Ermənistanda fəaliyyət göstərən şəxslərlə hər hansı iqtisadi əlaqədə deyil.

“MADE İN ARMENİA” etiketli malın Azərbaycanda satışı varsa belə, onun ölkəmizə necə gəlməsilə bağlı çoxsaylı suallar meydana çıxır. Eyni zamanda, dövlətimiz bəyan edib ki, münaqişə həll olunmayana, Ermənistanın Azərbaycana olan təcavüzü aradan qaldırılmayana qədər iki ölkə arasında iqtisadi, siyasi əlaqələrdən söhbət gedə bilməz”.

Ə.Nuriyev bu hala görə aidiyyəti orqanların məsuliyyət daşıdığını bildirib:
“Düşünürəm ki, bizim gömrük və sərhəd xidmətinin əməkdaşları bu cür malların Azərbaycana daxil olmasına imkan verməz. Əgər belə hal qeydə alınıbsa, bu, yalnız qaçaqmal yolu ilə gətirilib. Və mütləq şəkildə İqtisadiyyat Nazirliyinin müvafiq strukturları, gömrük orqanları, sərhəd xidməti tərəfindən araşdırılmalıdır. Bu malların Azərbayana rəsmi şəkildə gəlməsi qeyri-mümkündür. O zaman belə nəticə hasil olur ki, bu mallar ölkəmizə qaçaqmal yolu ilə gətirilib. Bunun ölkəyə daxil olmasına gətirən şəxslər, qurumlar da da mütləq cəzalandırılmalıdır”.

modern.az

Elmi-Tədqiqat Ağciyər Xəstəlikləri İnstitutunda kadr dəyişikliyi edilib. İnstitutun direktoru Elcan Məmmədbəyov yaşla əlaqəli öz ərizəsi ilə işdən azad edilib. Səhiyyə naziri Oqtay Şirəliyev müvafiq əmrinə əsasən Həqiqət Qədirova instituta yeni direktor təyin olunub.

Həqiqət Qədirova həm də Səhiyyə Nazirliyinin Elmi Tibbi Şurasının, eləcə də B və C viruslu hepatitlərin profilaktikası, diaqnostikası və müalicəsinin təşkili üzrə Komissiyanın üzvüdür.

Qeyd edək ki, Həqiqət Qədirova Respublika QİÇS-lə Mübarizə Mərkəzinə direktoru vəzifəsində çalışıb.

SİA

Azərbaycan Respublikasının İnsan Hüquqları üzrə Müvəkkili Elmira Süleymanova Pakistan İslam Respublikasının ölkəmizə yeni təyin edilmiş səfiri cənab Səid Xan Mohmandı qəbul edib.
Qonağı salamlayan Müvəkkil onu yeni təyinatı münasibətilə təbrik edib, fəaliyyətində uğurlar arzulayıb və Ombudsman təsisatı ilə əməkdaşlığın davam etdiriləcəyinə ümidini ifadə edib.
E.Süleymanova Pakistanın Azərbaycanın strateji tərəfdaşı, həmçinin ölkəmizin müstəqilliyini tanıyan ilk dövlətlərdən olduğunu və bu il iki ölkə arasında əməkdaşlığın 25 illiyinin qeyd olunduğunu diqqətə çatdırıb.
Müvəkkil 2017-ci ilin ölkədə İslam həmrəyliyi ili elan edildiyini nəzərə alaraq bu istiqamətdə əməkdaşlığın prioritet istiqamətlərinin müəyyən edilməsinin önəmini qeyd edib, həmçinin bu ilin may ayında ölkəmizdə keçiriləcək İslam oyunlarının bu həmrəyliyin daha da möhkəmləndirilməsində əhəmiyyətini vurğulayıb.
Azərbaycan Ombudsmanının Beynəlxalq və Avropa Ombudsmanlar İnstitutlarının, Asiya Ombudsmanlar Assosiasiyasının (AOA) üzvü olduğu diqqətə çatdırılmışdır. 2015-ci ilin noyabr ayında növbəti iki il üçün Asiya Ombudsmanlar Assosiasiyasının Direktorlar Şurasının iclasında Azərbaycan Ombudsmanın həmin Assosiasiyanın vitse-prezidenti vəzifəsinə seçildiyi qeyd edilib.
E.Süleymanova qonağa təsisatın əhalinin müxtəlif təbəqələrinin, o cümlədən həssas qruplarının, xüsusilə də əlilliyi olan şəxslərin, uşaqların və qadınların hüquqlarının müdafiəsi və təşviqi sahəsində görülən işlər, işgəncələrin qarşısının alınması üzrə milli preventiv mexanizm qismində fəaliyyəti, Müvəkkilin təşəbbüsü ilə hər il Bakıda və ölkənin müxtəlif regionlarında müvafiq dövlət qurumlarının, vətəndaş cəmiyyəti institutlarının və beynəlxalq təşkilatların iştirakı ilə geniş miqyaslı maarifləndirmə tədbirlərinin keçirilməsi, həmçinin xarici ölkələrin Ombudsman təsisatları, o cümlədən Pakistan Federal Ombudsmanı ilə qurulan sıx əməkdaşlıq əlaqələri barədə  məlumat vermiş, əlavə etmişdir ki, ötən ilin mart ayında iki təsisat arasında anlaşma memorandumu imzalanıb.
Səfir Səid Xan Mohmand Müvəkkilə qəbul üçün təşəkkürünü bildirib, Azərbaycanın regionda çox əhəmiyyətli ölkə olduğunu, Pakistanın Azərbaycanla əməkdaşlığa böyük önəm verdiyini, ölkə Prezidentləri, həmçinin yüksək rütbəli məmurlar səviyyəsində qarşılıqlı səfərlərin bu əlaqələri daha da möhkəmləndirdiyni qeyd edib.
Müvəkkilin fəaliyyətini yüksək qiymətləndirən səfir, onun rəhbərlik etdiyi qurumun ölkənin inkişafında xüsusi rol oynadığını bildirib.
Cənab Mohmand səmimi qəbul və fikir mübadiləsi üçün Ombudsmana təşəkkür edib, Ombudsman təsisatı ilə insan hüquqları sahəsində əməkdaşlıqda maraqlı olduğunu və bu istiqamətdə gələcəkdə də səylərini əsirgəməyəcəyini bildirib.

İqtisadiyyat Nazirliyi Ümummilli Lider Heydər Əliyevin anadan olmasının 94-cü ildönümü ilə əlaqədar KİV nümayəndələri arasında “Heydər Əliyev və iqtisadi islahatlar” mövzusunda yaradıcılıq müsabiqəsi elan edib.
Nazirlikdən verilən məlumata görə, müsabiqəyə təqdim ediləcək məqalələr 8 min işarədən, televiziya və radio süjetləri isə 3 dəqiqədən az olmamalı, Azərbaycanda dövlət qeydiyyatına alınmış KİV-də yerləşdirilməli, materialların sonunda “İqtisadiyyat Nazirliyi tərəfindən KİV nümayəndələri arasında elan edilmiş yaradıcılıq müsabiqəsinə təqdim edilir” qeydi göstərilməlidir.
Materiallar KİV nümayəndəsinin vəsiqəsinin sürəti ilə birlikdə 20 aprel 2017-ci il tarixinədək İqtisadiyyat Nazirliyinə təqdim edilməli və elektron formada vusala.guliyeva@economy.gov.az ünvanına göndərilməlidir.
Müsabiqənin şərtləri:
– Təqdim edilən məqalələrdə, televiziya və radio süjetlərində Ümummilli Lider Heydər Əliyevin rəhbərliyi ilə iqtisadi sahədə aparılan islahatlar və qazanılan uğurlar əks etdirilməlidir;
– Müsabiqədə Azərbaycanda dövlət qeydiyyatına alınmış KİV-lərin əməkdaşları və müstəqil jurnalistlər tək və ya müştərək halda iştirak edə bilərlər;
– Hər bir jurnalist və ya jurnalistlər qrupu müsabiqəyə yalnız bir məqalə (və ya süjet) təqdim edə bilər;
– Müsabiqəyə təqdim ediləcək məqalənin həcmi 8 min çap işarəsindən, televiziya və radio süjeti isə 3 dəqiqədən az olmamalıdır;
– Məqalə, televiziya və radio süjeti Azərbaycanda dövlət qeydiyyatına alınmış KİV-də çap olunmalı və ya yayımlanmalıdır;
– Materialın sonunda “İqtisadiyyat Nazirliyi tərəfindən KİV nümayəndələri arasında elan edilmiş yaradıcılıq müsabiqəsinə təqdim edilir” sözlərindən ibarət titr qeyd olunmalıdır;
– Material qəzetdə və ya jurnalda dərc edilərsə onun 1 nüsxəsi, elektron portalda yerləşdirilərsə A4 formatlı vərəqdə (Arial, 12 şrift) çap olunmalı və link əlavə edilməli, televiziya və radio süjeti isə DVD-də olmaqla KİV nümayəndəsinin vəsiqəsinin surəti ilə birlikdə 20 aprel 2017-ci il tarixinədək İqtisadiyyat Nazirliyinə (Ünvan: Bakı şəhəri, Ü.Hacıbəyli küç.,84 (Hökumət evi), 10-cu mərtəbə, 1004-cü otaq), materialın elektron versiyası isə həmin tarixədək “vusala.guliyeva@economy.gov.az” poçt ünvanına göndərilməlidir.
– Müsabiqəyə təqdim olunmuş materiallar İqtisadiyyat Nazirliyində yaradılmış Komissiya tərəfindən 10 may 2017-ci il tarixinədək qiymətləndiriləcək və müsabiqənin qalibləri müəyyən ediləcəkdir.
Materiallar aşağıdakı meyarlara əsasən qiymətləndiriləcək:
– mövzunun əhatə olunması, jurnalist araşdırması;
– materialın oxucu üçün informasiyalılıq səviyyəsi;
– dil və üslub xüsusiyyətləri, bədii-estetik ifadəsi;
– jurnalist obyektivliyi.
Qaliblərə diplomlar və pul mükafatları təqdim olunacaq.

Trend

“Müasir İnkişaf” İctimai Birliyinin sədri, “Türk Eli” jurnalının baş redaktoru Mübariz Göyüşlü 24-26 mart 2017-ci il tarixlərdə Gürcüstandakı təşkilatlarla əməkdaşlığı genişləndirmək niyyətilə bu ölkəyə səfər edib.

24 martda M.Göyüşlü Tiflisdə yerləşən Axundov adına Mədəniyyət Muzeyində Azərbaycanın Gürcüstandakı Səfirliyinin birinci katibi Elçin Məmmədov və muzeyin direktoru Leyla Əliyeva, Gürcüstan Milli Parlament Kitabxanasının direktoru Georgi Kikelidze, Gürcüstan Kitabxana Assosiasiyasının prezidenti Rusudan Asatiani, kitabxana resursları departamentinin rəhbəri Levan Taktakişvili ilə görüş keçirib, qarşılıqlı maraq doğuran məsələlərlə bağlı fikir mübadiləsi aparıb. 25 martda Gürcüstan Gənclərinə Yardım və Maarifləndirmə Dərnəyinin Qardabanidəki ofisində qurumun sədri Musa Hacıyevin başçılığı altında təşkilatın gördüyü işlər, həyata keçirdiyi layihələrlə tanışlıq olub, fikir mübadiləsi edilib. 25 martda Mübariz Göyüşlü Tiflisdə gürcüstanlı politoloqlar – Qafqaz Strateji Araşdırmalar İnstitutunun sədri Teymuraz Toumunaşvili, təmsilçiləri Levan Çxeidze, Tengiz Tikilava, Simon Kopadze ilə görşərək Azərbaycan-Gürcüstan münasibətləri, iki ölkənin ictimai təşkilatlarının əməkdaşlığı məsələsini müzakirə edib. 26 martda “Müasir İnkişaf” İctimai Birliyinin sədri Gürcüstan Müsəlmanları İdarəsinin müftisi Hacı Yasin Əliyevlə görüşüb fikir mübadiləsi aparıb, azərbaycanlıların kompakt yaşadığı Kosalı kəndindəki mədrəsəni də ziyarət edib.

Xatırladaq ki, “Müasir İnkişaf” İctimai Birliyi 2010, 2011, 2012, 2014, 2016-cı illərdə Gürcüstanla bağlı Bakıda və Tiflisdə Gürcüstan Gənclərinə Yardım və Maarifləndirmə Dərnəyi ilə birgə tədbirlər, görüşlər, müzakirələr həyata keçirib. Bu səfər həmin tədbirlərin və çalışmaların daha da genişləndirilməsini nəzərdə tutur.

Türkiyədə aprelin 16-da keçiriləcək referendumla bağlı Azərbaycanda yaşayan Türkiyə vətəndaşları aprelin 9-da səs verəcəklər.
Türkiyənin Azərbaycandakı səfirliyindən verilən məlumata görə, bu məqsədlə səfirlikdə, Gəncə və Naxçıvandakı baş konsulluqlarda seçki məntəqəsi açılacaq. Məntəqələr saat 09:00-21:00 arası fəaliyyət göstərəcək.
Azərbaycanda 6 mindən çox Türkiyə vətəndaşı yaşayır.
Xatırladaq ki, aprelin 16-da Türkiyədə keçiriləcək referendumda xalq Konstitusiya dəyişikliyi təkliflərinə münasibətini bildirəcək.
APA

Azərbaycan Prezidenti İlham Əliyev İlyas Umaxanovun “Dostluq” ordeni ilə təltif edilməsi haqqında sərəncam imzalayıb.

Sərəncamda qeyd olunur ki, Azərbaycan Respublikası ilə Rusiya Federasiyası arasında dostluq və əməkdaşlıq əlaqələrinin inkişafındakı xüsusi xidmətlərinə görə İlyas Maqomed-Salamoviç Umaxanov “Dostluq” ordeni ilə təltif edilsin.

Qeyd edək ki, İ.Umaxanov Rusiya Federasiyası Federal Məclisinin Federasiya Şurasının sədr müavinidir.

“Olimpiya Hərəkatı-2017” (“Olympic Moves-2017”) idman proqramı çərçivəsində rayondaxili yarışlar davam edir.

Bakı Şəhəri üzrə Təhsil İdarəsindən verilən məlumata görə, rayondaxili yarışlarda Bakı şəhərindən 294, regionlardan isə 112 məktəb olmaqla, ümumilikdə 406 məktəb iştirak edir.

Qarşılaşmalar 5 idman növü – voleybol, basketbol, badminton, velosiped yarışı və atletika üzrə keçirilir. Mart ayının əvvəllərindən start götürən rayondaxili yarışlar iyun ayına qədər davam edəcək.
Qeyd edək ki, “Olimpiya Hərəkatı-2017” idman proqramı Təhsil Nazirliyi, Milli Olimpiya Komitəsi, Gənclər və İdman Nazirliyinin birgə təşkilatçılığı ilə həyata keçirilir.

Proqramın əsas məqsədi olimpiya idman növlərinin məktəblilər arasında təbliğini aparmaqla, şagirdləri sağlam və aktiv həyat tərzinə cəlb etmək, ümumi təhsil müəssisələrində fiziki tərbiyə fənninə marağı daha da artırmaq, idman federasiyaları və idman məktəbləri arasındakı əməkdaşlığı genişləndirmək, olimpiya idman komplekslərindən səmərəli istifadəni təmin etməkdən ibarətdir.

Ukraynalı alim və ictimai xadim Tatyana Krupa Ermənistan-Azərbaycan Sülh Platformasına qoşulması haqqında bəyanat verib. Ermənistan-Azərbaycan Sülh Platformasındanverilən məlumata görə, bəyanatda deyilir:

“Gələcək nəsillərə miras qoya biləcəyimiz ən mühüm şey sülhdür. Buna görə də 25 ildən çox davam edən Ermənistan-Azərbaycan Dağlıq Qarabağ münaqişəsinin sülh yolu ilə həlli çox vacibdir. Həmçinin Azərbaycan və Ermənistan Respublikalarının ərazi bütövlüyü və suverenliyinə və hər iki dövlətin beynəlxalq səviyyədə tanınmış sərhədlərinə hörmət və dəstəyimi bildirmək istəyirəm. BMT Təhlükəsizlik Şurasının qəbul etdiyi müvafiq qətnamələrin, digər beynəlxalq təşkilatların qətnamə və qərarlarının icrası vacib olduğunu vurğulamaq istəyirəm. ATƏT-in Minsk qrupunun münaqişənin həlli istiqamətində göstərdiyi səylərin əhəmiyyətini qeyd etmək istəyirəm. Erməni və Azərbaycan xalqlarının münaqişədən qabaq münasibəti əsrlərlə formalaşan mehriban qonşuluq prinsipləri üzərində qurulmuşdur.

Lakin münaqişənin həll olunmaması nəticəsində hər iki xalqın bir birinə münasibətinin yalnız müharibə kontekstində formalaşmasını böyük təəssüf hissi ilə qeyd etmək istəyirəm. Xalq Diplomatiyasının münaqişənin həlli üçün əhəmiyyətli bir addım olduğuna inanıram. Bu səbəbdən bu təşəbbüsə dəstəyimi ifadə edərək, məqsədi Ermənistan-Azərbaycan, Dağlıq Qarabağ münaqişəsinin sülh yolu ilə həlli və Cənubi Qafqazda sülhün bərpası və onu qorunması olan Ermənistan-Azərbaycan Sülh Platformasına qoşulduğumu bəyan edirəm”.

Gürcüstanda səfərdə olan Milli Məclisin üzvü, Azərbaycan-Gürcüstan parlamentlərarası dostluq qrupunun rəhbəri Əflatun Amaşov Gürcüstan parlamentinin sədr müavini, Gürcüstan-Azərbaycan parlamentlərarası dostluq qrupunun rəhbəri Zviad Dzidziquri ilə görüşüb.

Görüşdə Gürcüstan parlamentinin deputatları Ruslan Hacıyev, Tamaz Naveriani və Mahir Dərziyev də iştirak edib. Görüş çərçivəsində tərəflər hər iki ölkə parlamentində fəaliyyət göstərən dostluq qruplarının aktiv və səmərəli fəaliyyət göstərməsi üçün yaxın vaxtlarda təkliflər paketinin işlənib hazırlanması barədə razılığa gəliblər. Təkliflər paketində hər iki ölkənin mədəni, idman və digər vacib sahələrdə, həmçinin sərhədyanı ərazilərdə görüşlər və tədbirlərin keçirilməsi üçün qrafik müəyyənləşdiriləcək.

Ə. Amaşov deyib ki, ilk tədbir kimi Gürcüstanın və Azərbaycan deputatlarının hər iki ölkəyə qarşılıqlı səfərləri həyata keçiriləcək.

APA

Sabah Azərbaycanda magistratura və rezidenturaya sənəd qəbulu başa çatır. Əvvəldən müəyyən edilən vaxta əsasən sənəd qəbulu martın 17-də başa çatmalı olsa da, bəzi səbəblərə görə bu prosesin vaxtı martın 28-i saat 23:59-dək uzadılıb.
Bu gün saat 10:00-dək magistraturaya 12 375 nəfər ərizəsini təsdiq edib, onlardan 11 189-u Azərbaycan, 1 186-sı isə Rus bölməsinin məzunlarıdır. Bu saata kimi rezidenturaya isə 1 028 nəfər ərizəsini təsdiq edib. Onlardan da 893-ü Azərbaycan, 135-i Rus bölməsinin məzunlarıdır:

Adları və ya soyadları ilə bağlı müəyyən problemləri olan vətəndaşlar Sənəd Qəbulu Komissiyalarına (SQK) müraciət etməlidirlər. Bayram və istirahət günlərindən sonra SQK-ı 2 gün ərzində fəaliyyət göstərəcək və problemləri həll etmək mümkün olacaq. Martın 29-dan artıq magistratura və ya rezidenturaya sənəd vermək mümkün olmayacaq.

SİA

Bu gün dünyada Beynəlxalq Teatr Günü kimi qeyd olunur. Bu barədə ilk dəfə Helsinkidə, daha sonra 1961-ci ildə Vyanada, Beynəlxalq Teatr İnstitutunun (ITI) IX Ümumdünya Konqresində müzakirə aparılıb.
Görkəmli teatr xadimi, ITI-nin Finlandiya Mərkəzinin prezidenti Arvi Kivima başçılıq etdiyi qurum adından bu bayramı təsis etmək təklifini irəli sürüb. Təklif Skandinaviya ölkələri tərəfindən dəstəklənərək, konqresdə qəbul olunub.
O vaxtdan etibarən martın 27-də (həmin gün “Millətlər teatrı” Ümumdünya Teatr Festivalının Paris mövsümünün təntənəli açılışı olmuşdu) bütün dünyada Beynəlxalq Teatr Günü kimi qeyd edilir. Hazırda dünyanın təqribən 100 ölkəsində fəaliyyət göstərən ITI-nin milli mərkəzləri buna geniş dəstək göstərirlər.
Azərbaycanın milli teatr tarixi isə XIX əsrin ikinci yarısından başlayır. Dahi mütəfəkkir Mirzə Fətəli Axundov tərəfindən ədəbiyyatımıza dram janrının gətirilməsi ilə xalq teatrının peşəkar teatr sənətinə çevrilməsində həlledici dövrə start verildi. Belə ki, 1873-cü il martın 10-da Bakı Realnı Məktəbinin tələbələri M.F.Axundovun «Lənkəran xanının vəziri» pyesini səhnələşdirdilər.
Öz dövrünün böyük maarifçisi Həsən bəy Zərdabi ideyanın müəllifi, dramaturq Nəcəf bəy Vəzirov isə tamaşanın rejissoru idi. Tamaşa xeyriyyəçi Cahangir Zeynalova məxsus binada nümayiş etdirilirdi. Sonradan Cahangir Zeynalov həmin binanı aktyorlara bağışlayıb. Elə həmin səhnədə ilk Azərbaycan operası, Üzeyir Hacıbəyovun «Leyli və Məcnun»u səhnələşdirilib. Orkestrə yazıçı Əbdürrəhim bəy Haqverdiyev drijorluq etmişdi.
Qərb müəlliflərinin əsərlərinə isə 1904-cü ildən müraciət olunub. 1940-cı ilə qədər Azərbaycanda 40-a yaxın dövlət statuslu teatr yaradılıb.

Mərkəzi icra hakimiyyəti orqanlarının rəhbərləri tərəfindən şəhər və rayonlarda vətəndaşların qəbulu cədvəlinə uyğun olaraq mədəniyyət və turizm naziri Əbülfəs Qarayev martın 29-da saat 11.00-da İsmayıllı şəhərində vətəndaşları qəbul edəcək.

Mədəniyyət və Turizm Nazirliyindən bildiriblər ki, bu şəhərdəki Heydər Əliyev Mərkəzində keçiriləcək qəbulda Ağsu, Qəbələ, Qobustan, İsmayıllı və Şamaxı rayonlarından olan vətəndaşlar iştirak edəcəklər.

Vətəndaşlar nazirliyin mct@mct.gov.az elektron poçt ünvanı, e-services, mct.gov.az elektron xidmətlər saytı, telefon məlumat sistemi (qaynar xətt): 147 və ya (012) 493-55-21 nömrəli telefon vasitəsilə (əlaqələndirici şəxs Pərviz İsgəndərli) qəbula yazıla bilərlər.

Qəbula gəlmək istəyən vətəndaşların, həmçinin yuxarıda adları qeyd edilən rayonların mədəniyyət və turizm şöbələri ilə əlaqə saxlamaları xahiş olunur.

Martın 25-də Bakıda “Yer saatı 2017” (Earth Hour 2017) beynəlxalq kampaniyası çərçivəsində iqlim dəyişikliyi əleyhinə kütləvi tədbir keçirilib. Tədbir bu il on illiyini qeyd edən “Yer saatı” beynəlxalq kampaniyasının Azərbaycan üzrə rəsmi əlaqələndiricisi olan IDEA İctimai Birliyinin və Dünya Vəhşi Təbiət Fondunun Azərbaycan nümayəndəliyinin (WWF Azerbaijan) birgə təşkilatçılığı ilə baş tutub.
Aksiya iştirakçıları dünya memarlığının nadir incilərindən olan Heydər Əliyev Mərkəzinin qarşısında toplaşaraq şəhərin mərkəzi hissəsində yerləşən böyük binaların fasadlarının işıqlarını bir saatlıq söndürülməsi prosesini müşahidə ediblər. İştirakçılar rəmzi gerisayımda kampaniyanın rəmzi olan “60+” yazısının şamlarla işıqlandırılmasında və velosiped yürüşündə iştirak ediblər.
“İqlim hərəkatına işıq saçın” (Shine a light on climate action) şüarı altında keçirilən “Yer saatı” kampaniyası çərçivəsində məşhur rəqs qruplarının “Yer saatı” konsepsiyasına uyğun qeyri-adi rəqsləri, zumba üzrə əyləncəli master-klasslar, tədbir müddətində fasiləsiz musiqi və digər sürprizlər gənclərin marağına səbəb olub.
“Yer saatı” dünyada ətraf mühitə həsr edilən ən böyük hərəkat olaraq milyonlarla insanı iqlim dəyişikliyinin dayandırılması uğrunda səfərbər edir. 2007-ci ildə Avstraliyanın Sidney şəhərində işıqların söndürülməsi aksiyası kimi başlanan “Yer saatı” kampaniyası 2016-cı ildə 178 ölkə, 7 min şəhər və hətta Beynəlxalq Kosmik Stansiyada qeyd edilib. “Yer saatı” aksiyaları zamanı böyük şəhərlərdəki məşhur binaların fasadlarının işıqları yerli vaxtla saat 20:30-da bir saatlıq söndürülür. Aksiya iştirakçıları bu rəmzi hərəkətlə ictimaiyyətin diqqətini iqlim dəyişikliyinin yaratdığı təhlükələrə yönəldir, enerjiyə qənaəti təşviq edirlər.
Beynəlxalq “Yer saatı 2017” kampaniyasının Azərbaycan üzrə rəsmi əlaqələndiricisi qismində çıxış edən IDEA İctimai Birliyi bu il ölkəmizdə keçirilən “Yer saatı” kampaniyasına qoşulduğuna görə Heydər Əliyev Fonduna, Heydər Əliyev Mərkəzinə, Azərbaycan Respublikası Mədəniyyət və Turizm Nazirliyinə, Bakı Şəhər İcra Hakimiyyətinə, “İçərişəhər” Dövlət Tarix-Memarlıq Qoruğu İdarəsinə, Azərbaycan Respublikası Dövlət Neft Şirkətinə, Dənizkənarı Bulvar İdarəsinə, Bakı Olimpiya Stadionuna, “Baku Crystall Hall”a, Milli Gimnastika Arenasına, Qəbələ “ASAN xidmət” mərkəzinə, ADA Universitetinə, “Alov qüllələri” kompleksinə, “Dalğa Plaza”ya, “Gilan Holding”ə və “Yeni Həyat Şirkətlər Qrupu” MMC-yə minnətdarlığını bildirir.
İqlim dəyişikliyi təhlükəsinin ciddiliyini, ona qarşı mübarizənin isə bəşəriyyət üçün vacibliyini nəzərə alaraq, IDEA İctimai Birliyi hər kəsi bu problemin həllinə töhfə verməyə, enerjiyə qənaət etməklə israfçılığa yol verməməyə çağırır.

AZƏRTAC

XƏBƏR LENTİ