Cümə, Aprel 28, 2017
İDMAN

Mərakeş Azərbaycanın paytaxtı Bakıda mayın 12-dən start götürəcək IV İslam Həmrəylik Oyunlarına 13 idman növündə 145 idmançı ilə qatılacaq. Bu barədə Mərakeş Milli Olimpiya Komitəsindən ölkənin yerli mətbuatına məlumat verilib.

Bakıya mayın 5-dən etibarən 4 qrupda gələcək Mərakeş nümayəndə heyətində, həmçinin 60 əməkdaş və rəhbər şəxslər də təmsil olunacaq.

Qeyd edək ki, 2013-cü ildə İndoneziyada təşkil edilmiş III İslam Həmrəylik Oyunlarında Mərakeş komanda hesabında altıncı yeri tutmuşdu.

AZƏRTAC

“Bakı-2017” IV İslam Həmrəyliyi Oyunlarının Xəzərdən başlayan su səyahəti aprelin 27-də Qəbələ rayonunda davam edib. APA-nın yerli bürosunun xəbərinə görə, bu gün axşam saatlarında rayonun Heydər Əliyev parkında möhtəşəm su festivalı keçirilib. Əvvəlcə tədbirin aparıcısı bu il mayın 12-dən 22-dək Bakı şəhərində keçiriləcək IV İslam Həmrəyliyi Oyunları barədə məlumat verib. Festivalda, həmçinin “Bakı-2017” IV İslam Həmrəyliyi Oyunlarının su səyahətinin başlanması, aprelin 5-də Prezident İlham Əliyevin su mərasiminin başlanğıcında Xəzər dənizinin suyu ilə dolu olan su səhəngini Qəbələ sakinlərinə təhvil verməsi görüntüləri təqdim edilib.

Xəzər dənizindən götürülmüş suyun Qəbələ rayonunadək keçdiyi səyahət yoluna, o cümlədən Qəbələ mərhələsinə nəzər salınıb. Məlumat verilib ki, Xəzərdən başlayan səyahət çərçivəsində təşkil edilən su festivallarının keçirilməsində əsas məqsəd xalqımıza idman bayramı əhval-ruhiyyəsini bəxş etməklə yanaşı, eyni zamanda həmrəylik və sevinc hissini bəxş etməkdir.

Sonra “Bakı-2017”-nin misdən hazırlanmış səhəngini bu gün səhər saatlarında Nohur gölündən su ilə dolduraraq Heydər Əliyev parkına gətirən taekvondo üzrə beynəlxalq turnirlərin qalibi Xəyal Əzizov, boks üzrə dünya çempionatının qızıl medalçısı Cavid Çələbiyev, rəsm və rəqs həvəskarı Şəfiqə Bayramzadə səhnəyə dəvət olunub. “Mirvari” rəqs qrupunun, Qəbələnin “Zopu-zopu” etnoqrafik folklor rəqs ansamblının çıxışı və musiqiçi Nəcməddin Əliyevin ifası Qəbələ sakinlərində yüksək əhval-ruhiyyə yaradıb. Festival su effekti və atəşfəşanlıqla başa çatıb.

Lent.az

Futbol üzrə Almaniya kubokunda ikinci finalçı da bəlli olub.

İkinci yarımfinal oyununda “Bavariya” “Borussiya” ilə qarşılaşıb.

5 qolun vurulduğu qarşılaşmada sevinən tərəf dortmundlular olub – 3:2.

Tomas Tuxelin komandası həlledici oyunda “Ayntraxt”la üz-üzə gələcək.

Bakı-2017” IV İslam Həmrəyliyi Oyunları ilə bağlı “Xəzərdən başlayan su səyahəti”nin növbəti estafetini aprelin 25-də Qax rayonu qəbul edib.

Axşam saatlarında Qax şəhərinin mərkəzi meydanında su festivalı keçirilib.

Tədbirin aparıcısı bu il mayın 12-dən 22-dək Bakıda keçiriləcək IV İslam Həmrəyliyi Oyunları barədə məlumat verib. Festivalda, həmçinin “Bakı-2017” IV İslam Həmrəyliyi Oyunlarının su səyahətinin başlanması, aprelin 5-də Prezident İlham Əliyevin Su mərasiminin başlanğıcında Xəzər dənizinin suyu ilə dolu olan su səhəngini Qax sakininə təhvil verməsi görüntüləri təqdim edilib. Xəzər dənizindən götürülmüş suyun Qax rayonunadək keçdiyi səyahət yoluna, o cümlədən su səyahətinin Qax mərhələsinə nəzər salınıb.

Sonra “Bakı-2017”nin misdən hazırlanmış səhəngini Ram-rama şəlaləsindən su ilə dolduraraq Qax şəhərinin mərkəzi meydanına gətirən yunan-Roma güləşi üzrə Avropa çempionatının bürünc mükafatçısı Əli Əminzadə, sərbəst güləş üzrə SSRİ idman ustası Məmməd Qasımov və Qax məktəblisi Ayşən Hüseynova alqış sədaları altında səhnəyə dəvət olunub. Festival iştirakçıları onları coşqu ilə qarşılayıblar.

Mərasim iştirakçıları IV İslam Həmrəyliyi Oyunlarının ulduz səfiri, əməkdar artist Tünzalə Ağayevanın, Arzu Dunusovanın ifalarından, “Mirvari” və “Pesvebi” rəqs qruplarının çıxışlarından böyük zövq alıblar.

“Su festivalı” su effektləri, lazer şousu və atəşfəşanlıqla başa çatıb.

Su festivalından aldığı sevinc hislərini AZƏRTAC-ın müxbiri ilə bölüşən rayonun fəal gənci Elvin Həsilov ürək sözlərini belə ifadə edib: “Biz gənclər Xəzərdən başlayan su səyahətinin tarixi anlarını doğma Qaxda yaşadığımız üçün qürur hissi keçiririk. “Bakı-2017” IV İslam Həmrəyliyi Oyunlarının su səyahətinin Qaxda davam etdirilməsi tolerantlıq mühitində yaşayan rayonumuz üçün unudulmaz bir hadisədir. İki il əvvəl birinci Avropa Oyunlarının, bu il isə IV İslam Həmrəyliyi Oyunlarının Azərbaycanda keçirilməsi ölkəmizin bu cür möhtəşəm tədbirlərə ən yüksək səviyyədə ev sahibliyi etmək qüdrətindən xəbər verir. İnanırıq ki, IV İslam Həmrəyliyi Oyunları həmrəylik, birlik, sağlam və ədalətli rəqabət ruhunda keçəcək”.

Qax şəhər sakini, 2 nömrəli məktəb-liseyin müəllimi Faiq Sofiyev IV İslam Həmrəyliyi Oyunlarının su səyahətinin Qax rayonunda davam etməsindən duyduğu sevinci belə ifadə edib: “Bakı-2017” IV İslam Həmrəyliyi Oyunlarının Xəzərdən başlayan su səyahəti, nəhayət, doğma Qaxımıza da gəlib çatdı. Bu əlamətdar hadisə rayonumuzun hər bir sakini kimi, məni də çox sevindirir, qürurlandırır. Bu Oyunların ölkəmizdə keçirilməsi Azərbaycanın nəinki İslam aləmində, eləcə də dünya arenasında növbəti uğurudur. Biz bu uğurlara çox sevinir və yarışlarda iştirak edəcək idmançılarımıza qələbələr arzulayırıq”.

Xatırladaq ki, “Bakı-2017” IV İslam Həmrəyliyi Oyunları ilə bağlı “Xəzərdən başlayan su səyahəti”nin Qax mərhələsinə respublikamızın dilbər guşələrindən biri sayılan qədim İlisu kəndindəki Ram-rama şəlaləsindən su götürməklə start verilib.

Rayon mərkəzindən 12 kilometr məsafədə, dəniz səviyyəsindən 1400 metr yüksəklikdə, Kürmük və Hamamçay çaylarının sahilində yerləşən İlisu kəndi Azərbaycanın qədim yaşayış məskənlərindəndir. Tarixi və təbiət abidələri ilə zəngin olan bu diyar termal suları və füsunkar şəlalələri ilə də tanınır. Bu şəlalələrdən ən məşhuru Ram-rama şəlaləsidir. Öz başlanğıcını “Latlar” adlanan dağ sahəsindəki bulaqlardan götürən və hündürlüyü təxminən 70 metr olan Ram-rama şəlaləsi Azərbaycanda ən yüksək şəlalə hesab olunur. Yerli əhali bu şəlaləni İlisu kəndinin üzük qaşı da adlandırır. Sərt keçən qış aylarında şəlalənin suyu donur və əsrarəngiz mənzərə yaradır.

Ram-rama şəlaləsindən suyu Qax şəhər 5 nömrəli tam orta məktəbin şagirdi, voleybol və rəqs həvəskarı Ayşən Hüseynova, yunan-Roma güləşi üzrə Avropa çempionatının bürünc mükafatçısı Əli Əminzadə və sərbəst güləş üzrə SSRİ idman ustası Məmməd Qasımov götürüblər. Bu su qabı mayın 12-də “Bakı-2017”nin açılış mərasimində nümayiş etdiriləcək.

Həmin gün günorta saatlarında Qax Olimpiya İdman Kompleksində “Bakı-2017” IV İslam Həmrəyliyi Oyunlarına daxil edilmiş “Domestic Grasspoots” proqramı çərçivəsində regional idman tədbiri də keçirilib. Tədbirdə Qax Rayon İcra Hakimiyyəti başçısının müavini Vəfa Heydərova, rayon gənclər və idman idarəsinin rəisi Əlövsət Bayramov, layihə rəhbəri Ülviyyə Əkbərova və Oyunların ulduz səfiri Tünzalə Ağayeva çıxış edərək, Bakıda keçiriləcək IV İslam Həmrəyliyi Oyunlarının ölkəmizin həyatında mühüm hadisə olduğunu bildirib, yarış iştirakçılarına uğurlar arzulayıblar.

“Bakı-2017” IV İslam Həmrəyliyi Oyunlarının təbliği, həmçinin gənclərin idmana cəlb olunması məqsədilə məktəblilər arasında təşkil olunan idman müsabiqəsində beş məktəbdən 50-si qız, 50-si oğlan olmaqla 100 şagird iştirak edib. Onlar idmanın müxtəlif növləri üzrə qüvvələrini sınayıblar. Sonda qaliblərə Əməliyyat Komitəsi tərəfindən hazırlanmış kubok, diplom, məlumat kitabçaları, qalib komandaya isə Oyunların bağlanış mərasiminə biletlər təqdim olunub.

IV İslam Həmrəyliyi Oyunlarının Azərbaycanda keçirilməsindən qürur duyduğunu bildirən Qax rayon gənclər və idman idarəsinin rəisi Əlövsət Bayramov sevinc hislərini AZƏRTAC-ın müxbiri ilə bölüşərək deyib: “Azərbaycan möhtəşəm idman bayramı ərəfəsindədir. Bakının bu Oyunlara ev sahibliyi etməsi ölkəmizin dünyada artan nüfuzunun, sosial-iqtisadi inkişafının göstəricisidir. Sevinirəm ki, Xəzərdən başlayan su səyahəti doğma Qax rayonuna da yetişdi. Əminik ki, bu möhtəşəm idman bayramı da yüksək səviyyədə keçəcək və ölkəmiz daha bir tarixi uğura imza atacaq”.

“Xəzərdən başlayan su səyahəti”nin növbəti dayanacağı aprelin 27-də Qəbələ rayonu olacaq.

AZƏRTAC

Gənclər və İdman Nazirliyinin, Azərbaycan Həndbol Federasiyasının təşkilatçılığı ilə “ABU Arena”da həndbol üzrə 9 komandanın (5 oğlan, 4 qız) iştirakı ilə 2000-2001-ci il təvəllüdlü yeniyetmələr arasında ölkə birinciliyi keçirilib.

Azərbaycan Həndbol Federasiyasından bildirilib ki, yarışda 2 saylı Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin (RİOEUGİM) komandası, 12 saylı İxtisaslaşdırılmış Olimpiya Ehtiyatları Uşaq-Gənclər İdman Məktəbinin (İOEUGİM) təmsilçiləri və Respublika Kompleks İdman Məktəbinin (RKİM) həndbolçuları iştirak ediblər.

Yekunda oğlanların yarışında 2 saylı RİOEUGİM-in komandası birinci, 12 saylı İOEUGİM-in kollektivi isə ikinci yerə layiq görülüb.

Qızlar arasında mübarizədə isə 12 saylı İOEUGİM-in komandası birinci, 2 saylı RİOEUGİM-in komandası isə ikinci olub.

AZƏRTAC

Gənclər və İdman Nazirliyinin, Azərbaycan Cüdo Federasiyasının dəstəyi və “Judo Club 2012″nin təşkilatçılığı ilə 21 yaşadək oğlanlar və qızlar arasında cüdo üzrə klub komandaları arasında keçirilən “Raquf Orucov Kuboku” beynəlxalq turniri başa çatıb. Bakı İdman Sarayında keçirilən turnirin rəsmi açılış mərasimində dövlət qurumlarının, ictimai təşkilatlarının nümayəndələri, ziyalılar, tanınmış idmançılar və Qarabağ müharibəsi veteranları iştirak ediblər.Mərasim Azərbaycanın müstəqilliyi və ərazi bütövlüyü uğrunda həlak olan şəhidlərimizin xatirəsinin bir dəqiqəlik sükutla yad edilməsi ilə başlayıb.Tədbirdə Gənclər və İdman Nazirliyinin şöbə müdiri Fərid Mansurov, Azərbaycan Cüdo Federasiyasının nümayəndəsi Ağayar Axundzadə, Milli Məclisin deputatları Hadi Rəcəbli, Adil Əliyev, ötən il aprel döyüşlərində şəhid olmuş polkovnik-leytenant Raquf Orucovun qardaşı Zabil Orucov çıxış ediblər.Turnirdə Azərbaycandan 10, Rusiya və Gürcüstanın hər birindən bir komanda mübarizə aparıb. Seçmə mərhələnin yekununda Rusiya, Gürcüstan, “Judo Club 2012” idman klubu və “Neftçi” komandaları yarımfinala çıxıblar.Yarımfinal qarşılaşmalarından sonra Gürcüstan və “Judo Club 2012” komandaları finala vəsiqə qazanıblar.

Maraqlı idman mübarizəsi şəraitində keçən final görüşündə qalib gələn Gürcüstan komandası “Raquf Orucov Kuboku”nun ilk sahibi olub.

Azertac

Aprelin 23-də “Bakı-2017” IV İslam Həmrəyliyi Oyunları Əməliyyat Komitəsinin təşkilatçılığı ilə “Bakı-2017”nin könüllüləri arasında ikinci velosiped yarışı keçirilib.

Əvvəlcə veloturun iştirakçılarına yarışın qaydaları haqqında məlumat verilib.

“Bakı Kristal Hall”ın yaxınlığında keçirilən velosiped yarışında 130-dən çox könüllü qız və oğlan mübarizəyə qoşularaq təxminən 700 metr məsafə qət edib və bacarıqlarını nümayiş etdiriblər.

Yarışın təsnifat mərhələsi hər birində on könüllünün iştirak etdiyi turlardan ibarət olub. Yarışda qızlar və oğlanlar ayrıca yarışıblar. Bu turların qalibləri final mərhələsində mübarizə aparmaq hüququ əldə ediblər. Gərgin mübarizə şəraitində keçən final mərhələsinin sonunda finiş xəttinə ilk çatan beş könüllü qalib elan olunub.

Sonra yarışın mükafatlandırma mərasimi keçirilib. Yarışda ilk üç yeri tutan qaliblərə velosipedlər hədiyyə edilib.

“Bakı-2017” IV İslam Həmrəyliyi Oyunları Əməliyyat Komitəsinin könüllülərlə kommunikasiya meneceri Təranə Həsənova yarışla bağlı bildirib ki, könüllülər arasında velosiped yarışına qeydiyyatdan keçmiş gənclərin sayı çox olduğundan bu gün ikinci velosiped yarışı təşkil edilib. “Bakı-2017”nin könüllüləri arasında Bakı Ağ Şəhər bulvarında aprelin 9-da keçirilmiş birinci veloyarışa 150-dən çox könüllü qatılmışdı. Yarış “Uğurlu gələcək” Könüllülərin İnkişaf Proqramının üçüncü istiqaməti olan “Bakı-2017 könüllülərinin sosial fəaliyyəti çərçivəsində təşkil olunur.

T.Həsənova qeyd edib ki, velosiped yarışının keçirilməsində əsas məqsəd könüllülər arasında sağlam həyat tərzini təbliğ etmək, gənclərdə idmana həvəsi artırmaq, eləcə də “Bakı-2017” könüllülərinin asudə vaxtlarını səmərəli təşkil etməkdir. Eyni zamanda, könüllüləri velosiped idmanı ilə məşğul olmağa və ondan nəqliyyat vasitəsi kimi istifadəyə cəlb etməkdir. Bugünkü yarışı Azərbaycan Velosiped İdmanı Federasiyasının hakimi idarə edir. Yarış zamanı iştirakçıların təhlükəsizlik məsələləri təmin olunub.

AZƏRTAC

Aprelin 23-də Dənizkənarı Milli Parkda “Bakı-2017” IV İslam Həmrəyliyi Oyunlarının başlamasına 20 gün qalması münasibətilə tədbir təşkil edilib.

Tədbirə “sağlam həyat tərzi” mesajını çatdıran açıq havada idman sessiyası ilə start verilib. Bu idman sessiyasını iştirakçılar böyük maraqla qarşılayıb, ona qatılıblar.

Tədbirlə bağlı təəssüratlarının bölüşən ulduz səfir Hacı Nuran deyib: “Bakı-2017” IV İslam Həmrəyliyi Oyunlarının ulduz səfiri olmaqdan və burdakı gəncləri dəstəkləməkdən qürur hissi duyuram. Bu gün biz Oyunların açılış mərasiminə 20 gün qalmasını bayram edirik. Vaxt qısaldıqca, həyəcan da artır. Ümid edirəm ki, Azərbaycan bayrağı altında ölkəmizi təmsil edəcək idmançılarımız böyük uğurlar qazanaraq xalqımızı sevindirəcəklər. Mən hamını “Bakı-2017” IV İslam Həmrəyliyi Oyunlarına gəlməyə və idmançılarımızı dəstəkləməyə çağırıram”.

Tədbir zamanı təşkil edilən müsabiqələr də iştirakçılara həyəcanlı anlar yaşadıb və mübarizədə qalib gələnlərə hədiyyələr verilib.

Sonda bir qrup gənc Oyunlarla bağlı fləşmob təqdim edib. Fleşmobda 50-dən artıq gənc Oyunlarda iştirak edəcək ölkələrin bayraqları ilə səhnəyə çıxıblar və “Bakı sizi gözləyir” mesajını veriblər.

Sonra tədbirin aparıcısı ictimaiyyətə Oyunlar və bilet satışı haqqında ətraflı məlumat verib və hər kəsi bu möhtəşəm Oyunlara qatılmağa və idmançılarımızı dəstəkləməyə çağırıb.

AZƏRTAC

“Bakı-2017” IV İslam Həmrəyliyi Oyunlarının Xəzərdən başlayan su səyahətinin Şəmkirdən sonra növbəti ünvanı aprelin 23-də ölkəmizin sürətlə inkişaf edən və gözəlləşən diyarı, energetiklər şəhəri olan Mingəçevir olub.

Mingəçevir şəhərində su səyahətinə Kür çayından su götürülməklə start verilib. Kür çayında hərəkət edən motorlu qayıqda olan sambo üzrə dünya çempionatının gümüş medalçısı Ayaz Ümidəliyev, yunan-Roma güləşi üzrə yeniyetmələr arasında respublika çempionu Cavanşir Qasımov, üzgüçülük həvəskarı İsfəndiyar Kərimov “Bakı-2017”nin misdən hazırlanmış səhəngini Kür çayının suyu ilə dolduraraq şəhərdəki Heydər Əliyev parkında keçiriləcək “Su festivalı”na yola düşüblər. Bu su qabı mayın 12-də “Bakı-2017”nin açılış mərasimində nümayiş etdiriləcək.

Sonra “Kür” Olimpiya Tədris-İdman Mərkəzində “Bakı-2017” IV İslam Həmrəyliyi Oyunlarına daxil edilmiş “Domestic Grassroots” proqramı çərçivəsində regional idman tədbiri keçirilib. Tədbirdə çıxış edən şəhər icra hakimiyyəti başçısının birinci müavini İlham İsmayılov, layihə rəhbəri Ülviyyə Əkbərova, “Bakı-2017” IV İslam Həmrəyliyi Oyunlarının idmançı səfiri Rəsul Çunayev çıxış edərək gələn ay Bakıda keçiriləcək mötəbər yarışların əhəmiyyətindən danışıb, məktəblilərə bu idman tədbirində uğurlar arzulayıblar.

“Bakı-2017” IV İslam Həmrəyliyi Oyunlarının təbliği və gənclərin idmana cəlb olunması məqsədilə məktəblilər arasında təşkil olunan müxtəlif idman müsabiqələrində 5 məktəbdən 50-si qız, 50-si oğlan olmaqla, 100 şagird iştirak edib. Məktəblilər idmanın müxtəlif növləri üzrə öz qüvvələrini sınayıblar. Musiqili-əyləncəli idman tədbiri iştirakçılara xoş anlar yaşadıb. Yarışda komanda hesabında Mingəçevir şəhər 3 və 10 nömrəli orta məktəblərinin və Texniki Humanitar Liseyin şagirdləri müvafiq olaraq I-III yerləri tutublar. Qaliblərə Əməliyyat Komitəsi tərəfindən hazırlanmış kubok, sertifikatlar, məlumat kitabçaları, qalib komandaya isə “Bakı-2017” IV İslam Həmrəyliyi Oyunlarının bağlanış mərasiminə biletlər təqdim olunub.

Mingəçevir şəhər 3 saylı orta məktəbinin şagirdi, yarışların iştirakçısı Ağalar Fətəliyev idman tədbiri barədə təəssüratlarını belə ifadə edib: “Bakı-2017” IV İslam Həmrəyliyi Oyunları münasibətilə Mingəçevirdə məktəblilər arasında təşkil edilən belə bir gözəl idman yarışında iştirak etdiyim üçün çox sevinirəm. Bizim komandanın üzvləri bu yarışda öz bacarığını nümayiş etdirərək qalib gəldiyi üçün mənə də Oyunların bağlanış mərasiminə bilet təqdim edildi”.

Qeyd edək ki, “Xəzərdən başlayan su səyahəti” proqramı çərçivəsində bu gün axşam saatlarında Mingəçevir şəhərindəki Heydər Əliyev parkında “Su festivalı” keçiriləcək, konsert proqramı və atəşfəşanlıq olacaq.

AZƏRTAC

Bakı-2017 İslam Həmrəyliyi Oyunlarının könüllüləri və Oyunların ulduz səfiri Tünzalə Ağayeva birgə “Salam, Bakı – Könüllülərin himni”ni ifa ediblər.

Himndə pop janrından istifadə olunsa da, milli musiqi alətlərimiz olan tar, qaval, zərb alətlərinin də ifası var.

Qeyd edək ki, açılış günü mayın 12-də baş tutacaq Bakı-2017 İslam Həmrəyliyi Oyunları 8-22 may tarixində Bakıda 16 yarış obyektində 17 Olimpiya və 3 qeyri-olimpiya növü olmaqla 20 idman növü üzrə keçiriləcək.

Trend

IV İslam Həmrəyliyi Oyunları 1000-dən çox mətbuat nümayəndəsi tərəfindən işıqlandırılacaq. Əllidən çox ölkədə yayımlanacaq yarışları ümumilikdə bir milyarddan çox tamaşaçının izləyəcəyi gözlənilir.

Bu barədə IV İslam Həmrəyliyi Oyunları Təşkilat Komitəsinin yekun iclasında məlumat verilib.

İclasda bildirilib ki, Oyunlarda 57 ölkəni təmsil edən üç mindən çox idmançının iştirakı nəzərdə tutulur. Bu rəqəmlər özlüyündə bir rekorddur. Çünki bu vaxta qədər keçirilən İslam Həmrəyliyi Oyunlarına bu qədər ölkənin qatılması heç vaxt müşahidə olunmayıb. Atletlər 10 gün ərzində 16 yarış məkanında 23 idman növü üzrə mübarizə aparacaqlar.

AZƏRTAC

Polşanın paytaxtı Varşavada keçirilən cüdo üzrə Avropa çempionatında fərdi yarışlara yekun vurulub. Yarışın sonuncu günü Azərbaycan milli komandası aktivinə daha bir qızıl medal əlavə edib.

100 kiloqram çəki dərəcəsində mübarizə aparan Elxan Məmmədov bütün rəqiblərinə qalib gələrək Avropa çempionu olub.

Xatırladaq ki, cüdoçumuz 2013-cü ildə dünya çempionu tituluna yiyələnmişdi.

Digər cüdoçularımız – Məmmədəli Mehdiyev (90 kq) və Elmar Qasımov (100 kq) isə beşinci yeri tutublar.

Bununla da, Azərbaycan milli komandası iki qızıl, üç bürünc medal qazanaraq Avropa çempionatını kişilər arasında fərdi yarışları ikinci yerdə başa vurub.

Qeyd edək ki, qitə çempionatının ilk iki yarış günündə Azərbaycan cüdoçularından Hidayət Heydərov (73 kq) qızıl, Orxan Səfərov (60 kq), Nicat Şıxəlizadə (66 kq) və Rüstəm Orucov (73 kq) bürünc medala sahib olub.

Aprelin 23-də cüdoçularımız komanda yarışlarında mübarizə aparacaqlar. Bu yarışlarda digər idmançılarımızla yanaşı, Vüqar Şirinli (66 kq) və Tural Səfquliyev (90 kq) də tatami üzərinə çıxacaq.

AZƏRTAC

21 aprel 2017-ci il tarixdə Ədliyyə Nazirliyi Penitensiar Xidmətinin və İdman və Gənclər Nazirliyinin birgə tədbirlər planına uyğun olaraq Azərbaycan Voleybol Federasiyasının hakimlərinin iştirakı ilə 2 saylı cəzaçəkmə müəssisəsində cəza çəkən məhkumlar arasında voleybol yarışı keçirilib. Tədbirdə Penitensiar xidmətin əməkdaşları, Gənclər və İdman Nazirliyinin və Azərbaycan Voleybol Federasiyasının nümayəndələri iştirak edib.

Yarışın sonunda komandalara təşkilatçılar tərəfindən hazırlanmış diplomlar və mükafatlar təqdim olunub.

SİA

Mərhum qrossmeyster Vüqar Həşimovun xatirəsinə həsr olunan “Shamkir Chess 2017” turnirində ilk tura yekun vurulub. “Synergy Group”un təşkilatçılığı ilə keçirilən yarışın ilk turunda Azərbaycanın hər iki təmsilçisi qara fiqurlarla oynayıb. Şəhriyar Məmmədyarov turnirin reytinq favoriti Uesli Soya (ABŞ) qalib gəlib. Teymur Rəcəbov isə Pavel Elyanova (Ukrayna) uduzub.

Birinci turun nəticələrini nəzərinizə çatdırırıq:

Vüqar Həşimov Memorialı

I tur

Radoslav Voytaşek (Polşa) – Vladimir Kramnik (Rusiya) – 0.5:0.5

Veselin Topalov (Bolqarıstan) – Maykl Adams (İngiltərə) – 0.5:0.5

Uesli So (ABŞ) – Şəhriyar Məmmədyarov (Azərbaycan) – 0:1

Sergey Karyakin (Rusiya) – Pentala Harikrişna (Hindistan) – 0.5:0.5

Pavel Elyanov (Ukrayna) – Teymur Rəcəbov (Azərbaycan) – 1:0

SİA

Avropa Liqasında həftənin ən yaxşı futbolçusu müəyyənləşib.  1/4 final mərhələsinin cavab oyunlarının ən yaxşısı adına Türkiyənin “Beşiktaş” klubunun üzvü Taliska seçilib.

O, UEFA-nın rəsmi saytı vasitəsilə keçirilən səsvermədə 53 faizlik göstəriciyə imza atıb. Futbolçunun Fransa “Lion”u ilə görüşdəki 2 qolu fərqləndirilməsində rol oynayıb.

“Şalke”nin oyunçusu Sead Kovaçeviç 24 faiz səslə 2-ci olub. “Mançester Yunayted”in üzvü Markus Reşford 19 faiz səs qazanıb. “Selta”lı Mallonu cəmi 15 faiz respondent bəyənib.

Lent.az

XƏBƏR LENTİ