Cümə, Aprel 28, 2017
MƏDƏNİYYƏT

“Azərbaycan tolerant ölkə olduğunu sözdə deyil, əməldə göstərib. 2016-cı ildə Azərbaycanda “Multikultiralizm ili” elan olunub və bu istiqamətdə bir çox işlər görülüb. Bu gün Azərbaycan dünyaya sübut edib ki, millətindən, dininindən, irqindən asılı olmayaraq, bütün insanlar bir arada xoşbəxt yaşaya bilər. Bu gün Bakı şəhərinin tam mərkəzində erməni kilsəsi yerləşir və həmin kilsə əsaslı təmir olunaraq qorunub saxlanılır. Çox təəssüf ki, bizim bədnam qonşularımız işğal etdikləri 20 faiz torpaqlarda tarixi abidələri dağıtmışdılar. Amma beynəlxalq təşkilatlar bu vandalizmə göz yumur.”

Daxil olan məlumata görə, bunu bir neçə gün əvvəl Moskva Dövlət Pedaqoji Universitetinin Stavropol filialında keçirilən “Gənclər Müasir Cəmiyyətdə: sosial bərabərliyə, mədəniyyətə və sülhə doğru” forumunda iştirak edən Dünya Azərbaycanlılarının Mədəniyyət Mərkəzinin vitse-prezidenti, Dünya Gənclər Konseyinin Azərbaycan rəhbəri, tanınmış ictimai xadim Hacı Quliyev MDPU tələbəsinin “Dünyanın heç bir ölkəsində dini bərabərlik yoxdur və ümumiyyətlə, bu bərabərlik mümkündürmü?” sualına cavab verərkən deyib.

Erməni gənclərinin çoxluq təşkil etdiyi Forumun moderatoru, siyasi elmlər doktoru Aleksandr Masalov ictimai xadimin çıxışına dəstək olaraq, fikrini bildirib və diskussiyanı bağlayıb:
“Bəli, dini bərabərlik mümkündür. Nümunə olaraq Azərbaycanı göstərə bilərəm. Amma çox təəssüf hissi ilə qeyd edək ki, Azərbaycan kimi ölkələr dünyada azlıq təşkil edir.”

Onu da qeyd edək ki, H.Quliyev ilə birgə Stavropola səfər edən DAMM və İNK Xarici Əlaqələr Şöbəsinin müdiri Nəcəf Qənbərov Stavropolda
Azərbaycanlıların diaspora fəaliyyətilə yaxından tanış olublar. Onlar başda Ümumi Rusiya Azərbaycanlılar konqresinin sədri, Odlar Yurdu diasporasının prezidenti Fəxrəddin Yarıyev olmaqla, buradakı diasporanın iş fəaliyyətini yüksək dəyərləndiriblər:
“Forum yüksək səviyyədə təşkil olunmuş və Azərbaycandan gələn nümayəndə heyyətinə xüsusi diqqət göstərilmişdi. Bunun üçün MDPU rəhbərliyinə və xüsusilə Stavropol və Dərbənd filiallarının rəhbərləri Natalya Nikolayevnaya və Ruslan Canqiroviçə təşəkkürmüzü bildiririk!”

Qeyd edək ki, H.Quliyev Moskva Dövlət Pedoqoji Universitetinin Ekspertlər Şurasında təmsil olunub. İctimai xadimin forum meydançalarında çıxışları olub və bu çıxışları böyük rəğbətlə qarşılanıb.

Tanınmış şair Yusif Nəğməkarın “Nizami demiş…” poeması bu günlərdə kitab halında nəfis tərtibatla çapdan çıxıb.

Xəbər verirlir ki, nəşrin redaktoru Xalq Şairi Nəriman Həsənzadədir. “Şairdən alimə…” adlı “Ön söz”ün müəllifi, tənqidçi-ədəbiyyatşünas Vaqif Yusifli yazır: “Ədəbiyyat aləmində bir-birinin uğurlarına sevinənlər az deyil. Təbii ki, burada yazıçı dünyasına, şəxsiyyətinə xas olan bir insani hissin yaşantıları var. Bir-birinin sevincinə, ədəbi uğurlarına qətiyyən paxıllıq etmədən, qısqanmadan böyük ürək açıqlığı ilə öz münasibətini bildirmək yazıçı qəlbinin böyüklüyündən irəli gəlir… Xatırlayıram, Mehdi Hüseynin İsmayıl Şıxlının “Dəli Kür” romanının əlyazmasını oxuyub uşaq kimi sevinməyini. Ona qədər İsmayıl Şıxlının bütün yazdıqlarına tənqidi münasibətini gizlətmirdi Mehdi müəllim. Ustad Rəsul Rzanın Məmməd Arazın “Atamın kitabı” poeması haqqında məqaləsini xatırlayıram. Necə böyük ürək açıqlığı ilə qələmə alınmışdı. Rəsul müəllimin altmışıncı illərdə ədəbiyyata gələn gəncləri necə qoruduğu, onlara dəstək olması da dönə-dönə xatırlanır. Böyük şairimiz Bəxtiyar Vahabzadə isə bu sahədə çoxlarına örnək idi. Bəxtiyar müəllim ədəbiyyatımızın ən gözəl nümunələrini yaradan şair dostlarını birinci təbrik edirdi, hətta istedadlı cavanlara xeyir-dua verib, onları ruhlandırırdı, qanadları bərkisin deyə uçuşa hazırlayırdı. Misallar çoxdur. Şair Yusif Nəğməkarın professor, müasir Azərbaycan tənqidinin, ədəbiyyatşünaslığının və dilçiliyinin avanqardlarından olan Nizami Cəfərova poema həsr etməsi də, zənnimcə, bu ənənə ilə bağlıdır”.

Kitabda Yusif Nəğməkarın “Nizami demiş…” poeması ilə yanaşı, professor Nizami Cəfərovun əsərlərindən seçilmiş fikirlər, mülahizələr də verilib.

Azərtac

Aprelin 26-da Vaşinqton meriyasının təşəbbüsü, “Macy’s” Ticarət Mərkəzi və “Cultural Tourism DC” təşkilatının birgə təşkilatçılığı ilə ABŞ-ın paytaxtında “Macy’s Global Fashion” mədəni tədbiri keçirilib. Tədbir “Dünya boyu səfirliklərə səyahət” adlı proqramın 10 illiyi münasibətilə təşkil olunub.

“Macy’s Global Fashion” mədəni tədbiri çərçivəsində 38 ölkə səfirliyi arasında “Ən yaxşı milli geyim” adlı müsabiqə keçirilib. Azərbaycanın milli geyimi müsabiqədə qalib gəlib və bir ay ərzində Vaşinqtonun mərkəzində yerləşən məşhur “Macy’s” vitrinlərində sərgilənəcək. Azərbaycanla yanaşı, müsabiqədə digər beş dövlət də qaliblər sırasında yer alıb.

Tədbirin açılışında çıxış edən “Cultural Tourism DC” təşkilatının icraçı direktoru Stiven Şulman bildirib ki, mərasimin keçirilməsində əsas məqsəd Amerika vətəndaşlarını müxtəlif mədəniyyətlərlə tanış etməkdir.

Daha sonra o, Vaşinqtonda artıq ənənə halı almış bu təşəbbüsdə Azərbaycanın ABŞ-dakı səfirliyinin ardıcıl olaraq 5 il fəal iştirak etdiyini diqqətə çatdırıb və qonaqlar üçün təşkil olunmuş ziyafətdə ölkəmizin istehsalı olan şərabların təqdim olunmasına görə Azərbaycana minnətdarlığını bildirib.

AZƏRTAC

“Daşkənd baharı-2017” IV Beynəlxalq Opera və Balet Festivalı çərçivəsində Azərbaycanın və Özbəkistanın Xalq Artisti Firudin Səfərovun rejissoru olduğu C.Verdinin “Traviata” operası nümayiş edilib.

Festivalda Azərbaycan, Rusiya, Belarus, Qazaxıstan, Qırğızıstan və Özbəkistanın opera və balet sənətinin tanınmış nümayəndələri, dirijorlar iştirak edib.

Tamaşaya Rusiya və Gürcüstandan gələn artistlər də qatılıb.

Xatırladırıq ki, Daşkəndə gəlməzdən əvvəl Firudin Səfərov 14 il Azərbaycan Dövlət Opera və Balet Teatrının baş rejissoru işləyib, bu mədəniyyət ocağında dahi Üzeyir Hacıbəylinin “Koroğlu” və “Leyli və Məcnun” operalarına quruluş verib.

Tanınmış rejissor artıq 40 ilə yaxındır ki, Daşkənddə çalışır. O, Bakı və Daşkənd teatrlarında 70-dən artıq müasir və klassik opera tamaşalarına quruluş verib.

AZƏRTAC

M.F.Axundzadə adına Azərbaycan Milli Kitabxanasında “Zərifə Əliyeva – qaranlığa nur saçan zəka” adlı kitab sərgisi açılıb.

Sərgi Azərbaycanın oftalmoloq-alimi, tibb elmləri doktoru, professor, Əməkdar Elm Xadimi, tibb elminin inkişafında əvəzsiz xidmətləri olan akademik Zərifə Əliyevanın anadan olmasının 94-cü ildönümü münasibətilə təşkil edilib.

Sərgidə görkəmli alimin Azərbaycan və xarici dillərdə elmi əsərləri, haqqında yazılmış kitablar, görkəmli şəxsiyyətlərin akademik haqqında söylədikləri fikirlər öz əksini tapıb.

AZƏRTAC

Mayın 2-də Azərbaycan Dövlət Filarmoniyasında xalq artisti, tarzən Ramiz Quliyevin 70 illik yubileyinə həsr olunan təntənəli qala-konsert keçiriləcək. Konsert Mədəniyyət və Turizm Nazirliyi və Azərbaycan Dövlət Filarmoniyasının təşkilati dəstəyi ilə baş tutacaq.

Tədbirdə Azərbaycanın tanınmış ifaçıları, kollektivləri və musiqi xadimləri iştirak edəcək. Bu il Ramiz Quliyevin pedaqoji fəaliyyətinin 50 illiyi də qeyd edilir. Tarzən Bakı Musiqi Akademiyasında pedaqoji fəaliyyətini davam etdirir. Onun xarici və Azərbaycan bəstəkarlarının tar ilə fortepiano üçün işlədiyi bir çox əsərləri çapdan çıxıb. R. Quliyev bir sıra dərsliklərin, dərs proqramlarının, elmi və metodiki tövsiyyələrin müəllifidir.

R. Quliyev Türkiyə, Əfqanıstan, Suriya, İsveçrə, Hollandiya, Hindistan, ABŞ, Kanada, Danimarka, İran, İraq, Fransa, İngiltərə, İsrail, Norveç və başqa ölkələrdə konsert proqramları ilə çıxış edib.

apa.az

Azərbaycan Dövlət Gənc Tamaşaçılar Teatrının may ayı üçün nəzərdə tutulan repertuarı maraqlı tamaşalarla zəngindir.

Teatrın may repertuarı:

2 may – “Ələddinin sehrli çırağı” (ərəb xalq nağılı)

3 may – “Hekayəti xırs quldurbasan”

6, 7 may – “Золотой Скакун” (Çeçenistan Dövlət Gənc Tamaşaçılar Teatrının qastrol tamaşası)

9 may – “Uzuncorab Pippi”

10 may – “Lineynin gözəllik kraliçası”

11 may – “Konnemarada bir kəllə”

12 may – “Yalqız Qərb”

13 may – “Dəcəl keçi”, “Pəri Cadu”

14 may – “Qırmızı papaq”, “Mən gəldim qızlar” (“Müharibə”)

16 may – “Romeo və Culyetta”

17 may – “Müsyö Jordan və dərviş Məstəli şah”

18 may – “Şeyx Sənan”

19 may – “Leyli və Məcnun”

20, 21 may- “Королевская Корова” (Gürcüstan Dövlət Peşəkar Gənc Tamaşaçılar Teatrının qastrol tamaşası)

26 may – “Yarımçıq qalmış”

27 may – “Balaca və damda yaşayan Karlson” , “Xortdanın cəhənnəm məktubları”

28 may – “Buratinonun macəraları”

Azertac

Aprelin 27-də YAY Qalereyasında altı gənc rəssamın “1001 gecə” adlı qrup sərgisi açılacaq.

Sərgi müasir incəsənət sahəsində çalışan görkəmli Azərbaycan rəssamlarının rəngkarlıq, heykəltəraşlıq və instalyasiya nümunələrini özündə birləşdirir.

Rəssamlar Orxan Hüseynov, Faiq Əhməd, Fərid Rəsulov, Rəşad Ələkbərov, Hüseyn Haqverdi və Reza Hazarenın sənət silsiləsinin yer alacağı sərginin ideyası İslam mədəniyyəti dəyərlərindən, onların müasir dövrə necə uyğunlaşmasından, habelə hansı transformasiyalara uğramasından bəhs edir.

İyunun 11-dək davam edəcək sərginin kuratoru Fərəh Ələkbərlidir.

AZƏRTAC

Beynəlxalq Türk Mədəniyyəti Təşkilatının (TÜRKSOY), Türkiyə Sənayeçi İş Qadınları və İş Adamları Konfederasiyasının (SANKON) və Başkənd Universitetinin təşkilatçılığı ilə Ankarada türk dünyası qadın bəstəkarlarının əsərlərindən ibarət konsert keçirilib.

Konsert salonun foyesində türk dünyasının qadın rəssamlarının əsərlərindən ibarət rəsm sərgisi açılıb. Sərgidə TÜRKSOY-un təşkilatçılığı ilə müxtəlif illərdə təşkil olunmuş sərgilərdə təqdim edilən 29 əsər nümayiş olunub.

Konsertdən əvvəl TÜRKSOY-un baş katibi, professor Düsen Kaseinov və SANKON sədri Nəzakət Əminə Atasoy layihənin əhəmiyyətindən danışıblar. Diqqətə çatdırılıb ki, türkdilli xalqlar həmişə qadın adını və əməyini uca tutublar. Türk qadınları cəmiyyətin bütün sahələrində olduğu kimi, milli musiqinin inkişafında da aparıcı rol oynayıblar.

Konsertdə Başkənd Universitetinin orkestrinə Ertuğ Korkmaz dirijorluq edib. Konsertin repertuarına Azərbaycandan Xədicə Zeynalova, Türkiyədən Özge Gülbe Usta, Qazaxıstandan Balnur Kıdırbek, Qırğızıstandan Nargiza Kurmanova, Türkmənistandan Jeren Gurbangulujova, Başqırdıstandan Leyla İsmayılova, Tatarıstandan Elmira Qulamovanın əsərləri daxil edilib.

Həmyerlimiz X.Zeynalovanın “Düşüncələr”, “Hekayə”, ”Yağış damcıları”, “Gəzinti” və “Rəqs” əsərləri ifa olunub.

Sonda TÜRKSOY adından ifaçılara diplom və hədiyyələr təqdim edilib.

Azərtac

Bu gün Azərbaycan elminin, ədəbiyyatının, təhsilinin inkişafında misilsiz xidmətlər göstərmiş xeyirxah insan, görkəmli yazıçı, böyük alim Mir Cəlal Paşayevin anadan olmasından 109 il keçir.

Mir Cəlal Əli oğlu Paşayev 1908-ci il aprelin 26-da Cənubi Azərbaycanın Ərdəbil vilayətində dünyaya göz açıb. Kiçik yaşlarında atası Gəncəyə köçdüyündən uşaqlığını burada keçirib.

Yazıçı kimi 1928-ci ildə ədəbiyyata gələn Mir Cəlal Paşayev elə həmin ildə də ilk tədqiqat əsərini yazıb. Sözün gücünə güvənib, onun böyüklüyünə baş əyən sənətkarın könüllərə yanğı salmış “Bir gəncin manifesti” əsəri, zəmanənin güzgüsü olan hekayələri klassik bədii nümunələr kimi ədəbiyyat tariximizin səhifələrində müəllifinə əbədiyaşarlıq qazandırıb. Yuxusuz gecələrinin, gərgin zəhmətinin bəhrəsi olan “Füzuli sənətkarlığı”, “XX əsr Azərbaycan ədəbiyyatı”, “Azərbaycanda ədəbi məktəblər (1905-1917)”, “Ədəbiyyatşünaslığın əsasları” adlı fundamental əsərləri ədəbiyyatşünaslıq elminin qızıl nüsxələrindəndir.

Mir Cəlal Paşayev görkəmli nasir kimi Azərbaycan ədəbiyyatı tarixində öz layiqli və şərəfli yerini tutub. Qəti əminliklə deyə bilərik ki, təkcə “Bir gəncin manifesti” əsərinə görə Mir Cəlal klassik sənətkarlar sırasında dayanmaq haqqını qazanıb. Bu əsər çapdan çıxanda onun heç 30 yaşı yox idi. 1928-ci ildə mətbuatda ilk şeirləri (“Dənizin cinayəti”, “Ananın vəsiyyəti”, “Müxbir”) çap olunub. Lakin o, bundan sonra, daha doğrusu, 1930-cu ildən etibarən hekayələr yazıb. O dövrün “Şərq qadını”, “Gənc işçi”, “İnqilab və mədəniyyət”, “Ədəbiyyat qəzeti” kimi nüfuzlu nəşrlərində “Doktor Cinayətov”, “İfşa”, “Mərkəz adamı”, “Naxələf”, “Bostan oğrusu”, “Qüdrət nümayişi”, “İstifadə”, “Dəzgah qızı”, “Heyrət” … hekayələrini çap etdirib. 1932-ci ildə “Sağlam yollarda”, 1935-ci ildə “Boy” adlı ilk oçerklər və novellalar kitabları çap olunub. O zaman, 1935-ci ildə “Dirilən adam” romanı ilə Mir Cəlal Paşayev akademik Məmməd Arifin yazdığı kimi “diqqətli bir realist yazıçı olduğunu göstərib”.

Yazıçının qələminə altı roman məxsusdur. Onların arasında “Bir gəncin manifesti”, “Dirilən adam”, “Yolumuz harayadır” keçmişdən, “Açıq kitab”, “Yaşıdlarım” və “Yeni şəhər” isə müasir həyatdan bəhs edir.

Mir Cəlal Paşayev 1940-cı ildə “Füzulinin poetik xüsusiyyətləri” əsərinə görə filologiya elmləri namizədi, 1947-ci ildə isə “Azərbaycanda ədəbi məktəblər” əsərinə görə filologiya elmləri doktoru alimlik dərəcələrini alıb.

Görkəmli Azərbaycan yazıçısı, alimi, pedaqoqu Mir Cəlal Paşayevin əsərləri bir çox xarici dillərə tərcümə edilib, onun əsərləri müxtəlif ölkələrin oxucularında sonsuz maraq doğurub.

Trend

Beynəlxalq Türk Mədəniyyəti Təşkilatının (TÜRKSOY), Türkiyə Sənayeçi İş Qadınları və İş Adamları Konfederasiyasının (SANKON) və Başkənd Universitetinin təşkilatçılığı ilə Ankarada türk dünyası qadın bəstəkarlarının əsərlərindən ibarət konsert keçirilib.

Konsert salonun foyesində türk dünyasının qadın rəssamlarının əsərlərindən ibarət rəsm sərgisi açılıb. Sərgidə TÜRKSOY-un təşkilatçılığı ilə müxtəlif illərdə təşkil olunmuş sərgilərdə təqdim edilən 29 əsər nümayiş olunub.

Konsertdən əvvəl TÜRKSOY-un baş katibi, professor Düsen Kaseinov və SANKON sədri Nəzakət Əminə Atasoy layihənin əhəmiyyətindən danışıblar. Diqqətə çatdırılıb ki, türkdilli xalqlar həmişə qadın adını və əməyini uca tutublar. Türk qadınları cəmiyyətin bütün sahələrində olduğu kimi, milli musiqinin inkişafında da aparıcı rol oynayıblar.

Konsertdə Başkənd Universitetinin orkestrinə Ertuğ Korkmaz dirijorluq edib. Konsertin repertuarına Azərbaycandan Xədicə Zeynalova, Türkiyədən Özge Gülbe Usta, Qazaxıstandan Balnur Kıdırbek, Qırğızıstandan Nargiza Kurmanova, Türkmənistandan Jeren Gurbangulujova, Başqırğızıstandan Leyla İsmayılova, Tatarıstandan Elmira Qulamovanın əsərləri daxil edilib.

Həmyerlimiz X. Zeynalovanın “Düşüncələr”, “Hekayə”, ”Yağış damcıları”, “Gəzinti” və “Rəqs” əsərləri ifa olunub.

Sonda TÜRKSOY adından ifaçılara diplom və hədiyyələr təqdim edilib.

AZƏRTAC

Mayın 14-də Azərbaycan Musiqi Mədəniyyəti Dövlət Muzeyində “İslam dünyasının musiqi mədəniyyəti Azərbaycan Musiqi Mədəniyyəti Dövlət Muzeyinin kolleksiyalarında” adlı sərgi açılacaq.
Muzeydən bildirilib ki, IV İslam Həmrəyliyi Oyunları çərçivəsində təşkil ediləcək sərgi Mədəniyyət və Turizm Nazirliyinin dəstəyi ilə reallaşacaq. Hər bir müsəlman ölkəsinin milli musiqi alətlərinin yer alacağı sərginin ekspozisiyasına şəhərimizin qonağı olacaq əcnəbi ölkə vətəndaşları baxa biləcəklər.
Sözügedən sərginin təşkili üçün artıq muzeydə müvafiq işlərə başlanılıb. Ölkəmizdə fəaliyyət göstərən İslam ölkələrinin səfirliklərinə bununla bağlı müraciət də olunub. Sərgi çərçivəsində Qədim Musiqi Alətləri Ansamblının konsert proqramı ilə çıxışı da nəzərdə tutulub.
AZƏRTAC

Xəbər verdiyimiz kimi, Azərbaycan Dövlət Gənc Tamaşaçılar Teatrının bir qrup yaradıcı heyəti Rusiyanın İvanov vilayətinin Kineşma şəhərində keçirilən “Hərarətli ürək” (“Горячее сердце”) klassik rus dramaturgiyası III Beynəlxalq Teatr Festivalında iştirak edir.

Teatrdan bildirilib ki, festivalda iştirak edən Azərbaycan və Kalmıkiyanın Əməkdar artisti Şövqi Hüseynovun əsas rol ifa etdiyi N.V.Qoqolun “Dəlinin qeydləri” mono- tamaşası aprelin 22-də A.N.Ostrovski adına Kineşma Dram Teatrının səhnəsində nümayiş olunub.

Festival tarixində ilk dəfə olaraq Gənc Tamaşaçılar Teatrı xarici ölkə teatrı kimi öz ana dilində səhnədə çıxış edib. Yenilik festivalın beynəlxalq münsiflər heyəti, iştirakçı teatrlar və tamaşaçılar tərəfindən maraqla qarşılanıb.

Ş. Hüseynov festivalın “Ən yaxşı kişi ifaçısı” nominasiyasına layiq görülüb.

AZƏRTAC

Mədəniyyət və Turizm Nazirliyi IV İslam Həmrəyliyi Oyunları münasibətilə zəngin mədəni proqram hazırlayıb. Oyunların keçiriləcəyi günlərində proqrama uyğun olaraq Heydər Əliyev Sarayında da qonaqlara və turistlərə islam mədəniyyəti və Azərbaycanın zəngin mədəniyyəti və incəsənətini əks etdirən müxtəlif tədbirlər və konsert proqramları təqdim ediləcək.

Heydər Əliyev Sarayının mətbuat xidmətindən bildirilib ki, aprel ayında Bakı Şopinq Festivalının açılış mərasimində Azərbaycan Dövlət Rəqs Ansamblının iştirakı ilə premyerası keçirilən konsert proqramı yenidən paytaxt sakinləri və xarici qonaqlara təqdim olunacaq. Obrazlığı, rəngarəngliyi və ifaları böyük maraqla qarşılanan və qonaqlar tərəfindən yüksək qiymətləndirilən Azərbaycan Dövlət Rəqs Ansamblının “Mənim Azərbaycanım” yeni konsert proqramı və “Koroğlu” bir pərdəli milli baleti mayın 20 –də Heydər Əliyev Sarayında yenidən təqdim ediləcək.

Konsertin bədii rəhbəri və quruluşçusu Rusiyanın Xalq Artisti Dikalu Muzakaevdir.

Biletləri www.iticket.az saytından onlayn, şəhərin kassalarından və “ASAN xidmət” mərkəzlərindən əldə etmək olar.

AZƏRTAC

Mədəniyyət və turizm nazirinin müavini Ədalət Vəliyevin rəhbərliyi ilə nümayəndə heyəti İranda Azərbaycan Mədəniyyət Günlərinin keçirilməsinə dair danışıqların aparılması, həmçinin tədbirlərin keçiriləcəyi məkanlara baxış keçirilməsi məqsədilə İranda səfərdədir.

Mədəniyyət və Turizm Nazirliyindən verilən məlumata görə, nümayəndə heyəti Tehranda yerləşən “Vəhdət” konsert salonu, İranın İncəsənət Akademiyası və Milli kitabxanada olublar. Mədəniyyət obyektlərinin rəhbərləri tərəfindən məkanların texniki imkanları və ümumi fəaliyyəti barədə məlumat verilib.

Danışıqlar zamanı Ə.Vəliyev tərəfindən həmin müəssisələr ilə Azərbaycanda yerləşən mədəniyyət müəssisələri arasında əməkdaşlığın qurulmasının vacibliyi vurğulanıb, fikir mübadiləsi aparılıb. Bu məkanların Mədəniyyət Günlərinin açıllş mərasimi, həmçinin Mədəniyyət Günləri çərçivəsində keçirilməsi nəzərdə tutulan Azərbaycanın mədəniyyəti və turizm imkanlarını əks etdirəcək sərgi, kitab və foto-sərgi, İranın aparıcı turizm şirkətləri ilə görüş və ölkəmizin turizm potensialına dair təqdimat, Azərbaycan kinematoqrafının istehsalı olan filmlərinin bir həftə ərzində nümayişi və teatr tamaşasının göstərilməsi ilkin olaraq qərara alınıb.

Həmin gün nazir müavini ilə İranın İslami Mədəniyyət və Əlaqələr Təşkilatının sədri Abuzər İbrahimi, İncəsənət Akademiyasının rektoru Əliyyə Müəllim və digər rəhbər şəxslər arasında görüş keçirilib.

Görüşdə ölkələrimiz arasında mədəniyyət sahəsində əlaqələrin mövcud vəziyyəti və əməkdaşlığın gələcək perpektivləri müzakirə edilib.

Görüşlər İsfahan və Təbriz şəhərlərində davam etdiriləcək.

Trend

XƏBƏR LENTİ