Cümə, Aprel 28, 2017
MEDİA VƏ QHT

UNEC-də “İslam Həmrəyliyi İli” çərçivəsində islam ölkələrinin diplomatik korpuslarının nümayəndələri ilə görüşlər davam edir.
Malayziyanın Azərbaycandakı fövqəladə və səlahiyyətli səfiri Dato Roslan Tan Sri Abdul Rahman UNEC-də olub. Rektor, professor Ədalət Muradov qonağı Cənubi Qafqazın ən böyük iqtisadyönümlü universitetində salamlamaqdan məmnun olduğunu bildirib. 2017-ci ilin ölkəmizdə “İslam Həmrəyliyi İli” elan edildiyindən bəhs edən rektor, bunun dözümlülük, sülh, tolerantlıq və dünyəviləşmə ideyalarının təbliğində dövlətin rolunu qabardan əlamətdar hadisə adlandırıb. IV İslam Həmrəyliyi Oyunlarının 2017-ci ildə Bakıda keçirilməsi ilə bağlı qərarın ölkəmizin islam həmrəylinin möhkəmləndirilməsi sahəsində növbəti əməli addımlar atması üçün əlverişli şərait yaratdığını qeyd edib.
Rektor səfirə UNEC-in tarixi, beynəlxalq əlaqələri, ikili diplom proqramları barədə məlumat verib. UNEC-in ölkədə dörd dildə təhsil verən və xaricdə filialı olan yeganə universitet olduğunu diqqətə çatdırıb. Qonağa İnnovativ Biznes İnkubatorunun fəaliyyəti haqqında məlumat verən rektor, uğurlu startap layihələrindən söz açıb.
Səfir Dato Roslan Tan Sri Abdul Rahman Azərbaycanın Malayziya ilə diplomatik münasibətlərinin müstəqilliyini bərpa etdikdən sonra yaratdığını diqqətə çatdıraraq, iki ölkə arasında uğurlu əməkdaşlıqdan söz açıb. Həmin vaxtdan etibarən sabit inkişaf xətti ilə tərəfdaşlıq səviyyəsinə yüksələn münasibətlərin bir çox mühüm hadisələrlə əlamətdar olduğundan bəhs edib.
Sonra diplomat UNEC tələbələri ilə görüşüb. UNEC-də olmaqdan məmnunluq duyduğunu ifadə edən səfir tələbələrə Malayziya barədə ətraflı məlumat verib. Ölkəsinin 1957-ci ildə müstəqillik qazandığını qeyd edərək, əhalisinin əksər hissəsinin müsəlmanlardan ibarət olduğunu diqqətə çatdırıb. Malayziyanın Birləşmiş Millətlər Təşkilatının lider üzvlərindən biri olduğunu vurğulayan diplomat, ölkəsinin Cənub-Şərqi Asiya Dövlətləri Assosiasiyasının da üzvü olduğunu bildirib. Səfir Malayziyanın coğrafiyası, iqtisadiyyatı, pul vahidi, təhlükəsizliyi, texnologiyası, təhsil sistemi, turizm imkanları və mədəniyyəti haqqında geniş təqdimatla çıxış edib.
Tələbələrin Malayziya barədə suallarını cavablandıran diplomat sonda auditoriyada müsabiqə elan edib. Təqdimatı ilə bağlı sualları cavablandıran tələbələrə hədiyyələr təqdim edib.
UNEC haqqında:
UNEC Azərbaycan Dövlət İqtisad Universitetinin brendidir. 21 yanvar 2016-cı ildə Standartlaşdırma, Metrologiya və Patent üzrə Dövlət Komitəsi tərəfindən UNEC brendi qeydiyyata alınaraq, patentləşdirilib.

Azərbaycanda da böyük oxucu kütləsi olan “Türk Yurdu” dərgisinin aprel sayı oxucuları ilə buluşdu.
Nəşr olunduğu ilk gündən Azərbaycan aydınlarının olduğu kimi oxucusunun da diqqətini çəkən dərgi tarixin ən ziddiyyətli dönəmlərindən birində, milli kimlik məsələlərinin ideoloji, fiziki mübahisə, müharibə, savaş,  obyektinə çevrildiyi bir vaxtda nəşr edilməyə başladı. “Türk Yurdu” dərgisin həm də ən dəyərli cəhətlərindən biri Türk fikir və məfkurəsinin özülünü təşkil edən aydınlarının dərgidə yazmış olmalarıdır. Əli bəy Hüseynzadənin, Məmməd Əmin Rəsulzadənin, Əhməd Ağaoğlunun və daha necə-necə Azərbaycan aydınının söz meydanına çevrilən dərgidə həyatımızla əlaqəli bütün sahələr- dil, tarix, ədəbiyyat, sənət, siyasət, iqtisadiyyat, elm, kültür və s. ilə bağlı bütün mövzular işlənib.

Qeyd edək ki, “Türk Yurdu” dərgisi “Türk Yurdu Cəmiyyəti”nin milli fikirlərini yaymaq üçün 30 noyabr 1911-ci ildə Yusif Akçuralının məsul müdirliyi ilə İstanbulda çapa başlamışdır. Dərigi 1911-ci ildən etibarən fasilələrlə çap olunur. “Türk Yurdu” Cəmiyyətinin bağlanması ilə “Türk Ocaqları”nın çap orqanına çevrilir. Dərgi “Türk Ocakları” Mərkəzinin aylıq çap orqanı olaraq hazırda Ankarada dərc edilir. 1997-ci ilin  İyul ayından başlayaraq 480-ci sayından etibarən Akademik status daşıyır.

Dərgiyə abone olaraq əldə etmək mümkündür.

Qax rayonunda Avropa Tələbə Psixoloqlar Assosiasiyaları Federasiyasının 31-ci Ümumavropa Konqresi öz işinə başlayıb.
“ASAN Könüllüləri” Təşkilatının əsas tərəfdaşlığı ilə “Gənc Psixoloqlar” İctimai Birliyi tərəfindən təşkil olunan konqresdə dünyanın 33 ölkəsindən 300 gənc iştirak edir.
Konqresin açılış mərasimində Qax rayon icra hakimiyyətinin başçısı Musa Şəkiliyev, Azərbaycan Respublikası Prezidenti yanında Vətəndaşlara Xidmət və Sosial Innovasiyalar üzrə Dövlət Agentliyinin aparat rəhbəri Azad Cəfərli, “ASAN Könüllüləri” Gənclər Təşkilatının sədri Bəxtiyar İslamov və Gənc Psixoloqlar” İctimai Birliyinin sədri Orxan Oruczadə çıxış ediblər.
Tədbirdə qonaqlara tədbirin keçirildiyi Qax şəhəri, eləcə də ölkəmiz haqqında məlumat verilərək ölkəmizdə dünyaya örnək və nümunə ola biləcək tolerantlıq mühitinin qorunub saxlanıldığı, 31-ci konqresin multukultural dəyərləri özündə ehtiva edən Azərbaycanda keçirilməsinin sevindirici hal olduğu bildirilib.
Qeyd edək ki, 30 aprel tarixinədək davam edəcək konqresin əsas mövzusu “Humanity today” olaraq müəyyənləşdirilib. Bu başlıq altında son dövlərin ən aktual mövzuları olan müharibə və terrorların psixoloji tərəfləri, onların insan psixikasına təsiri, mədəniyyətlər arası çətinliklər, qaçqın krizislərinin psixoloji tərəfləri müzakirə olunacaq. Bundan əlavə, adı çəkilən problemlərin yaratdığı islamafobiya, milli və irqi ayrıseçkiliyin psixoloji aspektləri, multikultiralizm dəyərlərinin əhəmiyyəti və bənzər mövzular da konqresin əsas mövzularındandır.

Yüzlərlə QHT rəhbəri bankların göstərdiyi xidmətlərin məhdudlaşdırılması ilə əlaqədar bu gün prezidentə müraciət ünvanlayıb.

Beynəlxalq Münasibətlərin Araşdırılması Mərkəzi Mətbuat Xidmətindən verilən məlumatda bildirilir ki, Son günlər banklar Maliyyə Bazarlarına Nəzarət Palatasının məktubuna istinad etməklə, qanunvericiliyə əsasən qeyri-hökumət təşkilatlarına göstərməli olduqları bank xidmətlərinin əhatə dairəsini məhdudlaşdırıblar. Nəticədə ölkədə dövlət tərəfindən maliyyələşdirilən yüzlərlə qeyri-hökumət təşkilatlarının ictimai əhəmiyyətli layihələrinin icrasında qeyri-müəyyənliklər meydana gəlib. Buna səbəb isə “Nağdsız hesablaşmalar haqqında” qanunun 3.4.7-ci maddəsinə istinad edilərək dövlət donor qurumları tərəfindən ayrılmış vəsaitin rəsmiləşdirilməsini nəzərdə tutan qrant müqaviləsinin dövlət satınalma müqaviləsi kimi qiymətləndirilməsi olub.

Maliyyə Bazarlarına Nəzarət Palatasının 16 dekabr 2016-cı il tarixli “Nağdsız hesablaşmalar haqqında” qanuna istinad edərək banklara ünvanladığı məktubun icrası nəticəsində yaranmış problemlərdir.

Qeyd olunur ki, qeyri-hökumət təşkilatları 15 min manatadək məbləğ çərçivəsində nağd qaydada hesablaşmaların aparılmasını həyata keçirə bilmirlər. Hazırda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən keçirilən müsabiqə nəticələrinə əsasən müxtəlif layihələrinin icrası ilə bağlı ayrılmış maliyyə vəsaitləri qeyri-hökumət təşkilatlarının bank hesablarına köçürülsə də, bu vəsaitlərdən istifadə praktiki olaraq mümkünsüz hal alıb.

Bu səbəbdən QHT-lər ictimai əhəmiyyətli layihələrinin həyata keçirilməsi ilə bağlı yaranmış çətinliyin aradan qaldırılması və qanunvericiliklə müəyyən edilmiş 15 min manatadək məbləğdə hesablaşmaların nağd qaydada aparılmasının təmin olunmasına dair dövlət başçısından müvafiq göstəriş verməsini xahiş ediblər.

“Sosial hüquqların araşdırılması” İctimai Birliyi (SHAİB) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Əhalinin həssas təbəqələrinin sosial hüquqlarının müdafiəsi sahəsində maarifləndirmə və hüquqi yardım xidmətlərinin göstərilməsi” adlı layihəsini həyata keçirməyə başlayıb.
qhtxeber.az-ın məlumatına görə, layihənin əsas məqsədi əhalinin həssas təbəqələrinin, çətin həyat şəraitində yaşayan şəxslərin (ailələrin), eləcə də işsiz gənclərin, aztəminatlı ailələrin, cəzaçəkmə yerlərindən azad olunaraq sosial adaptasiyaya ehtiyacı olan şəxslərin, təhsildən kənarda qalmış qadınların, ahıllar, iş tapmaqda çətinlik çəkən və sosial müdafiəyə ehtiyacı olan digər şəxslərin və s. sosial hüquqlarla (əmək, tibb, sosial təminat, ailə, təhsil və s.) bağlı məlumatlandırılması, bu sahədə hüquqi biliklərin artırılması və  onlara pulsuz hüquqi yardım xidmətlərinin göstərilməsi, pozulmuş hüquqlarının inzibati və məhkəmə qaydasında müdafiəsindən ibarətdir.
Layihə çərçivəsində aşağıdakı işlər həyata keçiriləcək:
Sosial məsələlər üzrə hüquq klinikasının fəaliyyətinin təmin edilməsi və genişləndirilməsi, sosial qanunvericiliyin CD formatında hazırlanması və əhalinin həssas təbəqələrinə paylanması, Bakı şəhəri və regionlarda təlimlərin və ictimai müzakirələrin təşkili, Bakıda və regionlarda pulsuz hüquqi xidmətlərin göstərilməsi, sosial qanunvericiliyin təkmilləşdirilməsinə dair tövsiyələrin Parlamentə və sosial müdafiə orqanlarına təqdim olunması.
Sosial məsələlər üzrə hüquq klinikasında əhalinin həssas təbəqələrinə pulsuz hüquqi yardım xidməti göstəriləcək. Klinikaya iyun ayının 1-dən etibarən müraciət edilə bilər.
Əhalinin həsas təbəqələrinin Klinikada qəbul günləri həftənin II və V günləri, saat 15-00-dan 18-00-dək həyata keçiriləcək.
Klinikanın ünvanı: Bakı şəhəri, Süleyman Rüstəm küç. 33/93
Əlaqə telefonları: mob: 055 612 85 45, 012 449 96 67

Azərbaycan Mətbuat Şurasının (MŞ) sədri, Milli Məclisin deputatı Əflatun Amaşov mədəniyyət və turizm naziri Əbülfəs Qarayevlə görüşüb.

Mətbuat Şurasından verilən məlumata görə, Mədəniyyət və Turizm Nazirliyində keçirilmiş görüşdə nazir Ə.Qarayev MŞ sədrini 60 yaşının tamam olması münasibətilə təbrik edərək, ən xoş arzularını çatdırıb. Nazir bildirib ki, rəhbərlik etdiyi dövlət qurumu mətbuat orqanları ilə əməkdaşlığa hər zaman böyük önəm verir, mədəni irsimizin, incəsənətimizin, ölkəmizin turizm imkanlarının təbliğində, dünyaya tanıdılmasında medianın rolunu yüksək qiymətləndirir. Nazirliyin mövcud xüsusda Mətbuat Şurası ilə əlaqələrindən, birgə layihələrinin cəmiyyət üçün faydalı tərəflərindən söz açan Ə.Qarayev vurğulayıb ki, Azərbaycan jurnalistikasının inkişafında, peşəkarlıq səviyyəsinin artmasında Şuranın müstəsna rolu var.

“2015-ci ildə Milli Məclisin üzvü seçildikdən sonra Azərbaycan mətbuatının inkişafına xidmət edən prioritet məsələlərin parlamentdə gündəmə gətirilməsi ilə bağlı təşəbbüsləriniz, qanunverici orqanda aktual mövzu və problemlərlə bağlı çıxışlarınız təqdirəlayiqdir. Azərbaycan-Gürcüstan parlamentlərarası əlaqələr üzrə işçi qrupun rəhbəri kimi fəaliyyətiniz də məmnunluq doğurur. Hər dəfə Gürcüstana səfər edərkən orada yaşayan soydaşlarımızın problemləri ilə maraqlanır, qonşu ölkədəki tarixi-mədəni irsimizin qorunması və bərpası ilə bağlı narahatlığınızı dilə gətirir, rəsmi qurumlarla səmərəli görüşlər keçirirsiniz”, – deyən Ə.Qarayev əlavə edib ki, MŞ sədri 30 ildən artıq müddətdə Azərbaycanda mətbu və ictimai fikrin, jurnalistikanın inkişafına xidmət etməklə mənalı ömür yolu keçib: “Ulu öndər Heydər Əliyevin əsasını qoyduğu, bu gün möhtərəm Prezident İlham Əliyevin uğurla davam etdirdiyi dövlətçilik xəttinin sadiq yolçusu kimi üzərinizə düşən vəzifələrin öhdəsindən layiqincə gəlirsiniz. 14 ildir Azərbaycan Mətbuat Şurasının sədri olaraq milli mətbuata, azad sözün, fikir plüralizminin daha da möhkəmləndirilməsinə töhfənizi verirsiniz”.

Ə.Qarayev ölkə mədəniyyətinin təbliği sahəsində xidmətlərinə görə Ə.Amaşova Mədəniyyət və Turizm Nazirliyinin “Fəxri mədəniyyət işçisi” döş nişanını təqdim edib. Nazir sonda Mədəniyyət və Turizm Nazirliyinin kollektivi adından bir daha Ə.Amaşovu 60 illik yubiley münasibətilə təbrik edərək, ona möhkəm cansağlığı, uzun ömür, işlərində yeni-yeni uğurlar arzulayıb.

Ə.Amaşov ona göstərilən yüksək ehtirama görə nazir Ə.Qarayev başda olmaqla Mədəniyyət və Turizm Nazirliyinin kollektivinə minnətdarlığını bildirib. Qeyd edib ki, bundan sonra da ölkəmizin ictimai, siyasi, mədəni və digər sahələrin təbliği istiqamətində yorulmadan fəaliyyət göstərəcək.

Görüşdə Gürcüstanın müxtəlif bölgələrində Azərbaycanın mədəni irsini yaşadan abidələr, muzeylər ətrafında fikir mübadiləsi aparılıb, onların qayğıları dilə gətirilib, problemlərin aradan qaldırılması mümkün yolları müəyyənləşdirilib. Tbilisi Azərbaycan Teatrının və Cəlil Məmmədquluzadənin Ev-muzeyinin təmiri və bərpası məsələləri xüsusi vurğulanıb.

Trend

“Yeni Üfüq” Mənəvi İrsin Təbliği İctimai Birliyi “İslam Həmrəyliyi – Azərbaycan nümunəsi” adlı silsilə tədbirlərini uğurla davam etdirir.
Birlik Bakıda fəaliyyət göstərən ictimai fəal xanımlarla görüş keçirib.
Tədbirin əhəmiyyəti barədə danışan təşkilatın sədri Sevinc Əzimbəyli bildirib ki, Azərbaycanda 2017-ci ilin “İslam Həmrəyliyi ili” elan edilməsi çox əlamətdar hadisədir: “Azərbaycanın tolerant ənənələri ilə dünyada tanınması və bu il “İslam Həmrəyliyi ili” kimi elan olunması milli və mənəvi dəyərlərimizin birbaşa dövlət başçısı tərəfindən himayə olunmasına bir daha əyani sübutdur. Bu, həmçinin ölkəmizdə İslam həmrəyliyinin qorunması, sabitliyin və əmin-amanlığın davamlı zəmanətidir. Həmrəylik mədəniyyətlərin və sivilizasiyaların dialoqunun ən yüksək zirvəsi kimi qəbul olunur və Azərbaycan bunu dünyaya bir daha bəyan etdi”. S. Əzimbəyli qeyd edib ki, islam həmrəyliyi dünyaya sülh və barışı təlqin edir: “Elə bu baxımdan birlik və bərabərliyimizin qorunmasında İslam peyğəmbəri Həzrəti Məhəmmədin əxlaq nümunəsi hər birimizə ibrət olmalıdır”.
Tədbirin sonunda mübarək şəhidlərin əziz ruhuna dualar oxunub, ehsan süfrəsi açılıb.

Tərəqqi Sosial İnkişaf İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Əhali arasında tibbi maarifləndirmə işinin təşkili və əhaliyə tibbi-psixoloji yardımların göstərilməsi” layihəsinin icrasını uğurla davam etdirir.
3 ay müddətində icra olunacaq layihənin əsas məqsədi müharibə şəraitində yaşayan əhalinin tibbi maarifləndirilməsi, onlara tibbi və psixoloji yardımların göstərilməsindən ibarətdir. Layihə çərçivəsində Birliyin Ağdam rayonundakı ofisində tədbir keçirilib.
Tədbirdə təşkilatın sədri Telman Dadaşov Birliyin fəaliyyəti haqqında ətraflı məlumat verib, layihənin məqsəd və mahiyyətindən bəhs edib. İştirakçılara ilk tibbi yardım barədə ətraflı söhbət açılıb, tibbi yöndə tövsiyələr verilib.
Daha sonra mövzu ətrafında müzakirələr aparılıb, iştirakçıların sualları cavablandırılıb.
Tədbirin yekununda Birliyin sədri T.Dadaşov Azərbaycan Respublikasının Prezidenti yanında Qeyri-Hökumət Təşkilatlarına Dəstəyi Şurasına layihəni dəstəklədiyinə görə təşəkkürünü bildirib.

Bildiyimiz kimi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası aprelin 11-də 2017-ci ildə 2-ci qrant müsabiqəsinin mövzu, qayda və şərtlərini elan edib. Şura hər zaman QHT-lərin cəmiyyətin inkişafı üçün xüsusi əhəmiyyət kəsb edən, ictimai aktuallıq dərəcəsi yüksək olan alternativ ideyalarına,  innovativ təşəbbüslərinə söykənən layihələrini maliyyələşdirməyə üstünlük verib. Bu dəfəki müsabiqə də yuxarıda qeyd olunan meyarlardan nəinki istisna deyil, əksinə xüsusi ilə spesfik səciyyə daşıyır. Şuranın budəfəki müsabiqəsi Azərbaycan Respublikasının qeyri-hökumət təşkilatlarına dövlət dəstəyi Konsepsiyasına uyğun olaraq 14 mövzunu əhatə edir. 2017-ci ildə 2-ci qrant müsabiqəsi analoji müsabiqələrdən mövzuların hədəfə istiqamətlənməsi baxımından daha da konkretliyi ilə seçilir.
Müsabiqə mövzularının Şuranın elektron resurslarında yerləşdirilməsinə və sosial şəbəkələrdə xeyli paylaşılmasına baxmayaraq onların hər biri haqqında ayrılıqda  ətraflı izahat verilməsinin faydalı olduğunu düşünürük.  İlk olaraq bunu qeyd edim ki, Şura mövzuya daha innovativ yanaşan, ölçülə bilən nəticənin əldə olunmasına indekslənən QHT layihələrinə üstünlük verəcək.
Müsabiqənin ilk mövzusu “Ermənistan tərəfindən Azərbaycanın işğal olunmuş ərazilərində qanunsuz məskunlaşma, təbii sərvətlərin qanunsuz istismarı, qanunsuz iqtisadi fəaliyyət, tarixi abidələrin dağıdılması və özgəninkiləşdirilməsi, yer adlarının qanunsuz dəyişdirilməsi, ətraf mühitə vurulan ziyan barədə beynəlxalq ictimaiyyətin məlumatlandırılması” adlanır.
Məlum olduğu kimi, Ermənistanın da 1993-cü ildə qoşulduğu 12 avqust 1949-cu il tarixli Mülki Əhalinin Müharibə Zamanı Müdafiəsinə aid Dördüncü Cenevrə Konvensiyası və ona əlavə Protokollar işğal altındakı ərazilərdə məskunlaşdırmanı qadağan edir. Ancaq təəssüflər olsun ki, Ermənistan-Azərbaycan, Dağlıq Qarabağ münaqişəsinin başladığı ilk dövrlərdən bədnam qonşumuz zəbt etdiyi torpaqlarımızda qanunsuz olaraq məskunlaşdırma siyasəti həyata keçirir. İşğal olunmuş ərazilərimizdə qanunsuz məskunlaşma faktları ilə bağlı indiyədək müxtəlif beynəlxalq təşkilatların və media qurumlarının hesabatları mövcuddur. BBC-nin əməkdaşı Reda El Mavinin 2015-ci ildə Ermənistanın işğalı altında olan Azərbaycan ərazilərindən hazırladığı reportajda Suriyadakı vətəndaş müharibədən qaçaraq Ermənistana gələn 15 mindən artıq erməninin Ermənistanın şəhərlərində, habelə işğal altında olan Azərbaycan torpaqlarında yerləşdirildiyi bildirilir. Digər bir məlumatda görə isə Ermənistanın cinayətkar rəhbərliyi Suriyadan qaçqın düşən 2700 nəfərdən çox şəxsi işğal altında saxladığı Qarabağ ərazilərində məskunlaşdırıb. QHT-lər tərəfindən araşdırmalar aparılaraq bu tipli faktların daha çox və əsaslı şəkildə aşkara çıxarılması, hesabatların hazırlanması, media vasitəsi ilə və toplantılar keçirərək beynəlxalq aləmdə yaymaqla Ermənistanın ifşa olunması üçün istifadə olunması lazımdır.
Bu mövzu üzrə digər mühüm istiqamət isə  hələ Sovet hakimiyyəti illərindən Ermənistanın ərazisindəki türk mənşəli toponimikanın erməni adları ilə əvəzlənməsi üçün həyata keçirdiyi fəaliyyətlə bağlıdır. Ermənistanda daşnakların hakimiyyəti dövründən 1935-ci ilədək 195 yaşayış məntəqəsinin adları dəyişdirilərək erməniləşdirilib. 1935-ci ildən 1988-ci ilədək isə Ermənistan ərazisində 521 türkmənşəli yaşayış məntəqəsinin adı dəyişdirilib. Təkcə 1935-1988-ci illərdə 2500-dən çox tarixi yer adı Ermənistan tərəfindən dəyişikliyə məruz qalmışdır. Məlumata görə Ermənistan türk mənşəli adlar daşıyan yaşayış məntəqələrinin adlarının dəyişdirilməsi prosesini 2008-ci ildə başa çatdırıb. Azərbaycan tarixinin və mədəniyyətinin vacib göstəricilərindən olan toponimlərin dəyişdirilərək saxta erməni adları ilə edilməsi faktları ilə bağlı QHT-lər araşdırmalar aparmalı və mövzunun adında da qeyd olunduğu kimi beynəlxalq ictimaiyyət problem haqqında innovativ yanaşmalarla məlumatlandırılmalıdır. Bunun üçün QHT-lər adıçəkilən mövzuyla bağlı sosial çarxların, hesabatların hazırlanması, kitab və məqalələrin nəşri kimi layihə təklifləri ilə çıxış etməlidirlər.
2-ci mövzu – Beynəlxalq informasiya resurslarında Azərbaycan haqqında məlumatların monitorinqi və aşkarlanan nöqsanların aradan qaldırılmasına  dair təşəbbüslər
Bildiyimiz kimi mütəmadi olaraq Ermənistan,  erməni diasporu və bir çox antiazərbaycan dairələr tərəfindən beynəlxalq informasiya axtarış şəbəkələrində (Google, Yahoo,Google Maps, MSN Search (Bing), Yandex və s. ) və sosial şəbəkələrdə (tvitter, feysbuq, instaqram, linkedin və s.) Azərbaycanın ərazisi, tarixi, mədəniyyəti, incəsənəti, toponimikası, dövlət rəmzləri, tarixi şəxsiyyətləri, ərazi vahidləri, hərbi, iqtisadi potensialı, müasir inkişafı  və s. haqqında məlumatlar saxtalaşdırılaraq yüz milyonlarla izləyiciyə təqdim olunur. QHT-lər bu mövzu ilə bağlı araşdırmaları apararaq təhrifləri müəyyən etməli, müvafiq informasiya resurslarına davamlı müraciətlər edərək ölkəmizlə bağlı obyektiv informasiyaların yayımlanmasını təmin etməyə çalışmalıdırlar. Eyni zamanda QHT-lər bloqqer qrupların yaradılmasını, onların milli hədəflərə istiqamətlənən yazırlarla çıxış etməsini təşviq etməlidirlər. Şura qeyd olunan istiqamət üzrə daxil olacaq layihələrə üstünlük verəcək.
3-cü mövzu – Əsir və itkin düşmüş,  girov götürülmüş,  o cümlədən müharibədən zərər çəkmiş vətəndaşların hüquqlarının beynəlxalq təşkilatlarda  müdafiəsinə,  onların azad olunmasına və hüquqlarının bərpasına  dair təşəbbüslər
Azərbaycan Respublikası Əsir və itkin düşmüş, girov götürülmüş vətəndaşlarla əlaqədar Dövlət Komissiyasının məlumatına görə Ermənistan-Azərbaycan, Dağlıq Qarabağ münaqişəsi başlayandan 3868 şəxs vətəndaşımız itkin düşüb. Ötən dövr ərzində 1437 şəxs əsir və girovluqdan azad olunub. Beynəlxalq Qızıl Xaş Komitəsinin qeydiyyatından keçən azərbaycanlı itkin şəxslərin sayı 3773 nəfərdir.
2014-cü il iyulun 11-də Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcər rayonunda doğma yurdlarını ziyarət etmək istəyərkən Ermənistan silahlı qüvvələri tərəfindən girov götürülüb, Azərbaycan vətəndaşı Həsən Həsənovisə öldürülüb. İşğal altında olan Azərbaycan ərazisində – Dağlıq Qarabağda Dilqəm Əsgərov və Şahbaz Quliyev üzərində “məhkəmə” tamaşası qurulub. Dilqəm Əsgərov ömürlük, Şahbaz Quliyev isə 22 il müddətinə azadlıqdan məhrum edilmə cəzasına məhkum olunub. Bu beynəlxalq hüquq normalarının kobud şəkildə pozulmasıdır.
 QHT-lər beynəlxalq təşkilatların diqqətini əsasən bu iki şəxsin girov götürülməsi faktına yönəltməli və onların simasında girovların hüquqlarının müdafiəsi ilə bağlı həyata keçirilən dövlət siyasətinə dəstək xarakterli layihələrlə müraciət etməlidirlər. Məsələn QHT-lər dünyanın müxtəlif ölkələrində, xüsusi ilə Avropanın siyasi mərkəzlərində (Brüssel, Strasburq, Vyana, Cenevrə və s.) Dilqəm Əsgərov və Şahbaz Quliyevin azad olunması tələbi ilə aksiyaların keçirilməsini, həmçinin onların hüquqlarının kobud şəkildə pozulması ilə bağlı xarici ölkələrin media orqanlarında yazıların yayımlanmasını təşkil etməlidirlər.
4-cü mövzu – Xocalı soyqırımının 25 illiyi ilə bağlı  beynəlxalq ictimaiyyətin məlumatlandırılması
1992-ci ilin 26 fevralında törədilmiş  Xocalı soyqırımının 25 illiyi bildiyimiz kimi dövlət səviyyəsində qeyd olunub. Ancaq QHT-lər 2017-ci ilin sonunadək bu istiqamətdə tədbirlərin təşkilini və beynəlxalq ictimaiyyətin soyqırımla bağlı məlumatlandırılmasını davam etdirməlidir.
QHT-lər Xocalı soyqırımı ilə bağlı dünyanın aparıcı xarici dillərində (ingilis, alman, rus, ispan, ərəb, fransız və s.) filmlər, sosial çarxlar hazırlamalı, müxtəlif ölkələrin nüfuzlu mətbuat orqanlarında təhlil xarakterli məqalələrlə çıxış etməli, xarici  ölkələrin universitetlərində foto, kitab sərgiləri, film nümayişləri təşkil etməlidirlər.
5-ci mövzu – Aprel döyüşlərinin qəhrəmanlıq nümunələrinin təbliğinə dair təşəbbüslər
Bu mövzu istiqaməti üzrə QHT-lərdən aprel döyüşlərində şəhid olan, eləcə də döyüşlərdə iştirak edən silahlı qüvvələrimizin digər əsgər, gizir və zabitlərinin qəhrəmanlığının təbliği, həmçinin bu döyüşlərdə şəhid oan şəxslərin xatirələrinin əbədiləşdirilməsi istiqamətində layihələrin hazırlanması tövsiyə olunur. Layihələrin aprel döyüşlərində şəhid olan və  qəhrəmanlıq göstərmiş digər şəxslərlə bağlı kitabların çapı, filmlərin və sosial çarxların, xatirə lövhələrinin hazırlanması, anım tədbirlərinin təşkili və s. məsələlərə həsr olunması tövsiyə olunur.
6-cı mövzu – Cəbhəyanı bölgələrdə müvafiq tədbirlərin təşkilinə dair təşəbbüslər
QHT-lər bu mövzu istiqaməti üzrə cəbhəyanı bölgələrdə əhalinin ruh yüksəkliyinin artırılmasını, müxtəlif tədbirlərin, konsertlərin və idman yarışlarının təşkilini, kiçik sahibkarlığın stimullaşdırılmasını, təmas xəttinə yaxın ərazilərdə yaşayan əhalinin QHT-lərlə yaxından əməkdaşlığını özündə ehtiva edən layihələrlə çıxış etməlidirlər.
7-ci mövzu – Azərbaycanın ərazi bütövlüyünün bərpası uğrunda şəhid olmuş vətəndaşlarımızın  xatirəsinə həsr olunmuş təşəbbüslər
Bildiyimiz kimi ötən 29 ildə ərazi bütövlüyümüzün qorunması uğrunda minlərlə vətəndaşımız qəhrəmanlıqla şəhid olub. Bu mövzu  üzrə 5-ci istiqamətdə olduğu kimi şəhidlərimizin adlarının ədəbiləşdirilməsi üçün tədbirlərin təşkili nəzərdə tutulub. QHT-lərin bu istiqamət üzrə şəhidlərimizin anım günlərinin təşkili, filmlərin, sosial çarxların çəkilməsi, kitabların çap edilməsi və digər əlaqəli mövzularda innovativ layihələr təqdim etməsi tövsiyə olunur.
8-ci mövzu – Milli maraqlara, vətənpərvərliyə və ictimai həyatın aktual sahələrinə dair sosial çarxların və 3D qrafikalı animasiya filmlərinin hazırlanmasına  dair təşəbbüslər
Hazırda informasiya savaşında tətbiq olunan ən effektiv vasitələrdən biri sosial çarxlar və 3 D qrafikalı filmlərin hazırlanaraq yayımlanmasıdır. Məlum olduğu kimi, Ermənistan ölkəmizə qarşı bütün sahələrdə təxribat, böhtan və saxtakarlığa əsaslanan informasiya savaşı aparır.  Azərbaycan haqqında böhtan xarakterli media kontentlər hazırlayaraq (karikaturalar, video çarxlar, qısametrajlı filmlər və s.) kütləvi informasiya vasitələrində və sosial şəbəkələrdə yayırlar. Yalnız sosial şəbəkələrdəki kiçik qruplar deyil, həm də düşmən ölkənin tanınmış saytları ön cəbhədəki son döyüşlərin nəticəsi ilə bağlı faktları Ermənistanın xeyrinə dəyişmək məqsədi ilə digər döyüşlərdən olan video kadrları paylaşaraq Azərbaycanın hərbi uğurlarına kölgə salmağa çalışırlar. Misal üçün 2014-cü ildə Ermənistan tərəfindən hazırlanmış “sənədli” film “Фальсификация истории: Азербайджан” http://www.yerkramas.org/article/86753/%C2%ABfalsifikaciya-istorii-azerbajdzhan%C2%BB-%C2%ABThe-History-Falsifiers–Azerbaijan%C2%BB, https://www.kinopoisk.ru/film/840632/ filmində bir neçə xarici “mütəxəssis”in iştirakı ilə Azərbaycan tarixi təhrif olunaraq yalan məlumatlar kimi təqdim olunur.
Xüsusi ilə  2016-cı ilin aprel döyüşlərindən sonra bu tendensiya daha da geniş vüsət alıb. Həmçinin NewsArmenia, PanArmenian, News.am və digər saytlarda davamlı olaraq paylaşılan materiallar buna misaldır: В сети появилось видео уничтожения карабахскими ПВО новейшего беспилотника из ЗРК “Оса” (17 aprel 2016): http://newsarmenia.am/news/nagorno_karabakh/v-seti-poyavilos-video-unichtozheniya-karabakhskimi-pvo-noveyshego-bespilotnika-iz-zrk-osa/?sphrase_id=15052.
QHT-lərimiz bu mövzu istiqaməti üzrə Azərbaycanın milli maraqlarının müdafiəsi ilə bağlı obyektiv məlumatlara söykənən analoji video materiallar hazırlayaraq mediada, xüsusi ilə sosial mediada yaymalıdırlar.
Bununla bərabər ölkənin ictimai həyatı üçün əhəmiyyətli olan digər mövzularda da video materialların hazırlanması vacibdir. Digər ölkələrin təcrübəsindən də görə bilərik ki, düzgün təşkil olunmuş sosial reklam (PSA — public service announcement) kampaniyaları vətəndaşların maarifləndirilməsi sahəsində effektli rol oynayır. Əsasən narkotiklərlə mübarizəyə, yol hərəkəti qaydalarına, sağlam həyat tərzinin və ətraf mühitin qorunmasının təbliğinə, ailə zorakılığının aradan qaldırılmasına və QİÇS-lə mübarizəyə həsr olunmuş bu cür kampaniyaların və onların əsas komponenti olan sosial çarxların pozitiv təsiri beynəlxalq təcrübədə təsdiq olunmuş faktdır.  Sadalanan istiqamətlər üzrə təklif olunan layihələrə Şura tərəfindən üstünlük veriləcək. Sosial çarxların və 3 D filmlərin televiziyalarla əməkdaşlıq çərçivəsində hazırlanması onların asan şəkildə efir həyatı qazanaraq böyük auditoriyalara çıxa bilməsi baxımından daha məqsədəuyğundur.
9-cu mövzu – Əhalinin həssas qruplarına psixoloji yardımların təşkili
Əhalinin həssas qruplarına ahıllar, işsizlər, çoxuşaqlı ailələr, qaçqınlar, həbsdən çıxmış şəxslər, əlilliyi olan şəxslər və digər bu kimi kateqoriyadan olan vətəndaşlar aiddir. Sosial-iqtisadi transformasiyalara uyğunlaşa bilməyən bu şəxslərin daimi olaraq cəmiyyətin dəstəyinə ehtiyacı olur. Onları düşünülməmiş,uyğunsuz hərəkətlərdən qoruyacaq effektiv alətlər kimi “etimad telefonunun” yaradılması, xüsusi psixoterapiya seanslarının, psixoloji məsləhət saatlarının təşkili, könüllülərin iştirakı ilə keçirilən müxtəlif növ  kampaniyaları və digər tədbirləri göstərmək olar. QHT-lərə peşəkar və təcrübəli kadrların cəlb edilməsi ilə psixoloji reabilitasiya üçün paytaxtda və regionlarda kursların təşkili, bu istiqamətdə təhlillərin aparılması və sorğuların keçirilməsi, problemin həlli ilə bağlı təkliflər paketinin hazırlanması və s. kimi məsələləri özündə ehtiva edən layihələrlə çıxış etməsi tövsiyə olunur.
10-cu mövzu – Sosial şəbəkələrdə milli və ictimai maraqların müdafiəsinə dair fəaliyyətin dəstəklənməsi
Müsabiqəyə bu mövzunun salınmasında əsas məqsəd sosial şəbəkələrdən fəal şəkildə istifadə edən vətəndaşların, xüsusi ilə gənclərimizin maarifləndirilməsi istiqamətində tədbirlərin təşkilidir. QHT-lərin bu istiqamətdə həyata keçirəcəyi layihələr sosial şəbəkələrdən istifadə edən şəxsləri milli maraqlara zidd hərəkətlərdən çəkindirməyə,  gənclər tərəfindən zərərli meyillərin, müxtəlif neqativ halların təbliğinin, təsdiqlənməmiş, yanlış mənbələrdən alınan məlumatların yayılmasının, sosial şəbəkələr vasitəsilə hərbi sirr hesab oluna biləcək informasiya, foto və video materialların, həmçinin saxta profillər vasitəsilə təhqir, böhtan xarakterli məlumatların paylaşılmasının qarşısının alınmasını hədəfləməlidir.
11-ci mövzu – İslam həmrəyliyinə həsr olunmuş tədbirlər
Bildiyimiz kimi Azərbaycan Respublikasının Prezidentinin 10 yanvar 2017-ci il tarixli sərəncamına əsasən Azərbaycanda 2017-ci il “İslam həmrəyliyi ili” elan olunub. “İslam həmrəyliyi ili” çərçivəsində dövlət qurumları və eləcə də ictimai qurumlar tərəfindən müxtəlif tədbirlər təşkil olunur. Şura dövlət siyasətinə uyğun olaraq bu mövzunu  priotet istiqamət kimi  müəyyən edib.QHT-lərin bu mövzu üzrə islamın terrorizmlə əlaqələndirilməsinə qarşı maarifləndirmə tədbirlərinin təşkili, ölkəmizin dünyada örnək olan modern müsəlman dövlət kimi həyata keçirdiyi sülhsevər, multikultral siyasətin təbliği, Azərbaycanda təhsil alan müsəlman ölkələrindən olan tələbələrlə əməkdaşlıq əlaqələrini genişləndirilməsi,  konfransların, seminarların, dəyirmi masaların, idman və mədəniyyət tədbirlərinin keçirilməsikimi layihə təklifləri ilə çıxış etməsi tövsiyə olunur.
12-ci mövzu – İctimai nəzarət və şəffaflıq məsələlərinə dair təşəbbüslər
Müsabiqədə bu mövzunun elan olunmasının əsas məqsədi ölkəmizdə ictimai nəzarət, hesabatlılıq və şəffaflıq məsələlərində QHT təşəbbüskarlığının artırılması və bu istiqamətdə tədbirlərin təşkilinə dəstək verilməsidir. Bu mövzu istiqamətini əsas götürərək QHT-lər  “İctimai iştirakçılıq” haqqında qanunun təbliği istiqamətində məlumatlandırma tədbirlərinin təşkili,  vətəndaşların müraciətləri haqqında Azərbaycan Respublikasının qanunlarının təbliğ olunması, elektron hökumət xidmətlərinin təbliği, Açıq hökumətin təşviqi ilə bağlı tədbirlərin təşkili və s. məsələlərlə bağlı layihələrlə çıxış etməsi tövsiyə olunur.
13-cü mövzu – Yol hərəkəti iştirakçıları arasında maarifləndirmə tədbirlərinin həyata keçirilməsinə dair təşəbbüslər
Hər il dünyada,  o cümlədən də ölkəmizdə yol-nəqliyyat qəzaları nəticəsində xeyli sayda insan xəsarət alır və dünyasını dəyişir.Bu statistikalar çox qorxuncdur. 2016-cı il ərzində ölkə üzrə 2006 yol nəqliyyat hadisəsi qeydə alınıb ki, nəticədə 759 nəfər həlak olub, 2003 nəfər isə yaralanıb.Ötən 28 il ərzində (1988-2016-cı illər) isə ölkəmizdə 73813 yol qəza hadisəsi və bunun nəticəsində 26 min 183 nəfərin həlak olması faktı qeydə alınıb. Belə hallara qarşı mübarizə aparmaq üçün QHT-lərin maraqlı və faydalı təşəbbüslərinə ehtiyac duyulur. QHT-lər bu istiqamət üzrə Şuraya yol hərəkətinin təşkili, yol polisi-sürücü-piyada münasibətlərinin tənzimlənməsi, sosial çarxların hazırlanması, yol hərəkəti qaydalarının təbliği ilə bağlı interaktiv təlimlərin keçirilməsi, baş vermiş qəzaların səbəbləri ilə bağlı monitorinqlərin və araşdırmaların aparılması, piyada keçidlərinin monitorinqi və piyadaların maarifləndirilməsi və s. mövzularda layihələr təqdim edə bilər.
14-cü mövzu – Məcburi əməyə və insan alverinə qarşı  mübarizəyə dair təşəbbüslər
Birləşmiş Millətlər Təşkilatının dünyada insan alverinin vəziyyətinə dair hesabatına görə  hər il dünyada  20 milyondan artıq şəxs insan alverinin qurbanına çevrilir.  Beynəlxalq Əmək Təşkilatının rəsmi məlumatına əsasən dünyada 12 milyondan çox insan məcburi əməyə cəlb olunur. Azərbaycanda məcburi əmək və insan alverinə qarşı məqsədyönlü dövlət siyasəti aparılır. Son illərdə müvafiq dövlət qurumlarının atdığı uğurlu addımlar nəticəsində işəgötürənlərin məsuliyyəti artmış və çalışan şəxslərlə əmək müqavilələrinin bağlanması və əmək şəraitinin yaxşılaşdırılması prosesi sürətləndirilmişdir. Lakin ölkəmizdə istər paytaxtda, istərsə də regionlarda məcburi əməyə cəlb olunmaqla bağlı məlumatlar mövcuddur. Xüsusən regionlarda valideynlərin uşaqlarını orta məktəblərdən yayındıraraq qanunsuz əməyə cəlb etməsi, iş vaxtının uzadılması və onun müqabilində heç bir ödənişin edilməməsi, vətəndaşlarımızın əmək müqaviləsi olmadan işləmələri və digər bu kimi məcburi əməyə cəlb olunma hallarına rast gəlinir. QHT-lərin  insan alveri ilə bağlı əhalinin məlumatsızlığının aradan qaldırılması, azyaşlı qızların məcburən ərə verilməsi, erkən nigahların yaratdığı fəsadlar,  qadınların məcburi cinsi istismarına qarşı mübarizəylə bağlı sosial çarxların, televiziya verlişlərinin hazırlanması, maarifləndirmə tədbirlərinin təşkil olunması ilə bağlı layihələrlə çıxış etməsi tövsiyə olunur.
Elməddin BEHBUD
Şuranın mətbuat və ictimaiyyətlə əlaqələr bölməsinin rəhbəri
Lent.az

Dünən “Ana Vətən” Niderland Azərbaycanlı Qadınlar Birliyinin üzvləri Niderland Krallığı Parlamentinin (Tweede Kamer) türk əsilli millət vəkilləri Tunahan Kuzu və Səlcuk Öztürklə görüşüblər. Görüş Parlament binasında baş tutub. Görüşdə Birliyin üzvləri və Rotterdam Erasmus universitetində təhsil alan 3 azərbaycanlı tələbə – Məhəmməd İbrahimov, Bayram Orucov və Mehrab Bağırlı iştirak edib. Görüş səmimi söhbət şəklində keçirilib. Öncə “Ana Vətən” Niderland Azərbaycanlı Qadınlar Birliyinin rəhbəri Mayisə Ağamirzəyeva onların hər ikisini keçən ay keçirilən Parlament seçkilərini qazanmaları və 3 nümayəndə ilə belə mötəbər məclisdə təmsil olunmaları münasibətilə təbrik edib və gələcək fəaliyyətlərində nailiyyətlər arzulayıb. Onların uğurlarına burada yaşayan bütün türk xalqlarının sevindiyini və onları dəstəklədiklərini qeyd edib. Qarşı tərəf də eyni zamanda azərbaycanlı diaspora üzvlərinin bu jestini yüksək qiymətləndirdiklərini və belə görüşlərin tez-tez keçirilməli olduğunu bildirib. Hər iki türk xalqının – Azərbaycan və Türkiyə insanlarının qərib ölkələrdə bir-birinə arxa-dayaq olmağının vacibliyindən danışıblar və birliyin uğurlu lobbiçilik fəaliyyəti üçün yardım gərəkirsə əllərindən gələni əsirgəməyəcəklərini bildiriblər. Görüş haqqında geniş məlumat verən birliyin sədri Mayisə Ağamirzəyeva belə münasibətlərin qurulmasının vacibliyindən danışıb: “İnformasiya üçün bildirmək istərdim ki, mart ayında Niderland Krallığında ölkə Parlametinə millət vəkillərinin seçkisi baş tutdu. Seçkidə ölkədə fəaliyyət göstərən bütün siyasi partiyaların namizədləri iştirak etdilər. Sevindirici haldır ki, seckidə türk əsilli 2 gənc liderin yeni yaratdığı DENK (Düşün) Partiyasından da 3 nəfər Milli Məclisdə yer almağa nail oldu. Onu da qeyd edək ki, DENK Partiyasının liderləri artıq bir neçə ildir ki, Hollandiya siyasətindədirlər və ölkənin aparıcı partiyalarından birində fəaliyyət göstəriblər. Seçkilərin başlamasına bir neçə ay qalmış isə öz partiyalarını yaratdılar və seçkilərə öz platformaları ilə qatıldılar. Qısa zaman ərzində təbliğat-təşviqat aparmalarına baxmayaraq, irəli sürdükləri namizədlər Parlamentə üzv seçilə bildi. Buna səbəb isə partiyanın Hollandiyada əhalinin sosial həyatına uyğun və ayrımçılığa qarşı fəaliyyət proqramı ilə çıxış etməsi idi. DENK-in platformasında əsas yeri Niderlandda yaşayan yabançıların-türk, mərakeş, indoneziyalı, surinamlı, hindli, çinli, afrikalı və s. 176 yabançı millətin nümayəndələrinin haqlarını müdafiə etmək tutur. Əlbəttə ki, Azərbaycan və Türkiyə qardaş ölkələr olduğu üçün qərib ölkələrdə də onların uğur və sevinclərinə də, kədər və uğursuzluqlarına da şərik oluruq. Ona görə də, birliyimiz adından Tunahan Kuzu və Səlcuk Öztürkü bu uğurları münasibətilə təbrik etməyi özümüzə borc bildik”. Görüşün sonunda Birliyin sədri DENK Partiyasının arxiv-muzeyinə “İrəvan xalçaları” adlı kitabı və Azərbaycan filmlərindən ibarət disklər toplusunu, eləcə də Azərbaycana aid suvenirləri xatirə hədiyyəsi verib. Görüş xoş bir dostluq abu-havasında başa catıb.

Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Tərəqqi Sosial İnkişaf İctimai Birliyi “Əhali arasında tibbi maarifləndirmə işinin təşkili və əhaliyə tibbi-psixoloji yardımların göstərilməsi” layihəsinin icrasına başlayıb.
3 ay müddətində icra olunacaq layihənin əsas məqsədi müharibə şəraitində yaşayan əhalinin tibbi maarifləndirilməsi, onlara tibbi və psixoloji yardımların göstərilməsindən ibarətdir. Layihə çərçivəsində Ağdam və Tərtər rayonlarının cəbhəyani ərazilərində yaşayan əhali və müvəqqəti məskunlaşan qaçqın və məcburi köçkünlərə tibbi və psixoloji yardımlar göstəriləcək, Tərtər rayonunda hərbi xidmətə gedəcək oğlanlar, Ağdam rayonunda evdar xanımlar üçün  ilk tibbi yardım kursları təşkil ediləcək, cəbhəyanı ərazidən olan gənc qadınlara tibbi yöndə tövsiyələr veriləcək.
Layihədən əsas faydalananlar cəbhəyanı bölgəlrdə yaşayan yerli və məcburi köçkün əhali, hərbi xidmət yaşlı gənc oğlanlar və evdar xanımlar olacaq. İlk tibbi yardım kursunu bitirənlərə sertifikatlar və ilk tibbi yardım çantaları veriləcək.

“Müasir İnkişaf” İctimai Birliyinin təşkilatçılığı ilə AMEA Mərkəzi Elmi Kitabxanasında “Azərbaycan Milli Kimliyinin formalaşması və müasir vəziyyəti” başlıqlı tədbir keçirildi. Tədbirdə eyni zamanda “Azərbaycan Milli Kimliyi” kitabının təqdimatı oldu.

“Müasir İnkişaf” İctimai Birliyinin İdarə Heyətinin sədri, AMEA-nın əməkdaşı Mübariz Göyüşlü bildirdi ki, 12 yaşını tamamlayan təşkilatın fəaliyyətinin böyük bir qismi milli kimlik mövzusunun araşdırılmasına həsr olunub. O, deyib ki, cəmiyyətdə milli-mənəvi dəyərlərimizə, tarixi şəxsiyyətlərimizə, soykökümüzə qarşı olan hücumlar mövzunun bu gün üçün də çox aktual olduğunu göstərir. M.Göyüşlü 2013-cü ildə “Milli-Mənəvi Dəyərlər və Milli Kimlik” layihəsini icra etdiklərini, yekunda “Azərbaycan Milli Kimliyi” kitabını ərsəyə gətirdiklərini vurğuladı. O, kitabdakı məqalələrdən bəhs etdi. M.Göyüşlü müəyyən nöqsanlara baxmayaraq ortaya qoyulmuş bu nəşrlə ciddi nəticə əldə etdiklərini açıqladı. O, bundan sonra da bu istiqamətdə geniş çalışmalar həyata keçirmək niyyətində olduqlarını dedi. Çıxışçı bu mövzuya həsr olunmuş ayrıca bir saytın yaradılmasını nəzərdə tutuduqlarını dedi. Onun sözlərinə görə təşkilatın tərkibində fəlsəfə doktoru Aqil Eyvazovun rəhbərliyi altında “Milli Kimlik” Araşdırma Mərkəzinin yaradılıb. M.Göyüşlü həmin mərkəzin təşkilatçılığı ilə müzakirələrin ictimai, elmi, ideoloji istiqamətdə olacağını vurğuladı. Çıxışçı eyni zamanda bu istiqamətdə çalışan dövlət qurumlarına da yaxından kömək etməyə hazır olduqlarını söylədi.

“Azərbaycan Milli Kimliyi” kitabında Nadir şah Əfşarla bağlı məqalənin müəllifi, AMEA Tarix İnstitutunun şöbə müdiri, fəlsəfə doktoru Hacı Həsənov akademik İqrar Əliyev haqqında müsbət fikirlər söylədi. O, Nadir şah Əfşarın timsalında nümunə göstərərərk insanlarımızın əksər tarixi şəxsiyyətlərimizi tanımamasını təəssüflə qeyd etdi. H.Həsənov məhz bu səbəbdən təklif edib ki, milli kimlik mövzusunda daha geniş müzakirələr aparılsın. Tarixçi milli məsələlərdə, dövlətçilik istiqamətində geniş fəaliyyətin tərəfdarı olduğunu açıqladı.

“Azərbaycan Milli Kimliyi” kitabında ümummilli lider Heydər Əliyevlə bağlı məqalənin müəllifi, Sənaye və İnnovasiyalar üzrə Bakı Dövlət Peşə Təhsil Mərkəzinin direktoru Yusif Alıyev milli kimliyimizə kənardan çox müdaxilələr olduğunu söylədi. Onun sözlərinə görə nəşrdə ziyalıların milli kimliyimizə baxışı əks olunub. O, bildirib ki, Heydər Əliyevlə bağlı məqaləni hazırlayarkən arxivlərdə çox maraqlı faktlarla rastlaşıb və bunları məqalədə əks etdirib. Y.Alıyev ümummilli liderin milli-mənəvi dəyərlərin qorunması istiqamətində gördüyü işlərdən danışıb.

“Azərbaycan Milli Kimliyi” kitabında Şirvanşahlar haqqında məqalənin müəllifi, AMEA Tarix İnstitutunun əməkdaşı Dilavər Əzimli bildirdi ki, Azərbaycan tarixini qalib dövlətlər yazdığı üçün milli kimlik məsələsinə ciddi zərbə vuruldu. Avropalının öz dini kitablarını təhqir etmədiyini diqqətə çatdıran D.Əzimli bizdə dini kitabın, o cümlədən tarixi şəxsiyyətlərimizin, dəyərlərimizin təhqir edilməsindən narazılığını büruzə verdi. O, tarixi və coğrafi təfəkkürün milli kimlikdə birləşdiyini söylədi. Tarixçi, Şirvanşahların dini həyatından bəhs edərək dini tolerantlığın yüksək səviyyədə təmin olunduğunu açıqladı. O, milli kimlik mövzusunun davam etdirilməsinin tərəfdarı kimi çıxış etdi.

Bakı Beynəlxalq Multikulturalizm Mərkəzinin mətbuat xidmətinin rəhbəri Yadigar Məmmədli bildirdi ki, bu cür müzakirələrin daha müntəzəm şəkildə keçirilməsinin tərəfdarıdır. Y.Məmmədli multikulturalizm haqqında danışaraq təmsil etdiyi qurumun gördüyü işlərdən bəhs etdi. O, azərbaycançılıq, azərbaycanlı kimi anlayışlarından söz açdı. Çıxışçı azərbaycanlı anlayışının Azərbaycanda yaşayan hər kəsi birləşdirdiyini vurğuladı və bunun reallaşdırılmasında Heydər Əliyevin rolundan bəhs etdi. Y.Məmmədli Multikulturalizm Mərkəzinin hazırladığı “Azərbaycan multikulturalizminin ədəbi-bədii qaynaqları” kitabı haqqında danışdı.

“Azərbaycan Milli Kimliyi” kitabındakı Azərbaycan ziyalılarının Rusiya müsəlmanlarının birliyi ilə bağlı gördüyü işlərlə bağlı məqalənin müəllifi, AMEA Fəlsəfə İnstitutunun əməkdaşı Yasəmən Qaraqoyunlu bildirdi ki, gələcəkdə nəzəri araşdırmalardan ibarət vahid bir kitab hazırlanmalıdır. Dünyada bu istiqamətdə çoxsaylı araşdırmaların aparıldığını deyən Y.Qaraqoyunlu qeyd etdi ki, milli kimliyi təşkil edən ünsürlər sistemli şəkildə işlənməlidir. O, təklif etdi ki, gələcəkdə həmin araşdırmanın hər fəsli bir araşdırmaçı tərəfindən işlənilsin: “Məsələn, “Milli kimlik və mədəniyyət”, “Milli kimlik və dil” və s. istiqamətdə çalışmalar aparılmalıdır”.

“Azərbaycan Milli Kimliyi” kitabında Babəklə bağlı məqalənin müəllifi, “Oğuz” müstəqil araşdırmaçılar qrupunun üzvü Ceyhun Bayramlı bildirdi ki, türk xalqları lokal milli təşəkkül tapmadıqca birlik qurmaq imkanları çətin olacaq. O, sovet imperiyasının milli kimliyimizə vurduğu zərbələrdən danışdı. C.Bayramlı azərbaycançılıq və türklük məsələlərinin bir-birinə qarşı qoulmasına etiraz edərək bunun məqsədli şəkildə həyata keçirildiyini vurğuladı. Onun sözlərinə görə etnik kimlik, dini kimlik, vətən kimliyi birləşərək milli kimliyi təşkil edir: “Burada milli-mənəvi dəyərlər mühüm amil təşkil edir”. C.Bayramlı hesab edir ki, şəxsiyyətlərin deyil ideyaların müzakirəsinə üstünlük vermək lazımdır. C.Bayramlı kitabda Babəki hökmdar kimi təqdim etdiyini və bununla bağlı bir sıra faktları əks etdirdiyini dedi.

Azərbaycan Kikboksinq Federasiyasının vitse-prezidenti, iş adamı Arzuman Abdulkərimov bildirdi ki, ilk dəfə 1987-1988-ci illərdə milli kimliklə, soykökümüzlə bağlı məsələlərlə maraqlanıb. O, daim türk-islam dəyərlərinə üstünlük verdiyini vurğuladı. A.Abdulkərimov görülən işlərin geniş şəkildə təqdim edilməsinə ehtiyac olduğunu qeyd etdi. O, türklüyə qarşı son dövrlərdə edilən hücumlardan narazılığını gizlətməyərək bunları qanyıb.

“Birlik” jurnalının redaktoru İlqar İlkin türklüklə bağlı gördükləri işlərdən danışaraq bu istiqamətdə sıxıntı yaşamadıqlarını açıqladı. O, Gürcüstanda qarapapaq türkləri adı altında görülən çalışmalardan narazılığını dilə gətirdi. İ.İlkin Gürcüstanda azərbaycanlılarla bağlı görülən bir sıra işlərdən də bəhs edib. Redaktor tarixi şəxsiyyətlərimizə olan münasibətdən bəhs edərək onları daha çox təbliğ etməli olduğumuzu vurğuladı.

Türkiyənin Karabük Universitetinin dosenti Ali Asker bildirdi ki, türklük məsələsi, türklərin problemi dünyanın hər yerində aktual bir mövzudur. O, Türkiyədə məzhəb və din amilinin türklüyə qarşı qoyulmasının yaratdığı çətinliklərdən bəhs etdi. O, milli kimliyin, türklüyün genetik mövzu olmasından daha çox bir ruh məsələsi olduğunu qeyd etdi. A.Asker Gürcüstandakı türklərlə bağlı həyata keçirdikləri araşdırmalardan, nəşr etdikləri kitabdan danışdı. O, Gürcüstanda demokratikləşmə prosesinin getdiyini, lakin bunun altında eyni zamanda gürcü millətçiliyinin olduğunu söylədi.

Tarix üzrə fəlsəfə doktoru Abbas Qurbanov bildirdi ki, millətin, dövlətin öz kökünü quracağı dörd əsas sütun var: “Bunlar tarix, mədəniyyət, dil-ədəbiyyat, inancdır. Bunları bir-birinə qarşı qoymaq düzgün deyil. Bu gün minlərlə əsgərimiz var, amma Mübariz İbrahimov olması üçün dördüncü ayaqdan qidalanma olmalıdır”.

Sosioloq Əhməd Qəşəmoğlu türklüyü islam dini olmadan təsəvvür etmədiyini açıqladı. O, sufizmdən bəhs edərək bu istiqamətdə konkret misallar çəkdi: “Həyatda imanla idrak yanaşı olmalıdır. İman idraksız olanda cəhalət baş verir, idrakın yanından iman çəkiləndə vəhşilik başlayır. Bunlar bir-birini tamamlayanda ahəng yaranır”.

Bakı Slavyan Universitetinin dosenti Dürdanə Tahirli elmi çalışmalarla yanaşı tariximizi, tarixi şəxsiyyətlərimizi geniş kütləyə sevdirmək üçün təkliflərlə çıxış etdi.

“Milli Kimlik” Araşdırma Mərkəzinin rəhbəri, fəlsəfə doktoru Aqil Eyvazov gələcək fəaliyyətlərdən bəhs etdi. O, tarixi şəxsiyyətlərimizi, tariximizi geniş kütləyə sevdirməyə çalışacaqlarını, bu istiqamətdə çalışmalar həyata keçirəcəklərini vurğuladı.

Bu gün Ali Məhkəmədə “ANS ÇM Yayım və Media” və “ANS Müstəqil Yayım və Media” şirkətlərinin Bakı Apellyasiya Məhkəməsinin qərarlarından verdiyi kasasiya şikayətlərinə baxılıb. Müvafiq olaraq hakimlər Kəmaləddin Bədəlov və Azər Hüseynovun sədrliyi ilə keçirilən proseslərdə Bakı Apellyasiya Məhkəməsinin qərarları qüvvədə saxlanıb, ANS-in şikayətləri təmin edilməyib.

Qeyd edək ki, Milli Televiziya və Radio Şurasının (MTRŞ) 18 iyulda keçirilmiş iclasında “Televiziya və radio yayımı haqqında” Azərbaycan Respublikası Qanununun 23.2.8-ci maddəsinin tələbinə uyğun olaraq “ANS ÇM Yayım və Media” Şirkətinə 25 oktyabr 2013-cü il tarixdə verilmiş TR 100 saylı xüsusi razılığın (lisenziyanın) qüvvəsinə xitam verilməsi barədə qərar qəbul edilib. Yayım zamanı bir neçə dəfə qanunvericiliyin tələblərinin pozulması halları əsas götürülərək ANS ÇM radiosunun xüsusi razılığı (lisenziya) ləğv olunub. “ANS ÇM Yayım və Media” Şirkəti qərardan 1 saylı Bakı İnzibati-İqtisad Məhkəməsinə şikayət verib, şikayət təmin edilməyib.

Xatırladaq ki, MTRŞ Türkiyə ilə Azərbaycan arasında strateji tərəfdaşlıq münasibətlərinin pozulmasına yönəlmiş təxribatın qarşısını almaq, açıq şəkildə terrorizmin təbliğatına yol verməmək məqsədilə, Azərbaycan respublikası Baş Prokurorluğunun 18 iyul 2016-cı il tarixli müraciətini, “Televiziya və radio yayımı haqqında” Azərbaycan Respublikası Qanununun 11, 23, 32-ci maddələrinin tələblərini rəhbər tutaraq “ANS Müstəqil Yayım və Media” Şirkətinin yayımının 18 iyul 2016-cı il tarixdən saat 18.30-dan etibarən dayandırılması barədə qərar qəbul edib. ANS MTRŞ-nin bu qərarından 1 saylı Bakı İnzibati-İqtisad Məhkəməsinə şikayət verib. ANS-in şikayəti təmin edilməyib. Bakı Apellyasiya Məhkəməsində “ANS Müstəqil Yayım və Media” Şirkətinin 1 saylı Bakı İnzibati-İqtisad Məhkəməsinin qərarından verdiyi şikayətə baxılıb, şikayət təmin olunmayıb.

İctimai Televiziya və Radio Yayımları Şirkətinin baş direktoru Cəmil Quliyev səlahiyyət müddətinin başa çatması ilə əlaqədar bu vəzifəyə yenidən seçilmək üçün namizədliyini irəli sürüb.

C. Quliyevin verdiyi məlumata görə, o, baş direktor vəzifəsinə seçilmək üçün elan edilmiş müsabiqədə iştirak edəcək:

“Bəli, mən budəfəki müsabiqədə iştirak üçün sənədlərimi təqdim etmişəm. İctimai televiziya və radio yayımı haqqında qanunun tələbinə əsasən, baş direktor bir neçə dəfə bu vəzifəyə seçilə bilər. Mən də qanunun yaratdığı imkanlardan istifadə edərək namizədliyimi yenə irəli sürmüşəm. Digər namizədlərin kim olması haqda məlumatım yoxdur” – deyə o, vurğulayıb.

“Sədr vəzifəsinə yenidən seçilmək üçün şansınız varmı?” sualına isə Cəmil Quliyevin cavabı belə olub: “Bunu zaman göstərər”.

Qeyd edək ki, Milli Televiziya və Radio Şurası (MTRŞ) İctimai Televiziya və Radio Yayımları Şirkəti baş direktorunun səlahiyyət müddətinin başa çatması ilə əlaqədar bu vəzifəyə seçilmək üçün namizədin müəyyənləşdirilməsi məqsədi ilə müsabiqə elan edib. İctimai Televiziya və Radio Yayımları Şirkətinin baş direktoru vəzifəsinə namizədlər müvafiq sənədləri 12 apreldən 22 aprelədək MTRŞ-ya təqdim etməlidirlər.

XƏBƏR LENTİ