Cümə, Yanvar 20, 2017
Mübariz Göyüşlü

1981-ci il yanvarın 23-də Qazax rayonunun Daş Salahlı kəndində anadan olub. Bakı şəhəri, Xətai rayonundakı 269 saylı orta məktəbdə 1987-1997-ci illərdə orta təhsil; Bakı Dövlət Univerisitetinin Jurnalistika fakültəsində 1998-2003-cü illərdə bakalavr (qiyabi), 2005-2008-ci illərdə mətbuat tarixi və ideoloji iş metodları istiqaməti üzrə magistraturada (qiyabi) ali təhsil alıb. 2014-2015-ci illərdə Bakı Dövlət Universitetinin nəzdində fəaliyyət göstərən Tyutor (tələbələrin akademik məsləhətçisi) kursunu müvəffəqiyyətlə bitirmişdir. 2016-cı ildən Bakı Dövlət Universitetinin Jurnalistika fakültəsinin Beynəlxalq jurnalistika kafedrasında siyasi elmlər üzrə fəlsəfə doktoru alimlik dərəcəsi almaq üçün (“Azərbaycan-Türkiyə strateji müttəfiqliyinin informasiya təminatı iki ölkənin mediasında 2005-2015-ci illər” mövzusunda) elmi iş üzərində çalışır. İxtisasca jurnalistdir.

1999-2000-ci illərdə Beyləqan rayonundakı “N” saylı hərbi hissədə həqiqi hərbi xidmət keçib.

2004-cu il

1998-2001-ci illərdə “Olaylar” və “525-ci qəzet”də, 2001-2008-ci illərdə “Şərq” qəzetində müxbir, parlament müxbiri vəzifəsində çalışıb. 2006-cı ilin oktyabr ayından 2008-ci ilin iyun ayına qədər “Dialoq – XXI əsr”, 2008-ci ilin iyun ayından “Türk Eli” adıyla çap olunan jurnal təsis etmiş və hazırda bu jurnalın baş redaktorudur. 1 fevral 2014-cü ildən fəaliyyət göstərən www.dialoq.info təhsil portalının təsisçisi və baş redaktorudur. 2015-2016-cı illərdə Bakı Dövlət Universitetinin Jurnalistika fakültəsində Tyutor vəzifəsində (tələbələrin akademik məsləhətçisi) çalışıb. 26 aprel 2016-cı ildən Azərbaycan Milli Elmlər Akademiyasının Mərkəzi Elmi Kitabxanasında Beynəlxalq və İctimaiyyətlə Əlaqələr Şöbəsinin müdiri vəzifəsində çalışır (Şöbənin tərkibində Beynəlxalq əlaqələr bölməsi və İctimaiyyətlə əlaqələr bölməsi fəaliyyət göstərməkdədir).

Fəaliyyət göstərdiyi müddət ərzində dövlət və dövlətçilik maraqlarını, ümummilli lider Heydər Əliyev siyasi xəttini və onun layiqli davamçısı olan prezident İlham Əliyevin gördüyü işləri təbliğ edən çoxsaylı tədbirlər həyata keçirmiş, 2011-2012-ci illərdə Bakıda üç beynəlxalq konfrans təşkil etmişdir.

Redaktor və jurnalist kimi fəaliyyət göstərdiyi 1998-2011-ci illərdə Mübariz Aşırlı, 2011-ci ildən isə Mübariz Göyüşlü imzası ilə çoxsaylı məqalələri çap olunmaqdadır. Jurnalist fəaliyyəti ilə yanaşı 2001-2005-ci illərdə müxtəlif gənclər təşkilatlarının təmsilçisi kimi fəaliyyət göstərib. 01 sentyabr 2008-ci ildən 21 dekabr 2010-cu ilə qədər Azərbaycan Milli Elmlər Akademiyasının İnsan Hüquqları İnstitutunda (Vətəndaşlarla əlaqələr şöbəsi; Milli təhlükəsizlik problemlərinin monitorinqi şöbəsi) elmi işçi vəzifəsində çalışıb.

2010 aprel BSU-da konsert

17 dekabr 2004-cü ildə keçirilmiş bələdiyyə seçkilərində namizədliyi Bakı şəhərindəki Xətai rayon Bələdiyyəsinə “Güclü  Bələdiyyə Uğrunda” Seçicilərin Təşəbbüs Qrupu tərəfindən irəli sürülüb və bələdiyyə üzvlüyünə namizəd kimi seçkilərdə iştirak edib. 2005-ci, 2010-cu və 2013-cü illərdə keçirilən seçkilərdə Bakı şəhərinin Xətai, Binəqədi rayonlarında seçkiləri müşahidə və monitorinq edən qrupa başçılıq etmişdir.

2005-2016-cı illərdə “Müasir İnkişaf” İctimai Birliyinin İdarə Heyətinin sədri olmuşdur (“Müasir İnkişaf” İctimai Birliyi 25 sentyabr 2011-ci ildən etibarən beynəlxalq təşkilat kimi çalışmalarını genişləndirərək Gürcüstan, Rusiya, Türkiyədə təmsilçiliklərini yaratmışdır).

2013 aprel-6

2008-ci ildə “Türk Qafqaz İslam Ordusu və ermənilər”, “Missioner” kitablarının; 2013-cü ildə isə “Milli-Mənəvi Dəyərlərimiz” kitabının (yeniyetmə və gənclər üçün nəzərdə tutulub) hazırlanmasında və çap olunmasında iştirak etmişdir.

2009-cu ildə dörd türk dövlətinin (Azərbaycan, Türkiyə, Qazaxıstan, Qırğızıstan) başçısı tərəfindən İstanbulda təsdiqlənərək həyata keçən Dünya Türklərinin Həmrəylik Gününün (Türk Dövlətləri Günü) əsas təbliğatçılarındandır.

2010-2013-cü illərdə Ortaq Türk Dili, Ortaq Türk Əlifbası, Ortaq Türk Tarix Kitabı, Ortaq Türk Ədəbiyyat Kitabı ideyasının həyata keçməsi üçün Azərbaycanda və Türkiyədə yüzdən çox millət vəkilindən, siyasi partiya, QHT, KİV rəhbərindən imza toplamışdır. 9 aprel 2013-cü ildə Prezident İlham Əliyev tərəfindən təsdiqlənmiş “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı”nın 6.3.3-cü maddəsində bununla bağlı da bənd əksini tapmış, nəticədə ideya ali siyasi platformada təsdiqlənmişdir.

20160305_112452-1

Azərbaycan Respublikasının Prezidenti Yanında QHT-lərə Dövlət Dəstəyi Şurasının maliyyə yardımı ilə həyata keçirilən layihələr çərçivəsində 2009-cu ildə “Gənclərdə vətənpərvərlik və vətəndaşlıq hisslərinin gücləndirilməsi” Konsepsiyasını, 2011-ci ildə “Milli tarix dərslikləri, milli şüur və milli maraqlar” Konsepsiyasını, 2013-cü ildə “Milli dövlətçilik ideologiyası” Konsepsiyasını, 2015-ci ildə “Gənclərin zərərli vərdişlərdən və yad təsirlərdən qorunması” Konsepsiyasını hazırlamışdır. Hazırda (2016-cı il üçün) Azərbaycan Respublikasının Prezidenti yanında QHT-lərə Dövlət Dəstəyi Şurasının maliyyə yardımı ilə “Genetik Modifikasiya Olunmuş (GDO) məhsullarla bağlı əhalinin məlumatlandırılması tədbirlərinin təşkili” layihəsini icra etməkdədir ki, layihənin sonunda mövzuyla bağlı kitab hazırlanacaq.

6 sentyabr 2013 - 3

2013-cü ildə “Müasir İnkişaf” İctimai Birliyinin təşkilatçılığı, Azərbaycan Respublikasının Dini Qurumlarla İş üzrə Dövlət Komitəsinin maliyyə dəstəyi, Dialoq və Əməkdaşlıq Uğrunda İslam Konfransı Gənclər Forumunun iştirakı ilə “Milli-Mənəvi Dəyərlər və Milli Kimlik” layihəsini həyata keçirmiş, layihə nəticəsində “Azərbaycan Milli Kimliyi” kitabını hazırlamışdır.

2009-cu ildə bir neçə qeyri-hökumət təşkilatının bir araya gəlməsində və Vətəndaş Cəmiyyəti İttifaqı adı altında bir koalisiyada birləşməsində aktiv iştirak etmişdir. 2013-cü ildə sıralarında 600-dən çox QHT-ni birləşdirən Azərbaycan Milli QHT Forumunun Regionlarla İş Mərkəzinin rəhbəri təyin olunub. 2007, 2008, 2009, 2014, 2015, 2016-cı illərdə Qurban bayramı münasibətilə 10000-dən çox imkansız ailəyə xeyriyyə yardımlarının paylanmasında aktiv iştirak etmişdir.

4 iyun 2015 ATV musahibe

2005-ci ilin oktyabr ayında Gürcüstanda (Azərbaycan Respublikası Diasporla İş üzrə Dövlət Komitəsinin təşkilatçılığı ilə orada yaşayan soydaşlarımızla bağlı problemlərin araşdırılması və ictimailəşdiriməsi üçün), 2010-cu ilin iyul-avqust aylarında Gürcüstanda (soydaşlarımızın yaratdıqları təşkilatlarla əlaqələr qurmaq üçün); 2009-cu ilin noyabr ayında Türkiyənin İstanbul və Ankara şəhərlərində (yerli təşkilatlarla əməkdaşlıq və tanışlıq məqsədilə), 2010-cu ilin noyabrında Türkiyənin İstanbul və Ankara şəhərlərində (Ortaq Türk Əlifbası ilə bağlı kampaniyaya dəstək məqsədilə), 2011-ci ilin aprel ayında Türkiyədə (İzmirdə keçirilən Türkiyədə yaşayan Azərbaycan Türklərinin I Qurultayının nümayəndəsi kimi iştirak üçün), 2011-ci ilin may ayında Türkiyənin Ankara şəhərində (Otaq Türk Əlifbası və Ortaq Türk Ədəbi Dili kampaniyasına dəstək məqsədilə), 2011-ci ilin 3-4 oktyabrında Türkiyənin Ankara şəhərində (“Türk Dünyası Günü” tədbirində iştirak, çıxış və Türk Dünyasına Xidmət mükafatı ilə mükafatlandırılma mərasimi üçün), 2014-cü ilin 15-18 martında Türkiyənin İstanbul, Eskişəhər, Bursa şəhərlərində (“Eskişəhər-2013” Türk Dünyasının Mədəniyyət Paytaxtı çərçivəsində keçirilən tədbirlərə qatılmaq üçün), 11-14 may 2014-cü il tarixdə Türkiyənin Eskişəhər, Kocaeli şəhərlərində (Türk Dünyası QHT-lərinin Zirvə toplantısında iştirak, “Siyasi, mədəni, ictimai münasibətlərdə QHT-lərin rolu” mövzusunda çıxış, Mükafatlandırma mərasiminə qatılma, Türkiyə televiziya və saytlarına müsahibə vermək üçün), 2015-ci ilin avqust ayında Türkiyənin İstanbul və Ankara şəhərlərində (BDU-nun Jurnalistika fakültəsinin nümayəndə heyətinin tərkibində), 3-5 mart 2016-cı ildə Türkiyənin Ankara şəhərində (Beynəlxalq “İpək Yolu və Türk Dünyası” konfransında iştirak üçün); 2007-ci ilin may ayında Rusiyada (Nijni-Novıqorod şəhərindəki Azərbaycan diasporasına dəstək məqsədilə), 2013-cü ilin 27 iyun-1 iyulunda Rusiyanın Moskva şəhərində (“Cənubi Qafqazda konfliktlər və onların həlli yolları” mövzusunda beynəlxalq konfransda iştirak və çıxış etmək üçün), 23-30 yanvar 2015-ci il tarixdə Rusiyanın Moskva, Rostov-Velikiy, Yaroslavl, Kastroma, Suzdal, Vladimr, Sankt-Peterburq şəhərlərində (“Rusiya Azərbaycan şagirdlərinin və tələbələrinin gözüylə” müsabiqəsinin qaliblərinin səfərini təşkil etmək üçün) səfərlərdə olub.

8-1_1413490140

Jurnalist və ictimai xadim kimi fəaliyyət göstərdiyi dövrlərdə müxtəlif mükafatlarla mükafatlandırılmışdır. 2004-cü ildə jurnalist fəaliyyəti ilə əlaqədar Bakı şəhərində Yeni Azərbaycan Partiyasının Gənclər Birliyi və Bakı şəhər Gənclər və İdman Baş İdarəsi tərəfindən birgə şəkildə təsis edilmiş Fəxri Diplomla; “Əkinçi” Cəmiyyəti tərəfindən Həsən bəy Zərdabi adına Fəxri Diplom və Medalla; “Bakcell” MMC tərəfindən Fəxri Diplomla; 2011-ci ildə Ankara şəhərində ictimai fəaliyyəti ilə əlaqədar Türk Ocaqları tərəfindən Türk Dünyasına Xidmət mükafatı ilə; 2014-cü ildə ictimai fəaliyyəti ilə əlaqədar Türkiyənin Eskişəhər Valiliyi tərəfindən plaket və sertifikatla mükafatlandırılmışdır.

Barəsində məlumatlar beynəlxalq internet ensiklopediyasında – Vikipediada yerləşdirilmişdir.

İngilis, rus, türk dillərini bilir.

Ailəlidir, bir qızı var.

11003937_10153060250513080_1623712743_n

Əlaqə;

Telefon (iş):       (+994 12) 539-73-67 (daxili 12-12)

Telefon (mob):   (+994 70) 736-11-44

E-mail:              mubariz2011@hotmail.com

Facebook:          http://www.facebook.com/mubariz.goyuslu

Wikipedia:          http://az.wikipedia.org/wiki/M%C3%BCbariz_G%C3%B6y%C3%BC%C5%9Fl%C3%BC

 

oktyabr 2014 (2)

Mübariz Göyüşlü
Diaqlo.info təhsil saytının baş redaktoru,
BDU-nun Jurnalistika fakültəsinin dissertantı

Ordu dövlətimizin dayağı, xalqımızın şərəfidir. Ordusuz dövlət, xalq müasir dünyada ərazi bütövlüyünü, suverenliyini çox çətin bir şəkildə qoruyub saxlaya bilər. Hazriki şəraitdə dünyada məhz güclü orduya malik olan dövlətlər beynəlxalq siyasətdə aparıcı rola malikdirlər.
Azərbaycan Respublikası müstəqillik əldə edən zamandan ordu quruculuğuna xüsusi diqqət ayırmışdır. Azərbaycan Ordusu 1918-1920-ci illərdə mövcud olmuş Azərbaycan Xalq Cümhuriyyətinin (AXC) ordu sahəsindəki ənənələrini özündə yaşadaraq müasir dövrün tələblərinə uyğun bir şəkildə formalaşır, inkişaf edir.
Çar Rusiyasının və sovet imperiyasının müstəmləkəsi olduğumuz zaman Azərbaycan türklərini orudya cəlb etmirdilər. Bu, müstəmləkə siyasəti həyata keçirənlərin məkrli və düşünülümüş bir addımı idi ki, xalqımız hərb işini bilməsin, hərbi sahədə düşmənlər qarşısında aciz duruma düşək. Etiraf etmək lazımdır ki, bəzən onlar bu istəklərinə nail ola bilirdilər. Amma 23 aylıq AXC-nin mövcudluğu və o zaman ordu quruculuğunun yüksək səviyyədə həyata keçirilməsi həmin planları müəyyən qədər poza bildi. Təsadüfi deyil ki, Prezident Heydər Əliyevin 22 may 1998-ci il Sərəncamına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir. Məlumat üçün bildirək ki, 1918-ci il 26 iyun tarixli fərmanla Azərbaycan Milli Ordusunun yaradılmasına başlandı. Avqustun 1-də AXC-nin Hərbi Nazirliyi təsis edildi. İstedadlı general Səməd bəy Mehmandarov dekabrın 25-də hərbi nazir, general-leytenant Əlağa Şıxlinski nazir müavini təyin edildilər. Qısa müddətdə Milli Ordu Osmanlı dövlətinin Qafqaz İslam Ordusu ilə birlikdə Bakını və ətraf qəzaları erməni-bolşevik işğalından xilas etdi. Bu hərbi birləşmələr Muğanda və Əsgəranda milli hökumətə qarşı baş vermiş qiyamları yatırmaqda yüksək səriştəlilik göstərdi, Qazaxda Azərbaycan sərhədlini pozmuş erməni nizami ordu hissələrini darmadağın etdi. Azərbaycan ordusunun Hüseynxan Naxçıvanski, İbrahim ağa Usubov, Həmid Qaytabaşı, Kazım Qacar, Cavad bəy Şıxlinski, Həbibbəy Səlimov kimi istedadlı generalları var idi.
Hər birimiz bilməliyik ki, müasir ordumuzun belə bir şanlı tarixi var. Lakin yuxarıda da qeyd etdiyimiz kimi sovet imperiyasının məqsədyönlü siyasəti nəticəsində azərbaycanlılar orduda mühüm işlərdən kənmarlaşdırılır, lazımsız sahələrə yönəldilirdilər. Bu da öz nəticəsini ölkəmizin müstəqilliyinin ilk illərində Ermənistanla müharibə zamanı göstərdi ki, ordumuz, dövlətimiz ilk anlarda çətin duruma düşdü. Böyük dövlətlərin dəstəyi ilə dişindən dırnağına qədər silahlanmış ermənilər ilk dövrlər müyyən üstünlük əldə etsələr də ordumuz sonradan təşəbbüsü ələ aldı və bir sıra uğurlu nəticələr də göstərdi, qələbələr də qazandı. Sadəcə olaraq siyasətçilərimizin qətiyyətsizliyi, xaotik durum və hərc-mərclik bu qələbələri axıra çatdırmağa, torpaqlarımızın işğalının qarşısını ala bilmədi.
1991-ci ilin sentyabrın 5-də Müdafiə Nazirliyinin yaradılması baradə qərar qəbul edildi. Azərbaycan dövləti inkişaf edib gücləndikcə ordumuz da tam olaraq formalaşır, orduda isalahatlar aparılır, döyüş qabiliyyəti yüksəlir, peşəkar kadrlarla və texnika, silah-sursat baxımından tam şəkildə təmin olunur. Bu gün Qafqazda ən müasir ordu hesab olunan Azərbaycan Milli Ordusu Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. Bu qoşun növləri potensial rəqiblə qırıcı və bombardmançı təyyarələrlə effektiv mübarizə aparmaq iqtidarındadır. MDB çərçivəsində Azərbaycan hava hücumundan müdafiə qüvvələrinə malik ən güclü ölkələrdən sayılır. Ordumuz fasiləsiz olaraq peşəkar kadrlarla təmin edilir. Prezident Heydər Əliyevin 20 avqust 2001-ci il tarixli fərmanı ilə Silahlı Qüvvələr üçün kadr hazırlığının təkmilləşdirilməsi məqsədilə Müdafiə Nazirliyi sistemində fəaliyyət göstərən məktəblər Azərbaycan Ali Hərbi Məktəbi, Azərbaycan Hərbi Dənizçilik Məktəbi və Azərbaycan Ali Hərbi Təyyarəçilik Məktəbi adlandırılmışdır.
Büdcə vəsaiti ildən-ilə artırılan Azərbaycan Silahlı Qüvvələrinin buna müvafiq olaraq hərbi imkanları da genişlənir. Yalnız bir faktı qeyd edək ki, müasir dövrdə azərbaycan ordusu üçün büdcədən ayrılan vəsait Ermənistanın bütövlükdə büdcəsinə bərabərdir. Hesab edirik ki, bu da işğalçı ölkəyə ciddi bir siqnal olmalıdır və təcavüzkar başa düşməlidir ki, bizim səbrimiz sonsuz deyil. Bununla yanaşı, Azərbaycan Prezidentinin Fərmanı ilə yaradılan Müdafiə Sənayesi Nazirliyində 400 addan çox müdafiə təyinatlı məmulatın istehsalının həyata keçirilməsi ölkəmizin hərbi qüdrətinin artmasının mühüm göstəricilərindən biridir. Bu, Azərbaycana öz ordusunu zəruri silah, sursat və texnika ilə təchiz etmək üçün əvəzsiz imkan yaratmışdır.
Son illər ordumuzun maddi-texniki bazasının möhkəmləndirilməsi sahəsində böyük işlər görülmüşdür. Müasir silahlar, sursatlar, hərbi texnika alınır və bu proses davam etdirilir. Son illər ərzində hərbi potensialımız yüksək dərəcədə artmışdır. Biz müasir tipli döyüş təyyarələri, döyüş və hərbi nəqliyyat helikopterləri alırıq. Artilleriya qurğuları, zirehli texnika, rabitə vasitələri, pilotsuz təyyarələr alınır və ordumuzun hərbi gücü artır. Eyni zamanda, Azərbaycanda səkkiz il bundan əvvəl yaradılmış Müdafiə Sənayesi Nazirliyinin xətti ilə hərbi təyinatlı məhsulların buraxılması prosesi uğurla gedir və biz bu sahədə də böyük nailiyyətlərə çata bilmişik. Bu gün Azərbaycan Ordusunun təchizatı, o cümlədən daxildə istehsal olunan məhsullar hesabına formalaşır. Azərbaycanda müxtəlif növ silahlar, sursatlar, hərbi texnika istehsal olunur. Patronlar, silahlar, mərmilər, tapançalar, avtomatlar, pulemyotlar, minaatanlar, snayper tüfəngləri, zirehli texnika, pilotsuz təyyarələr – bütün bunlar Azərbaycanda istehsal olunur və onlar yüksək səviyyədədir. Belə ki, beynəlxalq sərgilərdə nümayiş etdirilən Azərbaycan hərbi texnikası dünya miqyasında da böyük qiymətə malikdir.
Ordumuzun maddi-texniki bazasının möhkəmləndirilməsi və modernləşdirilməsi üçün biz bütün imkanlardan istifadə edirik və bundan sonra da edəcəyik. Biz ölkəmiz üçün ən ağrılı problem – Ermənistan-Azərbaycan, Dağlıq Qarabağ probleminin həlli üçün çalışırıq. Azərbaycan torpaqları uzun illərdir ki, işğal altındadır. Halbuki, Azərbaycanın ərazi bütövlüyü dünya birliyi tərəfindən tanınır və son zamanlar verilən yeni bəyanatlar, mötəbər beynəlxalq təşkilatlar tərəfindən verilən qərarlar, qəbul edilmiş qətnamələr bir daha Azərbaycanın ərazi bütövlüyünü dəstəkləyir. Buna baxmayaraq, məsələ öz həllini hələ də tapmır. O cümlədən, Birləşmiş Millətlər Təşkilatı Təhlükəsizlik Şurasının – dünyanın ən mötəbər qurumunun 4 qətnaməsi, digər beynəlxalq təşkilatların oxşar qərar və qətnamələri icra edilmir.
Lakin təcvüskar Ermənistan, separatçı qurumun rəhbərliyi və onların havadarları bilməlidirlər ki, Azərbaycan ordusu torpaqları işğaldan azad etməyə qadirdir. 2016-cı ilin aprel ayında baş vermiş döyüşlər də bunun əyani sübutudur. Həmin tarixə qədər qalib ədasıyla öyünən ermənilər ondan sonra Azərbaycan ordusunun döyüş qabiliyyətinin şahidi oldular. Şübhəsizdir ki, əgər böyük dövlətlərin dəstəyi olmasaydı ordumuz torpaqlarımızı işğaldan azad edəcəkdi. Lakin buna baxmayaraq uğurlu hərbi əməliyyatlar xalqımızın orduya olan etibarını və inamını artırdı, gənclərimizdə orduya qarşı böyük bir sevgi, istək formalaşdırdı.
Bu gün biz qətiyyətlə deyə bilərik ki, Ali Baş Komandan İlham Əliyevin verdiyi əmrlə ordumuz işğal olunmuş Qarabağ torpaqlarını qısa bir müddətdə düşmən işğalından azad edə biləcək. Ümummilli lider Heydər Əliyevin sözləri ilə məqaləmizi yekunlaşdırmaq istəyirik: “Biz bu gün böyük iftixar hissi ilə deyirik ki, Azərbaycan Respublikasının milli ordusu – respublikamızın milli təhlükəsizliyini, əhalimizin əmin-amanlığını və mühafizəsini təmin etmək üçün, ölkəmizin sərhədlərinin qorunması, ərazi bütövlüyünün, torpaqlarının müdafiə edilməsi üçün Azərbaycanın layiqli Silahlı Qüvvələri vardır”. Doğurdan da bu gün Azərbaycan Silahlı Qüvvələrinin quruculuğu prosesi davam etdirilir və ordumuz inkişaf, təkmilləşmə dövrünü yaşayır. Bu ordu işğal olunmuş ərazilərimizi düşməndən azad etməli, ölkəmizin ərazi bütövlüyünü qorumalıdır.

Məqalə “Universitet Təhsilli Qadınlar Cəmiyyətinın” Qeyri-Hökumət Təşkilatlarına Dövlət Dəstəyi Şurasının maliyyə dəstəyil ilə həyata keçirdiyi “Hərbi-vətənpərvərlik tərbiyəsində Multimediyanın rolunun artırılması” layihəsi çərçivəsində “Gənclərin hərbi-vətənpərvərlik tərbiyəsi” mövzusunda müsabiqəyə təqdim olunur.
23 noyabr 2016-cı il

Mübariz Göyüşlü

Azərbaycanın 25 illik müstəqillik yaşının olmasına baxmayaraq hələ də qanlı sovet imperiyasının nostaljisi ilə yaşayan insanlarımızın həsrətlə o illəri xatırlamalarının şahidi oluruq. Təəssüf ki, “sovet dövründə belə idi”, “sovet vaxtı belə haqsızlıq yox idi” kimi ifadələrə hələ də rast gəlməkdəyik. Bəzən bu insanlara haqq vermək istəyirsən. Bəzən vətəndaşlarımız dövlət qurumlarında bürokratiya ilə qarşılaşanda, bəzən rüşvət faktoruna görə haqsızlıq baş verdiyində sən də o insanların halına acıyaraq qeyri-ixtiyari sovet dövrü haqqında yanıqlı-yanıqlı danışmasına aldanırsan. Amma Azərbaycan Xalq Cümhuriyyəti haqqında xəbərdar olan, o dövrdə görülmüş işlərdən az miqdarda da olsa məlumatlı olan kəslər bilirlər ki, əgər qanlı sovet imperiyası, onun əli qanlı rəhbərləri olmasaydı biz bu cür çətinliklərlə üzləşməyəcəkdik.

Cəmi 23 ay yaşamasına baxmayaraq Azərbaycan Xalq Cümhuriyyəti elə bir mütərəqqi və güclü inkişafa nail oldu ki, qanlı imperiya onun izlərini silmək üçün on illərlə çalışdı, bütün gücünü səfərbər etdi, lakin 70 ildən sonra hər şey gün işığına çıxdı və sovet yalanı gün görmüş qar kimi əridi. Amma yalanlar ərisə də vurduğu yaralar hələ də silinməz izlərini saxlamaqdadır.

Xalqın on illərlə yetişdirdiyi ziyalıları bir neçə saat və ya bir neçə gün ərzində məhv edən rus-erməni cəlladları bunu sovet imperiyasını qurmaq adıyla həyata keçirdilər. Şübhəmiz yoxdur ki, əgər həmin şəxslər yaşasaydılar Azərbaycanı nəinki bölgənin, hətta dünyanın aparıcı dövlətinə çevirəcəkdilər. Bolşevik adıyla maskalanan rus-erməni işbirlikçiləri böyük bir nəsil Azərbaycan ziyalısını öldürdü, sürgün etdirdi. Az bir qism qaçıb canını zorla qurtara, digər bir qism isə sovet təhdidləri altında ömrünü başa vura bildi. Bu da öz növbəsində Azərbaycanı dinamik və sürətli inkişafdan saxladı.

AXC qurulanda böyük bir əraziyə malik idi. Qanlı sovet imperiyası Vətənimizi işğal edən kimi torpaqlarımızın böyük bir qismini ermənilərə peşkəş etdi. Əgər belə olmasaydı indi biz nəinki Dağlıq Qarabağ problemi ilə üzləşməyəcəkdik, böyük ehtimalla heç Ermənistan dövləti də olmayacaqdı. Yaxud olsaydı belə ən yaxşı halda bölgədə heç bir nüfuza malik olmayan, təsir gücü olmayan, çox kiçik, hətta deyərdim ki, Azərbaycandan asılı olan bir oyuncaq dövlət olacaqdı. Gürcüstana gəldikdə isə AXC Borçalını mübahisəli ərazi kimi qəbul etdirmişdi. Əgər əli qanlı kommunistlər olmasaydı bəlkə də Borçalı da hazırda Azərbaycan torpaqlarına qatılmışdı. Hər birimizə yaxşı məlumdur ki, Dağıstan hökuməti konfederativ əsaslarda Azərbaycan Xalq Cümhuriyyətinə birləşmək üçün müraciət etmişdi. Əgər qanlı sovet imperiyası olmasaydı bu istiqamətdə də çox ciddi nəticələr olacaqdı. Azərbaycan nəinki Cənubi Qafqazın, hətta bütövlükdə Qafqazın aparıcı dövləti olaraq regionda söz sahibi olacaqdı.

Azərbaycan hökumətinin başçısı Nəsib bəy Yusifbəylinin atasına pul göndərməklə bağlı məktubu çoxlarınıza bəllidir, xəbəri olmayanlara oxumağı tövsiyyə edirəm. İndi siz özünüz deyin belə bir təmiz, namuslu, savadlı, bacarıqlı insanların rəhbərlik etdiyi dövlətdə rüşvət, süründürməçilik, vətəndaşına laqeyd yanaşma, onu incitmək, əzmək ola bilərdimi? Birmənalı şəkildə “yox” demək olar. Məhz əli xalqın qanına batmış kommunistlərin fəaliyyətinin nəticəsində rüşvət, korrupsiya dövlətimizi xərçəng kimi sardı və onun aparıcı qurumlarını iflic vəziyyətə saldı. Bəlkə də bu fikrim birmənalı qarşılanmayacaq amma məhz kommunistlərin faliyyətinin nəticədir ki, rüşvət cəmiyyətimizin, onun insanlarının şüurunda möhkəm yer etdi. Nümunə olaraq Türkiyədəki, İrandakı və başqa yerlərdəki Azərbaycan türklərinə baxın. Onlarla bizim aramızda fərq yerlə göy qədərdir. Demək ki, əgər sovet olmasaydı, Azərbaycan Xalq Cümhuriyyəti yaşasaydı biz bu sahədə dünyaya örnək ola biləcək bir dövlət quracaqdıq.

Hərbi sahəyə gəldikdə məkrli kommunistlər, rus-erməni işbirlikçiləri xalqımızı bu işdən demək olar ki uzaq tuturdular. Müstəqilliyi qazandıqdan sonra hərbi sahədə qarşılaşdığımız çətinliklər buna əyani sübut idi. Məqsədyönlü şəkildə aparılan siyasətin nətici idi bu. Əgər qanlı sovet imperiyası olmasaydı AXC hərbi sahədə ciddi nəticələr əldə etmişdi ki, bunu daha da inkişaf etdirərək ölkəmizi bu sahədə də aparıcı mövqeyə çıxaracaqdı.

Demokratiya, insan hüquqları, seçki, mətbuat azadlığı və s. sahədə də AXC-nin fəaliyyəti nümunəvi idi. İndinin özündə belə bizə demokratiya dərsi keçməyə çalışan ölkələr o təcrübəni bildikdə heyrətlərini saxlaya bilmirlər. Qanlı sovet imperiyası olmasaydı bu təsisatlar daha da inkişaf edəcəkdi. Qadınlara belə səs hüququ tanıyan, parlamentində bir neçə partiyanın, hətta ermənilərin belə təmsilçiliyini təmin edən, mətbuat azadlığı sahəsində nümunə ola biləcək sistem quran AXC bu təcrübələri daha da inkişaf etdirəcəkdi.

Elm, təhsil, səhiyyə, sosial məsələlər haqqında da eyni fikirləri yazmaq olar. Məhdud imkanlar çərçivəsində Bakı Dövlət Universitetinin əsasını qoyan, xaricdə təhsil almaq üçün tələbələr göndərən, əhalisinin problemlərinə imkan tapan kimi diqqətlə yanaşan AXC-nin fəaliyyətini ancaq alqışlamaq olar. Əgər qanlı sovet imperiyası olmasaydı təsəvvür etmək mümkündür ki, biz adı çəkilən sahələr üzrə hansı inkişafa nail olacaqdıq?

Ən həssas məsələlərdən sayılan – xarici siyasət, milli şüur, milli kimlik, dövlətin ideoloji əsasları ilə bağlı da Xalq Cümhuriyyətinin başbilənləri yaddaşlardan silinməyəcək işlər gördülər. Özü də bunu çox qısa bir vaxtda, cəmi 23 ay ərzində həyata keçirdilər. Diqqət etmək lazımdır ki, xanlıqlar şəklində Rusiya tərəfindən işğal olunan bir ərazini onlar Azərbaycan Xalq Cümhuriyyəti şəklində, müstəqil bir dövlət olaraq dünyaya tanıda bildilər. Bir cümlədə bunu ifadə etmək çox asandır amma bu cümlənin arxasında ağır və gərgin fəaliyyət dayanır. Milli ideologiyamızın təməl prinsipi saya biləcəyimiz üçrəngli bayrağımız yüksəldildi ki, onun da çox böyük mənası və mahiyyəti var. Türk milli kimliyi, türklük şüuru, islam mənəvi dəyərləri topluma aşılanırdı. Əgər qanlı sovet imperiyası olmasaydı bu sahədə də böyük nəticələr əldə ediləcəkdi.

Bütün bu qeydləri ən müxtəlif sahələr üzrə kifayət qədər uzatmaq olar. Detallara qədər yazılsa şübhə etmirəm ki, ciddi bir kitab da ərsəyə gətirmək olar. Bunların bir çoxusu haqqında görkəmli ziyalılarımızın maraqlı araşdırmaları, kitabları da var. Ona görə də yekunlaşdıraraq demək istərdik ki, qanlı sovet imperiyası bizə çox şeylər verdi və bunu danmaq mümkün deyil. Bəzilərini təkrar sadalamaqda isə fayda var: milli şüurun və milli kimliyin məhv edilməsi, millətin öz adını unutması, öz dəyərlərinə laqeyd yanaşması, qorxaq və zəlil bir toplumun yetişdirilməsi, mənəvi dəyərlərimizin ayaqlar altına salınması, rüşvət anlayışının şüurlara hakim olduğu bir cəmiyyətin formalaşdırılması, torpaqlarımızın işğal edilməsi, təbii sərvətlərimizin talanması, tariximizin təhrif edilməsi, milləti formalaşdıracaq böyük bir nəsil milli ziyalılarımızın amansızcasına məhv edilməsi, millətimizə 1937-də, 1948-də, 1990-cı illərdə faciələr yaşatması.

Əgər sovet imperiyası, onun əli qanlı cəlladları olmasaydı, əgər Azərbaycan Xalq Cümhuriyyəti yaşasaydı biz belə çətinliklərlə qarılaşmazdıq. Ona görə də sovet nostaljisi ilə yaşayan insanlarımız o fikirləri dilə gətirməzdən öncə düşünməlidirlər ki, bu problemlərimizin hamısının əsası sovet vaxtı qoyulub. Sovet nostaljisini bitirib AXC haqqında düşünməyimiz, onların yarımçıq qalan işlərini davam etdirməyimiz, onlara və xalqımıza layiq bir şəkildə dövlətimizi inkişaf etdirməyimiz lazımdır.

Mübariz Göyüşlü

Müasir İnkişaf İctimai Birliyinin sədri

Əslində bu məqaləni mart ayında hazırlamaq istəyirdim. Martın əvvəllərində Ankarada Türk Ocaqlarının təşkilatçılığı ilə Türk Dünyasına həsr olunan beynəlxalq konfransın iştirakçısı olan zaman oradakı çıxışlar və aparılan müzakirələrdə doğmuşdu belə bir yazı hazırlamaq istəyi. Sadəcə olaraq vaxt məhdudluğu imkan vermədi. Amma arada ötən vaxtda aprel ayında Azərbaycan-Ermənistan qoşunlarının təmas xətttində baş verənlər, Türkiyədə ard-arda törədilən terror hadisələri, Qazaxıstanda baş verən hadisələr və s. bu məqalənin ərsəyə gəlməsini sürətləndirdi.

Bir əsrdən artıqdır ki, Türk dövlətlərinin birliyi üçün nə qədər əziyyətlər çəkilir, nə qanlar tökülür, nə canlar fəda edilir. Bu birliyin baş tutması üçün səmimi şəkildə millətçilik ideyasına xidmət edənlər nə cəfalar çəkirlər, onlara qarşı cəbhə alanlar nə qədər fənd işlədir, qəddarlıqlar edirlər. Lakin zaman ötdükcə bu birlik xəyaldan gerçəyə çevrilməyə başlayır. 5 il bundan əvvəl yazdığım məqalədə qeyd etdiyim fikri yenə də təkrarlamağa ehtiyac var. Artıq illər uzunu xəyallarımızda yaşatdığımız Turan ideyası – siyasi müstəvidə zəif formada olsa belə reallaşıb. Bu ideya mərkəzi qərargahı İstanbulda yerləşən və dörd türk dövlətini sıralarında birləşdirən Türk Dövlətlərinin Əməkdaşlıq Şurasının qismində reallaşıb. Bundan başqa parlamentlər Türk Dövlətlərinin Parlament Assambleyası, mədəni qurumlar TÜRKSOY, elmi qurumlar Beynəlxalq Türk Akademiyası adı altında birləşiblər. Digər istiqamətlərdə də çoxsaylı birliklərimiz qurulubdur.

Ötən hər gündə istər Türkiyədə, istər Azərbaycanda, istər Orta Asiyada Türk Birliyinə həsr olunan kifayət qədər çoxsaylı beynəlxalq və yerli əhəmiyyətli tədbirlər keçirilir, çıxışlar edilir, kitablar, jurnallar, məqalələr yazılır, TV-lər, radiolar, saytlar və s. fəaliyyət göstərir. Burada Macarıstan da daxil olmaqla Rusiyanın tərkibində olan muxtar türk dövlətlərini, dünyanın müxtəlif ölkələrində yaşayan və fəaliyyət göstərən diaspor təşkilatlarımızın da türklük uğrunda çalışmalarını qeyd etmək yerinə düşər. Əlbəttə bütün bunlar sevindiricidir və bunların sayını, keyfiyyətini daha da artırmaq lazımdır. Çünki biz hələ tam olaraq hədəfimizə çatmamışıq, qarşı tərəf hələ də bizdən kifayət qədər güclü və məkrlidir. Bir sözlə görüləsi çox işimiz var.

Amma bütün bu çalışmalarda ciddi nəticələr əldə etməyimizə mane olan iki məqam var. Mən bunu beynəlxalq və yerli konfranslarda iştirak edərkən səsləndirilən çıxışlardan sezmişəm. Bunları gözdən qaçırdığımız üçün bəzən həddən artıq enerji və pul xərcləyərək həyata keçirilən tədbirlərdən, qurulan təşkilatlardan lazım olan effekti ala bilmirik.

Birincisi, bir-birimizin gördüyümüz işlərdən məlumatsız olmağımız, əlaqələndirmə işinin demək olar ki, yox dərəcəsində olmasıdır. Bu çox ciddi bir problemdir. Məhz buna görədir ki, eyni mövzunu təkrar-təkrar müxtəlif şəkillərdə və yerlərdə, müxtəlif vaxtlarda müzakirəyə çıxarırırıq. Özü də bunları birimizin digərinin gördüyü işlərdən xəbərsiz şəkildə edirik və hər dəfəsində də prosesə yenidən başlamış kimi oluruq. Bu isə işin effektini və ciddiyyətini aşağı salır. İşin ən acınacaqlı tərəfi həmin işi görmüş şəxsin, təşkilatın bu işin yalnız onun tərəfindən edilməsini düşünmüş olması və onun tərəfindən edildiyini iddia etməsidir.

İkincisi, bir işin kifayət qədər hay-küylə və sanballı şəkildə başladılması, ən yaxşı halda zəif davam etdirilməsi, ən pis halda isə heç davam etməməsidir. Bu həmin işi görməməkdən daha pisdir. Çünki bu zaman işə könül vermiş həqiqi mənada Türk Dünyası sevdalısı saydığımız insanların əksəriyyətinin inamı qırılır, ideya gözdən düşür. Hazırda biz elə bir mərhələdəyik ki, artıq şüarçılığı arxada qoyub, sakit və təmkinlə çalışmalıyıq. Daha gözəl və ciddi nəticələri yalnız bu zaman əldə edə biləcəyik.

Bu problemlər yuxarıda adlarını sadaladığım qurumlardan tutmuş, beynəlxalq miqyaslı ictimai təşkilatlarımıza, yerli səviyyəli təşkilatlarımıza, KİV-lərimizə, bir sözlə hər birimizə aiddir. Bəzən əlaqələndirmə işinin və hay-küyün sanballı təşkilatların fəaliyyətlərində də gördüyümüz zaman bir xəyal qırıqlığı yaranmağa başlayır. Halbuki bir az diqqət, bir az səbr, bir az da ciddiyət və reklamdan qaçmaq daha böyük nəticələr əldə etməyimizə səbəb ola bilər. Daha çox gecikmədən əlaqəli, təşkilatlanmış, davamlı, ardıcıl fəaliyyətə doğru yürüməsinə ehtiyacı var Türk millətinin…

24 iyul 2016-cı il

Mübariz Göyüşlü

“Müasir İnkişaf” İctimai Birliyinin İdarə Heyətinin sədri,
BDU-nun Jurnalistika fakültəsinin əməkdaşı

Son bir neçə yüz ildə qarşılaşdığımız məğlubiyyətlər seriyası, Rusiyanın amansız müstəmləkə siyasəti psixoloji olaraq bizə ciddi təsir edib. Bu məqam özümüzə, tariximizə və tarixi şəxsiyyətlərimizə münasibətdə özünü qabarıq şəkildə büruzə verir. Əlbəttə ki, düşdüyümüz durumdan çıxmaq üçün tənqidi yanaşma lazımdır, lakin baxır bu tənqidin hədəfi kimdir, nədir, onun nəticəsi problemin həllinə nə dərəcədə dəstək ola bilir? Hələ onu demirəm ki, bir çox hallarda tənqid təhqirə çevrilir. İsti otaqlarda oturub, kompüter və internetin imkanlarından istifadə edib hər kəsi günahlandırmaq, tarixi geninə-boluna tənqid atəşinə tutmaqdan asan nə var? Çətin olan özümüzə, öz gördüyümüz (ya da görmədiyimiz) işlərə tənqidi yanaşa bilməkdir. Son illərdə sosial şəbəkələrin, internetin, televiziyaların, qəzetlərin yaratdığı imkanlardan hər kəs öz qabiliyyətinə və bacarığına görə istifadə edir. Bəziləri bundan hər kəsə ağıl vermək, hər kəsdən ağıllı olduğunu sübut etmək üçün yararlanır. Bəziləri isə lap dərinə gedir, tarixi şəxsiyyətləri eninə-uzununa təhqir edir, onları “haqsız” çıxarır, o zaman atılmış addımları və qərarları bu günlə “təhlil” edir, “araşdırır”. Tarixi şəxsiyyətlərlə bağlı nəticəni özü istədiyi kimi çıxarır və özünün subyektiv fikrini hər kəsə qəbul etdirməyə çalışır.

Qarşılaşdığımız və həllində acizlik göstədiyimiz problemlərdə tarixi şəxsiyyətlərimizi günahlandırmaq yolverilməzdir. Onları nə qədər çox günahlandırsaq da, nə qədər “dərin” və “möhtəşəm” faktlar açıqlasaq da Qarabağ problemimiz həll olunmayacaq. Nə Şah İsmayıl gəlib erməniləri qovmayacaq, nə də Rəsulzadə gəlib onlara qarşı döyüşmək üçün bizləri səfərbər etməyəcək. Məğlubiyyətlərimizin də, acizliklərimizin də, cəmiyyətmizidəki çatışmazlıqların da günahkarı və səbəbkarı özümüzük. Nəfsimizlə mübarizə aparmaqda acizlik göstərib Şah İsmayılın Sultan Səlimlə döyüşünü təhlil edirik, gan birini, gah da digərini haqlı çıxardırıq. Rəsulzadənin etdiklərinin mində birini həyata keçirə bilməyib onu daha nələrdə ittiham etmirik? Onun yazdıqlarını və gördüyü işləri heç yarıya qədər öyrənməyib ona qarşı hansı fikirlərdən çıxış etmirik?

Fikrimizcə tarixi şəxsiyyətlərimizi yanlışları ilə, doğruları ilə birgə qəbul etməyimiz lazımdır. Əksəriyyətimizə məlumdur ki, görkəmli ziyalımız Əhməd bəy Ağaoğlu uzun müddət Türkiyədə yaşayıb fəaliyyət göstərmiş, Atatürkün yaxın silahdaşı olmuşdur. Ömrünün son illərində onu sevməyənlərin fəaliyyəti nəticəsində Əhməd bəylə Atatürkün arasında inciklik yaranmışdır. Lakin buna baxmayaraq Atatürk vəfat edərkən onun əleyhinə yazıların yazılması və çıxışların edilməsi Ağaoğlunu üzmüşdür. O, bu cür addımların əleyhinə çıxaraq Nopoleon öldükdən sonra fransızların ona ehtiramla yanaşmasını nümunə göstərmişdir.

Gəlin tariximizi və tarixi şəxsiyyətlərimizi rahat buraxaq. Onları bir tarix olaraq öyrənək və öyrədək. Müsbət işlərini qabardaq, mənfi məqamlardan nəticə çıxardaq. Amma tarixin arxivlərində ilişib qalmayaq, tarixlə deyil bu günlə yaşayaq. Bu günümüzü inşa etmək üçün də tarix bilgisinə sahib olan, tarixiylə və tarixi şəxsiyyətlərilə qürur duyan, millətiylə fəxr edən, milli şüura sahib olan savadlı insanlardan ibarət cəmiyyət yaradaq. Bunun üçün yeganə yol təhsildir. Bunun üçün yeganə yol heç bir çətinliyə baxmadan millətin övladlarına düzgün təhsil və tərbiyə verməkdir. Problemlərimizin həlli ancaq və ancaq təhsildə, elmdədir. Yalnız düzgün təhsil milli düşüncəli və savadlı kadrların yetişməsinə vəsilə ola bilər.

Əlbəttə bunları həyata keçirmək, xüsusən də təhsilimizin inkişafına nail olmaq, onu arzu olunan səviyyəyə çatdırmaq asan deyil. Buradakı mövcud çətinliklər hər birimizə məlumdur. Ancaq tarixin yaddaşında iz buraxacaq işlər görmək heç zaman asan olmayıb. Heç 100 il, 300 il bundan əvvəl də asan olmayıb, indi də asan deyil. Hər dövrün öz çətinlikləri olub. Amma indi adını hörmətlə xatırladığımız millət fədailəri o çətinliklərə baxmayaraq bu işləri görüblər. Onları suçlamaqla öz işimizi bitmiş saymaqdansa qolumuzu çirmələyib üzərimizə düşən işləri gündə bir mənzil yerinə yetirsək bir müddət sonra cəmiyyətimizdə nümunə sayılan işlərin sayının artmasını şahidi olacağıq. Bu nümunələr bizlərə kiçik qələbələr bəxş edə bilər ki, bu da öz növbəsində cəmiyyətimizi düşdüyü məğlubiyyət və kölə psixologiyasından, hər addımda özünü, tarixini, tarixi şəxsiyyətlərini aşağılamaq davranışından qrutara bilər.

XƏBƏR LENTİ