Çərşənbə, Mart 29, 2017
XƏBƏRLƏR

Bu gün Bakı Şəhər Mədəniyyət və Turizm Baş İdarəsinin nəzdində olan Sabunçu rayon MKS-nin 1 saylı filialının M.Şəhriyar adına kitabxananın rekonstruksiyadan sonra açılışı olub.

Mədəniyyət və Turizm Nazirliyindən verilən məlumata görə, kitab evi tərzində qurulan yeni nəsil kitabxananın əsas ideyası 5 minə yaxın yeni və müasir kitablardan ibarət fondun daima yenilənməsi, oxucuya sərbəst seçim imkanın verilməsi, həmçinin əhalinin hər sahədə daha geniş məlumat əldə etməsidir.

Tədbirdə mədəniyyət və turizm naziri Əbülfəs Qarayev, nazir müavinləri Ədalət Vəliyev və Vaqif Əliyev , Bakı Şəhər Mədəniyyət və Turizm Baş İdarəsinin rəisi Vuqar Zeynalov, Sabunçu Rayon İcra Hakimiyyəti başçısı Adil Vəliyev və müavini Arzu Məmmədova, Milli Məclisin deputatı Fazil Mustafa, mədəniyyət işçiləri və media nümayəndələri iştirak ediblər.

Ə.Qarayev çıxışında qeyd edib ki, Bakı Şəhər Mədəniyyət və Turizm Baş İdarəsinin təşəbbüsü ilə yaradılan müasir kitabxana kompleksi qəsəbə sakinlərinin və gənclərin asudə vaxtlarının mənalı keçirmələrinə xidmət edəcək, dünya ölkələrində tətbiq edilən bu ideya artıq Bakının Sabunçu qəsəbəsində ilk olaraq reallaşdırılıb və 2017-ci ilin sonuna qədər paytaxtın bir neçə rayonlarında da kompleks kitabxanaların açılışı nəzərdə tutulub.

Sabunçu Rayon İcra Hakimiyyətinin başçısı Adil Vəliyev və deputat Fazil Mustafa kitab evinin qəsəbə sakinləri üçün çox əhəmiyyətli olduğunu vurğulayıblar.

Trend

Ermənilərin azərbaycanlılara qarşı onilliklər boyu davam edən soyqırımı siyasəti total ideoloji təcavüz, terror, ayrı-ayrı vaxtlarda irimiqyaslı hərbi əməliyyatlarla müşayiət olunub.

Bu fikir martın 28-də Yeni Azərbaycan Partiyası (YAP) Masallı rayon təşkilatında Azərbaycanlıların Soyqırımı Gününə həsr olunmuş tədbirdə səsləndirilib.

Toplantıda soyqırımı qurbanlarının, Azərbaycanın suverenliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.

Tədbirdə çıxış edən YAP Masallı rayon təşkilatının sədri Seyfəddin Əliyev bildirib ki, ermənilərin azərbaycanlılara qarşı məqsədyönlü şəkildə həyata keçirdiyi etnik təmizləmə və soyqırımı siyasəti nəticəsində xalqımız ağır məhrumiyyətlərə məruz qalıb.

Bildirilib ki, 1918-ci ildə ermənilərin azərbaycanlılara qarşı həyata keçirdiyi soyqırımı zamanı Bakı şəhərində və Bakı quberniyasının müxtəlif bölgələrində, eləcə də Şamaxı, Quba, Xaçmaz, Lənkəran, Hacıqabul, Salyan, Zəngəzur, Qarabağ, Naxçıvan və digər ərazilərdə qırğınlar törədiblər.

Diqqətə çatdırılıb ki, Azərbaycan xalqının ümummilli lideri Heydər Əliyevin 1998-ci il 26 mart tarixli Sərəncamı ilə 31 mart Azərbaycanlıların Soyqırımı Günü kimi qeyd olunur.

Tədbirdə çıxış edənlər “Böyük Ermənistan” xülyası ilə yaşayan ermənilərin azərbaycanlılara qarşı törətdikləri vəhşiliklərdən danışıb, bu soyqırımı siyasətini pisləyiblər.

AZƏRTAC

Naxçıvan şəhərindəki İlham Əliyev adına Olimpiya İdman Kompleksində voleybol üzrə kişilər arasında Azərbaycan çempionatının yüksək liqasında final mərhələsinin oyunlarına start verilib.

Bu mərhələdə çempionatın turnir cədvəlində ilk 4 pillənin sahibləri – “Neftçi”, “Lokomotiv”, MOİK və “Naxçıvan” komandaları mübarizə aparırlar. Üç gün davam edəcək final mərhələsinin oyunları reqlamentə əsasən dairəvi sistem üzrə keçiriləcək. Martın 30-da isə 2016-2017-ci il mövsümünün çempion komandasının adı məlum olacaq.

Martın 28-də final mərhələsinin ilk oyunları keçirilib. Oyunlardan öncə Azərbaycan Respublikasının Dövlət Himni səsləndirilib.

Meydana ilk olaraq “Neftçi” və MOİK komandaları çıxıb. Daha üstün oyun nümayiş etdirən “Neftçi” hər üç setdə qalib gələrək (25:20, 25:21, 25:12) bu mərhələdə ilk qələbəsini qazanıb.

Aleksandr Çornıyın rəhbərlik etdiyi “Naxçıvan” komandası playoff-un ilk oyununda “Lokomotiv” komandası ilə üz-üzə gəlib. İlk setdə rəqibinə məğlub olan komandamız (25:12), ikinci setdə də eyni aqibətlə üzləşib – 25:22. Son setdə daha üstün oyun sərgiləyən “dəmiryolçular” meydanı 3:0 hesablı qələbə ilə tərk ediblər.

Qeyd edək ki, martın 29-da daha iki oyun keçiriləcək. Saat 15:00-da “Neftçi” “Lokomotiv”lə, 17:30-da isə “Naxçıvan” MOİK-lə qaşılaşacaq.

AZƏRTAC

Martın 28-də Şəkidəki “Marxal” mehmanxanasında Birinci Alman Dili Müəllim Sessiyası işə başlayıb.

Almaniya Federativ Respublikasının Azərbaycandakı səfirliyinin və Tbilisi Höte İnstitutunun birgə təşkilatçılığı ilə keçirilən iki günlük sessiyada respublikamızın bütün bölgələrini təmsil edən 70-ə yaxın alman dili müəllimi iştirak edir.

Sessiyanın açılış mərasimində çıxış edən Şəki Şəhər İcra Hakimiyyəti başçısının müavini Zərinə Cavadova tədbirin əhəmiyyətini vurğulayaraq, orta məktəblərin alman dili müəllimləri üçün təşkil edilən ilk sessiyanın Şəkidə keçirilməsini təmin etdiyinə görə Almaniyanın ölkəmizdəki səfirliyinin rəhbərliyinə minnətdarlığını bildirib. Diqqətə çatdırılıb ki, əvvəllər Şəkinin bir çox məktəblərində alman dili fənni tədris olunsa da, son illər bu fənnə maraq azalıb və hazırda Şəkinin yalnız 4 məktəbində alman dili fənni tədris olunur. Zərinə Cavadova bu sessiyadan sonra orta məktəblərdə alman dilinə marağın artacağına əminliyini bildirib.

Tədbirdə Almaniyanın ölkəmizdəki səfirliyinin əməkdaşı xanım Heike Möckel və Tbilisi Höte İnstitutunun metodisti Eike Pockrand çıxış edərək, sessiyanın gündəliyi və müzakirə ediləcək məsələlər barədə məlumat veriblər.

Qeyd edək ki, sessiya çərçivəsində Höte İnstitutunun və Almaniyanın ölkəmizdə fəaliyyət göstərən təhsil təşkilatlarının təqdimatları keçiriləcək, həmçinin müəllimlər üçün metodiki seminarlar təşkil ediləcək. Çıxış və seminarların mövzuları təqaüd və təkmilləşdirmə imkanları, dərs metodikası, məktəblərdə alman dilinin tədrisinə dəstək, tədris prosesində yeni forma və üsullardan istifadə və digər məsələlərə həsr olunacaq.

Sessiyanın sonunda bütün iştirakçılara sertifikatlar veriləcək.

Belə tədbirlərin respublikamızın digər bölgələrində də keçirilməsi nəzərdə tutulur.

AZƏRTAC

Göyçay rayonunda qeydiyyatda olan narkotika istifadəçiləri sırasında yeniyetmə və gənclər yoxdur. Lakin buna baxmayaraq narkomaniyaya qarşı mübarizə məqsədilə vətəndaş cəmiyyətinin imkanlarından istifadə edilməli, gənclər arasında bu kimi zərərli vərdişlərin mənfi fəsadları haqqında, onun həyatımıza və sağlamlığımıza təhlükə, mənəviyyatımıza və dinimizə zidd olması barədə məlumatlar verilməlidir.

Bu fikirlər Göyçayda keçirilən “Narkomaniyaya yox deyək” mövzusunda “dəyirmi masa”da səsləndirilib. Tədbirdə hüquq-mühafizə orqanlarının əməkdaşları, rayonun müxtəlif idarə və müəssisələrində çalışan gənclər, məktəblilər, həmçinin ictimaiyyət nümayəndələri iştirak ediblər.

Çıxış edənlər bəşəriyyət üçün faciəyə çevrilən narkomaniya və digər zərərli vərdişlərə qarşı mübarizədə hər kəsi fəal olmağa çağırıblar.

Tədbirdə “Narkotik vasitələrin, psixotrop maddələrin və onların prekusorlarının qanunsuz dövriyyəsi və narkomanlığın yayılması ilə mübarizə üzrə Dövlət Proqram”ının icrası məqsədilə Göyçay Rayon Polis Şöbəsi tərəfindən görülən işlər haqında məlumat verilib. Bu sahədə əhali arasında maarifləndirmə işlərinin aparıldığı, mətbuatda məqalələrin dərc edildiyi bildirilib.

Sonda tədbir iştirakçılarına məlumatlandırıcı broşürlər paylanılıb. Tədbirin sonunda “dəyirmi masa” iştirakçılarının təklifləri dinlənilib və onları maraqlandıran suallar cavablandırılıb.

AZƏRTAC

Müdafiə Nazirliyinin Beyləqandakı hərbi birləşməsinin keçmiş komandiri, general-mayor Mahmud Həmzəyev Ermənistan prezidenti Serj Sarkisyanın “İsgəndər” operativ-taktiki raketlərindən istifadə edilməsinə əmr verəcəyi barədə bəyanatına cavab verib.
 M.Həmzəyev  açıqlamasında bildirib ki, Serj Sarkisyan yenə cəfəng fikirlər söyləyir:
“Sarkisyan guya öz aləmində Azərbaycana xof gəlir. Heç özü belə bu fikirlərinə inanmır. Ermənistan rəhbərliyi bu vaxta qədər Rusiyaya arxalanıb, xoflanırdı, Azərbaycanı hədələyirdi. Son vaxtlar Rusiya ilə Türkiyə arasında münasibətlər yaxşılaşdığı üçün Ermənistan künc-bucaqda qalıb. İndi Sarkisyan daha kimə arxalanır? Rusiya Ermənistana “İsgəndər” silahına yaxın durmağa belə icazə verməz. Serj Sarkisyandır da, nə danışdığını heç özü də bilmir. Yəqin ki, aprel döyüşlərinin ildönümü yaxınlaşdığı üçün Sarkisyan qorxuya düşüb. Ona görə də belə danışır”.
General Azərbaycan Silahlı Qüvvələrinin “İsgəndər” raketlərindən də güclü silahlara malik olduğunu söyləyib:
“Azərbaycanda elə silahlar var ki, “İsgəndər” raketləri onun yanında oyuncaq kimi görünür. Allah etməsin ki, Azərbaycan həmin silahlardan istifadə etsin. Yoxsa Ermənistan yer üzündən silinər”.
Moderator.az

2017-ci il martın 25-də Belçikanın Ham şəhərində Qarabağ Atı abidəsinin açılışı keçirilib.

Səfirlikdən verilən məlumata görə, Azərbaycan Respublikası Atçılıq Federasiyasının dəstəyi ilə ərsəyə gətirilmiş abidə Azərbaycan-Belçika Dostluq Cəmiyyəti tərəfindən Ham bələdiyyəsinə həddiyyə edilmiş və şəhərin mərkəzi meydanında ucaldılıb.

Açılış tədbirində çıxış edən Ham şəhərinin meri Dirk De Vis ötən əsrin əvvəllərində müsəlman Şərqində ilk demokratik respublika qurmuş Azərbaycanın bu gün Belçika ilə sıx əməkdaşlıq əlaqələrinə malik olduğunu qeyd edib, öz müstəsna keyfiyyətlərinə görə bütün dünyada məşhur olan Qarabağ Atı ilə bağlı bu abidənin Ham şəhərində qoyulmasının iki xalq arasındakı dostluğun rəmzi olduğunu bildirib.

Belçika-Azərbaycan Dostluq Cəmiyyətinin sədri Ayxan Dəmirçi öz çıxışında Ham şəhəri bələdiyyəsinin beynəlxalq əməkdaşlığa açıqlığını yüksək qiymətləndirib, Belçikanın Azərbaycanlı icmasının hər zaman iki ölkəni və xalqı daha da yaxınlaşdırmaq üçün səylər göstərdiyini xatırladıb, sözügedən abidənin ucaldılmasının bu yönümdə xüsusilə əlamətdar hadisə olduğunu diqqətə çatdırıb.

Azərbaycan Respublikasının Belçika Krallığındakı Səfiri Fuad İsgəndərov isə öz çıxışında, Azərbaycanın Ham şəhəri ilə qurduğu uğurlu əməkdaşlığın mədəniyyət və dinlərarası dialoqun ən gözəl nümunəsi olduğunu qeyd edib, bunun, təlatümlərlə zəngin bu günki dünyada izlənilməsi vacib olan müsbət təcrübə kimi çıxış edə biləcəyini söyləyib.

Açılış tədbiri çərçivəsində habelə Azərbaycanla bağlı film nümayiş etdirilib, eləcə də Ham şəhəri sakinləri üçün Novruz şənliyi təşkil edilib.

Tədbir Belçika KİV-ləri tərəfindən işıqlandırılıb.

Aziya.info

Azərbaycanda Formula 1 yarışının təşkilatçısı Bakı Şəhər Halqası Əməliyyat Şirkəti (BŞH) bu il 23-25 iyun tarixlərində Bakıda baş tutacaq Azərbaycan Qran Prisi üçün yerli medianın qeydiyyatı prosesini davam etdirir. SİA-nın verdiyi məlumata görə, əməliyyat şirkətinin vasitəçiliyi ilə aparılan bu proses aprelin 5-i, saat 17:00-da başa çatacaq.

BŞH-nin Marketinq və Kommunikasiya şöbəsinin rəhbəri Nigar Arpadarai yerli media nümayəndələrini tezliklə qeydiyyatdan keçməyə çağırır: “Ötən il böyük uğurla Bakıda reallaşdırdığımız ilk Formula 1 Qran Prisi zamanı yarışı izləyən jurnalistləri Beynəlxalq Avtomobil Federasiyasının müvafiq standartlarına uyğun iş şəraiti ilə təmin etmişdik. Həm xarici, həm də yerli jurnalistlər onlar üçün yaradılmış şəraitdən olduqca məmnun qalmışdılar.

Bu il Azərbaycan Qran Prisində daha yaxşı şəraiti təmin etmək üçün gərəkli hazırlıqlara indidən başlamışıq və çalışırıq ki, maksimum sayda yerli media nümayəndəsi qeydiyyatdan keçsin və Bakıda baş tutacaq növbəti Formula 1 yarışını yerində canlı izləyərək bu yarışı yüksək səviyyədə işıqlandıra bilsin.

Əməliyyat şirkəti olaraq bütün yerli jurnalistlərə bir daha müraciət edirik ki, sayılı günlərin qaldığını nəzərə alaraq qeydiyyatdan keçməyə tələssinlər və onlar üçün təqdim olunan bu əvəzolunmaz fürsəti əldən verməsinlər”.

Qeyd edək ki, akkreditasiyadan uğurla keçən jurnalistlər pilotlarla yanaşı komandaların texniki heyətləri ilə görüşmək və onlardan müsahibə almaq imkanına sahib olacaqlar. Eyni zamanda jurnalistlər yarış həftəsonu ərzində keçirilən bütün mətbuat konfranslarında da iştirak edərək öz suallarını əlaqədar şəxslərə birbaşa ünvanlaya biləcəklər. Bundan əlavə, akkreditasiya sahiblərini dünya ulduzlarının iştirakı ilə baş tutacaq əyləncəvi konsert proqramları da gözləyir.

Akkreditasiyadan keçmək istəyən media nümayəndələri https://www.bakucitycircuit.com/az/media/media-accreditation keçidinə daxil olaraq müvafiq formanı doldurmalıdırlar. Natamam və ya vaxtından gec göndərilmiş müraciət formaları nəzərə alınmayacaq.

Akkreditasiya prosesi ilə əlaqədar daha ətraflı məlumat almaq istəyənlər öz suallarını accreditation@bakugp.az e-mail adresinə göndərə və ya 012 404 1383 nömrəsinə zəng edərək bizə bildirə bilərlər.

Qeydiyyatdan keçmək istəyən televiziya və radio nümayəndələrinin nəzərinə!

Bakı Şəhər Halqası Əməliyyat Şirkəti 2017-ci ilin yayında keçiriləcək Formula 1 Azərbaycan Qran Prisi üçün qeydiyyatdan keçmək istəyən televiziya və radio qurumlarının nümayəndələrini martın 31-i, saat 11:00-da şirkətin mərkəzi ofisində baş tutacaq görüşə dəvət edir. Görüş zamanı jurnalistlərə qeydiyyat prosesindən keçməyə köməklik göstəriləcək və növbəti mərhələdə hansı əməliyyatların yerinə yetirilməsinə dair onlara ətraflı məlumat veriləcək.

Dənizkənarı Milli Park, Dövlət Bayrağı Meydanı, həmçinin “İçərişəhər” Dövlət Tarix-Memarlıq Qoruğu ərazisində istifadəyə verilən “Ictimai WiFi”-a qoşulmaq üçün istifadəçilər qeydiyyatdan keçməlidirlər.

Qeydiyyatdan keçmək üçün istifadəçilər mobil telefon, “notebook”, planşet və s. portativ cihazlarda şəbəkə siyahısında “Baktelekom”-u seçməlidirlər.

İstifadəçi açılan “Phone number” xanasına öz mobil telefon nömrəsini yazır və “Get password” düyməsini aktiv edir. Daha sonra sistem tərəfindən istifadəçinin mobil nömrəsinə SMS-lə şifrə göndərilir. Bu şifrə 3 saat ərzində aktivdir. İstifadəçi şifrəni “Password” xanasına daxil edərək ”Log In” düyməsini aktivləşdirir. Bununla da cihaz “İctimai Wi-Fi”a qoşulur.

SMS-lə göndərilən şifrə ilə yalnız 1(bir) cihazın pulsuz internetə qoşulması təmin olunur.

İstifadəçi 1 saat pulsuz internetdən yararlanır. Bu müddət kifayət etmədikdə istifadəçi gün ərzində daha iki dəfə pulsuz xidmətdən faydalana bilər.

Trend

Martın 28-də Azərbaycan Dövlət Neft və Sənaye Universitetinin (ADNSU) rektoru, professor Mustafa Babanlı Bakı Mühəndislik Universitetinin “Sənayenin təşkili və idarə olunması” kafedrasının müdiri Pərviz Həsənov və “Delta Group LLC”-nin planlama müdiri Seymur İlyasovla görüşüb.Universitetdən verilən xəbərə görə, görüşdə aprelin 9-da ADNSU və Bakı Mühəndislik Universitetinin təşkilatçılığı ilə keçiriləcək I Milli Sənaye Mühəndisliyi Forumuna hazırlıq məsələləri müzakirə olunub.

Forumun yüksək səviyyədə təşkil olunmasının vacibliyini vurğulayan rektor Mustafa Babanlı bu cür tədbirlərin gələcəkdə yüksəkixtisaslı mütəxəssislərin yetişdirilməsi üçün əhəmiyyətli olduğunu qeyd edib. ADNSU-da son vaxtlar həyata keçirilən islahatlar haqqında danışan rektor prof. M.Babanlı qonaqlara universitetin startap mərkəzinin gördüyü işlər haqqında məlumat verib.

Görüşdə Foruma hazırlıq işlərinin hazırki vəziyyəti, reqlament, iştirakçılar, müzakirə olunacaq mövzular və başqa məsələlər müzakirə olunub.

Qeyd edək ki, 9 aprel 2017-ci il tarixində “Qafqaz Hotel”də ADNSU və Bakı Mühəndislik Universitetinin təşkilatçılığı ilə I Milli Sənaye Mühəndisliyi Forumu keçiriləcək. Forumun keçirilməsində əsas məqsəd sənayenin müxtəlif sahələrində fəaliyyət göstərən peşəkarların bir araya toplanması, sənayenin müxtəlif perspektivləri üzrə fikir mübadiləsi aparmaq, yerli və beynəlxalq təcrübələrdən faydalanmaqdır. Forumda əsas qonaq qismində SOCAR-ın Strateji İnkişaf üzrə vitse-prezidenti Tofiq Qəhrəmanov, ADNSU-nun rektoru, professor Mustafa Babanlı və “Azərikimya” İB-nin Müşahidə Şurasının sədri Muxtar Babayev iştirak edəcək.

SİA

Ümummilli Lider Heydər Əliyevin 1997-ci il martın 23-də imzaladığı sərəncamla hər il martın 28-i Azərbaycanın təhlükəsizlik orqanları əməkdaşlarının peşə bayramı günü kimi qeyd edilir.

Dövlət Təhlükəsizliyi Xidmətinin (DTX) İctimaiyyətlə əlaqələr şöbəsindən verilən məlumata görə, bu münasibətlə Dövlət Xidmətinin şəxsi heyəti və təhlükəsizlik orqanlarının veteranları Fəxri xiyabana gələrək Ulu Öndər Heydər Əliyevin əziz xatirəsini yad edib, məzarı önünə əklil qoyublar. Görkəmli oftalmoloq alim, akademik Zərifə xanım Əliyevanın da xatirəsi ehtiramla anılıb, məzarı üzərinə gül dəstəsi düzülüb.

Sonra Şəhidlər xiyabanında ölkəmizin müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsi yad edilb, “Əbədi məşəl” abidəsinin önünə əklil qoyulub.

Təntənəli mərasim DTX-nin akt zalında davam etdirilib.

Dövlət Təhlükəsizliyi Xidmətinin rəisi, Azərbaycanın Milli Qəhrəmanı general-leytenant Mədət Quliyev çıxış edərək bütün şəxsi heyəti və təhlükəsizlik orqanlarının veteranlarını peşə bayramı münasibətilə təbrik edib. O, Ümummilli Lider Heydər Əliyevin hələ sovetlər dövründə Azərbaycanın gələcək müstəqilliyini düşünərək respublika həyatının bütün sahələrində misilsiz işlər gördüyünü qeyd edib, bugünkü güclü Azərbaycanın təməlinin məhz Ulu Öndərin dövlət təhlükəsizlik orqanlarına və davamlı olaraq ölkəmizə rəhbərlik etdiyi vaxtlardan qoyulduğunu bildirib. Vurğulanıb ki, dahi şəxsiyyət Heydər Əliyev, müstəqil Azərbaycanın hüquq mühafizə, o cümlədən təhlükəsizlik orqanlarının fəaliyyətinin də müasir dövrün tələblərinə uyğun formalaşmasında və inkişafında böyük işlər görüb.

Hazırda Azərbaycanın təhlükəsizlik orqanlarının öz inkişafında yeni mərhələyə qədəm qoyduğunu deyən general-leytenant M.Quliyev Ulu Öndərin layiqli davamçısı Zati-aliləri cənab İlham Əliyevin müdrik rəhbərliyi ilə dövlətimizin müstəqillik, sabitlik və tərəqqi siyasətinin həyata keçirilməsi üçün əlverişli şəraitin yaradılmasının DTX-nin əsas vəzifəsi olduğunu qeyd edib. Bu baxımdan, günün tələbləri nəzərə alınaraq, xidmətdə aparılan geniş islahatlar fəaliyyətin daha səmərəli, məqsədyönlü və çevik təşkilinə təkan verib. DTX-nin qarşısında böyük vəzifələrin qoyulduğunu, görüləsi işlərin hələ çox olduğunu vurğulayan general-leytenant M.Quliyev ölkənin sabitliyinin və təhlükəsizliyinin etibarlı təmin edilməsi, cinayətkarlıqla mübarizə üzrə aidiyyəti dövlət və hüquq mühafizə orqanları ilə mövcud olan sıx və işgüzar əməkdaşlıq əlaqələrinin bu vəzifələrin də öhdəsindən uğurla gəlməyə imkan verəcəyini bildirib.

General-leytenant M.Quliyev göstərdiyi diqqət və qayğıya görə dövlət başçısına bütün əməkdaşların adından minnətdarlığını çatdıraraq deyib: “Peşə bayramı ərəfəsində möhtərəm Prezident cənab İlham Əliyevin sərəncamları ilə ali hərbi rütbələrin verilməsi və bir qrup əməkdaşın dövlət mükafatları ilə təltif edilməsi fəaliyyətimizə verilən yüksək qiymətdir. Göstərilən böyük etimada və qayğıya görə dövlət başçısına dərin minnətdarlığımı bildirirəm. Əsası Ümummilli Lider Heydər Əliyev tərəfindən qoyulmuş dövlətçilik ənənələrinə sadiq olan Dövlət Təhlükəsizliyi Xidmətinin şəxsi heyəti möhtərəm Prezident cənab İlham Əliyevin Azərbaycanın dinamik inkişaf edən və qüdrətlənən dövlətə çevrilməsi yolundakı əzmkar fəaliyyətində daim ən yaxın silahdaşı olacaq, Ali Baş Komandanın bütün əmr və göstərişləri bundan sonra da dərhal və vicdanla yerinə yetiriləcək”.

Azərbaycan Xüsusi Xidmət Orqanlarının Veteranları İctimai Birliyinin sədri Şamil Suleymanov çıxış edərək bildirib ki, möhtərəm Prezident cənab İlham Əliyevin müdrik, inamlı və son dərəcə cəsarətli daxili və xarici siyasəti nəticəsində ölkəmizdə ictimai-siyasi sabitlik dönməz xarakter alıb. Azərbaycan bütün sahələrdə dinamik sürətdə inkişaf edir, Vətənimizin siyasi-iqtisadi nüfuzu və mövqeyi dünyada ildən-ilə möhkəmlənir. DTX xalqın maraqlarının və təhlükəsizliyinin etibarlı qorunması istiqamətində həyata keçirdiyi fəaliyyəti ilə öz yeni tarixinin şanlı səhifələrini yazır. Veteranlara göstərilən diqqət və qayğıya görə dövlət başçısına minnətdarlıq edən Şamil Suleymanov, Azərbaycanın təhlükəsizliyinin qorunmasının gözəgörünməz cəbhədə çalışan hər bir əməkdaşın müqəddəs vəzifəsi olduğunu vurğulanıb.

Təntənəli mərasimdə Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyevə tədbir iştirakçıları adından müraciət qəbul olunub.

Sonra Azərbaycan Respublikası Prezidentinin DTX-nin əməkdaşlarına ali hərbi rütbələrin verilməsi və bir qrup əməkdaşın təltif edilməsi haqqında sərəncamları elan edilib.

Xidmətdə fərqlənən əməkdaşların, eləcə də təhlükəsizlik orqanlarının veteranlarının mükafatlandırılması barədə DTX-nin əmrləri oxunub, təltif olunanlara, həmçinin peşə bayramı münasibətilə xidmətin struktur bölmələri arasında idmanın müxtəlif növləri üzrə keçirilmiş yarışların və turnirlərin qaliblərinə mükafatlar verilib.

Bayram tədbiri DTX-nin Mədəniyyət Mərkəzində bədii proqramla davam etdirilib.

Trend

AMEA Arxeologiya və Etnoqrafiya İnstitutunun Daş dövrü arxeologiyası şöbəsinin müdiri, tarix elmləri doktoru Əsədulla Cəfərovun “Qarabağın paleolit düşərgələri” kitabı çap olunub.

Nəşrin elmi redaktoru tarix elmləri doktoru, professor Abbas Seyidov, rəyçiləri AMEA-nın müxbir üzvü Vəli Əliyev və tarix üzrə fəlsəfə doktoru Ceyhun İsmayılovdur.

“Qarabağın paleolit düşərgələri” adlı əsər Azərbaycanın qədim sivilizasiya mərkəzlərindən biri olan Qarabağın dünya şöhrətli Azıx və Tağlar qədim insan düşərgələrində aparılmış kompleks elmi tədqiqatlar zamanı tapılmış maddi mədəniyyət qalıqlarının elmi şərhinə həsr olunub.

Kitabda çoxtəbəqəli Azıx, Tağlar və Şuşa paleolit düşərgələrində aparılan arxeoloji qazıntılar zamanı tapılmış arxeoloji, paleantoloji və paleoantropoloji qalıqlar arxeologiya elminin son nailiyyətləri əsasında tədqiq edilib. Azərbaycan Respublikasının Qarabağ ərazisində müəyyən olunmuş quruçay, qədim aşel, orta aşel, son aşel, mustye və üst paleolit mədəniyyətlərinin xarakterik xüsusiyyətləri, ulu sakinlərin istifadə etdikləri əmək alətləri, odu kəşf etmələri, ovçuluq, yığıcılıq məşğuliyyəti, o dövrdə ibtidai tikililərin yaranması, neandertal tipli insanların inkişaf edərək homo sapiens (kamil insan) tipli insanlara çevrilməsi Qarabağın ən qədim tarixi maddi mədəniyyət qalıqları əsasında şərh olunub.

Beynəlxalq İNTAS-200 proqramı əsasında Avropa alimləri ilə birgə aparılmış elmi tədqiqatlar zamanı əldə olunmuş nailiyyətlər kitabda ilk dəfə olaraq çap edilib.

Əsərdə Azıx qədim insan düşərgəsinin tarixini saxtalaşdırmağa çalışan bəzi erməni “tədqiqatçıların” fikirlərinin elmi əsassız olması faktlarla təkzib olunub.

Yeni nəşr arxeoloq, etnoqraf, tarixçi, paleogeoloq, paleoantoloq, paleoantropoloq və tələbələr, həmçinin geniş oxucu kütləsi üçün nəzərdə tutulub.

ATƏT Parlament Assembleyasının vitse-prezidenti Azay Quliyev 28 mart 2017-ci ildə Sankt-Peterburqda ATƏT PA və Müstəqil Dövlətlər Birliyi üzv ölkələrin Parlamentlərarası Assambleyasının birgə təşkil etdiyi “Beynəlxalq Terrorizmlə Mübarizə üzrə Parlament Konfransı”nda çıxış edib.
“Beynəlxalq (Humanitar) Hüquq və Terrorizm: Çağırışlar və onlara cavablar” mövzusunda məruzə edən ATƏT PA-nın vitse-prezidenti Azay Quliyev indiyədək terrorizmi pisləyən çoxsaylı bəyanat və qətnamələrin qəbul edilməsinə baxmayaraq, həmin sənədlərdə terror fəaliyyətinin effektiv şəkildə aradan qaldırılmasına (hərbi, siyasi, hüquqi və s.) yönələn mexanizmlərin olmadığını bildirib: “Bu gün hər bir dövlət öz vətəndaşlarını terror təhlükəsindən qorumağı bacarmalıdır. Bu dövlətlərin təkcə hüququ deyil, eyni zamanda vəzifəsidir. Dünya birliyi, ayrı-ayrı ölkələr beynəlxalq terrorla mübarizədə öz səy və potensialını birləşdirməli və “ümumidüşmənlə” effektiv şəkildə mübarizə aparmalıdır. Lakin dövlətlər elə etməlidir ki, terrorizmlə mübarizə tədbirləri zamanı insan hüquqları və humanitar standartlar pozulmasın, başqa sözlə, demokratik dəyərlər və insan hüquqları terrorla mübarizəyə qurban edilməsin. Əksinə, terrora qarşı mübarizədə yeganə uzunmüddətli və səmərəli vasitə BMT Nizamnaməsi, insan hüquqları haqqında beynəlxalq razılaşmalar və Cenevrə Konvensiyaları kimi ən mühüm beynəlxalq sənədlərdə göstərilən insan hüquqları, demokratiya və sosial ədalətə real həyatda əməl etməklə ciddi nailiyyətlər əldə etmək olar”.
Azay Quliyev son illərdə bəzi ATƏT ölkələrində qaçqın və sığınacaq axtaranlara qarşı kriminal hərəkətlərin artmasının narahatlıq doğurduğunu deyib: “Qaçqın və sığınacaq axtaran kütlənin içərisində ağır cinayət əməlləri törətmiş şəxslərin də olması qeyd olunan kateqoriyaya mənsub bütün insanlara pis münasibət göstərilməsinə və onların lənətlənməsinə əsas vermir. Sığınacaq axtaranların həmin ölkələrə qeyri-qanuni gəlmələri onların tələblərinin rədd edilməsinə səbəb ola bilməz. Eyni zamanda onların ağır cinayətlər törətmiş etnik və ya dini qruplara aid olması həmin insanların təcrid olunmasına əsas yaratmır. Əgər biz terror aktlarına qarşı mübarizə apararkən insan hüquqlarını qoruya bilməsək, nəticədə terroristlər və bütövlükdə terror bütün bəşəriyyətə qalib gələcək. Məhz terrorçuların əsas məqsədi dünya düzənini pozmaq, ölkələrdə çaxnaşma və xaos yaratmaq, ən əsası isə hamılıqla qəbul edilən demokratik dəyər və prinsipləri məhv etməkdən ibarətdir”.
ATƏT PA-nın vitse-prezidenti Azay Quliyev çıxışında diqqəti qaçqın və sığınacaq axtaranlara birbaşa təsir göstərə biləcək 5 əsas problemə yönəldib: “Birinci, terrorla əlaqəsi olan və ya bu cür əlaqədə əsaslı şəkildə şübhəli bilinən şəxslərlə həqiqi qaçqın vəziyyətinə düşən şəxslər arasında fərq dəqiq müəyyənləşməli və  qaçqın statusunu almaq üçün tələb olunan prosedurlara əməl edilməsi minimum satandartlara cavab verməlidir. Əmin olmaq lazımdır ki, qaçqınların müəyyən edilməsi ilə bağlı qərarlar bu sahədə bilikli və yüksək ixtisaslı şəxslər tərəfindən qəbul olunur.Qaçqın statusu almaq istəyən vicdanlı insanların hüquqları pozulmamaldır. Hamı qəbul etməlidir ki, bu insanlar məhz terrorun qurbanına çevrilərək qaçqın vəziyyətinə düşüb və yaranmış münaqişə vəziyyətindən canını qurtarmaq üçün başqa ölkələrə pənah gətirmək məcburiyyətində qalıblar”.
İkinci məsələ sığınacaq axtaranlarla rəftarla bağlıdır. Bir çox hallarda sığınacaq axtaranlara münasibət müsbət olmur. Onlar dini və milli zəmində diskriminasiyaya məruz qalır və ciddi təzyiqlərlə üzləşirlər. Hesab edirəm ki, sığınacaq axtaranların həbsi istisna hal olmalı, adi bir qaydaya çevrilməməlidir. Bu həbslər yalnız o zaman qəbul edilə bilər ki, onların terrorla əlaqəsinin olmasına əsaslı şübhələr olsun və ya həbslə bağlı şərtlər ədalətli olsun. Bununla belə, daxili qanunvericiliyə əsasən bu həbslər məhkəmə təftişinə tabe olmaqla yanaşı, həm də qeyd edilən prosesə uyğun olmalıdır.
Digər bir mühüm məsələyə – qaçqınların və sığınacaq axtaranların təcrid edilmə məsələsinə toxunan Azay  Quliyev qeyd edib: “Unutmaq olmaz ki, həqiqi qaçqınlar və sığınacaq axtaranlar terrorun qurbanı olaraq ölkələr tərəfindən tam şəkildə müdafiə olunmalıdır. Ağır cinayətlərə görə məsuliyyət daşıyan şəxslərdən başqa heç kim üz tutduğu ölkədə təcridə məruz qalmamalıdır. Onlar beynəlxalq humanitar qanunların tələblərinə uyğun olaraq müdafiə olunmalı və əsasssız olaraq qaçqın statusundan məhrum edilməməlidirlər. Mən  dövlətləri beynəlxalq hüququn tələbinə əməl etməyə çağırıram” .
1951-ci il Konvensiyası göstərilən proseslə bağlı qanuna əsaslanaraq verilmiş qərara uyğun olaraq qaçqınların ölkədən çıxarılmasına – deportasiyasına milli təhlükəsizlik və ya ictimai asayişə təhlükə ola biləcəyi hallarda icazə verir. Bu halda qaçqına ona qarşı irəli sürülən ittihamlara cavab vermək üçün sübutların təqdim edilməsinə şərait yaradılmalıdır”.
Azay Quliyev çıxışında BMT Təhlükəsizlik Şurasının terrorçu və sığınacaq axtaranlar/qaçqınlar arasında əlaqələrin olduğunu irəli sürən 1373 nömrəli qətnaməsini tənqiq edərək bildirib ki, bu qətnamənin olduğu kimi tətbiqi bir sıra anlaşılmazlıqlara, sui-istifadələrə qanun pozuntularına səbəb olur. “Qətnamədəki müddəaların bəziləri möbcud vəziyyətə tam olaraq adekvat deyil və onların yerinə yetirilməsi qeyri müəyyənliyə, ədalətsiz qərarların qəbuluna, bir sıra hallarda isə  pozuntularla səbəb olur. Ona görə də sözügedən qətnamə beynəlxalq qaçqın hüququnun tələblərini nəzərə alaraq tətbiq edilməlidir. Terrorçuların sığınacaq axtaranlarla bağlı sistemdən sui-istifadə etməsinin qarşının alınması üçün dövlətlərin qəbul etdiyi qanuni tədbirlər günahsız qaçqın və sığınacaq axtaranların təqibi ilə nəticələnməməlidir”.
Sonda ATƏT PA-nın vitse-prezidenti Azay Quliyev aparılan müzakirələrin, səsləndirilən tövsiyələrin qlobal terrorizmlə mübarizə konteksində insan hüquqlarının müdafiə edilməsi işinə töhfə verəcəyinə ümid etdiyini bildirib.

Praqada Bakı Dövlət və Karl universitetlərinin biologiya fakültələrinin əməkdaşlığının 45 illiyinə həsr edilmiş Azərbaycan haqqında fotosərgi açılıb.

Praqanın məşhur Karl Universitetinin biologiya fakültəsinə məxsus Botanika bağında açılan fotosərgi hər iki universitetin biologiya fakültəsinin təşkilatçılığı və Azərbaycanın Çexiyadakı səfirliyinin töhfəsi əsasında təşkil edilib. Sərgi bir həftə davam edib.

Azərbaycanın Çexiyadakı səfiri Fərid Şəfiyev sərginin keçirildiyi Botanika bağına gələrək Azərbaycan təbiətinin gözəlliklərini əks etdirən fotoşəkillərlə tanış olub. Sərginin təşkilatçıları ilə görüşən diplomat səfirliyinin tədbirin keçirilməsinə verdiyi töhfədən və universitetlərimiz arasında çox yaxın əməkdaşlıq əlaqələrinin qurulmasından məmnunluğunu ifadə edib.

Azərbaycanın flora və faunası, milli təbiət qoruqları, ölkəmizin təbiətinin əsrarəngiz zənginliklərini ehtiva edən fotoların nümayiş olunduğu sərgi qonaqların marağına səbəb olub.

AZƏRTAC

Aprel ayından Yeni Azərbaycan Partiyasının rayon və şəhər təşkilatlarının konfranslarının keçirilməsinə başlanılacaq.

Bunu Yeni Azərbaycan Partiyasının İcra katibinin müavini, Milli Məclisin deputatı Siyavuş Novruzov deyib.

S.Novruzov bildirib ki, konfransların keçirilməsi ilə bağlı hazırlıq işləri yekunlaşıb, ilk təşkilatların hamısında hesabat-seçki yığıncaqları keçirilib, konfranslara nümayəndələr seçilib.

Yerli təşkilatlara yeni sədrlərin seçilməsi məsələsinə gəlincə isə S.Novruzov bildirib ki, bu, partiyanın nizamnaməsinə uyğun olaraq konfrans nümayəndələrinin səlahiyyətinə aid olan bir məsələdir: “Ötən konfranslardan indiyə qədər partiyanın sıralarına yeni insanlar daxil olub, hər bir rayon və şəhər təşkilatının sıraları genişlənib, xüsusilə gənclərin və qadınların sayı artıb. Ona görə də əgər təşkilat sədri bugünki ictimai-siyasi vəziyyətə cavab vermirsə, təşkilat üzvlərini qane etmirsə, təbii ki, burada qərar konfrans nümayəndələrinindir və onlar da öz qərarlarını verəcəklər”.

S.Novruzov bildirib ki, bu il ərzində konfransların yekunlaşdırılması nəzərdə tutulur: “Növbəti il seçki ilidir. Artq növbəti ildən biz bütün fəaliyyətimizi seçkilər istiqamətində təşkil edəcəyik. Əslində elə konfransların keçirilməsi, partiya sıralarına nəzər yetirilməsi, ilk təşkilatlarla rayon və şəhər təşkilatları arasında əlaqələrin gücləndirilməsi və digər işlər də partiya məsələlərinin tam həll olunması və partiyamızın seçki prosesinə tam hazır olması üçün həyata keçirilir”.

Trend

XƏBƏR LENTİ