Texnologiya, Mədəniyyət və Beynəlxalq sabitlik üzrə 18-ci IFAC Beynəlxalq Konfrans

Elm, texnologiya, təhsil, mədəniyyət, siyasət, idman və s. mövzularda keçirilən qlobal miqyaslı tədbirlərə ev sahibliyi edən Bakı şəhərində ilk dəfə olaraq avtomatika sahəsində dünyanın ən nüfuzlu təşkilatı olan Avtomatik Nəzarət üzrə Beynəlxalq Federasiyanın – IFAC-in (IFAC – International Federation of Automatic Control) dəstəyilə beynəlxalq konfrans keçiriləcək. 13-15 sentyabr 2018-ci il tarixlərində baş tutacaq tədbir Texnologiya, Mədəniyyət və Beynəlxalq sabitlik üzrə 18-ci IFAC beynəlxalq konfransı – TECIS (Technology, Culture and International Stability – Texnologiya, Mədəniyyət və Beynəlxalq sabitlik) adlanır.
IFAC 12 sentyabr 1957-ci il tarixində Parisdə təsis edilmişdir. 1978-ci ildən IFAC təşkilatının katibliyi fəaliyyətini Avstriya hökumətinin dəvəti və dəstəyilə bu ölkənin Laksenburg şəhərində davam etdirir. 49 ölkədən avtomatlaşdırılmış idarəetmə və mühəndislik üzrə təşkilatları özündə birləşdirən IFAC il ərzində onlarla beynəlxalq tədbirlər təşkil edir. Regionda ilk dəfə olaraq belə bir mötəbər tədbir Azərbaycanda, Bakı şəhərində keçiriləcək. IFAC-in strukturundakı ilk komitələrindən biri olan TECIS texniki komitəsi 1983-cü ildən fəaliyyətdədir. Həmin ildən etibarən dünyanın bir çox ölkələrində 17 beynəlxalq konfrans kecirmiş komitə Bakıdakı tədbirində eyni zamanda 35 illik yubileyini qeyd etməyə hazırlaşır.
TECIS 2018 Beynəlxalq konfransının təşkilində IFAC-in Azərbaycandan tərəfdaşı qismində “Azərbaycan Robotika və Avtomatlaşdırma Cəmiyyəti” (Azerbaijan Robotics and Automation Society – ARAS) İctimai Birliyi çıxış edir. Bakıda təsis edilmiş, qısa müddətdə ciddi təşkilatlanma prosesi keçmiş ARAS ölkəmizdən IFAC üzvlüyünə yeganə namizəd təşkilatdır.
Bakı konfransının keçirilməsində əsas məqsəd texnologiya, mədəniyyət və beynəlxalq sabitlik sahəsi üzrə yeni tədqiqat nəticələrini təqdim etmək və ideya-təcrübə mübadiləsi aparmaq üçün sənaye və akademiya sahəsində alimləri, mütəxəssisləri bir araya gətirməkdir. Konfransın mövzuları avtomatik idarəetmənin texnika, iqtisadiyyat, robotika, tibb, sosial həyat və siyasət ilə əlaqəsini özündə əks etdirir. Nümunə olaraq qeyd edək ki, “Sabitliyin yaxşılaşdırılmasında İdarəetmə və Avtomatlaşdırma”, “Sabitliyi yaxşılaşdırmaq üçün texnoloji dəyişikliyin təqdimatının idarə edilməsi”, “Kiçik və orta sahibkarlıq üzrə avtomatlaşdırma”, “Mexatronik sistemlər və robotlar”, “Bio-tibbi sistemlər” kimi mövzular müasir dövrümüzdə çox aktualdır.
Təşkilat komitəsi çoxsaylı tələbləri nəzərə alaraq konfransın gündəliyinə Bakıda yaranmış TRİZ (teoriya resheniya izobretatelskikh zadach) nəzəriyyəsini də daxil edib. TRİZ nəzəriyyəsi ilk dəfə 1946-cı ildə sovet alimi, ixtiraçısı və mühəndisi Genrich Altshuller tərəfindən irəli sürülmüşdür. Bu nəzəriyyə çətin və mürəkkəb məsələlərə sistematik yanaşmaqla onların innovativ həll edilməsi üçün strategiyaların müəyyən edilməsini özündə ehtiva edir. Dünyada ilk dəfə Genrich Altshuller tərəfindən Azərbaycanda, Bakı şəhərində “Inventive Creation Institute” yaradılmış və alim özü TRİZ assosiasiyasının ilk prezidenti olmuşdur.
Konfransa məqalələrin qəbulu üçün çağırış elan edildikdən sonra tədbirdə iştirak etmək üçün dünyanın müxtəlif ölkələrindən olan elm adamlarından müraciətlər daxil olmaqdadır. TECİS 18 beynəlxalq konfransı elmi ictimaiyyət tərəfindən böyük maraqla qarşılanıb.
Bakıda keçiriləcək konfransın təşkilatçılarından olan Vyana Texnologiya Universitetinin professoru Peter Kopachek robotika və avtomatik idarəetmə sahəsi üzrə mütəxəssisdir. IFAC-in üzvü olan P.Kopachek 6 kitabın, 300-dən çox elmi məqalənin, onlarla elmi nəşrin, tərcümənin müəllifi və konfransın təşkilatçısıdır. Bakı konfransının digər təşkilatçısı Bahadur İbrahimov Vyana Texnologiya Universitetində 2017-ci ildə robotika sahəsi üzrə fəsəfə doktoru elmi dərəcəsi alıb. B.İbrahimov 2014-cü ildən mühəndislik menecerləri klubunun assosiativ üzvü, Avstriyada Gənc Azərbaycanlı Peşəkarlar Assosiasiyasının yaradıcısı, “Azərbaycanın Panoraması” jurnalının təsisçisi və IFAC-in üzvüdür. O, hazırda Vyana Texnologiya Universitetində post-doktorantura araşdırmalarına və bir sıra startup quruculuğuna rəhbərlik edir.
IFAC-lə birgə dəstək verən digər qurumların da xahişi ilə konfrans zamanı İnnovasiya üzrə “Young authors award” mükafatının təsis edilməsi gündəmdədir. Bu barədə yekun qərar IFAC, TECİS və ARAS təşkilatlarının yığıncağında veriləcək.
Son illərdə texnika və texnologiyanın inkişafı beynəlxalq sabitlikdə mühüm dəyişikliklərə gətirib çıxarmışdır. Bu mötəbər beynəlxalq elm-texnologiya tədbirinin azərbaycanlı təşkilatçılarından olan ARAS (Azerbaijan Robotics and Automation Society – ARAS) inanır ki, belə tədbirləri Azərbaycana gətirib beynəlxalq təcrübələri bölüşmək, o cümlədən nüfuzlu dairələrin marağını Azərbaycana cəlb etmək ölkəmizin qeyri-neft sektorunun inkişafı üçün son dərəcə əhəmiyyətlidir. TECIS 2018 Beynəlxaq Konfransında dünyanın bir çox ölkələrindən alimlər, mütəxəssislər və tələbələr bir yerə toplaşacaq, müxtəlif mövzular üzrə məqalələrini təqdim edəcək, eyni zamanda sürətlə inkişaf edən ölkəmizlə və paytaxt Bakı şəhəri ilə yaxından tanış olacaqlar.
Qeyd edək ki, Konfransın təşkilatçıları – Avtomatik İdarəetmə üzrə Beynəlxalq Federasiya (IFAC), IFAC TC 9.5 Texnologiya, Mədəniyyət və Beynəlxalq Sabitlik Komitəsi, Azərbaycan Robotika və Avtomatlaşdırma Cəmiyyəti (ARAS) və Vyana Texnologiya Universitetidir (IHRT). Konfransın texniki dəstəkçiləri IFAC təşkilatının müvafiq texniki komitələridir (texniki komitələr barədə – daha ətraflı www.ifac-control.org saytından məlumat əldə etmək mümkündür). Səyahət ilə bağlı dəstək “PASHA Travel” şirkəti tərəfindən həyata keçirilir. Tədbirin sponsorları – Avtomatik İdarəetmə üzrə Beynəlxalq Federasiya (IFAC), IFAC TC 9.5 Texnologiya, Mədəniyyət və Beynəlxalq Sabitlik təşkilatı, Bakı Ali Neft Məktəbi, ADA Universiteti və Boulevard hoteldir. Bundan başqa konfransa yerli səviyyədə Azərbaycan Respublikasının Xarici İşlər və Təhsil nazirlikləri, xarici ölkələrdəki səfirliklərimiz, Azərbaycan Milli Elmlər Akademiyası (AMEA Riyaziyyat və Mexanika İnstitutunun, AMEA İdarəetmə Sistemləri İnstitutunun əməkdaşlarının konfransda araşdırma və məqalələrlə iştirak edəcəkləri təsdiqlənib), beynəlxalq səviyyədə isə Avstriya QHT-ləri və universitetləri (məs, Webster universiteti) dəstək verirlər. Bir sıra texnologiya şirkətləri isə konfransa ciddi maraq nümayiş etdirirlər.
Konfrans və məqalələrin təqdim edilməsi qaydaları barədə geniş məlumatı www.tecis18.org və www.tecis18.net saytlarından əldə etmək mümkündür.

LEAVE A REPLY

Please enter your comment!
Please enter your name here