CƏMİYYƏT 2020.11.03 12:30

Baş konsul ABŞ-ın nüfuzlu telekanallarında Ermənistanın işğalçılıq siyasətindən danışıb

35

ABŞ-da fəaliyyət göstərən radikal erməni lobbisinin təşkilatçılığı ilə 1 noyabr 2020-ci il tarixində Azərbaycanın Los Ancelesdəki Baş Konsulluğunun qarşısında nümayiş keçirilib.

Baş Konsulluqdan verilən məlumata görə, öncədən erməni lobbisi nümayişə on minlərlə insanın qatılacağını bəyan etsə də, Los Anceles Polis İdarəsinin rəsmi açıqlamasına əsasən nümayişə yalnız 400-500 nəfər qatılıb.

Baş Konsulluq nümayişdən öncə Los Ancelesdə fəaliyyət göstərən nüfuzlu televiziya kanalları, radio və qəzetlərə mətbuat açıqlaması göndərib. Açıqlamada Ermənistanın Azərbaycana qarşı son təcavüz aktı, ölkəmizin şəhərlərini və mülki əhalisini hədəf alması, kasetli bombalardan istifadə etməklə müharibə cinayətləri törətməsi bərədə məlumat verilərək, Ermənistanın bu təcavüzü nəticəsində çoxlu sayda dinc azərbaycanlının həlak olduğu və yaralandığı diqqətə çatdırılıb.

Bundan başqa, milyonlarla izləyicisi olan nüfulzlu “FOX” və “NBC” televiziya kanalları ermənilərin sözügedən nümayişi ilə bağlı hazırladıqları reportajda Azərbaycanın Los Ancelesdəki baş konsulu Nəsimi Ağayev ilə müsahibəyə də yer veriblər. Müsahibələrdə baş konsul Ermənistanın Bərdə şəhərinə kasetli bombalardan istifadə edərək raket zərbələri endirdiyini və nəticədə çoxlu sayda mülki əhalinin həlak olduğunu diqqətə çatdırır. N.Ağayev Ermənistanın kasetli bombalardan istifadə etməsi faktının “Amnesty International” təşkilatı tərəfindən də təsdiq edildiyini bildirir. Həmçinin, baş konsul 27 sentyabrdan bəri Ermənistan tərəfindən uşaqlar da daxil olmaqla 91 mülki vətəndaşın qətlə yetirildiyini bildirir.

Müsahibələrdən birini burada izləmək mümkündür: https://youtu.be/qMIynoaZnNM

Qeyd edək ki, Qarabağ həqiqətlərinin Amerika ictimaiyyətinə çatdırılması üçün Azərbaycanın Los Ancelesdəki Baş Konsulluğu tam şəkildə fəaliyyətini davam etdirir. Bu səpkidə sentyabrın 27-dən bəri baş konsul N.Ağayev ABŞ-ın bir sıra nüfuzlu televiziya kanallarına, o cümlədən “ABC”, “CBS”, “NBC”, “FOX”, “KTLA”, “TELEMUNDO”, “CURRENT TIME” kanallarına və “NPR/KCRW” radiosuna 20-dən çox müsahibə verərək, Ermənistanın işğalçılıq və təcavüzkarlıq siyasəti barədə məlumat vermişdir. Bundan başqa, bu müddət ərzində Ermənistanın ölkəmizə qarşı son hərbi təcavüzü, Gəncə və Bərdə hücumları, kasetli bombalardan istifadə etməsi, işğal olunmuş torpaqlarımızdakı mədəni irsimizə qarşı təcavüzkarlığı ilə bağlı Baş Konsulluq tərəfindən ingilis dilində 6 qısa film hazırlanıb. Filmlər sosial şəbəkələrdə geniş yayılaraq ümumilikdə 3 milyona yaxın baxış toplayıb.

 

Şərhlər

Çox oxunanlar (günlük)

Çox oxunanlar (həftəlik)

Yuxarı