CƏMİYYƏT 2020.05.01 19:44

Prezident kifayət qədər uğurlu kadr seçimi edib

45

Bu həftə gündəmə damğasını vuran ən önəmli hadisə sözsüz ki, yeni Baş prokurorun təyin edilməsi məsələsi oldu. Bildiyimiz kimi Prezident İlham Əliyev Baş prokuror vəzifəsinə Azərbaycan Respublikası Baş Prokurorunun müavini, Azərbaycan Respublikasının Baş Prokuroru yanında Korrupsiyaya qarşı Mübarizə Baş İdarəsinin rəisi, II dərəcəli dövlət ədliyyə müşaviri Kamran Əliyevin namizədliyini irəli sürmüşdü. Milli Məclisin bügünkü plenar iclasında “Azərbaycan Respublikasının Baş prokuroru vəzifəsinə təyin olunmasına razılıq verilməsi haqqında” məsələyə baxıldı və məsələ səsverməyə çıxarılaraq yekdilliklə qəbul edildi. Milli Məclisin razılıq verməsindən sonra Prezident İlham Əliyev Kamran Əliyevin respublikamızın Baş prokuroru təyin edilməsi haqqında sərəncam imzaladı.

Mən Milli Məclisin bugünkü iclasında iki məqamın üzərində xüsusilə dayanmaq istəyirəm. Birinci məqam Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri hörmətli Ədalət Vəliyevin Milli Məclisin plenar iclasının işində ilk dəfə iştirak etməsi ilə bağlıdır. Ədalət müəllim iclasda çıxış etdi və Baş prokuror postuna namizədi parlamentarilərə təqdim etdi. O qeyd etdi ki, Kamran Əliyevin fəaliyyəti dövlət tərəfindən, dövlət başçısı tərəfindən yüksək qiymətləndirilir. Baş prokurorluğa namizədin Siyasi partiyalar və qanunvericilik hakimiyyəti ilə əlaqələr şöbəsinin müdiri tərəfindən təqdim edilməsi yeni formatdır, yeni ənənədir. Mən bu formatı təqdir edirəm. Əminəm ki, bu şöbə dövlət başçısı ilə parlament arasında daha işgüzar və daha səmərəli əlaqələrin qurulmasında son dərəcə mühüm rol oynayacaq. Şöbənin Prezidentlə parlamentarilər arasında birbaşa kommunikativ körpü rolunu oynayacağı şəksizdir. Bu həm də ölkədə formalaşmaqda olan yeni siyasi konfiqurasiyanın işləkliyini, effektivliyini göstərir. Siyasi partiyalar və qanunvericilik hakimiyyəti ilə əlaqələr şöbəsi ölkə siyasətinə tamamilə yeni keyfiyyət qazandırır və dinamiklik gətirir. Mən bu ağır və şərəfli işdə Ədalət müəllimə uğurlar diləyirəm.

İclasda Baş Prokuror vəzifəsinə namizədliyi irəli sürülən Kamran Əliyevin inamlı, təmkinli tərzdə çıxış etməsi mənim diqqətimi cəlb edən ikinci əsas məqam oldu. Bu vəzifəyə təyin olunmağı ilə bağlı təqdimat göndərdiyi üçün Prezident İlham Əliyevə və eləcə də bu təqdimatı dəstəklədiyi üçün Milli Məclisə təşəkkür edən K.Əliyev eyni zamanda prokurorluq orqanları qarşısında duran ən ümdə vəzifələri öz çıxışında məntiqi ardıcıllıqla qeyd etdi. Mən fürsətdən istifadə edib həmin vəzifələri burda olduğu kimi qeyd etmək istəyirəm. Onlar aşağıdakılardır:

– Dövlətin təhlükəsizliyinə qəsd edilən cinayətlərə qarşı mübarizənin kəsərinin artırılması, dövlətçiliyin daxili və xarici təhlükələrdən müdafiə edilməsi;

– Cinayətkarlığın bütün növlərinə qarşı mübarizə və qanunçuluğun qorunmasında digər hüquq və mühafizə orqanları, o cümlədən Daxili İşlər Nazirliyi və Dövlət Təhlükəsizliyi Xidməti ilə birgə səylərin gücləndirilməsi;

– Vətəndaşların hüquq və azadlıqlarının etibarlı müdafiəsində prokurorluğun iştirakının genişləndirilməsi;

– Həm dövlət,həm də özəl sektorda korrupsiyanın bütün təzahür formalarını, eləcə də vəzifəli şəxslər tərəfindən törədilən cinayətlərə qarşı ciddi mübarizə tədbirlərinin həyata keçirilməsi;

– Hazırda ölkəmizdə reallaşdırılan sosial-iqtisadi inkişafa hədəflənən islahatlar konteksində vergi və gömrük siyasətinin optimallaşdırılması, əlverişli biznes mühitinin formalaşdırılması və sahibkarklığın hüquqi vasitələrlə dəstəklənməsi;

– Ölkə iqtisadiyyatının kölgə iqtisadiyyatına qarşı təsirli mübarizənin aparılması kimi mühüm strateji tədbirlərdə yaxından iştirak etmək;

– Məhkəmələrdə dövlət və onun müdafiə edilməsi işinin keyfiyyətcə yeni mərhələyə qaldırılması, balanslaşdırımış cəza siyasətinə riayət edilməklə cəzanın məqsədləriə nail olunmasında əsaslı dönüş əldə edilməsi;

– Beynəlxalq tərəfdaşlarla əməkdaşlığın gücləndirilməsi və qabaqcıl beynəlxalq təcrübəni cari fəaliyyətimizdə tətbiqi.

Kamran Əliyevin bu yanaşması onu göstərir ki, o, Prezident İlham Əliyevin siyasi iradəsi ilə başladılan və hazırda davam etdirilən islahatlar prosesinin yeni dövrdə Azərbaycan prokurorluğu qarşısında olduqca mühüm vəzifələr qoyduğunu tamamilə düzgün dərk edir və məsələlərə kifayət qədər peşəkar yanaşma ortaya qoyur. Deməli, dövlət quruculuğunun bu yeni mərhələsində prokurorluq orqanları öz işinin öhdəsindən uğurla gələ biləcək. Bu da olduqca vacib amildir. Çünki prokurorluq ölkənin digər hüquq-mühafizə qurumları arasında bir növ əlaqələndirici və tənzimləyici rolunu oynayan həlledici təsir gücünə malik instansiyalardan biridir. Odur ki, bir çox məsələlər sonda mütləq gəlib prokurorluğun fəaliyyətində birləşir, təmərküzləşir. İstənilən hüquqi prosesin gedişatı prokurorluğun mövqeyi ilə müəyyən olunur. Bu mənada məhkəmə-hüquq sistemində islahatların bundan sonra da dərinləşdirilməsi bu və ya digər şəkildə məhz prokurorluğun necə fəaliyyət göstərməsindən asılı olacaq. Bax, belə bir həlledici məqamda prokurorluq sisteminə Kamran Əliyev kimi geniş planda düşünməyi bacaran, islahatlar prosesinin vektorlarını düzgün müəyyən edə bilən peşəkar bir şəxsin rəhbərlik etməsi çox önəmlidir. Mən Kamran müəllimi bu yeni vəzifəyə təyin edilməsi münasibətilə ürəkdən təbrik edir və cənab Prezidentin də bu seçimini tam dəstəkləyirəm. Bəli, Prezident kifayət qədər uğurlu kadr seçimi edib. Bu doğru fikirdir ki, istənilən islahatların uğuru ilk növbədə uğurlu kadr siyasətindən asılıdır.

Əlisahib Hüseynov 

Demokratik Azərbaycan Dünyası Partiyasının (DADP) sədri

Şərhlər

Çox oxunanlar (günlük)

Çox oxunanlar (həftəlik)

Yuxarı