Ukraynalı sənətkarlar Bakıda çıxış edəcək

Sentyabrın 30-da Azərbaycan Dövlət Akademik Opera və Balet Teatrında Adolf Adanın “Jizel” baleti təqdim ediləcək. Bu bir daha göstərir ki, klassik opera və balet tamaşalarına adlı-sanlı vokal və balet ulduzlarını dəvət etməklə tamaşaçıları sevindirməyə çalışan sənət ocağı bu mövsümdə də öz faydalı ənənəsinə sadiqdir.

Teatrın mətbuat xidmətindən bildirilib ki, bu dəfə Bakı teatrının qonaqları ukraynalı sənətçilər – Tatyana Qolyakova və Sergey Dosenkodur. Y.Qolyakova tamaşada Jizel partiyasını ifa edəcək. Tatyana Ukrayna Milli Operasının prima-balerinası, Ukraynanın Xalq Artistidir, bir sıra beynəlxalq balet müsabiqələrinin laureatıdır.

Onun tərəf müqabili, qraf Albert partiyasını isə Odessa Opera və Balet Teatrının aparıcı solisti, Ukraynanın Əməkdar Artisti, beynəlxalq müsabiqələr laureatı Sergey Dosenko ifa edəcək.

Tamaşada həmçinin balet truppasının solistləri – Elmira Süleymanova, Əməkdar artistlər Alsu Qimadiyeva və Makar Ferştandt çıxış edəcək.

AZƏRTAC

LEAVE A REPLY

Please enter your comment!
Please enter your name here